இன்றைய செய்தி,நாளைய வரலாறு. நாளைய வரலாறை படிப்போம்.

வியாழன், 30 ஏப்ரல், 2015

மே -1. உழைப்பாளர் தினம்.

உலகில் உள்ள அனைத்து தொழிலாளர்களுக்கும் [கை நீட்டி அல்லது ஏ.டி.எம்.அட்டை மூலம் சம்பளப்பணம் பெறும்] உழைப்பாளர் தின வாழ்த்துக்கள்.
கருத்தாலும் -கரத்தாலும் உழைக்கும் அனிஅவ்ருக்கும் இனிய வாழ்த்துக்கள்.
‘அதிகாலை முதல் அந்திசாயும் வரை’ என்பதுதான் அப்போதெல்லாம் வேலைநாள். இதனால் ஏற்பட்ட மனக்குமுறல்களை அமெரிக்கத் தொழிலாளர்கள் பத்தொன்பதாம் நூற்றாண்டின் துவக்கத்திலேயே வெளிக்காட்டினர். 
பதினாறு, பதினேழு ஏன் பதினெட்டு மணிநேர வேலை என்பதெல்லாம் அப்போது சாதாரண விஷயங்கள், 1806-ம் ஆண்டு பிலடெல்பியா நகரத் தொழிலாளர்கள் வேலை நிறுத்தத்தில் ஈடுபட்டனர். அவர்களின் தலைவர்கள் மீது சதி வழக்கு போடப்பட்டது. இந்த வழக்கு விசாரணையின் போது தொழிலாளர்கள் பத்தொன்பது, இருபது மணி நேரங்கள் வேலை வாங்கப்பட்டார்கள் என்ற விஷயம் வெளியே வந்தது.
1820 மற்றும் 30-களில் வேலை நேரத்தைக் குறைக்க வேண்டும் என்று பற்பல வேலைநிறுத்தங்கள் நிகழ்ந்தன. பத்து மணி நேர வேலைநாள் என்ற கோரிக்கை பல தொழில் மையங்களில் முன் வைக்கப்பட்டது.
 பிலடெல்பியா நகர இயந்திரத் தொழிலாளர்களின் சங்கம்தான் உலகின் முதற் தொழிற்சங்கமாக கருதப்படுகிறது.

 இந்த தொழிற்சங்கம் உருவான இரு ஆண்டுகளுக்குப் பின்புதான் இங்கிலாந்தில் தொழிற்சங்கங்கள் உருவாகத் துவங்கின. பத்து மணி நேர வேலை நாள் என்ற கோரிக்கையை முதன் முதலாக வைத்த பெருமை இச்சங்கத்துக்கே உண்டு. 
1827-ல் பிலடெல்பியாவில் கட்டிடங்கட்டும் தொழிலாளர்கள் நடத்திய வேலைநிறுத்தத்தில்தான் இந்தக் கோரிக்கை பிரதானமாக வைக்கப்பட்டது. 1834-ல் நியுயார்க்கில் ரொட்டி தொழிலாளர்கள் எகிப்திய அடிமைகளைக் காட்டிலும் அதிகம் துன்புற்றனர். 
நாளொன்றுக்கு அவர்கள் பதினெட்டிலிருந்து இருபது மணி நேரம் வேலை செய்ய வேண்டி வந்தது என்ற செய்தியை அப்போது வெளியான ‘தொழிலாளருக்காக வாதிடுபவன்’ (Workingmen’s Advocate) என்ற பத்திரிகை வெளியிட்டது. 
பத்துமணி நேர வேலை நாளுக்கான இப்போராட்டங்கள் விரைவிலேயே ஒரு இயக்கமாக உருவெடுத்தன். 1837-ல் ஏற்பட்ட நெருக்கடி ஒரு தடையாக இருந்தபோதிலும் வேன் பியுரன் தலைமையிலான அரசாங்கம், அரசு ஊழியர்கள் அனைவருக்கும் பத்து மணி நேர வேலைநாள் அறிவித்தது. 
எல்லோருக்கும் பத்து மணி நேர வேலை நாள் என்பதற்காக போராட்டம் தொடர்ந்து நடைபெற்றது. 
பல தொழிற்சாலைகளில் இக்கோரிக்கை வெற்றியடைய, உடனேயே தொழிலாளர்கள் 8 மணி நேர வேலை நாள் என்ற கோஷத்தை எழுப்பினர்.
 இவ்வாறு குறைந்த வேலை நேரத்துக்கான போராட்டம் அமெரிக்காவில் மட்டும் நிகழவில்லை. முதலாளித்துவத்தின் கீழ் தொழிலாளர்கள் சுரண்டப்பட்ட எல்லா வளரும் நாடுகளிலும் இப்போராட்டங்கள் நிகழ்ந்தன. 
உதாரணமாக வெகு தூரத்தில் இருந்த ஆஸ்திரேலியாவில் கட்டிடத் தொழிலாளர்கள் ‘8 மணி நேர வேலை, 8 மணி நேர பொழுதுபோக்கு, 8 மணி நேர ஓய்வு’ என்ற கோரிக்கையை முன் வைத்து 1858-ல் அதை அடைவதில் வெற்றியும் பெற்றனர்.
1884-ல் அமெரிக்காவில் 8 மணி நேர இயக்கத்தின் போது வெடித்த போராட்டங்கள்தான் மே தினம் உருவாவதற்கு நேரடியான காரணமாய் அமைந்தன. ஆனாலும் இதற்கு ஒரு தலைமுறை முன்பே ‘தேசிய தொழிற்சங்கம்’ குறைந்த வேலை நேரத்துக்கான கோரிக்கையை முன்வைத்து பரந்த இயக்கத்தையே நடத்தியது. ‘தேசிய தொழிற் சங்கம்’ அமெரிக்க தொழிலாளி வர்க்கத்தின் போர்க்குணமிக்க ஸ்தாபனமாக அப்போது விளங்கியது.
1861-62-ல் உள்நாட்டுப் போர் துவங்கியது. இதற்கு சற்று முன்பே துவங்கப்பட்ட வார்ப்பட அச்சு தொழிலாளர் சங்கம், இயந்திர தொழிலாளர்கள் சங்கம், கொல்லர்கள் சங்கம் போன்ற தேசிய தொழிற்சங்கங்கள் அப்போது மறையத் துவங்கின. ஆனபோதிலும் அதற்கடுத்த சில ஆண்டுகளில் பல உள்ளூர் தேசிய தொழிற்சங்கங்கள் ஒன்றிணைந்து ஒரு கூட்டமைப்பை ஏற்படுத்த வேண்டிய அவசியமும் எழுச்சியும் உருவானது. இவ்வாறு பல தொழிற்சங்க பிரதிநிதிகள் ஒன்று சேர்ந்து 1866, ஆகஸ்டு 20-ஆம் நாள் பால்டிமோர் என்னுமிடத்தில் தேசிய தொழிற்சங்கத்தை உருவாக்கினார்கள். இதன் தலைவராக வில்லியம் எச. சில்விஸ் தேர்ந்தெடுக்கப்பட்டார். இவர் மாற்றியமைக்கப்பட்ட வார்ப்பட அச்சு தொழிலாளர் சங்கத்தின் தலைவராவார். தொழிற்சங்க இயக்கத்தில் முக்கியமானவராய் கருதப்பட்ட இவர் ஒரு இளைஞர். இவர் லண்டனில் இருந்த முதலாவது இனடர் நேஷனல் தலைவர்களோடு தொடர்பு கொண்டிருந்தார். இதன் காரணமாக தேசிய தொழிற்சங்கத்துக்கும் இன்டர்நேஷனலின் பொதுக்குழுவுக்கும் இடையே உறவை ஏற்படுத்த அவரால் முடிந்தது.
1875-ம் ஆண்டு சுரங்க தொழிலாளர் சங்கங்களை அழிக்கும் பொருட்டு தீவிர போர்க்குணமுள்ள பத்து தொழிலாளர்களை சுரங்க அதிபர்கள் தூக்குமரத்திலேற்றினார்கள்.
அமெரிக்க தொழிற்துறை மற்றும் உள்நாட்டு சந்தை 1880-90-க்கு இடைப்பட்ட பத்தாண்டுகளில் தீவிர வளர்ச்சியடைந்தது. ஆனபோதிலும் 1884-85-க்கு இடைப்பட்ட காலகட்டத்தில் ஒரு மந்த நிலை நிலவியது. இந்நிலை 1873-ல் ஏற்பட்ட நெருக்கடியின் தொடர்ச்சியாகும். அப்போது வேலையில்லா திண்டாட்டமும் மக்கள் துன்பமும் பெருகியது. இது குறைவான வேலை நாளுக்கான இயக்கத்திற்கு உந்துதல் சக்தியை தந்தது.
1877-ல் மிகப் பெரிய வேலை நிறுத்தப் போராட்டம் நடைபெற்றது. இதில் பத்தாயிரக்கணக்கில் சாலை, ரெயில்வே, மற்றும் உருக்குத் தொழிலாளர்கள் கலந்து கொண்டனர். இவர்கள் அரசாங்கத்தையும் நகராட்சியையும் எதிர்த்து தீவிர போர்க்குணத்தோடு போரிட்டனர். இவர்களுக்கெதிராக ராணுவம் ஏவப்பட்டது. தொழிலாளர்கள் தொடர்ந்து போராடினர். இப்போராட்டம் தொழிலாளர் இயக்கம் முழுமைக்கும் பெரும் பாதிப்பை ஏற்படுத்தியது. அமெரிக்க தொழிலாளி வர்க்கத்தின் முதல் மாபெரும் தேசிய அளவிலான வெகுஜன இயக்கமாக விளங்கியது. அரசு மற்றும் முதலாளிகளின் கூட்டுச் சதி காரணமாக இவ்வியக்கம் தோற்கடிக்கப்பட்டது.
1885-ல் கூட்டமைப்பு மாநாடு அடுத்த ஆண்டு மே முதல் நாள் வேலை நிறுத்தம் செய்வது பற்றி மீண்டும் எடுத்துரைத்தது. பல தேசிய சங்கங்கள் போராட்டத்துக்கான தயாரிப்புகளில் இறங்கின. குறிப்பாக மரவேலை மற்றும் சிகரெட் தொழிலாளர்கள் தயாரிப்புகளில் இறங்கினார். இந்த போராட்டத்தின் காரணமாக அப்போதிருந்த தொழிற்சங்க உறுப்பினர் எண்ணிக்கை வேகமாக வளர்ந்தது. கூட்டமைப்பைக் காட்டிலும் பிரபலமாக விளங்கிய ‘நைட்ஸ் ஆப் லேபரி’ன் உறுப்பினர் எண்ணிக்கை 20 லட்சத்திலிருந்து 70 லட்சத்திற்கு உயர்ந்தது. 
 வேலை நிறுத்தத்திற்கான நாள் நெருங்க நெருங்க ‘நைட்ஸ் ஆப் லேபர்’ அமைப்பின் தலைமை, குறிப்பாக, டெரன்ஸ் பெளடர்லி என்பவன் நாச வேலைகளில் இறங்கினான். தன்னுடன் இணைந்துள்ள தொழிற்சங்கங்களை வேலை நிறுத்தத்தில் ஈடுபட வேண்டாமென ரகசியமாக அறிவுறுத்தினான்.
‘நைட்ஸ் ஆப் லேபர்’ ஸ்தாபனத்தின் நாசவேலை இருந்த போதிலும் 8 மணி நேர வேலை நாளுக்கான போராட்டத்தில் ஐந்து லட்சத்திற்கும் அதிகமான தொழிலாளர்கள் கலந்து கொண்டார்கள் என கணக்கிடப்படுகிறது..
சிக்காகோவில் மே முதல் நாள் வேலை நிறுத்தம் மிகத் தீவிரமாக இருந்தது. அப்போது இடதுசாரி தொழிலாளர்கள் இயக்கத்தின் ஒரு மையமாக சிக்காகோ திகழ்ந்தது. தொழிலாளர் இயக்கத்தின் அரசியல் ரீதியான பல்வேறு பிரச்சினைகள் குறித்து போதுமான தெளிவு இல்லாவிட்டாலும் அது ஒரு போராட்ட இயக்கமாக விளங்கியது. 
மே முதல் நாள் சிக்காகோ, நகரத் தொழிலாளர் இயக்க ஸ்தாபனம் அழைப்பு கொடுத்ததின் பேரில் ஏராளமான தொழிலாளர்கள் தங்கள் கருவிகளை கீழே வைத்துவிட்டு தெருவுக்கு இறங்கிய மாபெரும் காட்சியைக் கண்டது. இந்த ஆர்ப்பாட்டம் முன் எப்போதுமில்லாத வகையில் மாபெரும் வர்க்க ஒற்றுமையாக விளங்கியது. எட்டு மணி நேர வேலை நாள் கோரிக்கையின் முக்கியத்துவமும், வேலை நிறுத்தத்தின் பரந்த மற்றும் தீவிரத்தன்மையும் இந்த இயக்கத்திற்கு குறிப்பிடத்தக்க அரசியல் முக்கியத்துவத்தைத் தந்தது. அடுத்த சில நாட்களில் ஏற்பட்ட சில மாற்றங்களால் இந்த முக்கியத்துவம் மேலும் தீவிரமானது. 1886 மே முதல் தினம் உச்சக் கட்டத்தையடைந்த 8 மணி நேர இயக்கமானது,
அதே நேரத்தில் தொழிலாளர்களின் விரோதிகள் வெறுமனே இருக்கவில்லை. முதலாளிகள் மற்றும் அரசின் இணைந்த சக்தி, ஊர்வலம் சென்ற சிக்காகோ தொழிலாளர்களைக் கைது செய்தது. போர்குணமிக்க தலைவர்களை அழித்தொழிப்பதன் மூலம் சிக்காகோ நகரின் தொழிலாளர் இயக்கத்தையே நசுக்கி விடலாம் என கண்டார்கள். மே 3, 4 தேதிகளில் நிகழ்ந்த நிகழ்ச்சிகள் ‘வைக்கோல் சந்தை (ஹே சந்தை) விவகாரம்’ என்றழைக்கப்படும் நிகழ்ச்சிக்கு வழி வகுத்தன. மே 3-ம் நாள் வேலை நிறுத்தம் செய்த மெக்கார்மிக் ரீப்பர் வொர்க்ஸ் தொழிலாளர்களின் கூட்டத்தில் நிகழ்ந்த போலிஸின் காட்டு மிராண்டித்தனமான அடக்கு முறையை எதிர்த்து மே 4-ஆம் நாள் வைக்கோல் சந்தை சதுக்கம் என்றழைக்கப்படும் இடத்தில் ஆர்ப்பாட்டம் நடந்தது. அந்த கூட்டம் அமைதியாக நடந்தது. போலீசு மீண்டும் கூடியிருந்த தொழிலாளர் மீது தாக்குதலைத் தொடுக்க ஆரம்பிக்கும் போது கூட்டம் தள்ளிவைக்கப்பட இருந்தது. கூட்டத்தில் எறியப்பட்ட ஒரு குண்டு ராணுவ அதிகாரி ஒருவனைக் கொன்றது. இதன் விளைவாக எழுந்த ஒரு மோதலில் ஏழு போலீஸ்காரர்களும் நான்கு தொழிலாளர்களும் கொல்லப்பட்டனர். வைக்கோல் சந்தை சதுக்கத்தில் ஏற்பட்ட ரத்த ஆறும், போர்க்குணமிக்க சிக்காகோ தொழிலாளர் தலைவர்களை சிறைக்கும், தூக்கு மேடைக்கும் அனுப்பியதும்தான் சிக்காகோ நகர முதலாளிகளின் பதிலாயிருந்தன. 
உலகெங்கிலுமுள்ள பாட்டாளி மக்களுக்கு மே தினம் ஒரு ஈர்க்கும் முனையாக மாறியது. மே தின ஆர்ப்பாட்டங்களின் போது 8 மணி நேர வேலை நாள் என்ற பிரதான கோரிக்கையோடு மற்ற முக்கியமான கோரிக்கைகள் குறித்தும் கவனம் செலுத்துமாறும் தொழிலாளர்கள் அழைக்கப்பட்டார்கள். 
உலகத்தொழிலாளர் ஒற்றுமை; எல்லோருக்கும் ஒரே மாதிரியான ஓட்டுரிமை; ஏகாதிபத்திய போர் மற்றும் காலனி ஆதிக்க எதிர்ப்பு; 
தெருக்களில் ஆர்ப்பாட்டம் செய்யும் உரிமை; 
அரசியல் மற்றும் பொருளாதார ஸ்தாபனம் கட்டும் உரிமை; 
போன்றவை அந்தக் கோரிக்கைகளில் சிலவாகும்.
இன்றோ அரசுப்பணிகளில் சேருவொரும், மென்பொருள் நிறுவனத்தில் இருப்போரும் தங்களை மாத சம்பளம் பெறுபவர் என்பதையே மறந்து 12 நேரம் உழைக்கிறார்கள்.தொழிற்சங்க நடவடிக்கைகளில் ஈடுபடுவதில்லை.அதன் பலனை 35 வயதில்  திறனற்ற்வர் என்ற முத்திரையை முகத்தில் குத்தி தங்களை திடீரென வெளியே தள்ளும் போது அனுபவிக்கிறார்கள்.
டிசிஎஸ் சம்பவத்திற்கு பின்னர் தொழிற்சங்க அருமை சிலருக்கு புரிந்து வருகிறது.அனைவருக்கும் வரவேண்டும்.அணி சேர்ந்து போராடி புது விதிகள் செய்ய வேண்டும்.
தகவல் தொழில் நுட்பத்துறையில் ஆயிரம் கோடிகள் கணக்கில் பணம் பண்ணும் முதலாளிகளுக்கு சங்கம் நாஸ்காம் இருக்கையில் பணிபுரிபவர்களுக்கு ஏன் 
இல்லை?
=================================================================================
இன்று,
மே-01.
# மே தினம்[தொழிலாளர் தினம்.


  • இந்தியாவின் மகாராஷ்டிர மாநிலம் அமைக்கப்பட்டது(1960)
  • நியூயார்க்கில் எம்பயர் ஸ்டேட் கட்டிடம் திறந்து வைக்கப்பட்டது(1931)
  • புளூட்டோவின் பெயர் அதிகாரபூர்வமாக அறிவிக்கப்பட்டது(1930)




மூர் விதி


சுரன் -20150430



ஒரு கம்ப்யூட்டர் வேகமாகவும், சரியாகவும் இயங்க, அதில் பயன்படுத்தப்படும் சிப் முக்கிய பங்கு வகிக்கிறது. 
இவற்றை, ஐ.சி. (integrated circuit) அல்லது “ஒருங்கிணைந்த மின் சுற்று கொண்ட சிப்” என அழைக்கலாம். 
இந்த சிப்கள் பணியை மேற்கொள்கையில், செயல்பாட்டின் துல்லியமும், விரைவுத் தன்மையும், சிப்களில் பதிக்கப்படும் ட்ரான்சிஸ்டர்களே நிர்ணயம் செய்கின்றன. 
எனவே, அறிவியல் உலகம், இந்த சிப்களில் தொடர்ந்து கூடுதலான எண்ணிக்கையில், ட்ரான்சிஸ்டர்களைப் பதிப்பதிலேயே தன் முழுக்கவனத்தையும் செலுத்தி, ஆய்வினை மேற்கொண்டு வருகிறது.
1965 ஆம் ஆண்டு, இந்தப் பெருக்கத்தினைக் கண்ணுற்ற, இந்த சிப் துறையில் செயலாற்றிய விஞ்ஞானி கார்டன் மூர் (Gordon Moore) ;
"ஒவ்வோர் ஆண்டும், சிப் ஒன்றில் பதிக்கப்படும் ட்ரான்சிஸ்டர்களின் எண்ணிக்கை, முந்தைய ஆண்டைக் காட்டிலும் இரு மடங்காக உயரும்
என்று, ஏப்ரல் 18, 1965 அன்று, கருத்து வெளியிட்டார். 
இதனையே கம்ப்யூட்டர் உலகம்மூர் விதி (Moore's Law)” எனப் 
பெயரிட்டு அழைத்தது.
இந்த விதி உருவாக்கப்பட்டு 50 ஆண்டுகள் உருண்டோடிவிட்டன. இந்த விதியின் தாக்கம் டிஜிட்டல் உலகில் பெரும் திருப்பத்தை ஏற்படுத்தியுள்ளது. டிஜிட்டல் உலகில் ஏற்படும் ஒவ்வொரு புதிய கண்டுபிடிப்பும், சாதன உருவாக்கமும், இந்த விதியின் எடுத்துக் 
காட்டுகளாக இயங்கி, குறிப்பிட்ட அந்த விதி இன்றைக்கும் பொருள் கொண்டதாக இருப்பதனை உறுதிப்படுத்தியுள்ளது.
சிப்களைத் தயாரிக்கும் இன்டெல் நிறுவனத்தின் தலைமை விஞ்ஞானியான கார்டன் மூர், இந்த புதிய நோக்கினைக் கொண்ட விதியை 50 ஆண்டுகளுக்கு முன்னர் எடுத்துக் கூறினார். 
டிஜிட்டல் உலகில், புதிய பிரிவுகளையும், தொழிற்சாலைகளையும் ஏற்படுத்த இந்த விதி அடிப்படையாக அமைந்தது. இன்றைய டிஜிட்டல் கேமராக்கள், ஸ்மார்ட் போன்கள், வர இருக்கின்ற ட்ரைவர் இல்லாத கார்கள் என அனைத்தும், இந்த விதியின் அடிப்படையில் உருவாகும் சிப்களின் இயக்கத்திலேயே இயங்குபவையாய் இருக்கின்றன.
தற்போது 86 வயதாகும், கார்டன் மூர், 50 ஆண்டுகளுக்கு முன், ”எலக்ட்ரானிக்ஸ் மேகஸின்” என்னும் பத்திரிக்கைக்கு அளித்த பேட்டியில் இதனைக் கூறினார். 
அப்போது அவர் “பேர் சைல்ட் செமி கண்டக்டர் (Fairchild Semiconductor)” என்னும் நிறுவனத்தில் பணியாற்றிக் கொண்டிருந்தார். அப்போது 8 ட்ரான்சிஸ்டர்கள் கொண்ட சிப்களே புழக்கத்தில் இருந்தன. ஆனால், அவர் பணியாற்றிய தொழிற்சாலை 16 ட்ரான்சிஸ்டர்கள் கொண்ட சிப்களைத் தயாரித்துக் கொண்டிருந்தன. இதனைக் கண்ணுற்ற மூர், மேலே விளக்கப்பட்ட கோட்பாட்டினை அறிவித்தார்.
பின்னர், 1968ல், ராபர்ட் நாய்ஸ் என்பவருடன் இணைந்து, கார்டன் மூர் இன்டெல் நிறுவனத்தைத் தொடங்கினார். அப்போது 60 ட்ரான்சிஸ்டர்களுடன் இருந்த சிப், பத்து ஆண்டுகளில், 60 ஆயிரம் ட்ரான்சிஸ்டர்களைக் கொண்டதாக உருவானது. இன்றைக்கு உருவாக்கப்படும் அதி நவீன சிப்களில், 130 கோடி ட்ரான்சிஸ்டர்கள் ஒருங்கிணைக்கப்படுகின்றன. சிப்கள் தொடர்ந்து, சிறியனவாகவும், வேகமாகச் செயல்படுபவையாகவும், அதிகத் திறனுடன் செயலாற்றும் தன்மை கொண்டதாகவும் உருவாக்கப்பட்டு வருகின்றன. 
இந்த மாற்றம் ஏதோ ஏற்பட வேண்டும் என்ற உந்துதலினால் சிப்பினை மட்டும் அடிப்படையாகக் கொண்டு ஏற்பட்டது அல்ல.
சுரன் -20150430
 இதற்குப் பல புதிய கண்டுபிடிப்புகள் உதவியாக இருந்து அடிப்படையை அமைத்தன. இந்த அறிவியற் கண்டுபிடிப்புகளில் சிலவாக CMOS, Silicon straining, VLSI, Immersion lithography மற்றும் High-k dielectrics ஆகியவற்றைக் கூறலாம். இந்த வரிசையில், அண்மையில் வந்திருப்பது FinFET அல்லது Tri-gate "3D" transistor process technology என அழைக்கப்படும் தொழில் நுட்பமாகும். இதன் மூலம் மிக மிகச் சிறிய மைக்ரோ ப்ராசசர்களையும், மெமரி செல்களையும் உருவாக்க முடிகிறது.
இதனைப் புரிந்து கொள்ள, நாம் அன்றைய காலத்து பிலிம் கேமராக்களையும், இன்று மொபைல் போன்களில் பயன்படுத்தும் கேமராவினையும் ஒப்பிட்டுப் பார்க்கலாம். சிறிய ட்ரான்சிஸ்டர் ரேடியோக்களையும், இன்று பட்டன் அளவில் கூட இல்லாமல் இயங்கும் எப்.எம். ரேடியோக்களை எண்ணிப் பார்க்கலாம். 
இவ்வாறு மிகச் சிறிய அளவில் நாம் உல்லாசமாகப் பயன்படுத்தும் சாதனங்கள் அனைத்தும், மூர் விதியின் கீழ் தயாரிக்கப்பட்ட, பல லட்சம் ட்ரான்சிஸ்டர்களைக் கொண்ட சிப்களினால் தான் வடிவமைக்கப்பட்டன.
முன்பு வெற்றிடக் கண்ணாடி குப்பிகளில் இருந்த வால்வ்கள் பல கொண்ட ரேடியோவை, இன்று ஐம்பது, அறுபது வயதில் இருப்பவர்கள் பயன்படுத்தி இருப்பார்கள். 
ரேடியோவை அதன் ஸ்விட்ச் போட்டுவிட்டு, ரேடியோ ஸ்டேஷனில் இருந்து நிகழ்ச்சி ஒளிபரப்பு வருவதற்குள், முகம் கழுவித் திரும்பலாம். இன்று, இயக்கியவுடனேயே ஒளிபரப்பு கிடைப்பது இந்த சிப்களினால் தான். இன்று வால்வ் ரேடியோவைத் தேடிப் போனாலும் வாங்க முடியாது.
அது மட்டுமல்ல, முதன் முதலில் யு ட்யூப் தளத்தில் காட்டப்பட்ட விடியோ படத்தின் காட்சிகள் தொடர்ந்து நம் கம்ப்யூட்டரை வந்தடைந்தது, இந்த விதியின் கீழ் உருவான சிப் மூலம் தான்.
 ஸ்ட்ரீமிங் செயல்பாட்டுக்கு அடிப்படையை அமைத்துக் கொடுத்தது, பல ட்ரான்சிஸ்டர்கள் கொண்ட சிப்கள் தான். ட்விட்டர் அமைந்ததும் இதன் மூலம் தான். ஐபோன், ஐ பேட் ஆகியன உருவானதன் அடிப்படையும் இதுதான்.
இன்றைக்கு நாம் பயன்படுத்தும் கம்ப்யூட்டர்கள், டேப்ளட் பி.சி.க்கள், ஸ்மார்ட் போன்கள், கேம்ஸ் விளையாடப் பயன்படுத்தும் கன்ஸோல் சாதனங்கள், நவீன 4கே ரெசல்யூசன் காட்சித் திரைகள் எனத் தொடர்ந்து, இதற்கான எடுத்துக் காட்டுகளாக அடுக்கிக் கொண்டே செல்லலாம்.
மூர் விதி சொல்லிவிட்டதே என்று வலுக்கட்டாயமாக ஒவ்வொரு நிறுவனமும் இந்த சிப் மேம்பாட்டினைக் கொண்டு வரவில்லை. 
பல நிறுவனங்கள் மேற்கொண்ட ஆய்வுகள் இதற்கான அடிப்படையையும், கண்டுபிடிப்பினையும் தந்தன.
 பரிசோதனைச் சாலைகளிலும், நிறுவனங்களிலும் தொடர்ந்து கடுமையான உழைத்த விஞ்ஞானிகளால் தான், இந்த புதிய சிப்கள் உருவாகின. அதில் ஒரு சில நிறுவனங்களைப் பட்டியல் இடுவதாக இருந்தால், Bell, Shockley Semiconductor, Fairchild, Intel, Toshiba, IBM, Advanced Micro Devices, TSMC, Samsung, போன்றவற்றைக் கூறலாம். 
சுரன் -20150430
ஆனால், இவற்றின் முயற்சிகள் அனைத்திற்கும் தூண்டுகோலாய் இருந்தது மூர் விதி தான். இன்றும் இனியும் தொடர்ந்து இந்த விதி, சிப் தயாரிப்பின் அடிப்படையை நிர்ணயிக்கும் விதியாகவும், பல டிஜிட்டல் சாதனங்கள் உருவாவதின் கட்டமைப்பாகவும் இருக்கும்.
இந்த விதியின் அடிப்படையில், தொடர்ந்து சிப் தயாரிக்கப்பட்டால், இந்த தொழில் என்னவாகும்? 
புதிய, வியக்கத்தக்க சாதனங்கள் வெளியாகி, மனித வாழ்வை மேம்படுத்தும். தானாக ஓடும் கார்கள், சர்வ சாதாரணமாக சாலைகளில் ஓடும். 
நம் வீடுகளில் நமக்குத் துணை புரிய பலவிதமான ரோபோக்கள் கிடைக்கும். மருத்துவமனைகளில், நுண்ணிய அறுவை சிகிச்சைகளை, ரோபோக்கள் நடத்தும். மருந்து காண இயலாத, புற்று நோய்க்கு சிகிச்சை முறை கிடைக்கலாம். 
ஏன், இந்தப் புவியில், மனித வாழ்க்கையின் சராசரி அளவு இன்னும் அதிகமாகலாம்.

நன்றி:தினமலர்.
சுரன் -20150430
========================================================================

சுரன் -20150430

புதன், 29 ஏப்ரல், 2015

கொண்டைக்கடலை.



சத்து மிக்க கடலை பற்றி பார்க்கலாம்.அதை பற்றி இன்று கடலை போடாலாம் நாம்.
இந்தியாவில் அதிகம் உபயோகிக்கும் முழுப் பயறுகளில் முக்கியமானது கொண்டைக்கடலை. 
இதில் வெள்ளையாக உள்ளது ஹிந்தியில் ‘சன்னா’ என்றும், ஆங்கிலத்தில் ‘பெங்கால் கிராம்’ (Bengal gram) என்றும் அழைக்கப்படுகிறது. 
வங்காளத்தில் அதிகம் விளைவதால் இந்தப் பெயர்.. 
வங்கத்தில் இதை பச்சையாகவும் சுட்டும் சாப்பிடுகிறார்கள்.
. உலர வைப்பதற்கு முன் பட்டாணியைப் போல பச்சை நிறத்தில் இருக்கிறது. அதை வேர்க்கடலையை வறுப்பது போல வண்டிகளில் வறுத்து விற்கிறார்கள். தமிழ்நாட்டில் இப்படிபச்சையாக கிடைப்பது இல்லை.

உலர வைக்கப்பட்டு கிடைப்பதிலேயே பல வகை உண்டு. சிறியதாக பச்சை நிறத்திலும் பிரவுன் நிறத்திலும் கிடைக்கிறது. 

இதை  நாம் சுண்டல் செய்ய பயன்படுத்துகிறோம். 
பிரவுன் நிறத்தில், கொஞ்சம் அளவில் பெரியதாகவும் கிடைக்கிறது. 
அளவில்  அதைவிட பெரியதாக வெண்மையாக இருப்பதை ‘காபூலி சன்னா’ என்று அழைக்கிறோம். 
பிரவுன் கொண்டைக்கடலையை  தோல் நீக்கி, உலர வைத்து கடலைப் பருப்பாக தினசரி சமையலில் உபயோகிக்கிறோம். 
இதை மாவாக்கி, கடலை மாவாக பஜ்ஜி  உள்பட பல பண்டங்களில் உபயோகிக்கிறோம்.

வட இந்தியர் கடலை மாவை ‘பேஸன்’ (Besan) என்று கூறுகின்றனர்.

 இதில் அவர்கள் செய்யும் டோக்ளா, கண்ட்வி  போன்றவை இங்கும் எல்லோரும் விரும்பும் உணவாக இருக்கின்றன. 
கேரளாவில் புட்டோடு தரும் கடலைக்கறியை இந்த  பிரவுன் நிற கொண்டைக்கடலையில் சமைக்கிறார்கள். 
இந்தக் கடலையை தோலுடன் உப்பு நீர் தெளித்து வறுத்து  உப்புக்கடலையாக, மாலைநேர சிறு தீனியாக சாப்பிடுகிறோம். 

கொண்டைக்கடலையின் தோலை நீக்கி அதை பொட்டுக்கடலை, பொரிகடலை என்று சொல்கிறோம். 

அதைத்தான் சட்னி முதல்  பலவற்றிலும் உபயோகிக்கிறோம். முறுக்கு, தட்டை முதல் பலவற்றிலும் இந்தப் பொட்டுக்கடலை மாவை சேர்க்கும்போது  எண்ணெய் குடிக்காமல் இருக்கும். 
பொட்டுக்கடலையில் ஆந்திராவில் செய்யும் ‘பருப்பு பொடி’ மதிய உணவோடு அதிகமாக  விரும்பப்படும் உணவு. 
இது தமிழ்நாட்டிலும் கூட மிகவும் பிரசித்தம். மிகவும் காரமாக, சுவையாக இருப்பதால் இதை ‘கன்  பவுடர்’ (Gun Powder) என்றும் கூறுவர்.

இப்படி நமது தினசரி சமையலில் பலவாறாக உபயோகப்படுத்தும் கொண்டைக்கடலை செடியின் விதைப்பகுதி, புரதச்சத்து  மிகுந்தது. 

சைவ உணவு உண்பவர்களுக்கு புரதத்தை நாம் பருப்பு, பயறு வகைகள், தானியங்கள், பால் மற்றும் பால் பொருட்களில்  இருந்து பெறவேண்டும். மற்ற நாடுகளில் நமது நாட்டைப்போல பலவிதமான பருப்புகள், பயறு வகைகள் இருக்காது. 
பொதுவாக தானியங்களுடன் பருப்பு அல்லது பயறு வகைகள் 5:1 என்ற விகிதத்தில் சேரும்போது எல்லா முக்கிய அமினோ  அமிலங்களும் சேர்ந்த முழுமையான புரதமாகப் பெற இயலும் என்பதை விஞ்ஞானம் கூறுகிறது. 

இதையே நமது முன்னோர்கள் இட்லி, தோசை, பொங்கல் என்று பல டிபன் வகைகளில் மட்டுமன்றி, மதிய உணவில்,  சாதத்துடன் கூட்டு, பொரியல், சாம்பார் என பலவற்றிலும் ஒவ்வொருவிதமான பருப்பு வகைகளை சேர்ப்பதின் மூலம் பெற  இயலும் என்பதை மெய்ஞ்ஞானத்தின் மூலமே உணர்த்தினார்கள். 

மற்ற பயறு வகைகளைவிட கொண்டைக்கடலையை அதிகம்  விரும்புகிறோம். 
கொண்டைக்கடலை காற்றில் உள்ள ஹைட்ரஜனை உள்ளிழுப்பதால் செடியாக இருக்கும்போது மண்ணின்  சத்துகள் அதிகரிக்கும்.

கொண்டைக்கடலையை வேக வைக்கும் போது ஒரு சிலர் சீக்கிரம் வேக வேண்டும் என்பதற்காக சமையல் சோடா சேர்ப்பது  உண்டு. இந்த சோடாவை சேர்த்தால் முக்கியமான தயாமின் என்னும் வைட்டமினை அழித்துவிடும். சிலருக்கு முழுப்பயறுகள்  உண்ணும்போது வாயுத்தொல்லை ஏற்படும். ஊறவைத்த தண்ணீரை மாற்றி நல்ல தண்ணீர் ஊற்றி வேக வைத்தால் வாயு  பிரச்னை குறையும். 

மேல் தோல் வெடிக்கும் வரை நன்கு மெத்தென்று வேக வைத்தால் வாயுத்தொல்லை அதிகம் வராது.  வேகும்போதே ஒரு சிறு துண்டு இஞ்சி சேர்க்கலாம்.
பிரவுன் கொண்டைக் கடலையில் வெள்ளை கொண்டைக் கடலையைவிட சத்துகள் அதிகம். 
ஒருசில சத்துகள் வெள்ளைக்  கடலையில் இல்லை. பயறு வகைகளிலேயே கொண்டைக்கடலையில்தான் நல்ல புரதம் கிடைக்கும். கிட்டத்தட்ட 100 கிராம்  அளவில் 17.1 கிராம் அளவு புரதம் இருக்கிறது. 
இதில் எல்லா முக்கிய அமினோ அமிலங்களும் இருக்கின்றன. முளைகட்டும்போது பல சத்துகள் அதிகமாகும். சுலபமாக ஜீரணமாகும். முக்கியமாக என்சைம்கள் அதிகரிக்கும்.  
வைட்டமின்-சியும் கிடைக்கும். புரதம் சுலபமாக ஜீரணமாகும்.
 சீக்கிரமாக வேகும். முளை கட்டியதை வறுக்கும்போது ‘மால்ட்’  ஆக மாறும்போது நல்ல மணம்  கிடைக்கும்.

எல்லா சத்துகளும் நிறைந்த இதை முழுமையான உணவு என்று கூறலாம். எடை குறையவும், இதய நோய் வராமலும் தடுக்கும்  ஒமேகா 3 என்ற கொழுப்பு சரியான சதவிகிதத்தில் ஒமேகா 6 என்ற கொழுப்புடன் கலந்து இருக்கும் ஓர் உணவுப்பொருள். 

 தினமும் ஏதாவது ஒரு விதத்தில் சேர்த்துக் கொண்டால் ஆரோக்கியமாக வாழலாம்.

பொட்டுக்கடலையாக உபயோகிக்கும் போது அதிகமாகத் தண்ணீர் குடிக்க வேண்டும். 

கர்ப்பிணிகளுக்கு மிகவும் முக்கியத்  தேவையான ஃபோலிக் ஆசிட் என்னும் பி வைட்டமின் நிறைந்தது. மரபணுக் கோளாறுகள் வராமல் தடுக்கும் ‘கோலின்’  வைட்டமின் கொண்டைக்கடலையில் சிறந்த அளவில் உள்ளது.
பிரவுன் நிற முழு கொண்டைக்கடலையில் எல்லா தாது உப்புகளும் இருக்கின்றன.

 சிறுநீரகக் கோளாறு உள்ளவர்கள், சோடியம்,  பொட்டாசியம் குறைக்க வேண்டிய நிலையில் உள்ளவர்கள் வெள்ளை கொண்டைக்கடலையை உண்ணலாம். 
இதில் இவை  இரண்டும் அறவே இல்லை (சல்பரும் இல்லை).

பிரவுன் கொண்டைக்கடலையில் எல்லா தாதுக்களும் இருக்கின்றன (மக்னீசியம், சோடியம், பொட்டாசியம், காப்பர், மாங்கனீசு,  குரோமியம், சல்பர், துத்தநாகம்).

முழு கொண்டைக்கடலையில் இருக்கும் சத்துகள்100 கிராம் அளவில்

சக்தி    360 கலோரிகள்
புரதம்    17.1 கிராம்
கொழுப்பு    5.3 கிராம்
தாதுக்கள்    3.00 கிராம்
நார்ச்சத்து    3.9 கிராம்
மாவுச்சத்து    60.9
கால்சியம்    202 மி.கி.
பாஸ்பரஸ்    312 மி.கி.
இரும்புச்சத்து    4.6 மி.கி.
வைட்டமின் ஏ
(கரோட்டீன்)    189 மைக்ரோ கிராம்
தயாமின்    0.30 மி.கி.
ரிபோ
ஃப்ளோவின்    0.15 மி.கி.
நயாசின்    2.9 மி.கி.
ஃபோலிக் ஆஸிட்    34.0 மி.கி.
கோலின்           194 மி.கி.

கடலைப் பருப்பு, வறுகடலையில் இருக்கும் சத்துகள் 
100 கிராம்  அளவில்

கலோரிகள்     372    369
புரதம்    20.8 கி    22.5 கி
கொழுப்பு    5.6 கி    5.2 கி
தாதுக்கள்    2.7 கி    2.5 கி
நார்ச்சத்து    1.2 கி    1.0 கி
மாவுச்சத்து    59.8     58.1
கால்சியம்    56 மி.கி.    58 மி.கி.
பாஸ்பரஸ்    339 மி.கி.    340 மி.கி.
இரும்புச் சத்து    5.3 மி.கி.    9.5 மி.கி.
வைட்டமின் ஏ
(கரோட்டீன்)    129மை.கி    113 மை.கி
தயாமின்    0.48 மி.கி.     0.20 மி.கி.
ரிபோ
ஃப்ளோவின்    0.20 மி.கி.
நயாசின்    2.4 மி.கி.    1.3 மி.கி.
ஃபோலிக்
ஆசிட்    32.0 மி.கி.    22.0 மி.கி
.
===========================================================
நன்றி:தினகரன்.
இன்று,

ஏப்ரல்-30.

  • .ஜெர்மனியில்  தந்தையர் தினம்
  • வியட்நாம் விடுதலை தினம்(1975)
  • இந்திய திரைப்படத் துறையின் முன்னோடியான தாதாசாஹிப் பால்கே பிறந்த தினம்(1870)
  • திருச்சியில் பாரதிதாசன் பல்கலைக்கழகம் அமைக்கப்பட்டது(1982)
  • ஆசியான் அமைப்பில் கம்போடியா இணைந்தது(1999)
வியட்நாம் 

1954-ம் ஆண்டு. பிரெஞ்சு காலனி ஆட்சியாளர்கள், அமெரிக்க இராணுவத்தின் துணையோடு வியட்நாம் மக்கள் மீது தொடுத்த ஆக்கிரமிப்பு போரின் 8-வது ஆண்டு. அதிகரித்து வரும் வியட்நாம் மக்கள் படையினரின் தாக்குதல்களை சமாளிக்க, பியன்-தியன்-பு என்ற இடத்தில் தனது படைகளை குவித்து தளம் ஒன்றை உருவாக்க முயன்றன பிரெஞ்சு ஆக்கிரமிப்பு படைகள். அந்தத் தளம் தகர்க்கப்பட முடியாதது, வலுவானது என்று பிரெஞ்சு, அமெரிக்க இராணுவ நிபுணர்கள் உறுதியாக நம்பினார்கள்.
டெட் தாக்குதல்
டெட் தாக்குதல்
ஆனால் அந்தத் தளத்தை சுற்றியிருந்த உயரமான மலைகளில் தாக்குதல் ஆயுதங்களை எடுத்துச் சென்ற வியட்நாம் மக்கள் படைகள் பிரெஞ்சு ஆக்கிரமிப்பு படைகளை மண்டியிடச் செய்தன. 11,000 பிரெஞ்சுப் படையினர் சிறை பிடிக்கப்பட்டனர். இந்தோ சீனாவில் ஐரோப்பிய நாடுகளின் காலனிய ஆக்கிரமிப்புகளுக்கு சவக் குழி வெட்டப்பட்டது.
ஆனால், அமெரிக்க ஏகாதிபத்தியம் வியட்நாமை விட்டுக் கொடுக்க தயாராகவில்லை. பிரெஞ்சு படைகள் துரத்தி அடிக்கப்பட்ட பிறகு 10 ஆண்டுகளுக்கு தெற்கு வியட்நாம் அரசுக்கு ஆயுதங்கள் அளித்தும், நேரடியாக அமெரிக்கப் படைகளை அனுப்பியும், வியட்நாம் மீது தனது ஆதிக்கத்தை நிலை நாட்ட முயற்சித்தது. உலகின் மிகப்பெரிய முதலாளித்துவ நாடு, இராணுவ ரீதியாகவும், பொருளாதார ரீதியாகவும் யாராலும் எதிர் கொள்ள முடியாத அமெரிக்க அரசை, நெல் வயல்கள் நிறைந்த விவசாய நாடான பலவீனமான இராணுவம் கொண்ட வியட்நாம் கம்யூனிஸ்ட் கட்சி எதிர் கொண்டது.
1968-ம் ஆண்டு சயானில் உள்ள அமெரிக்க தூதரகம் உட்பட தெற்கு வியட்நாமில் உள்ள அமெரிக்க தளங்கள் பலவற்றில் ஒரே நேரத்தில் வியட்நாம் மக்கள் இராணுவமும் தெற்கு வியட்நாமின் வியட்காங் போராளிகளும் தாக்குதல் நடத்தினர். அமெரிக்கப் படைகளின் எதிர் தாக்குதலில் ஆயிரக்கணக்கான வியட்நாமியர்கள் உயிரிழந்தனர்.
இந்தப் போர் முழுவதிலும் அமெரிக்க ஆயுதங்களால் கொல்லப்பட்ட வியட்நாமியர்களின் எண்ணிக்கை 25 லட்சம், வியட்நாம் மக்கள் படையினரின் தாக்குதலில் உயிரிழந்த அமெரிக்கப் படையினரின் எண்ணிக்கை 58,000. கொல்லப்பட்ட அமெரிக்கப் படை வீரர்களின் உடல் பொதிகளையும், அமெரிக்க இராணுவம் வியட்நாம் மக்கள்  மீது அவிழ்த்து விட்ட ஈவிரக்கமற்ற கொலைகளையும் தொலைக்காட்சியில் பார்த்த அமெரிக்க மக்கள் மத்தியில் அவர்களது அரசு கட்டியமைத்திருந்த பிம்பங்கள் சரிந்தன. போரை எதிர்த்து நடந்த அமெரிக்க மக்களின் போராட்டத்துக்கு அடி பணிந்தும், போரில் தோல்வி ஏற்பட்டதாலும் அமெரிக்கா வியட்நாமிலிருந்து விலகிக் கொண்டது. வியட்நாம் ஒரே நாடாக விடுதலை பெற்றது.
வோ குயன் கியாப்
ஜெனரல் கியாப்
இந்த ஏகாதிபத்திய எதிர்ப்புப் போர்களின் தலைமை தளகர்த்தராக பணியாற்றிய ஜெனரல் கியாப் 1911-ம் ஆண்டில் வியட்நாமின் விவசாய குடும்பம் ஒன்றில் பிறந்தவர். இளம் வயதிலேயே புரட்சிகர நடவடிக்கைகளுக்காக பிரெஞ்சு ஆக்கிரமிப்பாளர்களால் கைது செய்யப்பட்டார். பிறகு ஹனோய் பல்கலைக் கழகத்தில் அரசியல், பொருளாதாரம், மற்றும் சட்டத் துறைகளில் படித்துக் கொண்டே வரலாற்று ஆசிரியராக பணி புரிந்தார். 1939-ம் ஆண்டு ஜப்பான் வியட்நாம் மீது போர் தொடுத்த போது ஹோ-சி-மின் தலைமையிலான இந்தோ சீனா கம்யூனிஸ்ட் கட்சியுடன் சீனாவுக்கு இடம் பெயர்ந்தார்.
அவரது மனைவியும், தந்தையும், சகோதரியும் பிரெஞ்சு ஆக்கிரமிப்பு அரசால் சிறையிடப்பட்டு சித்திரவதை செய்யப்பட்டுக் கொல்லப்பட்டனர். இரண்டாம் உலகப் போரின் போது ஜப்பானிய ஆக்கிரமிப்பை எதிர்த்து நடத்தப்பட்ட கொரில்லா போரில் கியாப் தலைமைத் தளபதியாக நியமிக்கப்பட்டார். ஜப்பானிய சரணடைவுக்குப் பிறகு 1946-ம் ஆண்டு வியட்நாம் ஜனநாயக குடியரசு அறிவிக்கப்பட்டு தேர்தல்கள் நடைபெற்றன.
ஆனால், வியட்நாம் மக்களின் விடுதலையை ஏற்றுக் கொள்ளாமல் தனது காலனி ஆதிக்கத்தை மீண்டும் நிலை நாட்ட வந்தது பிரெஞ்சு ஏகாதிபத்தியம். அவர்கள் தோற்கடிக்கப்பட்ட பிறகு அமெரிக்க ஏகாதிபத்தியம் வியட்நாம் மீது படை எடுத்தது.
பிரெஞ்சு படைகளுக்கு எதிரான தியன் பியன் பூ தாக்குதலிலும் அமெரிக்க ஆக்கிரமிப்பாளர்களுக்கு எதிரான டெட் தாக்குதலிலும் வியட்நாம் மக்கள் படை எப்படி வெற்றி பெற முடிந்தது?
ஒரு பொருளாதார ரீதியில் பின்தங்கிய, பலவீனமான ராணுவத்தைக் கொண்ட நாட்டு மக்கள் தம்மை ஆக்கிரமித்திருக்கும் முதலாளித்துவ பொருளாதாரத்தினால் வலுப்படுத்தப்பட்ட நவீன இராணுவத்தை எதிர்த்து எப்படி தமது சுதந்திரத்தை மீட்க முடிந்தது?
வியட்நாம் மக்களின் ஏகாதிபத்திய எதிர்ப்புப் போரின் கோட்பாட்டை வகுத்து நடைமுறைப்படுத்தி வியட்நாம் மக்களின் விடுதலைப் போரை வழி நடத்தினார் ஜெனரல் கியாப்.
மக்கள் யுத்தம்
யுத்தத்தின் முடிவை தீர்மானிப்பது பொருட்களும் ஆயுதங்களும் இல்லை, மக்கள்தான்.
எதிரியின் இராணுவ, பொருளாதார வலிமைகள் எவ்வளவு பெரிதாக இருந்தாலும், தம்முடைய அடிப்படை உரிமைகளுக்காக ஒன்றுபட்டு போராடும் மக்களை எதிர் கொண்டு தோற்கடிக்க அது போதாது. ஒரு நாட்டின் மக்கள் தமது சுதந்திரத்துக்காக ஒன்றுபட்டு போராடும் போது அவர்கள் எப்போதும் வெற்றியடைவது உறுதி.  உலகின் மிகப் பலமான பொருளாதார, இராணுவ சக்தி கூட தமது சர்வதேச உரிமைகளுக்காக ஒன்றுபட்டு போராடும் மக்களின் எதிர்ப்பை தகர்க்க முடியாது.
“அவ்வாறு ஒரு நாட்டின் மக்களுக்காக, மக்களால் நடத்தப்படும் மக்கள் யுத்தம் இராணுவ, அரசியல், மற்றும் பொருளாதார தளங்களில் நடத்தப்படுகிறது. எதிரிகள், ஒரு இராணுவத்தை மட்டும் எதிர் கொள்ளவில்லை, வியட்நாம் மக்கள் அனைவரையும் எதிர் கொண்டனர். யுத்தத்தின் முடிவை தீர்மானிப்பது பொருட்களும் ஆயுதங்களும் இல்லை, மக்கள்தான்” என்றார் ஜெனரல் கியாப். ஏகாதிபத்தியங்களுக்கு எதிரான வியட்நாம் மக்களின் போர், நாட்டு மக்கள் அனைவரையும் உள்ளடக்கியிருந்தது.
“போரில் வெற்றி பெற்றவர்கள் வியட்நாம் மக்கள், அமெரிக்க இராணுவம்  தோற்கடிக்கப்பட்டது. வியட்நாம் மக்கள் போரை விரும்பவில்லை, அமைதியை விரும்பினார்கள். அமெரிக்க மக்கள் போரை விரும்பினார்களா? இல்லை, அவர்களும் அமைதியை விரும்பினார்கள். எனவே எங்கள் வெற்றி வியட்நாம் மக்களின் வெற்றி, அமெரிக்காவில் அமைதியை விரும்பிய மக்களின் வெற்றி.” என்றார் ஜெனரல் கியாப்.
என்ன விலை கொடுத்தாவது வியட்நாமை ஆக்கிரமிக்கத் துடித்த ஏகாதிபத்திய ஆட்சியாளர்கள்தான் தோல்வி அடைந்தார்கள்.
உழைக்கும் மக்களின் விடுதலைக்காக ஏகாதிபத்தியங்களை எதிர்த்து போராடி மண்டியிடச் செய்த தளபதி ஜெனரல் கியாப்புக்கு சிவப்பு வணக்கங்கள்..
========================================================================


செவ்வாய், 28 ஏப்ரல், 2015

மீண்டு[ம்] வந்த ஆச்சார்யா!


பி.வி. ஆச்சார்யா.
ஜெயலலிதா தனது வழக்கின் மேல் முறையீட்டு வழக்கில் முன்பு அரசு வழக்குரைஞராக இருந்து கொண்டு குற்றவாளியான தனக்கு ஆதரவாக வாதாடிய பவானிசிங்கையே அரசு வழக்குரைஞராக நியமித்துக்கொண்டார்.
பேராசிரியர் அன்பழகன் கர்நாடக அரசு வழக்கில் தமிழகம் எப்படி அரசு வழக்குரைஞரை  நியமிக்கலாம் என்று உச்ச நீதிமன்றம் வரை சென்று வாதாடினார்.இதனால் பவானி சிங் அரசு வழக்கறிஞராக நியமிக்கப்பட்டது செல்லாது என உச்ச  நீதிமன்றம் தீர்ப்பு வழங்கியது.

 ஜெயலலிதாவின் சொத்துக் குவிப்பு மேல்முறையீட்டு வழக்கில் அரசு தரப்பு வழக்கறிஞராக பி.வி.ஆச்சர்யாவை கர்நாடக அரசு நியமித்துள்ளது. இதற்கான அரசாணையை வெளியிடப்பட்டுள்ளது.

பி.வி. ஆச்சார்யா.
 நாட்டின் மூத்த, முக்கியமான வழக்கறிஞர்களில் ஒருவர். 
80 வருட வாழ்க்கையில், 60 வருடங்களைச் சட்டப் புத்தகங்களோடு கழித்திருப்பவர். 
ஐந்து முறை அட்வகேட் ஜெனரல், பார் கவுன்சில் தலைவர், இந்திய சட்ட ஆணைய உறுப்பினர் உள்பட பல முக்கிய பொறுப்புகளில் இருந்தவர். ஜெயலலிதாவின் சொத்துக்குவிப்பு வழக்கில், முன்னதாக அரசுத் தரப்பில் வாதாடி, ஜெயலலிதா மிரட்டல் மற்றும் பல தொடர் நெருக்கடிகள் காரணமாக விலகியவர்.
 சென்னை சட்டக் கல்லூரியில் சட்டம் படித்தவர்.
ஜெயலலிதா வழக்கிலிருந்து விலகுமாறு பாஜக மேலிடமும் கர்நாடக அரசும் தன்னை ராஜினாமா செய்யுமாறு அழுத்தம் கொடுத்ததாக 
தனது சுயசரிதையில் எழுதியிருந்தார் என்பது குறிப்பிடத்தக்கது.

ஆனால் இப்போது கர்நாடக அரசால் அரசு வழக்குரைஞராக நியமிக்கப்பட்டுள்ளபி.வி.ஆச்சார்யா தனது பணியை துவக்கிய 
உடனே உச்ச நீதிமன்ற அறிவுரைபடி 18 பக்க எழுத்துப்பூர்வ வாதத்தை தாக்கல் செய்தார். எழுத்துப்பூர்வ வாதத்தை தாக்கல் செய்த ஆச்சார்யா, சிறப்பு நீதிமன்ற நீதிபதி குன்ஹாவின் தீர்ப்பை உறுதி செய்ய வேண்டும் என்றார்.

மேலும் சாட்சிகள் மற்றும் ஆதாரப்பூர்வமாக குற்றம் நிரூபிக்ககப்பட்டு தீர்ப்பு வழங்கப்பட்டுள்ளது. தமிழகத்திலிருந்து 2004ஆம் ஆண்டு ஜெயலலிதா வழக்கு கர்நாடகத்திற்கு மாற்றப்பட்டது. கர்நாடகத்திற்கு மாற்றப்பட்டதால் வழக்கில் அந்த மாநிலத்துக்கே முதல் உரிமை என்றும் ஆச்சார்யா வாதிட்டுள்ளார்.

ஜெயலலிதா மேல்முறையீட்டு மனுவிலோ கர்நாடகம் ஒரு தரப்பாகவே சேர்க்கப்படவில்லை என குறிப்பிட்டுள்ள ஆச்சார்யா, ஜெயலலிதாவின் மேல்முறையீட்டு மனுவே சட்டப்படி தவறானது என்று தெரிவித்துள்ளார்.
இப்போது ஜெயலலிதா,பாஜக அரசு என்ன நடவடிக்கையை முறைகேடாக எடுத்து நீதிமன்றம் மூலம் திணிக்கப் போகிறது.?

தினமணியின் மறுபக்கம் ? 
அம்மணமா?

ன்னர்களுக்கு தேள் கொட்டினால் அரசவைப் புலவர்களுக்கு நெறிகட்டுவது தமிழ் மரபு. என்ன இருந்தாலும் அண்டிப் பிழைப்பதில் உள்ள சுகமும், பாதுகாப்பும், எலும்புத் துண்டும் நேர் வழியில் இல்லை அல்லவா?
அவ்வழியில் பவானி சிங் நியமனம் செல்லாது என உச்சநீதிமன்றம் தீர்ப்பளித்திருப்பதை ஒட்டி ஏகப்பட்ட சட்ட, சாத்திர, சாணக்கிய வாதங்களை அடுக்குகிறார், தினமணியின் வைத்தி.
சாரமாகச் சொன்னால் ஒரு வன்புணர்ச்சி நடைபெறுகிறது என்று வையுங்கள்! நாமெல்லாம் புணர்ந்தவனை பொளந்து கட்ட பொங்கியெழும் போது, பொறுக்கியை காப்பாற்றும் முகமாக அவனைப் பற்றி இல்லாதது, பொல்லாததையெல்லாம் இட்டுக்கட்டி நல்லவனாக்கும் கிரிமினல் லாயர் சூட்கேஸ் சகிதம் வருவார்கள் அல்லவா! அரசவைப் புலவர் வைத்தியும் அப்பேற்பட்ட லாயரின் வாயைக் கொண்டிருக்கிறார்.
பவானி சிங் நியமனம் தவறு என்றாலும் மறு விசாரணை தேவையில்லை என்று நீதிமன்றம் கூறியிருப்பதை வைத்தி மாமா முதலில் எடுத்து வைக்கிறார். இது தீர்ப்பு குறித்த விளக்கம் என்று இன்னும் தினமணியின் நடுநிலை வேடத்தை நம்பும் கோயிந்துகள் நம்பலாம்.
ஆனால், அந்த விளக்கத்தினுள்ளே மாபெரும் அர்த்த சாஸ்திரத்தின் பொழிப்புரை மறைந்துள்ளதை அடுத்து வரும் பத்திகளில் அசால்ட்டாக பிட்டு வைக்கிறார் சாணக்கிய வைத்தி.
போயஸ் தோட்டத்து மந்திரவாதி வைத்தி
போயஸ் தோட்டத்து மந்திரவாதி வைத்தி
ஒரு வழக்கில் வாதம் புரியும் அரசு வழக்குரைஞர் அந்த வழக்கின் மேல்முறையீடுகளிலும் வாதிடலாம் என்று குற்றவியல் சட்டப் பிரிவு 301 சொல்கிறதாம். இதைத்தான் நீதிபதி பானுமதி ஏற்று பவானி சிங் நியமனம் தவறில்லை என்று குறிப்பிட்டதாக எழுதுகிறார் வைத்தி. தற்போது உச்சநீதிமன்றத்தின் மூவர் அமர்வு இந்த நியமனத்தை தவறு என்று தீர்ப்பளித்திருப்பதை இப்படி மறைமுகமாக மறுக்கிறார் மாமா. இருப்பினும் நீதியின் தீர்ப்புக்கு வணங்குவதாக கூறி அவமதிப்பு வழக்கு அபாயங்களிலிருந்தும் காத்துக் கொள்கிறார்.
அதே நேரம் இந்தத் தீர்ப்பின் மூலம் உச்சநீதிமன்றம்தான் சுயமுரண்பாட்டோடு நடந்துள்ளதாக அடுத்து நிரூபிக்கிறார். அதாவது, இந்த மேல்முறையீட்டு வழக்கு முழுவதும் 3 மாதங்களில் முடிக்க வேண்டும் என்று கட்டளையிட்டதே உச்சநீதிமன்றம்தானாம். அதைத்தான் கர்நாடக உயர்நீதிமன்ற நீதிபதி குமாரசாமி குறிப்பிட்டு, அன்பழகனது மனுவை நிராகரித்தாராம்.
இதன்படி ஒரு வழக்கு எத்தனை காலத்திற்குள் நடக்க வேண்டும் என ஒரு நீதிமன்றம் முடிவெடுத்து விட்டால் பிறகு குற்றவாளியே அரசு தரப்பில் வாதாட வழக்குரைஞரை நியமிப்பதெல்லாம் பிரச்சினை இல்லையாம். எதற்கு இப்படி சுற்றி வளைக்க வேண்டும் வைத்தி சார்? ஜெயலலிதாவையோ இல்லை வைத்தியையோ நீதிபதியாக்கினால் ஒரு விநாடியில் வழக்கு முடிந்து விடுமே! பக்கத்து இலை பாயாசம் மற்றும் பங்சுவாலிட்டி மேல என்னமா ஒரு லவ்வு………
சொத்துக் குவிப்பு வழக்கு குறிப்பிட்ட காலத்திற்குள் முடிய வேண்டும் என்று உச்சநீதிமன்றம் ஏன் உத்திரவிட்டது? இந்த வழக்கை இந்தியாவிலேயே இப்படி ஒரு முன்னுதாரணம் இல்லாத அளவுக்கு ஆயிரெத்தெட்டு வழிகளில் இழுத்தடித்தது யாராய்யா? வாய்தா ராணி என்று பட்டமே இங்கு பொன்னெழுத்தில் உருவாக்கப்பட்டு வழங்கப்பட்டதெல்லாம் வைத்திக்கு புரியாது என்றால் அவருக்கு பிடித்திருப்பது பைத்தியமா இல்லை பக்தியா?
எந்த மாநிலத்தில் வழக்கு நடைபெறுகிறதோ அந்த மாநிலம்தான் வழக்குரைஞரை நியமிக்க வேண்டும் என்றால் அப்படி நியமிக்காத கர்நாடக அரசைத்தான் நீதிமன்றம் கண்டித்திருக்க வேண்டுமாம். மாறாக தமிழக அரசை கண்டிருத்திருப்பது கண்டு பூணுல் சிவக்கக் கேட்கிறார் தினமணி வைத்தி.
conspiracy-theoriesஇதன்படி சொத்துக்குவிப்பு வழக்கில், ஏதோ நல்ல மனது காரணமாக கிடைக்கும் சொத்துக்களை குவித்து விட்ட  தோழிகளுக்கு பதில் அந்த சொத்துக்களை வம்படியாக திணித்த தொழிலதிபர்களைத்தான் டின் கட்டியிருக்க வேண்டும். ஒரு வீட்டிற்குள் பீரோ இருப்பதால்தான் பீரோ புல்லிங் திருடன் திருடுகிறான். இதற்கு பீரோ உரிமையாளரை கைது செய்யாமல் திருடியவரை கைது செய்வது நியாயமா என்று கேட்கிறார் நிமிர்ந்த நன்னடைக்கு சொந்தம் கொண்டாடும் மாமா.
சொல்லப் போனால் அம்மா அரசை கண்டித்திருக்கும் வாசகங்களை மேன்மை தாங்கிய நீதிபதிகள் பதிவு செய்ய வேண்டிய அவசியமே இல்லை என்று போல்டாக போடுகிறார். போயஸ் தோட்டத்திற்காக இப்படி மானங்கெட்டு போனாலும் உச்சநீதிமன்றத்தை எதிர்க்கும் தைரியம் வைத்தி மாமா அல்லாது யாருக்கு வரும்? ஒரு வேளை சோ-வுக்கு வரலாம்.
பவானி சிங்கின் வாதங்களை புறக்கணித்து விட்டு, நீதிபதி குமாரசாமி தனது தீர்ப்பை வழங்க வேண்டும் என்று உச்சநீதிமன்றம் வழிகாட்ட முற்பட்டிருப்பது  அந்த நீதிபதியின் (குமாரசாமியின்) கௌரவத்தை குலைப்பதாகாதா என்று சீறுகிறார் நிலத்தில் அஞ்சாத நெறிகளுக்கு சொந்தக்காரரான வைத்தி.
ஜெயா எனும் ஊழல் பெருச்சாளியின் வழக்கை ஒரு மாபெரும் ஊழல் பிரச்சினையாக கருதியே தீர்ப்பளிக்க வேண்டும் என்ற தொனியில் நீதிமன்றம் கூறியிருப்பதைத்தான் இப்படி சாடுகிறார். இது நீதிபதி குமாரசாமியின் மீதான அக்கறையா இல்லை அம்மாவை அண்டிப்பிழைத்து வாழும் ஒரு அற்பத்தின் வியாக்கியானமா என்று யாருக்கும் குழப்பம் வரவே வராது.
ஏனெனில், உயர்நீதிமன்ற நீதிபதி தீர்ப்பை வழங்கிய பிறகு மேல்முறையீட்டில் அந்தத் தீர்ப்பின் குறைகளை சுட்டிக் காட்டி, சரியான புரிதலுடன் –  அப்ஃளிகேஷன் ஆஃப் மைண்ட் – தீர்ப்பு எழுதப்படவில்லை என்று கூற உச்சநீதிமன்றத்திற்கு உரிமை இருக்கிறதாம். மாறாக, அந்த சுட்டிக்காட்டலை இப்போதே செய்ய நினைப்பது தவறான முன்னுதாரணம் என்று கன்னம் பழுக்க பேசுகிறார் ஜென்டில்மேன் வைத்தி.
என்ன செய்ய! நீதித்துறை என்பதே ஆதித்யா சேனலில் வரும் வண்டு முருகனது சிரிப்பு மன்றம் என்பதை சொத்துக் குவிப்பு வழக்கின் இத்தனை ஆண்டுகளில் எண்ணிறந்த முறைகளில் ஜெயா கும்பல் நிரூபித்தாலும் எச்சக்கலைகளுக்கு எப்படி புரியும்? ஜாமீனை மீனாக நினைத்த வண்டு முருகனது உதவியாளர்கள் போல, தாமதத்தை அம்மாவுக்கு எரிச்சலூட்டும் விடயங்களில் மட்டும் தேடுகிறது தினமணி.  அதன்படி ஜெயா கும்பல் தண்டிக்கப்படும் வாய்ப்பை உருவாக்குவது மட்டும் நீதித்துறையின் தவறான முன்னுதாரணமாம்.
இதே உச்சநீதிமன்ற தலைமை நீதிபதி இதே ஜெயாவுக்கு சட்ட விரோதமாக பிணை வழங்கினாரே அப்போது இதே வைத்தி எந்த கோவிலுக்கு மா விளக்கு வைக்க போயிருந்தார்?
மேல்முறையீட்டில் பவானி சிங் வாதிட்டது குறித்து தி.மு.கவுக்கு பெரும் ஆட்சேபணை இருந்தாலும் அவர்களது உள்நோக்கம் புதிய வழக்குரைஞரை நியமித்து தீர்ப்பு வழங்கப்படுவதை தாமதப்படுத்துவது என்று ஜேம்ஸ்பாண்ட் போல புலனாய்வு செய்து கூறுகிறார் வைத்தி.
பவானி சிங்கை தி.மு.கவிற்கு மட்டும் பிடிக்காதாம்.
பவானி சிங்கை தி.மு.கவிற்கு மட்டும் பிடிக்காதாம்.
பவானி சிங்குதான் வேண்டுமென்று ஜெயாவின் வக்கீல் படை எல்லா நீதிமன்றங்களிலும் வேர்க்க விறுவிறுக்க போராடியதும், அதற்கு பிராயச்சித்தமாக பவானி சிங்கும் அதிக சம்பளத்திற்கு பிகு பண்ணி பிறகு நீதிபதி குமாரசாமி கேள்வி கேட்கும் போது அச்சு அசலாக தில்லானா மோகானாம்பாள் வைத்தி போல சிரித்தாரே? பாம்பின் கால் பாம்பறிய வேண்டுமே மிஸ்டர் வைத்தி?
ஜெயாவின் சொத்து முறைகேடுகளை பச்சை பச்சையாக காப்பாற்றும் முயற்சியில் பவானி சிங் ஈடுபட்டது ஏதோ தி.மு.கவிற்கு மட்டும் ஆட்சேபணை ஏற்படுத்துமென்றால் இந்த வைத்தி சார் துன்னுவது அரிசியா இல்லை நரகலா என்று கேட்பது ஒன்றும் அநாகரிகமில்லையே?
தீர்ப்பை தாமதப்படுத்துவதால் தி.மு.கவிற்கு என்ன பயன்? ஜெயாவுக்கு சாதகமாக தீர்ப்பு வந்து விட்டால் அடுத்த தேர்தலில் அ.தி.மு.கவை எதிர்கொள்ள வேண்டிய கட்டாயம் தி.மு.கவுக்கு உண்டாம். அதனால்தான் வழக்கை இழுத்து தேர்தல் முடியும் வரை ஆதாயம் அடைய தி.மு.க சதி செய்கிறது என்று போயஸ் தோட்டத்து மந்திரவாதி போல ஜோசியம் கூறுகிறார் வைத்தி.
இந்த வழக்கில் தி.மு.க விற்கு என்ன ஆதாயம் என்பது இருக்கட்டும். ஜனநாயகம், அரசு, கட்சிகள், நேர்மை, நீதிமன்றம், வழக்கு, ஊழலற்ற ஆட்சி இந்த வஸ்துகளுக்கு என்ன பாதிப்பு என்பதை திருவாளர் வைத்தி ஏன் யோசிக்க வில்லை? ஊழல் குற்றவாளிகள் தண்டிக்ப்பட வேண்டும், அந்தத் தண்டனை இங்கே தவறு செய்யும் அனைவருக்கும் ஒரு பாடமாக இருக்குமென்று ஏன் முழங்க முடியவில்லை?
ஆக பவானி சிங் நியமனம் குறித்த வழக்கு தி.மு.கவிற்கு ஆதாயமா இல்லை இந்த தீர்ப்பு குறித்து இப்படி ஜேப்படி திருடன் போல வெட்கம் கெட்டு பேசுவதால் தினமணிக்கு ஆதாயமா?
பவானி சிங் நியமனம் செல்லாது என்றாலும் மீண்டும் விசாரணை தேவையில்லை என்று உச்சநீதிமன்றம் கூறியிருப்பதை தினமணி வைத்தி மனதார பாரட்டுகிறாராம். அதன் மூலம் இந்த வழக்கை தாமதப்படுத்தும் தி.மு.கவின் சதி முறியடிக்கப்பட்டதாம்.
உயர்நீதிமன்ற மேல் முறையீட்டு வழக்கில் ஜெயா விடுவிக்கப்படுவார் எனும் நிலையில் தி.மு.க தலைவர் அன்பழகனது வழக்கு அதை மாற்றி விட்டது என்று கால் முதல் தலை வரை எரிச்சலுடன் புலம்புகிறார் வைத்தி. நல்லது, இந்த தாமதத்திற்கான அறச்சீற்றம் வாய்தா ராணியின் இழுத்தடிப்புகள் குறித்த மகிழ்ச்சியின் மற்றுமொரு பக்கம் என்றால்…………
தினமணியின் மறுபக்கம் என்ன? அம்மணமா?
நன்றி"வினவு.
=============================================================================================
இன்று,
ஏப்ரல் -29.
ஓவியர் ரவி வர்மா 
  • சர்வதேச நடன தினம்

  • ஜப்பான் தேசிய தினம்

  • புரட்சி கவிஞர் பாவேந்தர் பாரதிதாசன் பிறந்த தினம்(1891)

  • இந்திய ஓவியர் ரவி வர்மா பிறந்த தினம்(1848)



========================================================================

தமிழகத்தில் நிலநடுக்கம் உண்டாகுமா?

நமது தமிழக நகரங்கள் பல கடற்கரையையொட்டி உள்ளது.தலை 
நகர் சென்னை சுனாமி போன்ற இயற்கை சீற்றங்களை 
ஏற்கனவே எதிர் கொண்டுள்ளது.
; நேபாளத்தில் ஏற்பட்ட நிலநடுக்கம் போன்று  தமிழ் நாட்டில் உள்ள நகரங்கள்  இயற்கை சீற்றங்களை தாங்கும் வகையில் உள்ளதா 
என்பதை பரிசீலனை செய்ய ஒருவாய்ப்பை ஏற்படுத்திக்கொடுத்துள்ளது.
சென்னை மாநகரமும் நிலநடுக்கம் ஏற்படக்கூடும் என்று கருதப்படும் பகுதியில்தான் உள்ளது.
சென்னை நகரில் நாளுக்குநாள் அதிகரித்து வரும் மக்கள்தொகை பெருக்கத்தால் கட்டுமான நிறுவனங்கள் வானளாவிய கட்டிடங்களை கட்டிக் கொண்டே இருக்கிறார்கள். 
வீட்டுக்கு வீடு வாகனங்களும் பெருகிவிட்டதால் அடுக்குமாடி குடியிருப்புகள் கட்டும்போது தரைதளத்தில் வாகன நிறுத்தும் இடத்திற்கு விட்டு விட்டு முதல்மாடியில் இருந்து குடியிருப்புகளை அமைக்கிறார்கள். அப்படி அமைக்கும்போது அந்த தூண்கள் வலுவானவையாக இருக்கவேண்டும். இல்லையெனில் இதுபோன்ற கட்டுமானங்கள் ஆபத்தை உருவாக்கும் .தரைதளம் முழுவதும் வாகனம் நிறுத்தும் இடத்திற்கு ஒதுக்கி கட்டப்படும் கட்டிடம் எந்த அளவில் கட்டவேண்டும்;
தூண்களின் சுற்றளவு எந்த அளவு இருக்கவேண்டும் என்றுவிதிமுறைகள் உள்ளன. குறைந்த பட்சம் அந்த தூண்கள் 300 மிமீ அளவு அல்லது ஒரு அடி அகலம் இருக்கவேண்டும். 
பத்துமாடி கட்டிடம் அல்லது அதற்கு மேல் என்றால் தூண்கள் குறைந்தபட்சம் ஒருமீட்டர் சுற்றளவோடு இருக்கவேண்டும். மேலும் பழைய கட்டிடங்கள் என்றால்அரசு நிர்வாகத்தினர் ஆய்வுசெய்து அந்தகட்டிடத்தை புதுப்பித்து பலப்படுத்தவேண்டும்.
பழைய கட்டிடத்தை புதுப்பிக்கவேண்டும் என்றால் தூண்களை அகலப்படுத்தவேண்டும்.
இது கட்டிடத்தின் மொத்த செலவில் 25 விழுக்காடாக இருக்கும். அதேநேரத்தில் நிலநடுக்கத்தை தாங்கக்கூடிய கட்டிடதொழில்நுட்பம் என்றால் மொத்த செலவில் 15 விழுக்காடுக்கும் சற்று அதிகமாக தேவைப்படும்.
கட்டிடங்களில் தீ தடுப்பு வசதிகளும் அவசியம். 
காரணம் நில நடுக்கம் ஏற்பட்டால் கட்டிடங்கள் இடிந்து விழும்போது மின் கசிவு ஏற்பட்டு தீப்பிடிக்கும் ஆபத்து உண்டு.

சென்னை மாநகரை பொறுத்தவரை நில நடுக்க மண்டலம் 3ல் உள்ளது. 
அதாவது சென்னை  நகரில் ரிக்டர் அளவையில் 6 வரைநிலநடுக்கம் ஏற்படும் ஆபத்து உள்ளது. 
நகரில் நில நடுக்கம் ஏற்பட வாய்ப்புள்ள பகுதிகள் பல உண்டு என்றாலும் சில பகுதிகளில் வாய்ப்பு அதிகமாக உள்ளது. 
குறிப்பாக அடையாறுபகுதி மிகவும் மோசமான நிலத்தட்டின் மீது அமைந்துள்ளது. 
அந்தப்பகுதியில் பூமிக்கடியில் உள்ள மண் பொலபொலவென்று உள்ளதால் பூமிக்கடியில் மிகப்பெரிய பாறைகள் நகரும்போது கட்டிடங்கள் எளிதில் உடைந்து விழும் ஆபத்து உள்ளது என்று நிபுணர்கள் கூறுகிறார்கள்.
மறுபுறம் கடும்பாறைகள் உள்ள பகுதிகளில் போடப்படும் தூண்கள் நில நடுக்கத்தை ஓரளவு சமாளிக்கும் வகையில் உள்ளன.
அதே நேரத்தில் சென்னையில் உள்ள கட்டிடங்கள் நில நடுக்கத்தை எதிர்கொள்ளும் வகையில் உள்ளன என்று அரசுத் தரப்பினர் தொடர்ந்து கூறிவருகிறார்கள். 
கடந்த 10 ஆண்டுகளில் கட்டப்பட்ட கட்டடங்கள் அனைத்தும் நில நடுக்கத்தை தாக்குப்பிடிக்கும் வகையில் கட்டவேண்டும் .
இங்கு ஆண்டுதோறும் ஆயிரம்கோடி ரூபாய் மதிப்புள்ள கட்டிடங்களை கட்டுகிறோம்;

இந்தியாவில் நிலநடுக்கம் ஏற்படும் பகுதிகள் என்று தகவல்களை புதுப்பிக்கும் இந்திய தரநிர்ணய அமைப்பு (பிஐஎஸ்) அதுகுறித்த வரைபடத்தையும் வெளியிட்டு வருகிறது. 
கடைசியாக அந்த அமைப்பு வெளியிட்டுள்ள வரைப்படத்தில் முந்தைய வரைப்படத்தை விட தமிழகத்தில் மேலும் பலபகுதிகள் நிலநடுக்கம் ஏற்படக்கூடிய பகுதிக்குள் வந்துள்ளன.
 இந்த அமைப்புதான் நில நடுக்கத்தை தாங்கக்கூடிய கட்டிடத்திற்கான பொறியியல் வடிவமைப்புக்கான விதிமுறைகளையும் உருவாக்கி வருகிறது. மாநிலத்தில் மேலும் பல பகுதிகள் நில நடுக்கம் ஏற்படும் பகுதியின் மேல் அமைந்துள்ளதையும் அது கண்டுபிடித்துள்ளது.
காவிரி, வைகை ஆற்றோரப்பகுதி, கல்முனை அருகில் உள்ள பகுதி ஆகியவை இதில் அடங்கும். அதாவது மதுரை, தஞ்சாவூர், கோவை,நாகப்பட்டினம், புதுச்சேரி ஆகிய நகரங்கள் இதன் அருகில் உள்ளன.
இதனால் மற்றப் பகுதிகளில் நில நடுக்கம் ஏற்படாது என்பதல்ல.
இவை அனைத்தும் நிலநடுக்கம் கண்டிப்பாக என்றாவது உண்டாகும் நிலையில் உள்ள பகுதிகள் என்பதுதான்.அதை தவிர்க்க முன்னெச்சரிக்கை நடவடிக்கைகளை மேற்கொள்ள வேண்டும் .வந்த பின் புலம்ப நாம் இருப்போமா என்று கூட தெரியாது.
========================================================================