இன்றைய செய்தி,நாளைய வரலாறு. நாளைய வரலாறை படிப்போம்.

புதன், 30 செப்டம்பர், 2015

ஜெயலலிதா மிக திறமைசாலி,நிர்வாகத்திறமை மிக்கவர்

மத்திய தணிக்கைத்துறை தமிழ் நாடு அரசின் வரவு செலவுகளை ஆய்வு செய்ததில் பல்வேறு குளறுபடிகளை கண்டு பிடித்து வெட்ட வெளிச்சமாக்கி இருக்கிறது.
ஜெயலலிதா மிக திறமைசாலி,நிர்வாகத்திறமை மிக்கவர் என்று சிலர் சொல்லிக்கொண்டு திரிவதை உண்மை நிலை என்ன அன்பதை காட்டியுள்ளது தணிக்கைத் துறை அறிக்கை.
இது 2012-2013 மார்ச் வரையிலான கணக்கு மட்டுமே .
முந்தைய குளறுபடிகள் தனி.
இது அரசு செலவின முறைகேடுகள் மட்டும்தான்.
மற்றபடியிலான துறைவாரியான லஞ்ச -ஊழல்கள்தனி.     அவை இவைகளை விட அதிகம் . 

குடிசை மாற்று வாரியம் செய்த வீண் செலவு ரூ.19.17 கோடி :
கோவை மாநகராட்சிக்கு உட்பட்ட உக்கடம் பகுதியில், 55.35 கோடி ரூபாயில், 2,232 அடுக்குமாடி வீடுகள் கட்ட திட்டமிடப்பட்டது. 
மத்திய அரசு உதவியுடன் கட்டுமான பணிகள் துவங்கப்பட்டன.கட்டுமானப் பணிகள் முடியும் நிலையில் இருந்தபோது, நான்காவது பிரிவு கட்டடம் பூமிக்குள் இறங்கியது. இதையடுத்து, அங்கு கட்டப்பட்டு இருந்த பல பிரிவு குடியிருப்புகள் இடிக்கப்பட்டன. 
கட்டியது மற்றும் அவற்றை இடித்தது ஆகிய வகையில், குடிசை மாற்று வாரியத்துக்கு, 19.17 கோடி ரூபாய் இழப்பு ஏற்பட்டுள்ளது. 
குறைபாடுள்ள வடிவமைப்புகளை பின்பற்றியதே இந்த வீண் செலவுக்கு காரணம். 

குறைத்து மதிப்பிட்ட பதிவுத்துறை ரூ.7.59 கோடி :
 கூட்டுறவு சங்கங்கள் சட்டத்தின் கீழ் பதிவு செய்து, தமிழகத்தில் மட்டும் செயல்படும் கூட்டுறவு சங்கங்களுக்கு, அவை விற்பனை செய்யும் மனைகளுக்கு முத்திரைத் தீர்வை செலுத்துவதில் சலுகை வழங்கப்படும். 
பன்மாநில கூட்டுறவு சங்கங்கள் சட்டத்தின் கீழ் பதிவு செய்யப்பட்ட சங்கங்களுக்கு இந்தச் சலுகை பொருந்தாது. ஆனால், சென்னை மண்டலத்தில், மாதவரம், வில்லிவாக்கம் உள்ளிட்ட, எட்டு சார் பதிவாளர் அலுவலகங்களில், 2009ம் ஆண்டு ஏப்ரல் முதல், 2013ம் ஆண்டு மார்ச் வரை, பன்மாநில சட்டத்தின் கீழ் பதிவான, நான்கு கூட்டுறவு சங்கங்களின் மனை விற்பனைக்கு, முத்திரைத் தீர்வை செலுத்துவதில் சலுகை அளிக்கப்பட்டுள்ளது. 
இந்த வகையில், 7.59 கோடி ரூபாய் இழப்பு ஏற்பட்டு உள்ளது. அதேபோல், ஒன்பது சார் பதிவாளர் அலுவலகங்களில், 29 விற்பனை ஆவணங்களுக்கு, உட்பட்ட சொத்துகள் குறைவாக மதிப்பிடப்பட்டதால், ஒரு கோடி ரூபாய் அளவுக்கு வருவாய் இழப்பு ஏற்பட்டு உள்ளது.
சென்னையில், கோடம்பாக்கம் சார் பதிவாளர் அலுவலகத்தில், ஆவணங்கள் தவறாக வகைபடுத்தப்பட்டதால், ஆறு லட்சம் ரூபாய் இழப்பு ஏற்பட்டுள்ளது.

தாமதத்தால் மின் வாரியம் செய்த செலவு ரூ.109 கோடி
மின் உற்பத்தி மற்றும் மின் பகிர்மான பணிகளை, 'டான்ஜெட்கோ' செய்கிறது. நீண்ட கால மற்றும் நடுத்தர கால மின் கொள்முதல் ஒப்பந்தங்களை இறுதி செய்வதில் தாமதம் ஏற்படுகிறது. இதனால் ஏற்படும் மின் கொள்முதல் அளவு குறைபாட்டை சமாளிக்க, 'டான்ஜெட்கோ' குறுகிய கால மின் கொள்முதலை மேற்கொண்டது. 
ஆனால், குறுகியகால மின் கொள்முதலில் பல குறைபாடுகள் இருந்தன. ஒரே காலகட்டத்துக்கு, பல ஒப்பந்த புள்ளிகள் வெவ்வேறு விலைகளில் இறுதி செய்யப்பட்டுள்ளன. 
தனியார் மின் உற்பத்தி நிறுவனங்களிடம் இருந்து பெறப்படும் ஒப்பந்த புள்ளிகளை ஆய்வு செய்ய வலுவான அளவுகோல், 'டான்ஜெட்கோ'விடம் இல்லை. இதனால், 109.60 கோடி ரூபாய் அளவுக்கு கூடுதல் செலவு ஏற்பட்டு இருக்கிறது. 
மேலும், தனியார் மின் உற்பத்தி நிறுவனங்களுக்கு ஆதாயம் கிடைக்கவும் இது வழி வகுத்துள்ளது. தேவைக்கு ஏற்ப கடன் உத்தரவாத கடிதம் வழங்க, 'டான்ஜெட்கோ' தவறியதால், 25.64 கோடி ரூபாய்க்கு அதிக விலை கொடுத்து, மின்சாரம் வாங்கும் நிலை ஏற்பட்டு இருக்கிறது.

 'டான்சி' விலைகள்  அதிகம்.
 ரூ.1.44 கோடி : கடந்த, 2011ம் ஆண்டு மே மாதம், டான்சி நிறுவனம், 11 ஆயிரத்து, 393 கனஅடி அளவுள்ள தேக்கு மரக் கட்டைகளை, கேரள வனத்துறையிடம் இருந்து, 3.4 கோடி ரூபாய்க்கு வாங்கியது. 
அவை, 5,000 பெரிய கட்டில்கள் தயாரிப்பதற்காக வாங்கப்பட்டது. ஆனால், அரசுத்துறைகள் கொடுத்த வழக்கமான,' ஆர்டரின்' பேரில், அறைகலன்கள் செய்வதற்காக அவை பயன்படுத்தப்பட்டன. அதில், 709 கனஅடி கட்டைகளை, 2014 ஆகஸ்ட் வரை பயன்படுத்தவில்லை.மேலும், தமிழக வனத்துறை, 1 கன மீட்டர் தேக்கு மரக் கட்டையை, 58 ஆயிரத்து, 474 ரூபாய்க்கு விற்ற நிலையில், கேரள அரசிடம் இருந்து, 86 ஆயிரத்து, 691 ரூபாய்க்கு அதிக விலை கொடுத்து வாங்கியிருக்கின்றனர்.
 இதன் மூலம், 1.44 கோடி ரூபாய் கூடுதல் செலவு ஏற்பட்டுள்ளது.

'நபார்டு' திட்டத்தில் செயல்படும், 687 அரசு உயர் மற்றும் மேல்நிலைப் பள்ளிகளுக்கு பெஞ்ச், மேஜை ஆகியவை வாங்க, 'டான்சி' மற்றும் தமிழ்நாடு கதர் மற்றும் கிராமத் தொழில் வாரியத்தில், 'டெண்டர்' கோரப்பட்டது. 
கதர் மற்றும் கிராமத் தொழில் நிறுவனம் குறைந்த தொகையை குறிப்பிட்டிருந்த போதும், 'டான்சி' நிறுவனத்துக்கே, 33.34 கோடி ரூபாய்க்கு, 90 சதவீத கொள்முதல் ஆணை வழங்கப்பட்டது. கதர் வாரியத்துக்கு, 3.75 கோடி ரூபாய்க்கு, 10 சதவீத கொள்முதல் ஆணை மட்டுமே வழங்கப்பட்டு இருக்கிறது. 
இந்த விலை நிர்ணயம் மற்றும் கொள்முதல் தொடர்பாக, தமிழக அரசுக்கு, பள்ளிக் கல்வி இயக்குனர் தரப்பில், பல முறை விளக்கம் அளித்த பிறகும், அதிக விலை குறிப்பிட்டிருந்த,'டான்சிக்கு' அதிக கொள்முதல் ஆணை வழங்க அரசு உத்தரவிட்டு இருக்கிறது. 
இதனால், 3.88 கோடி ரூபாய் கூடுதல் செலவு ஏற்பட்டுள்ளது.

தவறான முடிவெடுத்த வாணிப கழக நஷ்டம் ரூ.3.85 கோடி:
நுகர்பொருள் வாணிபக் கழகம், பொது வினியோகம் மற்றும் அரசின் பிற திட்டங்களுக்கு வழங்க அரிசி, கோதுமை, பருப்பு, சர்க்கரை ஆகியவை கொள்முதல் செய்கிறது. 
இதில், பருப்பு வகைகள், திறந்த ஒப்பந்தபுள்ளி மூலம் வாங்கப்படுகிறது. 
கடந்த, 2012 - 13ல், பருப்பு வகைகள் ஒப்பந்த புள்ளியிலேயே குறைந்த விலையில் கிடைத்தபோதும், தவறான முடிவு எடுத்ததால், நுகர்பொருள் வாணிப கழகத்துக்கு, 3.85 கோடி ரூபாய் நஷ்டம் ஏற்பட்டுள்ளது.

கட்டாய கல்வி சட்டத்தில் குளறுபடி:
 இலவச மற்றும் கட்டாயக் கல்வி உரிமைச் சட்டத்தை அமல்படுத்த, பஞ்சாயத்து, மாநகராட்சி போன்ற அமைப்புகள் மூலம், உள்ளூர் அதிகார அமைப்பு உருவாக்கி கண்காணிக்க வேண்டும். 
ஆனால், தமிழக அரசு இதை செய்யவில்லை.கட்டாயக் கல்வி சட்டத்தின் நடைமுறைகளை உள்ளூர் அதிகார அமைப்பு மூலம் மேற்கொண்டு, மத்திய அரசிடம் நிதி பெற, பள்ளிக் கல்வி இயக்குனர் அறிக்கை அளிக்க வேண்டும். 
ஆனால், பள்ளிக் கல்வி இயக்குனரிடம், மெட்ரிக் பள்ளி இயக்குனர் ஆலோசனை அறிக்கை கேட்டும் அவர் அறிக்கை தரவில்லை. 
நான்கு மாவட்டங்களில், 1,004 நர்சரி பள்ளிகளில் ஆய்வு செய்ததில், 467 பள்ளிகள் இந்தச் சட்டத்தை அமல்படுத்தவில்லை. மேலும், 537 பள்ளிகளில் பல குறைகள் இருக்கின்றன. 
தமிழகம் முழுவதும், 862 மெட்ரிக் பள்ளிகளில் ஆய்வு நடத்தியதில், 334 பள்ளிகள் சட்டத்தை அமல்படுத்தவில்லை. 
மேலும், 801 பள்ளிகளில் ஏழை மாணவர் ஒருவருக்குக் கூட, கட்டாயக் கல்வி சட்டத்தின் கீழ் இடம் வழங்கவில்லை. இந்த சட்டம் அமல்படுத்தப்பட்ட பள்ளிகளிலும் பல குளறுபடிகள் இருக்கின்றன. தகுதியை உறுதி செய்யாமல், நலிந்த பிரிவினர் மட்டுமின்றி,மற்றவர்களுக்கும் இடம் தரப்பட்டுள்ளது. கட்டாயக் கல்விச் சட்டத்தின் கீழ் சேர்ந்தவர்களிடம் கூட, கட்டணம் வசூலித்து இருக்கின்றனர். 
இலவச சீருடை மற்றும் பாடப்புத்தகங்கள் வழங்கவில்லை. சட்டத்தை அமல்படுத்திய பள்ளிகளுக்கு முறையாக நிதி அளிக்கவில்லை.

மீன்வளத்துறையில் பணம் முடக்கம் ரூ.7.50 கோடி
சென்னை அருகேயுள்ள பழவேற்காடு ஏரியில், இரண்டு மீன் இறங்கு தளங்கள் கட்டும் பணிக்காக, 8.85 கோடி ரூபாய்க்கு ஒப்பந்தம் விடப்பட்டு, 2011ல் பணிகள் துவங்கின. இதற்கு முறையான அனுமதி பெறாததால், வனத்துறை ஆட்சேபம் தெரிவித்ததது. 
இதனால், 2012ல், அந்தப் பணிகள் முடங்கின. இதுவரை, அதற்காக, இரண்டு கோடி ரூபாய் செலவு செய்யப்பட்டுள்ளது. பணிகள் துவங்குவதற்கு முன், வனத்துறை அறிவுறுத்தல்படி, மீன் வளத்துறை முறையான அனுமதி பெறாததால், இரண்டு கோடி ரூபாய் முடங்கிக் கிடக்கிறது.மீனவர்களின் படகுகளில், வயர்லெஸ் கருவிகள் பொருத்த, 5.50 கோடி ரூபாய்க்கு, 'எல்காட்' நிறுவனத்துக்கு ஒப்பந்தம் தரப்பட்டுள்ளது.
 கடந்த, 2008ல், 3,100 வயர்லெஸ் கருவிகள் வாங்கப்பட்டுள்ளன. மீனவர்களிடம் இருந்து, 2,158 விண்ணப்பங்கள் பெறப்பட்டு, 1,928 விண்ணப்பங்கள் மட்டுமே சமர்ப்பிக்கப்பட்டன.
 இதில், 94 படகுகளுக்கு மட்டுமே இயங்கும் உரிமங்கள் தரப்பட்டன. 
மற்ற கருவிகள் முடக்கி வைக்கப்பட்டுள்ளன. இந்த வகையில், 5.50 கோடி ரூபாய் முடங்கியுள்ளது.
இந்த, இரு திட்டங்களால் மட்டும், 7.50 கோடி ரூபாய் முடக்கப்பட்டுள்ளது.

ஆவணங்கள் தராததால் அதிக இழப்பு ரூ.1,088 கோடி
வணிக வரி, மாநில ஆயத்தீர்வை, வாகன வரி, முத்திரைத் தீர்வை, பதிவுக் கட்டணங்கள், மின்சார வரி மற்றும் சுங்க வரி ஆகியவை மூலம், தமிழக அரசுக்கு வருவாய் கிடைக்கிறது. 
இதன்படி, 2013 - 14ம் ஆண்டுக்கான மொத்த வருவாய், 1.08 லட்சம் கோடி. 
இவற்றில் வரி வருவாய், 73,718 கோடி ரூபாய். இதில், 3,230 ஆவணங்களில், குறைவான மதிப்பீடு, குறைவான வரி விதிப்பு என, 1,088 கோடி ரூபாய் வரை வருவாய் இழப்பு ஏற்பட்டுள்ளது. இறக்குமதி சார்ந்த வகைகளில், 2011 - 12ல், 257 கோடி ரூபாய்; 2012 - 13ல், 368 கோடி ரூபாய், வரி அபராதம் விதிக்கப்படவில்லை. 
'தணிக்கைக்கு தேவையான ஆவணங்களை தயாராக வைத்திருக்க வேண்டும்' என, ஒரு மாதத்திற்கு முன், வணிக வரித்துறைக்கு தகவல் தெரிவித்தும், 183 அலுவலகங்களில், 26 ஆயிரத்து, 700 விற்பனை வரி மதிப்பீட்டு ஆவணங்களை தரவில்லை. 
இந்த காலதாமதம், தணிக்கை செய்வதை முறியடிக்க முயற்சி செய்வது போல் உள்ளது என, தணிக்கைத்துறை சுட்டிக் காட்டியுள்ளது.

தாலிக்கு தங்கம் வாங்கியதில் கூடுதல் செலவு ரூ.3.22 கோடி :
தமிழக அரசின், தாலிக்கு தங்கம் வழங்கும் திட்டத்துக்கு தேவையான தங்க நாணயம், 2011 - 12 மற்றும் 2012 - 13 ஆகிய நிதியாண்டுகளில், வங்கிகளிடம் இருந்து, சமூக நலத்துறை கொள்முதல் செய்தது. வங்கிகள், தங்கம் இறக்குமதி செய்ய, 2013ல், ரிசர்வ் வங்கி சில கட்டுப்பாடுகளை விதித்தது. 
இதனால், 2013 - 14ல், 'தங்க நாணயம் வழங்க முடியாது' என, வங்கிகள் மறுத்து விட்டன. இதையடுத்து, 'டெண்டர்' மூலம், தனியார் நிறுவனங்களிடம் இருந்து, தங்க நாணயம் வாங்க, தமிழக அரசு முடிவு செய்தது. அதன்படி, நான்கு கிராம் எடை கொண்ட, ஒரு லட்சம் தங்க நாணயம் கொள்முதல் செய்ய, சமூகநலத் துறை டெண்டர் ெவளியிட்டது.
கடந்த, 2013ல், டெண்டர் திறக்கப்பட்டபோது, சர்வதேச தங்கத்தின் மதிப்புக்கு நிகராக, இந்திய ரூபாய் மதிப்பை கணக்கில் எடுத்துக் கொள்ளவில்லை. 
இதனால், தமிழக அரசுக்கு 3.22 கோடி ரூபாய் நஷ்டம் ஏற்பட்டுள்ளது.

அரசு குறைத்து காட்டியது ரூ.2,370 கோடி
தமிழகத்தில், 2012 - 13ல், வருவாய் வகையில் மிகுதி காணப்பட்டதால், வருவாய் பற்றாக்குறை இல்லை. ஆனால், நிதி பற்றாக்குறை, 16 ஆயிரத்து, 519 கோடி ரூபாயாக இருந்தது. இது, 2013 - 14ல், வருவாய் பற்றாக்குறை, 1,788 கோடி ரூபாயாகவும், நிதிபற்றாக்குறை, 20 ஆயிரத்து, 583 கோடி ரூபாயாகவும் உயர்ந்தது. 
வருவாய் பற்றாக்குறையுடன், மூலதன செலவு உயர்வு, கடன்கள், முன் பணத்தை திரும்பப் பெற்றதில் குறைவு போன்ற காரணங்களால், நிதி பற்றாக்குறை அதிகரித்துள்ளதாக, மத்திய தணிக்கைத்துறை ஆய்வில் தெரிய வந்துள்ளது. 
மேலும், வருவாய் பற்றாக்குறை, 2,170 கோடி ரூபாய், நிதி பற்றாக்குறை, 200 கோடி ரூபாய் என, 2,370 கோடி ரூபாயை, பற்றாக்குறையில், அரசு குறைத்து காட்டியுள்ளது எனவும் தணிக்கைத்துறை கண்டுபிடித்துள்ளது.

2,500 பேருக்கு திருமண உதவி மறுப்பு :
தமிழக்தில், திருமண உதவி கோரி, 2011 மே 17க்கு முன், 2,538 விண்ணப்பங்கள் பெறப்பட்டன. இதற்கான, கூடுதல் நிதியை, சமூக நலத்துறை கமிஷனர் கோரியும், நிலுவை விண்ணப்பங்களுக்கு அரசு நிதி ஒதுக்கவில்லை.
 பயனாளிகளுக்கு உதவிகள் மறுக்கப்பட்டுள்ளன. 
மேலும், தாலிக்கு தங்கம் என்ற புதிய திட்டத்தின் கீழ், 2012 மார்ச் முதல் டிசம்பர் வரை, கோவை மாநகராட்சியால் பெறப்பட்ட, 58 விண்ணப்பங்கள், மாவட்ட சமூக நலத்துறை அலுவலகத்துக்கு அனுப்பப்பட்டது. 
ஆனால், இதுவரை உதவித்தொகை வழங்கவில்லை என, மத்திய தணிக்கைத்துறை சுட்டிக்காட்டியுள்ளது.

சிமென்ட் நிறுவன இழப்பு ரூ.1.78 கோடி: -
பொதுத்துறை ஊழியர்களுக்கான பணிக் கொடை, இந்திய பணிக் கொடை சட்டம் மற்றும் அவ்வப்போது கொண்டு வரப்படும் மாற்றங்களுக்கு ஏற்ப, நிர்ணயிக்கப்பட வேண்டும். 
2010 மே மாதம், பணிக்கொடை உச்சவரம்பை, 3.50 லட்சம் ரூபாயில் இருந்து, 10 லட்சம் ரூபாயாக, மத்திய அரசு உயர்த்தியது.
ஆனால், அதற்கேற்ப அரசு ஆணையை மாநில அரசு வெளியிடவில்லை. 
2007 ஜனவரி முதல், 2010 ஏப்ரல் வரை, பணிஓய்வு பெற்ற நிர்வாகப் பிரிவு ஊழியர்கள், 91 பேருக்கு தலா, 10 லட்சம் ரூபாயை பணிக் கொடையாக சிமென்ட் நிறுவனம் வழங்கிவிட்டது. 
அப்போது நடைமுறையில் இருந்த உச்சவரம்பான, 3.5 லட்சம் ரூபாயை விட, கூடுதலாக வழங்கப்பட்ட தொகை, 1.78 கோடி ரூபாய் ஆகும்.

வசூலான ரூ.10 கோடி அரசுக்கு வரவில்லை
சென்னை ராஜிவ் காந்தி அரசு பொது மருத்துவமனையில், 206 படுக்கைகள் கொண்ட, கட்டண சிகிச்சைப் பிரிவு உள்ளது. 2008 முதல், 2013 வரை, நோயாளிகளிடம் இருந்து, தமிழ்நாடு மருந்து சேவைக் கழகம், 10.13 கோடி ரூபாய் கட்டணம் வசூலித்துள்ளது.
இந்த தொகை அரசு கணக்கில் செலுத்தப்பட்டிருக்க வேண்டும். 
ஆனால், கருவூலத்தில் செலுத்தவில்லை. 
அந்தப் பணத்தில், 4.85 கோடி ரூபாய் செலவு செய்யப்பட்டுள்ளது.
இது, அரசியல் அமைப்புச் சட்ட வழிமுறைகள் மற்றும் தமிழ்நாடு கருவூல விதிகளை மீறிய செயல்.
=========================================================================================
இன்று,
அக்டோபர்-01.

  • உலக முதியோர் தினம்
  • உலக சைவ உணவாளர்கள் தினம்
  • தென்கொரியா ராணுவ தினம்
  • சிங்கப்பூர் குழந்தைகள் தினம்
  • இந்திய அஞ்சல் துறை ஏற்படுத்தப்பட்டது(1854)

இந்தியாவில் மட்டும், 10 கோடி பேர், 60 வயதை கடந்தவர்களாக உள்ளனர். 7
0 வயதை தாண்டியவர்கள், நான்கு கோடி பேரும், 80 வயதை கடந்தவர்கள், 90 லட்சம் பேரும் இருக்கின்றனர். முதியவர்களில் 40 சதவீதம் பேர், வாரிசுகளால் கைவிடப்பட்ட நிலையில் இருக்கின்றனர். 

இதுவே, தமிழகத்தில், 300க்கும் மேற்பட்ட முதியோர் இல்லங்கள் அமைந்திருப்பதற்கு காரணமாக இருக்கிறது.
முதியோரை கண்ணியமாகவும், கவுரவமாகவும் மதிக்க வேண்டியதன் அவசியத்தை வலியுறுத்தி, அக்., 1ல், சர்வதேச முதியோர் தினம் கடைபிடிக்கப்படுகிறது. 

முதன் முதலாக, 1991ல், சர்வதேச முதியோர் தினம் உலகெங்கும் கடை பிடிக்கப்பட்டது.கடந்த, 2002ல், சர்வதேச அளவில், முதியோருக்கான செயல்பாட்டு திட்டம் நடைமுறைப்படுத்தப்பட்டது. 

முதியோர் சுதந்திரம், பங்களிப்பு, வயதானவர்களை மதித்தல் போன்றவை, உலக முதியோர் தினத்தின் முக்கிய நோக்கங்கள்.

ஐ.நா., கணக்கீட்டின்படி, உலகில் ஒவ்வொரு, 10 பேருக்கு ஒருவர் என்ற அடிப்படையில், 60 வயதுக்கு மேற்பட்டவர்கள் உள்ளனர். 


2050ம் ஆண்டில், ஐந்துக்கு ஒன்று என்ற அடிப்படையிலும், 2150ல், மூன்றுக்கு ஒன்று என்ற அடிப்படையில் இருக்கும் என எதிர்பார்க்கப்படுகிறது.



=========================================================================================
மன் கீ பாத்

‘மன் கீ பாத்’ நாடகத்தைப் பார்க்க அரண்மனை அரங்கில் கூட்டம் நிரம்பி வழிகிறது. 
அறிவிப்பாளர்: மகாஜனங்களே! சற்று அமைதியாக இருங்கள். நாடகம் தொடங்க இன்னும் சில நிமிடங்களே இருக்கின்றன. அமைதி.. அமைதி!
(திரைச் சீலை உயர்கிறது. அம்சவர்த்தன புஜபலபராக்கிரம குபேந்திர மோடி மகாராஜா சிம்மாசனத்தில் கம்பீரமாக அமர்ந்திருக்கிறார். பல தூரதேசங்களிலிருந்து வரவழைக்கப்பட்ட பட்டாடைகள், ஆபரணங்கள், தங்கக் கவசங்கள் அவரது உடலை அலங்கரிக்கின்றன. பக்கத்தில் மகாராணியார் சிம்மாசனம் காலியாக இருக்கிறது. மன்னர் அந்தப் பக்கம் பார்ப்பதே கிடையாது).
மன்னர்: அமைச்சரே.. சபை கலையலாம்.. சாரி... கூடலாம்.
அமைச்சர்: கூடி விட்டது மன்னா!
மன்னர்: அமைச்சரே! நம் நாட்டில் மாதம் மும்மாரி பொழிகிறதா?
அமைச்சர்: சே! இந்தக் கேள்வியைக் கேட்டுக்கேட்டு அலுத்துவிட்டது மன்னா! மழை பொழிவதைக் கூட என்னிடம் கேட்டுத்தானா தாங்கள் தெரிந்துகொள்ள வேண்டும்? அரண்மனையை விட்டு சற்று வெளியே வந்து நாட்டைச் சுற்றிப் பார்த்தாலே மழை பொழிந்திருக்கிறதா இல்லையா என்பது தெரிந்துவிடுமே மன்னா?
மன்னர்: மன்னருக்கே ஆலோசனை சொல்லத் தொடங்கிவிட்டீரா? உம்மை மாற்றிவிட வேண்டியதுதான். அடுத்த ஆள் யாரென்று குருஜியிடம் கேட்டுவிட்டு உம்மைக் கடாசிவிடுகிறேன்.
அமைச்சர்: ஐயோ, ஐயோ.. வேண்டாம் மன்னா, வாய் தவறி உளறிவிட்டேன் .. என் பிழைப்பில் மண்ணைப் போட்டுவிடாதீர்கள், மன்னா ! நீங்கள் இனி அடுத்து நான்கு ஆண்டுகள் கழித்து உறியடித் திருவிழா வரும்போதுதான் மக்களைச் சந்திக்கக் கிளம்புவீர்கள் என்பது எனக்குத் தெரியாதா மகாராஜா?
மன்னர் : நம் நாட்டு மக்களைவிட வேற்று நாட்டு மக்களைச் சந்திப்பதையே நான் விரும்புகிறேன். அவர்கள் நான் என்ன பேசுகிறேனோ அதைக் கேட்கிறார்கள். என்னைக் கேள்வி கேட்பதில்லை. அடடா! என்ன உற்சாகமாக வரவேற்கிறார்கள்.. கைதட்டுகிறார்கள்! காதுக்கு எவ்வளவு ரம்மியமாக இருக்கும் தெரியுமா? அந்தக் கைதட்டல்களைக் கேட்டு மூன்று நாட்களாகி விட்டன. அண்டை நாடு ஏதும் அழைப்பு அனுப்பியிருக்கிறதா, அமைச்சரே?
அமைச்சர்:
அழைப்பு அனுப்ப வேண்டும் என்றெல்லாம் எதிர்பார்க்க வேண்டாம் மன்னா! எந்த நாட்டுக்குப் போக வேண்டும் சொல்லுங்கள். இதோ வருகிறேன் என்று ஓலை அனுப்பிவிடுகிறேன்.
காவலன்: அரண்மனைக்கு வெளியே மக்கள் கூட்டம் மன்னா! உங்களைப் பார்க்க வேண்டுமாம்.. ஏதோ கோரிக்கை இருக்கிறதாம். வரச் சொல்லவா மன்னா?
மன்னர் : இவங்க தொந்தரவு தாங்க முடியலியே? அந்த சனியன்களை உள்ளே விடவேண்டாம் காவலா.. மன்னர் உப்பரிகைக்கு வந்து தரிசனம் கொடுப்பார் என்று சொல்லித் தொலை!
(தரிசனத்திற்கு ஏற்பாடாகிறது.. குடிமக்களிடமிருந்து கூக்குரல்கள்...)
மன்னர் (கடுகடுப்புடன்) : என்ன வேண்டும் மகாஜனங்களே.. எதற்காக என்னைப் பார்க்க வேண்டும்?விவசாயிகள்: நாங்கள் உழுது பயிரிடும் எங்கள் உயிரான நிலத்தை வேற்று நாட்டான் எவனாவது வந்து அபகரித்தால் தங்களிடம் முறையிடலாம். தாங்களே அபகரித்தால் யாரிடம் போய் முறையிடுவது மன்னா?முஸ்லிம்கள் : எங்கள் தலையில் நாங்கள் தொப்பி வைக்கக் கூடாதாம்.. தொப்பி வைத்தவனெல்லாம் அரேபியாவுக்கு ஓடுங்கள் என்று அரண்மனை அதிகாரி மிரட்டுகிறார் மன்னா!
பெண்கள் : மாலை 6 மணிக்கு மேல் நாங்கள் வீட்டைவிட்டு வெளியே வரக்கூடாது என்று இன்னொரு அதிகாரி உத்தரவு போடுகிறார் மன்னா!
இளைஞர்கள்: எங்களுக்கு கல்வி வேண்டும்! வேலை வேண்டும்! கௌரவமான வாழ்க்கை வேண்டும்!வறியவர்கள் : நாங்கள் பட்டினி கிடக்கிறோம் மன்னா, பட்டினி கிடக்கிறோம். ஏனென்று கேட்க நாதியில்லை. எங்களுக்கு சோறு வேண்டும்!
மன்னர் : எனக்கு முந்தைய மன்னர் காலத்தில் நீங்களெல்லாம் என்ன செய்தீர்கள்? இதையெல்லாம் பொறுத்துக் கொண்டுதானே இருந்தீர்கள்? இப்ப மட்டும் ஏன் ஒப்பாரி வைக்கிறீர்கள்? அயல்நாடுகளுக்குப் போய் பல சீமான்களை வருந்தி வருந்தி உங்களுக்காகத்தான் நம் நாட்டுக்கு அழைக்கிறேன். அவர்கள் வந்து உங்கள் குறைகளைக் கேட்பார்கள். என்னை விடுங்கள்.
குடிமக்கள் : நாங்கள் பார்க்காத சீமான்களா மன்னா? இப்படி உப்பரிகையிலே நின்றுகூட எங்களுக்கு அவர்கள் தரிசனம் தரமாட்டார்கள். மன்னர்தான் எங்கள் குறைகளைப் போக்க வேண்டும். சென்ற ஆண்டு நகர்வலம் வரும்போது தாங்கள் பேசியதையெல்லாம் மறந்துவிட்டீர்களா மன்னா? நாங்கள் சொல்வதை சற்று காது கொடுத்துத்தான் கேளுங்களேன்!
மன்னர் (அமைச்சரிடம்): இவங்களோட பஞ்சப் பாட்டையெல்லாம் கேட்க நான் தயாராக இல்லை. நான் பேசுவதைக் கைதட்டிக் கேட்கும் கூட்டம் மட்டுமே எனக்கு வேண்டும். காவலர்களைக் கூப்பிட்டு இவர்களை விரட்டியடியுங்கள்!
காவலன் : மோகன் பாகவதரும் சிரவண் பகாடியாவும் தங்களைக் காண வந்திருக்கிறார்கள் மன்னா.. கீழே காத்திருக்கிறார்கள். 
(மன்னர் கிளம்புகிறார்).
மன்னர் (வந்து கொண்டே) : மன்னிக்க வேண்டும் சுவாஜி! அந்த சனியன்களை அனுப்பிவிட்டு வர சற்று தாமதமாகிவிட்டது. மன்னிக்க வேண்டும்!
மோகன் பாகவதர் : சம்ஸ்கிருதத்திற்கு ஒரு வாரக் கொண்டாட்டம் எப்படிப் போதும்? இந்த வருடம் முழுதும் கொண்டாட ஏற்பாடு என்ன? அதைக் கேட்கத்தான் வந்தேன்.
பகாடியா : முஸ்லிம்களைக் குழந்தைகள் பெற்றுக் கொள்ள எப்படி அனுமதிக்கிறீர்கள் என்றே தெரியவில்லை. ஆசிரமத்தில் படித்தது எதுவுமே உம் நினைவில் இல்லையா?
மன்னர் : எல்லாம் நினைவில் இருக்கிறது குருஜி! நாம் நினைத்தபடியெல்லாம் செய்யமுடியாமல் தவிக்கிறேன். இந்துக்களும் முஸ்லிம்களும் ஒற்றுமையாக இருந்து பழகிவிட்டார்கள். அதை மாற்றுவது அவ்வளவு எளிதாக இல்லை. ஏதோ, ஜனநாயகமாம்! மக்கள் உரிமையாம்! கேட்கவே நாராசமாக இருக்கிறது. கொஞ்ச கால அவகாசம் கொடுங்கள். எல்லாவற்றையும் செய்து முடிக்கிறேன்.
பாகவதர் : மறந்துவிடாதீர்கள்! பள்ளி, கல்லூரிகளில் இனிமேல் அறிவியல் வகுப்புகளே வேண்டாம்! ராமாயணம், மகாபாரதம், பகவத்கீதையைப் படித்தால் போதும்! யாராவது கேட்டால் அதில் இல்லாத அறிவியலா என்று மடக்குங்கள்!
மன்னர் : ஆகட்டும் குருஜி! பாரசீகத்திற்குக் கிளம்பிக் கொண்டிருக்கிறேன். விமானம் தயாராக இருக்கிறது. 
என்னுடன் வாருங்கள். உங்களை நாகபுரியில் இறக்கிவிட்டுப் போகிறேன்
                                                                                                                                                                                          கற்பனை : ராஜகுரு
================================================================================================================================
முகனூல்.............,!





அனைத்துலக நாடுகளும் சேர்ந்து ஒரு சர்வதேச விசாரணையைகூட இன்று இலங்கையில் கொண்டுவர முடியவில்லை...
ஆனா....பாருங்க நம்மூர் ஐயாச்சாமிகள் மட்டும் கலைஞர் நினைத்திருந்தால் அன்று போரை நிறுத்தியிருக்கலாம்னு நீட்டிமுழக்குவானுங்க...







செவ்வாய், 29 செப்டம்பர், 2015

அப்பாக்களுக்கு டாஸ்மாக்-அம்மாக்களுக்கு அலைபேசி?



மகளிர் சுய உதவிக் குழுவினர்களுகெல்லாம் அம்மா அலை பேசியாம் .
தமிழ் நாடு மிகவும் வேகமாக முன்னேறிக்கொண்டுதான் இருக்கிறது.
இரண்டு நாள் முதலீட்டாளர் மாநாட்டில் 2 .5 லட்சம் கோடி முதலீடு.
தமிழ் நாட்டில் மின் மிகை மாநிலமாகி மூன்று ஆண்டுகளாகி விட்டது.
 பிள்ளைகளுக்கு மடிக்கணினி கொடுத்தாகி விட்டது.
அம்மாக்களுக்கு  பாலூட்ட தனி இடம்.
இப்போது அலை  பேசி  ஏற்கனவே அப்பாக்களுக்கு டாஸ்மாக் அரசு  உற்சாகப் பானம் கொடுத்தாகி விட்டது.

மகளிர் சுய உதவிக்குழுவினர்களுக்கு சுழல் நிதியோ ,வங்கிக்கடனோ கொடுக்காத  அம்மா அரசு இப்போது அலைபேசி கொடுக்க காரணம்?

அப்போது இல்லாத பணம் 13000கோடிகளில் அலை பேசி கொடுக்க எங்கிருந்து வருகிறது?
சுய உதவிக் குழு பெண்கள் எல்லோரும் அலை பேசியில் தன்னிடம் குறைகளை உடனுக்குடன் சொல்லவா?
தமிழகத்தை வாட்டும் மின் வெட்டை நீக்க  இதுவரை 100 கூட செலவிடாத ஜெயலலிதா அரசு கோடிகளில் இலவசம் கொடுக்க பணம் உள்ளது.
அமைச்சர்களும்,அதிகாரிகளும் கால்கடுக்க போயஸ் தோட்டத்தில் தவம் இருந்த பின்னர் இன்டர்காம் மூலம் மட்டுமே பேசும் முதல்வரை அவர்கள் அப்படி எளிதாக தொடர்பு கொள்ள முடியுமா?
ஸ்டாலின் ஊர்,ஊராக போய் மகளிர் குழுவினர்களை சந்திப்பதை அதை வாக்குகளாக மாற்றி விடக் கூடாது என்ற நல்ல எண்ணத்தின் அடிப்படையில்தான் அம்மாவின் மனதில் இந்த அலைபேசி திட்டம் உதித்திருக்க வேண்டும்.
அல்லது திமுக தயாரிக்கும் தேர்தல் அறிக்கையில் இந்த அலைபேசி இலவசம் என்று இருப்பதாக காதில் விழுந்திருக்க வேண்டும்.
அரசுக்கு வருமானம் தருவதாலும்,அதன் வருமானம் மூலம்தான் இலவசங்கள் அல்லது விலை இல்லா பொருட்களை கொடுக்கிறோம்.அதானால் மதுக்கடைகளை மூடுவது இயலாத காரியம் என்று அமைச்சர் நத்தம் விசுவநாதன் கூறியுள்ளார்.

இவர் இதில் உண்மையை கூறியுள்ளார்.அதானால் தமிழ் நாட்டில் மின்வெட்டே இல்லை என்று இவர் சட்டப்பேரவையில் கூறியது உண்மையாகி விடாது.
அந்த மதுக்கடை வருமானத்தில்  வரும் அம்மா அரசு இலவசமாக தரும்  அலைபேசியை   மகளிர் சுய உதவிக்குழுவினர் வாங்கிக் கொண்டால் மதுக்  கடைகளை டாஸ்மாக்கை மூடு என்று சொல்லுவது,அதானால் தங்கள் குடும்பம் சீரழிகிறது என்று சொல்வதற்கே அவர்களுக்கு தகுதியோ,உரிமையோ இல்லாமல் போய் விடும்.
இலவசத்துக்கு  ஒடி போய் வரிசையில் நின்றால் அந்த இலவசம் வரும் வழியையும் நாம் ஒத்துக்கொள்ளத்தானே வேண்டும்.
மக்களின் மன நிலையை நன்கு தெரிந்து கொண்ட  வாக்குகளைப்பெற எதையும்செய்யத்துணிந்த அரசுதான்,கட்சிதான் ம்மா திமுக.
இப்பொது ஸ்டாலின் எவ்வாள்வுதான் ஊர்,ஊராக போய்,தெருத்தெருவாகப் போய் ஜெயலலிதா அரசின் அவலங்களை ,ஊழல்களை சொன்னாலும் தேர்தலில் பணத்தைக்கொடுத்தும்,தேர்தல் ஆணையம்,அலுவலர்கள்,காவல்துறையினர் உதவியுடன் வெற்றிப்பெற்று விடலாம் என்பதுதான் ஜெயலலிதாவின் கணக்கு.
அவருக்கு கூட்டணி கட்சிகள் எல்லாம் தேவை இல்லை.வானத்தில் பறந்து கீழே இறங்காமல் பரப்புரை செய்தாலும் வெற்றி பெற்று விடுவோம் என்ற நம்பிக்கை அதிகம் உள்ளது.
அந்த நம்பிக்கையை ஜெயலலிதாவுக்கு தந்தது சென்ற மக்களவை தேர்தல்தான்.
அதிமுக வைத்திருக்கும் கூட்டணி அந்த அளவு வலிமையானது.
ஆர்.கே.நகரில் மொத்தம்  3200 வாக்குகள் உள்ள தொகுதியில் 4100 வாக்குகளை பெற்று அமோகமான வெற்றியை ஜெயலலிதாவுக்கு அக்கூட்டணி பெற்று தந்தது.[இந்த சரித்திரம் படைத்த வாக்குப் பதிவுக்கு இதுவரை தேர்தல் ஆணையம் எடுத்த நடவடிக்கை?]
அதிமுக+காவல்துறை+தேர்தல் ஆணையம் = வெற்றி.
இதுதான் இன்றைய வெற்றிக்கான சூத்திரம்.இது இருக்கும் வரை ஸ்டாலின்  என்ன கருணாநிதியே சக்கர நாற்காலியில் வளம் வந்தால் கூட வெற்றி சந்தேகம்தான்.
மதுக்கடை வருமானத்தில் வரும் அலைபேசியை வாங்கும் ஒவ்வொரு மகளிரும் மதுக்கடைகளை மூட வேண்டாம் ,யார் குடும்பம் குடித்து சீரழிந்தாலும் பரவாயில்லை எமக்கு தேவை விலையில்லா,இலவசங்கள் என்று உறுதி கூறுபவர்கள்தானே?
அம்மா திட்டம்,அம்மா குடிநீர்,அம்மா உப்பு,அம்மா உணவகம்,அம்மா அலைபேசி,அம்மா விருது என்று தனது புன்னகை ததும்பும்  படத்துடன் எல்லாவற்றிற்கும் அம்மா என்று தனது பெயர் வைக்கும் ஜெயலலிதா ஏன் தனது வருமான வழியான டாஸ்மாக்கிற்கு அம்மா பெயரை சூட்டவில்லை?
மகளிர் சுய உதவிக்குழுவினர் சிந்திப்பார்களா?
========================================================================================
இன்று,
செப்டம்பர்-30.
  • தமிழ் விக்கிப்பீடியா ஆரம்பிக்கப்பட்டது(2003)
  • சர்வதேச மொழிபெயர்ப்பு தினம்
  • போட்ஸ்வானா விடுதலை தினம்(1966)
  • உலகின் முதலாவது நீர்மின் உற்பத்தி நிலையம் அமெரிக்காவில் அமைக்கப்பட்டது(1882)
  • பாகிஸ்தான், ஏமன் ஆகியன ஐநாவில் இணைந்தன(1947)

========================================================================================

கலப்பட பெரிய நிறுவனங்கள்.

கடலை எண்ணெய், சூரியகாந்தி எண்ணெய் என்ற பெயரில் பிரபல நிறுவனங்கள் விற்றுவரும் பல பாக்கெட்களில் பாமாயில், பருத்திவிதை எண்ணெய் கலப்படம் செய்யப்பட்டிருப்பது நுகர்வோர் அமைப்பின் ஆய்வில் தெரியவந்துள்ளது.
‘தூய்மையான கடலை எண்ணெய், நல்லெண்ணைய்யை சமையலில் சரியான அளவில் பயன்படுத்துவது உடலுக்கு நல்லது’ என்று சமீபகால ஆராய்ச்சிகள் தெரிவிக்கின்றன. 
இதை தங்களுக்கு சாதகமாக பயன்படுத்திக்கொண்ட ஒருசில எண்ணெய் விற்பனை நிறுவனங்கள் விலை குறைவான பாமாயில், பருத்திவிதை எண்ணெய், தவிட்டு எண்ணெய் போன்றவற்றை கலப்படம் செய்து கடலை எண்ணெய் என்ற பெயரில் விற்பது இந்திய நுகர்வோர் சங்கம் நடத்திய ஆய்வில் தெரியவந்துள்ளது.

சென்னை, விழுப்புரம், சேலம், தருமபுரி, திருச்சி, ஈரோடு ஆகிய 6 மாவட்டங்களில் 14 நிறுவனங்களின் கடலை எண்ணெய், சூரியகாந்தி எண்ணெய் பாக்கெட்களை சோதனை செய்தனர். 
தமிழக சுகாதாரத் துறையின் கீழ் இயங்கிவரும் சென்னை கிண்டி கிங்க்ஸ் பரிசோதனைக் கூடம் உட்பட 3 பரிசோதனைக் கூடங்களில் இவை சோதனை செய்யப்பட்டன. அவற்றின் முடிவு அதிர்ச்சி அளிப்பதாக இருந்தது.
‘கடலை எண்ணெய்’ என்று விற்கப்பட்ட 4 பிராண்டுகளின் பாக்கெட்களில் முழுக்க பாமாயில் மட்டுமே இருந்தது. 
ஒரு பாக்கெட் டில் பருத்திவிதை எண்ணெய் மட்டுமே இருந்தது. 
ஒரு பாக்கெட் டில் 90 சதவீதம் பாமாயில், 10 சதவீதம் கடலை எண்ணெய் இருந் தது. 
ஒரு சூரியகாந்தி எண்ணெய் பாக்கெட்டில் 50 சதவீதம் பாமாயில், 50 சதவீதம் பருத்திவிதை எண்ணெய் இருந்தது.
சமையல் எண்ணெய் பாக்கெட்டில் அக்மார்க் முத்திரை கட்டாயம் என உணவு பாதுகாப்பு விதிமுறை உள்ளது. 
ஆனால், 42 சதவீத சமையல் எண்ணெய் பாக்கெட்களில் அக்மார்க் முத்திரை இல்லை. 
உணவுப் பாதுகாப்பு மற்றும் தர நிர்ணய விதிகள் 2011-ன்படி அனைத்து உணவுப் பொருள் பாக்கெட்களிலும் உணவுப் பாதுகாப்பு தர நிர்ணய ஆணையத்தின் (FSSAI) குறியீடு, உரிமம் எண் குறிப்பிடப்பட வேண்டும். 
ஆனால், 79 சதவீத சமையல் எண்ணெய் பாக்கெட்களில் அந்த குறியீடு இல்லை. 64 சதவீத பாக்கெட்களில் உரிமம் எண் இல்லை. கலப்படம் இல்லாத சுத்தமான கடலை எண்ணெய் ஒரு லிட்டர் விலை ரூ.105 முதல் ரூ.120 வரை உள்ளது. 
ஒரு லிட்டர் பாமாயில் விலை ரூ.52 மட்டுமே. அதனால், பாமாயிலை நிறம், மணம் நீக்கி ரீஃபைண்டு செய்து, கடலை எண்ணெய் என்ற பெயரில் அதிக விலைக்கு விற்று மோசடி செய்கின்றனர்.
ஒரு லிட்டர் கடலை எண்ணெய் தயாரிக்க 2.5 கிலோ கடலை தேவை. ஒரு கிலோ கடலை விலை ரூ.100 முதல் ரூ.110 வரை. 
எனவே, கலப்படமின்றி சுத்தமாக ஒரு லிட்டர் கடலை எண்ணெய் தயாரிக்க குறைந்தபட்சம் ரூ.250 ஆகும். 
இதனால், செக்குகளில் ஆட்டப்படும் கடலை எண்ணெய் விலை அதிகமாக இருந்தது. 
மேலும், செக்கில் பாரம்பரிய முறையில் தயாரிக்கப்படும் எண்ணெயில்தான் உடலுக்கு நன்மை தரும் புரதம், நல்ல கொழுப்புச் சத்துகள் ஆகியவை சிதையாமல் கிடைக்கும். பாக்கெட்களில் குறைந்த விலையில் கிடைக்கிறதே என்று தரமற்ற எண்ணெயை மக்கள் வாங்கத் தொடங்கியதால், வருமானமின்றி செக்குகள் மூடப்பட்டுவிட்டன. 
நம் கண் முன்பாகவே கடலையைப் போட்டு எண்ணெய் எடுத்து தரும் செக்குகள் இப்போது இல்லை. கண்ணுக்குத் தெரியாமல் நடக்கிற இயந்திர சுத்திகரிப்பு முறை நடைமுறைக்கு வந்ததில் இருந்தே, கலப்படமும் தொடங்கிவிட்டது.
பிரபல நிறுவனங்களும் மக்களை இப்படி ஏமாற்றினால்?
இதையெல்லாம் கவனிக்க வேண்டிய உணவுத்துறை ஆய்வு அரசு அலுவலர்கள் அப்படி என்னதான் முக்கிய பணிகளை செய்து கொண்டிருக்கிறார்கள்?






திங்கள், 28 செப்டம்பர், 2015

விண்டொஸ் 10 ம்,விண்டொஸ் 7 ம்


பலர் இன்னும் விண்டோஸ் 10 ஆப்பரேட்டிங் சிஸ்டத்திற்கு மாறாமல், நாங்கள் விண்டோஸ் 7 சிஸ்டமே பயன்படுத்தி வருகின்றனர் . 
புதிய லேப்டாப் மற்றும் பெர்சனல் கம்ப்யூட்டர்களிலும், விண் 7 சிஸ்டத்தினையே தளவிறக்கம் செய்து பயன் படுத்துகின்றனர்.
அவர்களுக்காக விண்டோஸ் 7 சிஸ்டத்தில் கிடைக்கும் சில மாறுதலான வசதிகள் குறித்த டிப்ஸ்கள் இங்கு தரப்படுகின்றன.
விண்டோஸ் 7 ஆப்பரேட்டிங் சிஸ்டம் பயனாளர்களிடையே ஊன்றி சில ஆண்டுகள் ஆகிவிட்டன. விண்டோஸ் எக்ஸ்பி சிஸ்டம் முடிவிற்கு வந்த பின்னர், பெரும்பாலானவர்கள் இதற்கு மாறிக் கொண்டு, இது தரும் வசதிகளை மிகவும் விரும்பி பயன்படுத்தி வருகின்றனர். இவர்கள் அனைவரும், விண்டோஸ் 7 சிஸ்டம் குறித்த இயக்கக் குறிப்புகளை சில நூல்கள் வாயிலாகவும், தங்கள் பயன்பாட்டின் மூலமும் தெரிந்து கொள்கின்றனர். ஆனாலும், விண்டோஸ் 7 சிஸ்டம் கொண்டுள்ள பல விஷயங்கள் இன்னும் பலருக்குத் தெரியாமலேயே உள்ளன. 
இதற்குக் காரணம் எந்த நூல்களும் இது குறித்து எழுதாமல் இருப்பதுதான். பொதுவாகவே, கம்ப்யூட்டர் இயக்கத்தில், Undocumented Features எனச் சில உண்டு. இவற்றைப் பற்றி ஒரு சிலருக்குத் தெரிந்திருக்க வாய்ப்புண்டு. அவர்கள் மற்றவர்களுக்கு டாகுமெண்ட் செய்து வெளியிட்டால் தான் உண்டு. மேலும், இந்த சிஸ்டத்தினை வடிவமைத்தவர்கள், அவர்களுக்கு மட்டுமே தெரிந்திடும் வகையில் சில விசேஷ அம்சங்களை உருவாக்கி வைத்திருப்பார்கள். அவற்றை Easter Eggs என அழைப்பார்கள். அப்படிப்பட்ட சில வசதிகள் குறித்தும், Easter Eggs குறித்தும் இங்கு காணலாம்.

1. சில ஷார்ட்கட் கீகள்: புரோகிராமிற்கான ஐகான் ஒன்றில் கிளிக் செய்திடும் முன், ஷிப்ட் கீயை அழுத்திக் கொண்டு கிளிக் செய்தால், அந்த புரோகிராமின் விண்டோ ஒன்று ஏற்கனவே திறந்து செயல்பட்டுக் கொண்டிருந்தாலும், புதியதாக ஒரு செயல்பாட்டு விண்டோ திறக்கப்படும். எடுத்துக் காட்டாக, வேர்ட் புரோகிராமினைத் திறந்து, டாகுமெண்ட் ஒன்றில் செயல்பட்டுக் கொண்டிருக்கிறீர்கள். புதிய விண்டோ ஒன்றில், புதிய டாகுமெண்ட் அல்லது பழைய டாகுமெண்ட் ஒன்றைத் திறக்க வேண்டும் எனில், இவ்வாறு செய்திடலாம். புதிய வேர்ட் விண்டோ ஒன்று திறக்கப்படும்.
2. ஐகான் அழுத்துகையில், ஷிப்ட்+ கண்ட்ரோல் கீகளை அழுத்திக் கொண்டு செய்தாலும், மேலே கூறிய செயல்பாடு மேற்கொள்ளப்படும். இதில் என்ன வேறுபாடு என்றால், இந்த விண்டோ, முற்றிலும் அட்மினிஸ்ட்ரேட்டர் உரிமையுடன் திறக்கப்படும்.
3. கண்ட்ரோல் பட்டனை அழுத்திக் கொண்டு, இதே போல புரோகிராம் ஐகான் ஒன்றில் கிளிக் செய்தால், திறந்து செயல்படுத்தப்படும் விண்டோக்களில், இறுதியாகத் திறந்த விண்டோ திறக்கப்படும். 
திறக்கப்பட்ட விண்டோவின் மேல் பட்டியில் கர்சரை வைத்து கிளிக் செய்தால், அது மினிமைஸ் செய்யப்படும். இதனை மானிட்டர் திரையில் எங்கு வேண்டுமானாலும் கொண்டு சென்று அமைக்கலாம். இதன் அளவினை நாம் விரும்பும் வகையில் சிறிதாக்கலாம்; பெரியதாகவும் அமைக்கலாம். இதனை மவுஸ் தொடாமலும் அமைக்கலாம் என்பது உங்களுக்குத் தெரியுமா? இதோ அவை:
விண்டோஸ் லோகோ கீயினை அழுத்திக் கொண்டு அப் (UP) அம்புக்குறியினை அழுத்தினால், விண்டோவின் அளவைப் பெரிதாக்கலாம்.
அதே போல, விண்டோஸ் லோகோ கீயினை, வலது அல்லது இடது அம்புக் குறியுடன் அழுத்த, விண்டோ திரையின் இடது அல்லது வலது பக்கமாக நகர்த்தப்படும்.

பிரச்னைகளை மற்றவருக்குத் தெரிவிக்க: கம்ப்யூட்டரில் பிரச்னை ஒன்று ஏற்படுகையில், அதனை மற்றவருக்கு இதனால் தான், அல்லது இந்த செயல்பாட்டின் போதுதான் பிரச்னை ஏற்பட்ட து என்று சொன்னால் தான் புரியும். இதனை எப்படி சொல்வது? பிரச்னை ஏற்படுகையில், கம்ப்யூட்டர் செயல்பாட்டில், என்ன என்ன ஏற்பட்ட்து என நமக்குத் தெரியுமா? இதனைப் பதிவு செய்திடும் வகையில், டூல் ஒன்றை விண்டோஸ் 7 கொண்டுள்ளது. இந்த டூலின் பெயர் Problems Step Recorder. இதனை அணுக, ஸ்டார்ட் மெனுவில் கிளிக் செய்து, தேடல் கட்டத்தில் “Problem Record” என டைப் செய்து எண்டர் தட்டவும். அடுத்து, Record steps to reproduce a problem என்பதில் கிளிக் செய்திடவும். இது Problem Steps Recorder டூலை இயக்கத் தொடங்கும். உடன் என்பதில் அழுத்த, நாம் மேற்கொள்ளும் செயல்பாடுகள் அனைத்தும், டெஸ்க்டாப்பில் பதிவு செய்யப்படும். ஒவ்வொரு முறை மவுஸால் கிளிக் செய்திடும்போதும், டெஸ்க்டாப் திரை, ஸ்கிரீன் ஷாட் ஆகப் பதிவு செய்யப்படும். இவை அனைத்தும் “problem steps” என்றபடி வரிசையாக, தானாகவே பதிவு செய்யப்படும். பதிவு செய்தது போதும் என்று அதை நிறுத்தினால், பைலை ZIP file ஆக, சேவ் செய்திடும்படி நீங்கள் கேட்டுக் கொள்ளப்படுவீர்கள். அதே போல் பதிவு செய்திடலாம். பின்னர், தேவைப்படுகையில், இதனை விரித்து, ஸ்கிரீன் ஷாட்களை ஒவ்வொன்றாகப் பார்த்து, எப்போது பிரச்னை ஏற்பட்டது என்று அறியலாம். அல்லது, பிரச்னைகளை அறிந்து தீர்க்கக் கூடிய தொழில் நுட்பவியலாளருக்கு, இந்த பைலை அனுப்பலாம். அவர் அதனை விரித்துப் பார்த்து, பிரச்னையை உணர்ந்து கொண்டு, அதற்கான தீர்வினைத் தருவார். இப்படி ஒரு டூல் உள்ளது என, பல தொழில் நுட்ப வல்லுநர்களுக்கே தெரியாது.
அடுத்து சில விந்தையான, ஆனால் அதே சமயம் பயனுள்ள விண்டோஸ் 7 ஈஸ்டர் எக்ஸ் எனப்படும் சில குறுக்கு வசதிகளைக் காணலாம்.

1.GodMode: இது ஒரு மிக மிகப் பயனுள்ள டூல். விண்டோஸ் 7 சிஸ்டத்தின் இயக்க செயல்பாடுகள் அனைத்தையும் இதன் மூலம் செட் அப் செய்திடலாம். ஏறத்தாழ 270 சிஸ்டம் அமைப்பு செயல்பாடுகளை இதன் மூலம் மேற்கொள்ளலாம். இதற்கு டெஸ்க்டாப்பில், புதிய போல்டர் ஒன்றை உருவாக்கவும்.இதன் பெயராக “GodMode.{ED7BA470-8E54-465E-825C-99712043E01C}” என்பதனை அமைக்கவும் (மேற்கோள் குறிகள் இல்லாமல்). இந்த போல்டரின் ஐகான் படம் மற்றவற்றிலிருந்து 
சற்று வித்தியாசமாக நீல நிறத்தில் அமைந்திருக்கும். கண்ட்ரோல் பேனலுக்கான ஐகான் போலக் காட்சி அளிக்கும். பின்னர் அந்த போல்டரைத் திறந்து பார்க்கவும். கம்ப்யூட்டர் இயக்க செயல்பாடுகள், ஏறத்தாழ 45 பிரிவுகளில் 
பிரிக்கப்பட்டுத் தரப்படும். 
அட்மினிஸ்ட்ரேட்டிவ் டூல்ஸ், பாண்ட்ஸ், விண்டோஸ் பயர்வால், அப்டேட், யூசர் அக்கவுண்ட்ஸ் எனப் பல பயனுள்ள பிரிவுகளில், 270க்கும் மேற்பட்ட செட் அப் செயல்பாடுகளுக்கான லிங்க் கிடைக்கும். இவற்றில் தேவையானதில் கிளிக் செய்து, நாம் புதிய செட் அப் வழியை மேற்கொள்ளலாம். இந்த டூல் அதன் பெயருக்கேற்ப, நம்மை நம் கம்ப்யூட்டரின் கடவுளாக மாற்றுகிறது.
2. பைல்களைச் சுவடு இன்றி அழிக்க: நாம் அலுவலகத்தில் பயன்படுத்திக் கொண்டிருக்கிற கம்ப்யூட்டரை, அடுத்து நம் இருக்கையில் அமர்ந்து செயல்படப் போகும் இன்னொருவரிடம் தர வேண்டியதிருக்கும். நம் கம்ப்யூட்டரில் நம் சொந்த பைல்களைப் பதிந்து வைத்திருக்கலாம். என்ன தான் அழித்தாலும், Recuva போன்ற புரோகிராம்களால், அவற்றை மீண்டும் பெற்றுவிடலாம். இவ்வாறு இல்லாமல் சுவடே இல்லாமல், மொத்தமாக, முழுமையாக நீக்க விண்டோஸ் 7 வழி ஒன்று கொண்டுள்ளது. இதற்கு கமாண்ட் ப்ராம்ப்ட் (Command Prompt) செல்லவும். ஸ்டார்ட் தேடல் கட்டத்தில் cmd என டைப் செய்து எண்டர் அழுத்தினால், இந்த கட்டளைப் புள்ளி கொண்ட விண்டோ கிடைக்கும். இதில் “cipher /w:C” என டைப் செய்து எண்டர் தட்டவும். அழிக்கப்பட்ட அல்லது அழிக்கப்படாத பைல்கள் அனைத்தும் முழுமையாக நீக்கப்படும். இந்தக் கட்டளையை எந்த ட்ரைவில் உள்ள பைல்களுக்கு என செயல்படுத்துகிறோமோ, அதற்கான ட்ரைவ் எழுத்தினை, கட்டளையில் அமைக்க வேண்டும். 
இன்னும் சில ஷார்ட் கட் கீகளை இங்கு குறிப்பிடலாம். 
உங்கள் கம்ப்யூட்டரில் நிறைய விண்டோக்கள் திறந்த நிலையில் உள்ளதா? ஒவ்வொன்றிலும் ஏதேனும் புரோகிராம் ஒன்று திறக்கப்பட்டு, பைல் ஒன்று செயல்பாட்டில் உள்ளதா? அல்லது எந்த செயல்பாடும் இன்றி திறக்கப்பட்ட நிலையில் உள்ளதா? இவற்றை மூடிட, Windows Logo + Home என்ற கீகளை அழுத்தவும். ஒவ்வொரு முறை அழுத்தும்போதும், 
ஒவ்வொரு விண்டோ மூடப்படும். நீங்கள் அப்போது டெஸ்க்டாப்பில் திறந்து வைத்து செயல்படும் விண்டோ மட்டும் திறந்தபடியே இருக்கும்.
திரையில் உள்ள சிறிய எழுத்துக்களைப் பார்க்க இயலவில்லையா? விண்டோஸ் கீயை அழுத்திக் கொண்டு, நம் லாக் பட்டன் அழுத்திய நிலையில் + கீயை அழுத்தவும். விண்டோஸ் இயக்கத்தின் மேக்னிபையர் செயல்படத் தொடங்கும். 
முதலில் இருந்த விண்டோவிற்கு மேலாக ஒரு சிறிய விண்டோ காட்டப்படும். பழைய விண்டோவில் கர்சர் இருக்கும் பகுதி மட்டும் இங்கு பெரிது படுத்தப்பட்டு காட்டப்படும். மைனஸ் கீ அழுத்தினால், காட்டப்படும் அளவு குறைத்துக் காட்டப்படும்.
                                                                                                                                        நன்றி:தினமலர் 
==========================================================================================
இன்று,
செப்டம்பர்-29.

  • உலக இதய தினம்
  • சர்வதேச காபி தினம்
  • அர்ஜெண்டீனா கண்டுபிடிப்பாளர்கள் தினம்
  • ஓமன், அரபுக் கூட்டமைப்பில் இணைந்தது(1971)
  • ஜான் ரொக்பெல்லர், உலகின் முதலாவது கோடீஸ்வரர் ஆனார்(1916)

==========================================================================================















ஞாயிறு, 27 செப்டம்பர், 2015

27 செப்டம்பர் 2014.

நேற்று முதலாமாண்டு முடிவுற்றது.ஆமாம்.ஜெயலலிதா சொத்துக்குவிப்பு ஊழல் வழக்கில் குற்றவாளி.நான்காண்டுகள் சிறை என்று நீதியரசர் மைக்கேல் டி குன்கா தீர்ப்பளித்து முன்னாள் முதல்வராக ஜெயலலிதா சிறை சென்ற முதலாமாண்டு நினைவு நாள்.
ஆனால் அதன் பின் கணித மேதையும் நீதிக்கு அரசருமான குமாரசாமியின் கணித தேற்றம் மூலம் வெளியே வந்தது தனிக்கதை.சாண்டில்யனின் கதைகளை விட அதிகமான பக்கங்களையும் எதிர்பார்த்த திருப்பங்களையும் கொண்ட அக்கதை நம்மால் வெளியிட முடியாது.வெளியிட்டாலும் உங்களால் படிக்க காலம் போதாது.
எனவே முதல்வர்  ஜெயலலிதா காரின் கொடி கழற்றப்பட்டு முன்னாள் முதல்வராக்கப்பட்ட தின நிகழ்வுகள் மட்டும் உங்கள் நினைவுகளுக்காக.
நன்றி:சவுக்கு தளம்.
இந்த நாளை ஜெயலலிதா எப்படி அணுகியிருப்பாரோ தெரியவில்லை, ஒரு மாதமாகவே இரவு உறங்க முடியவில்லை. துளியும் உறக்கம் இல்லாமல் பல்வேறு ஊடகவியலாளர்கள் மற்றும் அதிகாரிகளோடு இரவு நெடு நேரம் விவாதித்துக் கொண்டிருந்த நாட்கள் பல.
என்ன ஆகும் இந்தத் தீர்ப்பு ?  ஜெயலலிதா தப்பித்து விடுவாரா ?  இது வரை மற்ற ஊழல் வழக்குகளில் இருந்து தப்பித்ததுபோல தப்பித்து விடுவாரா ?  அவரிடம் உள்ள அசாத்திய பண பலத்தை வைத்து, நீதிபதியை விலைக்கு வாங்கி விடுவாரோ ?  மைக்கேல் டி குன்ஹாவும், சதாசிவம், கர்ணன், கேபிகே வாசுகி, சி.டி.செல்வம் போல இருந்து விடுவாரோ என்று பல்வேறு விவாதங்கள்.
avd
ஒரு கோடி, இரண்டு கோடி கொடுத்தாலே வாயைப் பிளக்கும் நீதிபதிகள் இருக்கையில், 500 கோடியை வேண்டாம் என்று மறுக்கும் ஒரு மனிதன் இருக்க முடியுமா  என்று பல்வேறு ஐயங்கள்.   இதற்கு நடுவே நாட்கள் செல்ல செல்ல தினம் ஒரு வதந்தியை அதிமுக அடிமைகள் கிளப்பி விட்டு வந்தார்கள்.  குன்ஹா கடந்த வாரம் சென்னை வந்திருந்தார்.  டீல் முடிந்து விட்டது.  மோடியோடு டீல் செட் ஆகி விட்டது.  உளவுத்துறை ஐஜி அம்ரேஷ் பூஜாரி, கடந்த வாரம் கேரளா சென்றிருந்தார்.  அங்கே உள்ள ஒரு பாதிரியார் மூலமாக மொத்த டீலும் முடிந்து விட்டது என்று எத்தனையோ வதந்திகள்.

நீதிபதி மைக்கேல் குன்ஹா
ஆனால், நான் உறுதியாக நம்பினேன்.   நியாயம் வென்றே தீரும் என்று. இயற்கை நடக்கும் அநீதிகளை சமன்படுத்தியே வந்திருக்கிறது. உலகம் தட்டை என்று தேவாலயங்கள் ஆணித்தரமாக சொல்லி வந்தபோது, உலகம் உருண்டை என்று உறுதியாக கூறி தன் உயிரை இழந்தார் கலிலியோ.   இது போல வரலாறு நெடுக, எதிர்ப்புக் குரல்கள் எழுந்தே இருந்துள்ளன.
எதிர்குரலை ஒட்டு மொத்த சமூகமும் சேர்ந்து அழுத்த நினைத்தாலும் அது வீரிட்டு எழுந்தே வந்துள்ளது. அப்படி வீரிட்டு எழுந்த ஒரு குரல்தான் மைக்கேல் டி குன்ஹா.
ஜெயலலிதா தமிழகத்துக்கும் அதன் மக்களுக்கும் செய்த அநியாயங்கள் கொஞ்ச நஞ்சங்கள் அல்ல.  எத்தனையோ தாய்மார்களும், தகப்பன்மார்களும், வயிறெரிந்து சாபம் இட்டுள்ளனர். ஜெயலலிதாவும் இறுமாப்போடும், ஆணவத்தோடும், அகந்தையோடும், செறுக்கோடும் மட்டுமே வாழ்ந்து வந்திருக்கிறார்.  மனிதர்களை மனிதர்களாக ஜெயலலிதா ஒரு போதும் நடத்தியது கிடையாது.  நாம் வீட்டில் வளர்க்கும் நாய், எப்படி நம் காலை நக்க வேண்டும் என்று விரும்புவோமோ, அது போல, அமைச்சர்களும், கட்சிப் பிரமுகர்களும், அரசு அதிகாரிகளும், தன் காலை கூட அல்ல….. கால் வைத்த இடத்தை நக்க வேண்டும் என்று நினைத்தார்.  அவர் நினைத்தது எப்போதும் நடந்தே வந்திருக்கிறது.  அவ்வாறு அவர் நினைத்தது நடக்க நடக்க, ஜெயலலிதாவின் ஆணவம், மென்மேலும் கட்டுக்கடங்காத படி வளர்ந்து வந்தது.
இந்த ஆணவத்தோடுதான், 27 சனிக்கிழமை பரப்பன அக்ரஹாரா செல்வது என்று முடிவெடுத்தார்.   27 சனிக்கிழமை 11.04 மணிக்கு, நீதிபதி மைக்கேல் நீங்கள் அனைவரும் குற்றவாளிகள் என்று சொல்லும் வரை, ஜெயலலிதாவுக்கு, நாம் தண்டிக்கப்படப் போகிறோம் என்பது துளியும் தெரியாது.
உளவுத்துறை வட்டாரங்களில் விசாரித்தபோது, இந்த வழக்கிலிருந்து தப்பிக்க, சசிகலா தனியாக ஒரு ஆப்பரேஷனை மேற்கொண்டதாகவும், அந்த ஆப்பரேஷனின் சூத்ரதாரி ராமச்சந்திரா மருத்துவக்கல்லூரியின் வேந்தர் வெங்கடாச்சலம் என்றும் தெரிகிறது.  வெங்கடாச்சலமும், சசிகலாவும் சேர்ந்து, டீல் முடிந்து விட்டதாகவும், மைக்கேல் குன்ஹா 27ம் தேதி பிறப்பிக்க உள்ள உத்தரவின் நகல் என்று 15 பக்கங்கள் கொண்ட ஒரு தீர்ப்பையும் வழங்கியதாகவும் தெரிகிறது.  எப்போதும் எல்லோரையும் விலைக்கு வாங்கியே பழக்கப்பட்ட ஜெயலலிதா, அதை அப்படியே நம்பினார்.  அந்த நம்பிக்கையின் அடிப்படையில்தான், எனக்கு பாதுகாப்பு சரியில்லை. விடுதலைப் புலிகளால் என் உயிருக்கு ஆபத்து, பரப்பன அக்ரகாரா சிறை வளாகத்தில் நீதிமன்றத்தை அமைக்க வேண்டும் என்று மனு தாக்கல் செய்தார்.   ஜெயலலிதா அவ்வாறு மனுத் தாக்கல் செய்யாமல் இருந்திருந்தால், 20ம் தேதி தீர்ப்பு வழங்கப்பட்டிருக்கும்.   அந்த வாரம் முழுக்க உயர்நீதிமன்றம் செயல்பட்டது.  ஜாமீன் மனுவை தாக்கல் செய்திருக்கலாம்.   ஆனால் ஜெயலலிதாவின் மனு காரணமாக, வழக்கு 27ம் தேதிக்கு தள்ளிவைக்கப்ப்டடது.  6ம் தேதி வரை, தசரா விடுமுறை.
நாம் விடுதலைதான் செய்யப்படப் போகிறோம் என்று நம்பி விமானத்தில் ஏறினார் ஜெயலலிதா என்றால் மிகையாகாது.
ஜெயலலிதா, சசிகலா மற்றும் இளவரசி, ஒரே வாகனத்தில் வந்தனர்.  சுதாகரன் முன்னதாகவே ஒரு காரில் சென்றார். 10 45க்கு ஜெயலலிதா நீதிமன்றத்துக்குள் நுழைந்தார்.  நான்கு இருக்கைகள் போடப்பட்டிருந்தன.
நான்கு பேரும் வரிசையாக போடப்பட்ட நாற்காலியில் அமர்ந்தனர்.   தனக்கு நேராக சுதாகரன் அமர்ந்திருந்ததைப் பார்த்த ஜெயலலிதா, கண்ணாலேயே, சுதாகரனை பின்னால் செல்லும்படி மிரட்டினார்.  சுதாகரன் உடனடியாக நாற்காலியை பின்னால் தள்ளி அமர்ந்தார்.
சரியாக 11 மணிக்கு கோர்ட் ஓபன் என்று டவாலி சத்தமிட்டார். தன் இருக்கையில் அமர்ந்தார் நீதிபதி குன்ஹா.     அனைவரும் எழுந்து நின்றனர்.  சிசி நம்பர் 208 / 2004.  ஜெயலலிதா, சசிகலா, இளவரசி, சுதாகரன் என்று பெயர்கள் உரக்க அழைக்கப்பட்டது.  அரசுத் தரப்பு இவ்வழக்கின் குற்றச்சாட்டுகளை சந்தேகத்திற்கிடமின்றி நிரூபித்துள்ளது.   இதனால் உங்கள் அனைவரையும் நான் குற்றவாளிகள் என்று அறிவிக்கிறேன் என்று நீதிபதி கூறிய அடுத்த வினாடி, ஜெயலலிதா அருகில் இருந்த சசிகலாவை பார்த்து முறைத்தார். அப்போதுதான் அங்கே இருந்தவர்களுக்கு, தான் தண்டிக்கப்படப் போகிறோம் என்பது துளியும் தெரியாது என்பது தெரிந்தது.
11.05க்கு காவல்துறையினர் அனைத்து குற்றவாளிகளையும் தங்கள் கட்டுப்பாட்டில் எடுக்க வேண்டும் என்று உத்தரவிட்டார்.  நீங்கள் ஓய்வு எடுப்பதென்றால், அருகில் உள்ள அறையில் ஓய்வெடுக்கலாம் என்றார் நீதிபதி.  நான் என் காரில் காத்திருக்கிறேன் என்றார் ஜெயலலிதா.  நீதிபதி அப்படி அனுமதிக்க முடியாது.  தண்டனை எவ்வளவு என்பதை மதியம் 1 மணிக்கு அறிவிக்கிறேன் என்றார். அடுத்த ஐந்து நிமிடங்களில் ஜெயலலிதாவின் வாகனத்தில் இருந்த தேசியக் கொடி அகற்றப்பட்டது.
மதியம் 1 மணிக்கு தீர்ப்பு குறித்து என்ன சொல்ல விரும்புகிறீர்கள் என்றார்.  ஜெயலலிதா, இந்த வழக்கு 18 வருடமாக நடக்கிறது. இந்த வழக்கு எனது அரசியல் எதிரிகளால் புனையப்பட்டது.  இந்த வழக்கால் எனக்கு ரத்த அழுத்தம், மன உளைச்சல், மற்றும் நீரிழிவு ஆகிய நோய்கள் வந்துள்ளன.  இவையெல்லாவற்றையும் கருத்தில் கொண்டு தண்டனை விதிக்க வேண்டும் என்றார், இதன் பிறகு, சசிகலா, இளவரசி மற்றும் சுதாகரன் ஆகியோர் இதையே வேறு வார்த்தைகளில் சொன்னார்கள். சசிகலா கூடுதலாக எனக்கு கண் பிரச்சினை இருக்கிறது. இரண்டு மணி நேரத்துக்கு ஒரு முறை, கண் மருந்து விட வேண்டும் என்று கூறினார்.
அனைத்தையும் கேட்டுக் கொண்ட நீதிபதி, ஆளுக்கு நான்காண்டுகள் சிறை, ஜெயலலிதாவுக்கு 100 கோடி அபராதம் மற்றும் இதர குற்றவாளிகளுக்கு தலா 10 கோடி அபராதம் என்று கூறினார். ஜெயலலிதா, சசிகலா மற்றும் இளவரசி ஆகியோரை, அல்சூர் கேட் மகளிர் காவல் நிலைய ஆய்வாளர் அஞ்சுமலா டி நாயக் மற்றும் சேசாத்திரி நகர் உதவி ஆய்வாளர் ரம்யா ஆகியோர் கட்டுப்பாட்டில் எடுக்க வேண்டும் என்றும், சுதாகரனை பரப்பன அக்ரஹாரா உதவி ஆய்வாளர் வாசு கட்டுப்பாட்டில் எடுத்து, மத்திய சிறையில் அடைக்க வேண்டும் என்றும் உத்தரவிட்டார்.
இந்த விபரங்கள் எதுவும் வெளியே உள்ளவர்களுக்கு தெரியாது.
வெளியே வேறு உலகம்.   காவல்துறையினர் எவ்வளவோ முயற்சிகள் செய்து தடுத்தும், ஆயிரக்கணக்கில் பரப்பன அக்ரகாரா வளாகத்தின் அருகே அதிமுக அடிமைகள் கூடினர்.  ரயிலிலும், வாகனத்திலும், விமானத்திலும், ஆயிரக்கணக்கில் கூடினர்.  சரி….. இவ்வாறு கூடிய அடிமைகள், நீதிமன்றத்தில் வந்து என்ன செய்யப்போகிறார்கள் ?
ஆனால், எதற்காக வருகிறோம் என்றே தெரியாமல் ஏறக்குறைய 20 ஆயிரம் அடிமைகள் கூடினார்கள்.  சாரி சாரியாக வந்தார்கள்.   அழுதார்கள்.  புரட்சித் தலைவி வாழ்க என்று உரக்கக் கூவினார்கள். அம்மாவின் விடுதலை உறுதி என்று முழக்கமிட்டார்கள்.
கர்நாடக காவல்துறையினர் இந்த பாதுகாப்புக்காக செலவிட்ட தொகை 2 கோடி.  5000த்துக்கும் மேற்பட்ட காவல்துறையினரும், ஊர்க்காவல் படையினரும் பாதுகாப்புப் பணியில் ஈடுபட்டனர். தமிழகத்தில் விவிஐபிக்களாக, சிகப்பு விளக்குகளில், தொண்டர்களும், அடியாட்களும் புடைசூழ வலம் வந்த அமைச்சர்களும், அதிமுக முக்கிய பிரமுகர்களும், கர்நாடக காவல்துறையினர் முன்பு பம்மினர்.   குழைந்தனர்.  கூழைக் கும்பிடு போட்டனர்.  சிகப்பு விளக்கில் வலம் வந்து கொண்டு, சாதாரண பாமர மக்களை ஆணவத்தோடும், அலட்சியத்தோடும் கையாண்ட அமைச்சர்களை, கர்நாடக காவல்துறையினர் கசக்கிப் பிழிந்தபோது ஏற்பட்ட இன்பம் இருக்கிறதே….
அதை வார்த்தைகளால் வர்ணிக்க முடியாது. கர்நாடக காவல்துறையினர், பரப்பன அக்ரகாரா வளாகத்துக்குள் நுழையும் சாலையின் முனையிலேயே அனைவரையும் நிறுத்தினர்.  வாகனம் உள்ளே செல்ல அனுமதிச் சீட்டு வைத்திருந்தவர்கள் மட்டுமே உள்ளே செல்ல முடியும் என்று தெளிவாகக் கூறினர். மீறி விவாதத்தில் ஈடுபட்டவர்களை விரட்டி அடித்தனர்.   இதனால் அமைச்சர்கள் மற்றும் முக்கிய பிரமுகர்கள், எங்கே அம்மாவின் விடுதலைச் செய்தியை அருகாமையில் இருந்து கேட்க முடியாமல் போய்விடுமோ என்று அரற்றினர்.
இறுதியாக உண்மை உறைக்க உறைக்க, முகம் தொங்கிய அதிமுகவினர் சிறிது நேரம் கோஷமிட்டனர்.  கலவரம் செய்யலாமா என்று அவர்கள் யோசிக்கும் முன்னதாகவே 144 தடைச் சட்டம் 5 கிலோ மீட்டர் சுற்றளவுக்கு விரிவு படுத்தப்படுவதாக காவல்துறை அறிவித்தது.  கூட்டமாக நின்றவர்களை கலைந்து செல்லச் சொன்னார்கள்.  இரண்டு வாகனங்களில் கைதுக்கு சம்மதித்தவர்கள் ஏற்றிச் செல்லப்பட்டனர்.   கைதுக்கும் தயாராக இல்லாமல் சும்மா கூடி நின்ற அடிமைகள் அடித்து விரட்டப்பட்டனர்.
அந்த சாலையில் அனைத்து கடைகளும் காலை ஆறு மணி முதல் அடைக்கப்பட்டிருந்தன.  குடிக்கத் தண்ணீர் கூட கிடையாது.  அங்கே இருந்த அத்தனைபேரும், பட்டினியோடும் தாகத்தோடும்தான் இருந்தனர்.  தண்டனையில் முழு விபரமும் அறிந்து, உணவு குடிநீர் இல்லாமல் தளர்ந்து நடந்து சென்றபோதும், மனதில் ஏற்பட்ட இனம் புரியாத மகிழ்ச்சியை வார்த்தைகளில் விவரிக்க முடியாது.
இந்த நீதித்துறையின் வரலாற்றின் மிகச்சிறந்த நாளான 27 செப்டம்பர் 2014 அன்று பரப்பன அக்ரஹாரா வளாகத்தில் நடந்த களேபரங்களை ஒளி ஓவியமாக உங்களுக்கு அளிக்கிறேன்.
இந்த ஒளி ஓவியங்களும், இந்தக் கட்டுரையும், வரலாற்றின் பொன்னேட்டில் தன் பெயரை பொறித்த நீதிபதி மைக்கேல் குன்ஹாவுக்கு அர்ப்பணம். அடிமைகளுக்கு, தர்ப்பணம்.
காலை 7 மணிக்கே வந்திறங்கிய ராஜ்ய சபா எம்.பி சசிகலா
ஆடி காரில் ஆணவத்தோடு வந்த சாருலதா, அனுமதி இல்லை என்றதும் அதிர்ச்சி அடைகிறார்
அனுமதி இல்லை என்ற காவல்துறை அதிகாரிகளை அதிர்ச்சியாக பார்க்கும்
மதுரை மேயர் ராஜன் செல்லப்பா
அடிமைகள் கூட்டத்தால் மைல் கணக்கில் வாகனங்கள் தேங்கின
அய்யா நான் ஒரு அமைச்சருங்க என்று கெஞ்சும் அக்ரி கிருஷ்ணமூர்த்தி









====================================================================================
இன்று,
செப்டம்பர்-28.
  • இந்திய சுதந்திர போராட்ட வீரர் பகத் சிங் பிறந்த தினம்(1907)
  • உலக ரேபிஸ் நோய் தினம்
  • பசுமை நுகர்வோர் தினம்

  • சீன பகுத்தறிவாளர்
    கன்ஃபூசியஸ் பிறந்த தினம்(கிமு 551)



=====================================================================================