இன்றைய செய்தி,நாளைய வரலாறு. நாளைய வரலாறை படிப்போம்.

புதன், 31 ஆகஸ்ட், 2016

ஐ.டி.சி சிகரெட் கம்பெனி ஊழல் .


ன்றாடம் சிகரெட் பிடிக்கும் வழக்கமுள்ளவர்கள் கட்டாயம் ஐ.டி.சி. (ITC) என்கிற பகாசுரக் கம்பெனிக்கு பணம் கொடுத்தாக வேண்டும். சிகரெட் உற்பத்தியில் ஏகபோகமாய் விளங்கும் இந்த இந்திய புகையிலை நிறுவனம் தற்போது வேறு பல துறைகளிலும் இறங்கி, சர்வதேச அளவிலும் தனது கிளை நிறுவனங்களைத் துவக்கியுள்ளது. அதனுடைய மூலதன மதிப்பு 1997-ம் ஆண்டின் படி ரூ.5,100 கோடி.
சிகரேட்
சிகரேட்
ரூ. 350 கோடி ரூபாய் அந்நியச் செலாவணி மோசடி செய்ததாக இந்நிறுவனத்தின் முக்கிய அதிகாரிகள் 10 பேர் கைது செய்யப்பட்டு தற்போது பிணையில் வந்துள்ளனர். இதன் முன்னாள் தலைவர்கள் கே.எல். சக் மற்றும் ஜே.என். சாப்ருவும் கைது செய்யப்பட்டு, நீண்ட நாள் கழித்து பிணையில் வெளிவந்தனர்.
இந்திய புகையிலை நிறுவனம் இந்தியாவில் நட்சத்திர விடுதிகளும் உணவு விடுதிகளும் நடத்தத் தொடங்கி வெற்றி பெற்றது. இதனடிப்படையில் 1989-ல் அமெரிக்காவிலுள்ள நியூயார்க்கில் இந்திய உணவு விடுதியைத் தொடங்கியது. அங்கிருந்த இந்திய மருத்துவர்களிடம் நிறைய இலாபப் பங்கு கிடைக்கும் எனக்கூறி பங்கு பத்திரம் மூலம் நிதி திரட்டியது. ஆனால் உணவு விடுதி பெருத்த நட்டமடைந்தது.
நிறுவனம் நட்டமடைந்தது வெளியே தெரிந்தால் கெட்ட பெயர் வரும் என்பதற்காக பத்திரங்களுக்கு இலாபப் பங்கு தர ஐ.டி.சி. திட்டமிட்டது. ஏற்கனவே ஐ.டி.சி.யின் பத்ராசலம் பேப்பர் கம்பெனிக்கு பழைய பேப்பர்களைக் கொடுத்து வந்த நியூ ஜெர்சியிலிருக்கும் சுரேஷ் சித்தா லியா, தேவாங் சித்தாலியா என்பவர்கள் மூலம் முதலீட்டாளர்களுக்கு இலாபப் பங்கு தந்தது. இதற்காக ஐ.டி.சி. இவர்களுக்கு 40 லட்சம் டாலர்களைக் கொடுத்தது. இது முதல் அந்நியச் செலாவணி மோசடி, இதற்கு ரிசர்வ் வங்கியின் அனுமதி பெறவில்லை.
ஐ.டி.சி.யின் முன்னாள் தலைவர்கள் கே.எல்.சக் மற்றும்  ஜே.என். சாப்ரு
ஐ.டி.சி.யின் முன்னாள் தலைவர்கள் கே.எல்.சக் மற்றும் ஜே.என். சாப்ரு
பின் 40 லட்சம் டாலர் எப்படிக் கிடைத்தது? தான் ஏற்றுமதி செய்யும் பொருட்களை மிகக் குறைந்த விலைக்கு சித்தாலியாக்கள் நடத்தும் நிறுவனங்களுக்கு அனுப்புவது. அவர்கள் சர்வதேச விலையில் (அதாவது கூடுதல் விலைக்கு) விற்று, கூடுதல் பணத்தை வைத்துக் கொள்வார்கள். அதேபோல ஐ.டி.சி. வெளிநாட்டிலிருந்து இறக்குமதி செய்யும்போது கூடுதல் விலைக்கு கணக்கெழுதி சித்தாலியா நிறுவனங்கள் மூலம் இறக்குமதி செய்வது. இதில் கிடைக்கும் அதிகப்படி டாலரை சித்தாலியாக்கள் எடுத்துக் கொள்வார்கள். இப்படி ஏற்றுமதி – இறக்கு மதியில் அந்நியச் செலாவணி மோசடி செய்துள்ளனர்.
உணவு விடுதி நட்டத்தை ஈடுகட்ட சித்தாலியாக்களுடன் ஏற்பட்ட உறவு வேறு பல வழிகளிலும் தொடர்ந்தது. புதிய பொருளாதாரக் கொள்கையின் சலுகைகளைப் பெறவும் இந்த அந்நியச் செலாவணி மோசடி தொடர்ந்து நடத்தப்பட்டது. இப்படி நடந்த மோசடியின் விளைவாக சித்தாலியாக்களுக்கும் ஐ.டி.சிக்கும் கொடுக்கல் வாங்கலில் சிக்கல் ஏற்பட்டது. சித்தாலியாக்கள் ஐ.டி.சி.க்கு 1.6 கோடி டாலர் தர வேண்டும் என ஐ.டி.சி. அமெரிக்க நீதிமன்றத்தில் வழக்கு தொடுத்தது. சித்தாலியாக்களோ தாங்கள் பணம் தரவேண்டியதில்லை. ஐ.டி.சி.தான் பணம் தர வேண்டும். தவிர தங்களை இழிவுபடுத்தியதால் மான நஷ்டமும் தர வேண்டும் என சுமார் 5 கோடி டாலர் ஐ.டி.சி. தரவேண்டும் என எதிர் வழக்கு தொடுத்தனர்.
குதிரை கீழே தள்ளியது மட்டுமின்றி குழியையும் பறித்த கதையாக சித்தாலியாக்கள் இந்தியாவிலுள்ள அமலாக்கப் பிரிவு அதிகாரிகளுடன் தொடர்புகொண்டு, தமக்கு சட்டப் பாதுகாப்பு கேட்டுப்பெற்று. ஐ.டி.சி. நிறுவனத்தின் அந்நியச் செலாவணி மோசடியை ஆதாரத்துடன் காட்டிக் கொடுத்து விட்டனர். இதனடிப்படையில் அக்டோபர் 30-ல் தொடங்கி ஐ.டி.சி.யின் உயர் அதிகாரிகள் அனைவரும் கைது செய்யப்பட்டு சிறையிலடைக்கப்பட்டனர். இதன் முன்னாள் தலைவர்களான சாப்ருவும், சக்கும் தான் இந்த மோசடிகளை நடத்தியவர்கள் என்பதால் அவர்களும் கைது செய்யப்பட்டனர். நாடு முழுதும் ஐ.டி.சி. நிறுவனங்களில் சோதனைகள் நடத்தப்பட்டன.
ஐ.டி.சி. நிறுவனம் இதுவரை 800 கோடி ரூபாய்க்கு வரி ஏய்ப்பு செய்துள்ளது என்ற வழக்கும் கடந்த ஒரு ஆண்டாக நடந்து வருகிறது.
***
ஷா வாலஸ் பொருட்கள்
ஷா வாலஸ் பொருட்கள்
ஷா வாலஸ் என்கிற சீமைச் சாராய உற்பத்தி செய்யும் ஒரு பகாசுரக் கம்பனியும் அந்நியச் செலாவணி மோசடியில் சிக்கியுள்ளது. அதன் மீதும் தற்போது நடவடிக்கை எடுக்கப்பட்டு வருகிறது. இந்நிறுவனம் மோசடி செய்துள்ள மொத்த மதிப்பு ரூ.150 கோடி.
ஷா வாலஸ் நிறுவனத்திலுள்ள தொழிற்சங்கமே வழக்கு தொடுத்து இந்த மோசடிகளை அம்பலப்படுத்தியுள்ளது. இதன் உரிமையாளர் மனு சாஃப்ரியா என்கிற வெளிநாட்டு இந்தியர் மோசடியே மூலதனம் என்கிற அடிப்படையில் செயல்பட்டு திடீர்ப் பணக்காரராகிய இவர் இன்று இந்தியாவின் மிகப் பெரிய தொழிலதிபர்களில் ஒருவராவார்.
ஷா வாலஸ் தொழிற்சங்கத்தினரின் வழக்கே நிர்வாகத்தை மாற்ற வேண்டும் என்பதுதான். மோசடிகளால் இந்நிறுவனமே மூடப்படும் அபாயமுள்ளது என்றும் குற்றம் சாட்டியுள்ளனர்.
***
இந்த இரு அந்நியச் செலாவணி மோசடிகளைத் தொடர்ந்து 50 பெரிய தொழில் நிறுவனங்கள் சிறப்புக் கண்காணிப்பின் கீழ் வைக்கப்பட்டிருக்கின்றன.
1991 பட்ஜெட் தாக்கலின் போது மன்மோகன் சிங் மற்றும் 1997 பட்ஜெட் தாக்கலின் போது சிதம்பரம்
1991 பட்ஜெட் தாக்கலின் போது மன்மோகன் சிங் மற்றும் 1997 பட்ஜெட் தாக்கலின் போது சிதம்பரம்
1994-95-ல் இந்திய தொழில் நிறுவனங்கள் அந்நியச் செலாவணி கட்டுப்பாட்டுச் சட்டத்தை மீறியது ரூ. 663 கோடி என்றிருந்தது. இது 1995-96ல் ரூ.1447 கோடியாக உயர்ந்துள்ளது. மத்திய அதிகாரிகள் தமது அறிக்கையில் இதுவரை நடந்துள்ள வருமான வரி-சுங்கவரி ஏய்ப்பு மட்டும் ரூ.10,000 கோடி இருக்கும் என மதிப்பிடுகின்றனர்.
குறிப்பாக, புதிய பொருளாதாரக் கொள்கை நடைமுறைப்படுத்தப்பட்ட பின் பொருளாதாரக் குற்றங்கள் அதிகரித்துள்ளன. உற்பத்தி முழுவதும் ஏற்றுமதியை நோக்கித் திருப்பி விடப்பட்டுள்ளது. தவிரவும் சர்வதேச அளவில் வியாபாரத்தை நடத்த ஊக்குவிக்கின்றனர்.
இந்நிலையில் அந்நியச் செலாவணி கட்டுப்பாட்டுச் சட்டம் நடைமுறைக்குப் பொருந்தாது என எல்லா முதலாளித்துவப் பத்திரிகைகளும் கூக்குரலிடுகின்றன. ஏற்கனவே மன்மோகன் சிங் தனது காலத்தில் அந்நியச் செலாவணி கட்டுப்பாட்டுச் சட்டத்தில் சில மாற்றங்களைக் கொண்டு வந்தார். அது போதாது. இச்சட்டத்தை முற்றாகத் திருத்த வேண்டும் என்கின்றனர் தரகு முதலாளிகள்.
தவிர தற்போது ஐ.டி.சி. மற்றும் ஷா வாலஸ் கம்பனிகள் மீது எடுக்கப்படும் நடவடிக்கைகள் இந்தியாவின் தொழிற்துறையையே சீர்குலைக்கிறது. வெளிநாட்டிலிருந்து ரூ.14000 கோடி ரூபாய் மூலதனம் போட உள்ள அந்நியக் கம்பெனிகள் தயங்குகின்றன. எனவே உடனடியாக அந்நியச் செலாவணி கட்டுப்பாட்டுச் சட்டம் தளர்த்தப்பட வேண்டும் என முதலாளித்துவ வல்லுநர்கள் வரிந்துகட்டி எழுதுகின்றனர். நமது சிதம்பரமும் அவசர அவசரமாகத் திருத்தி எழுதி வருகிறார்.
பிரிட்டிஷ்-அமெரிக்க புகையிலை நிறுவனத்தின் (BAT) இந்திய கிளையாயிருந்த இம்பீரியல் புகையிலை நிறுவனம் 1971க்குப் பின் இந்திய புகையிலை நிறுவனமாக (ஐ.டி.சி.) புது அவதாரமெடுத்தது.
பிரிட்டிஷ்-அமெரிக்க புகையிலை நிறுவனத்தின் (BAT) இந்திய கிளையாயிருந்த இம்பீரியல் புகையிலை நிறுவனம் 1971க்குப் பின் இந்திய புகையிலை நிறுவனமாக (ஐ.டி.சி.) புது அவதாரமெடுத்தது.
நமது வளத்தை நூற்றாண்டுகளாக ஆங்கிலேயன் சுரண்டிச் செல்கிறான். போலி சுதந்திரம் என்பது அம்பலப்பட்டு நாறத் தொடங்கிய போது, அதை மூடி மறைக்க அந்நியச் செலாவணி கட்டுப்பாட்டுச் சட்டம், ஏகபோகத் தடுப்புச் சட்டம் என மாய்மாலம் செய்தனர். தற்போது மீண்டும் மறுகாலனியாக்கும் புதிய பொருளாதாரக் கொள்கைக்கு இவை தேவையற்றவை என ஏகோபித்த குரலில் தரகு முதலாளிகள் எதிர்க்கின்றனர்.
எற்கனவே பிரிட்டிஷ்-அமெரிக்க புகையிலை நிறுவனத்தின் (BAT) இந்திய கிளையாயிருந்த இம்பீரியல் புகையிலை நிறுவனம் 1971க்குப் பின் இந்திய புகையிலை நிறுவனமாக (ஐ.டி.சி.) புது அவதாரமெடுத்தது. தற்போது இங்கிலாந்தின் பிரிட்டிஷ்-அமெரிக்க புகையிலை நிறுவனம் ஐ.டி.சி.யை மீண்டும் கைப்பற்ற முனைந்துள்ளது. அதற்கான நாடகத்தின் ஒரு பகுதி தற்போது அரங்கேறியுள்ளது. அந்நியச் செலாவணி கட்டுப்பாடு சட்டத்தை நீக்கி அடுத்த காட்சி அரங்கேறப் போகிறது. தரகு முதலாளிகள் கைதட்டி ஆரவாரிக்கக் காத்திருக்கின்றனர்.
– பாரி
பெட்டிச் செய்தி:
ஐ.டி.சி மோசடியில் அதிகாரிகளின் பங்கு
அந்நியச் செலவாணி மோசடி நடந்துள்ள ஐ.டி.சி நிறுவனத்தில் மத்திய அரசின் நிதி நிறுவனங்கள் மொத்த மூலதனத்தில் 32 சதவீதப் பங்குகள் வைத்துள்ளன. எனவே நிதி நிறுவன அதிகாரிகள் ஐ.டி.சி நிறுவன நிர்வாகிகளாக உள்ளனர். நிறுவனம் முக்கிய முடிவுகள் எடுக்கும் போது இயக்குனர்களுக்கு தெரியாமல், அவர்களது சம்மதமின்றி முடிவெடுக்க இயலாது.
சித்தாலியாக்களுடனான உறவு, அவர்களின் மூலம் ஏற்றுமதி – இறக்குமதி, அதில் மோசடி – இதெல்லாம் இயக்குனர்களாக உள்ள நிதி நிறுவன அதிகாரிகளுக்கு தெரிந்தே, அவர்களது ஆதரவுடனே அரங்கேறியுள்ளன. ஆனால், இன்றைக்கு இந்த அதிகாரிகள் தமக்கு எதுவும் தெரியாது எனக் கைவிரித்து விட்டனர். அமலாக்கப் பிரிவு அதிகாரிகளும் அவர்கள் மீது எவ்வித நடவடிக்கையும் எடுக்கவில்லை.
இந்த அதிகார வர்க்க முதலாளிகள் எவ்விதச் சிரமுமின்றி கோடிக்கணக்கில் நமது செல்வங்களைச் சூறையாடுகிண்றனர். போபர்ஸ் பீரங்கி பேர ஊழலில் ராஜீவ் பெயர் தான் வெளிவந்தது – சம்பந்தப்பட்ட அதிகார வர்க்க கும்பல்கள் தப்பிவிட்டன. இன்னும் நாட்டை உலுக்கிய பல மோசடிகளிலும் இந்த அதிகார வர்க்க கும்பல்கள் மீது எவ்வித நடவடிக்கையுமில்லை.
நன்றி:– புதிய ஜனநாயகம்
=================================================================================================
இன்று,
செப்டம்பர்-01.

  • உஸ்பகிஸ்தான் விடுதலை தினம்(1991)
  • ரஷ்யாவின் செயிண்ட் பீட்டர்ஸ்பெர்க் நகரம் பெட்ரோகிராட் எனப் பெயர் மாற்றப்பட்டது(1914)
  • =================================================================================================
  • கார்ப்பரேட் சாமியாரின் பதஞ்சலி பொருட்களில் பல முறைகேடுகள்.அதில் ஒன்றுதான் வருங்காலத்தை முன்னரே கொணர்ந்து தயாரிப்பது.2016 அக்டொபர்  20ம் தேதிஅன்று தயாரிக்கப்பட்ட பொருள் பல மாதங்கள் முன்னதாக விற்பனைக்கு வந்த அதிசயம்.
  • அவர் ஆண்டவனுடன் நேரடியாக குண்டலினி மூலம் தொடர்பு கொள்பவர் அல்லவா.இது அவரின் திருவிளையாடல்கள் ஒன்று.
  • ஆனால் இந்த திருவிளையாடல்களால் பாதிக்கப்படுபவர்கள் அப்பாவி நுகர்வோர் அல்லவா.மத்திய மோடி அரசு அவர் மீது நடவடிக்கை எடுக்கும் என்பது பகல் கனவு.
மாநில அரசுகள் நடவடிக்கையில் இறங்கலாமே.





செவ்வாய், 30 ஆகஸ்ட், 2016

இணையம் என்றால் இனி ...?

கூகுள் தன் கிளை நிறுவனங்களை எல்லாம் ஒரே குடையின் கீழ் கொண்டு வர முயற்சித்து வரும் வேளையில் அதற்கு நேர்மாறான பாதையில் நடை போடுகிறது ஃபேஸ்புக். 
இப்படி ஒரே குடையின் கீழ் நிறுவனங்களை கொண்டுவரும்போது வெளிப்பார்வைக்கு கூகுள் டெக் உலகின் அரசன் போல காட்சியளித்தாலும் நிஜம் அதுவல்ல. ஃபேஸ்புக்தான் டெக் உலகின் ரியல் சாம்ராட். ஃபேஸ்புக்கில் பயனாளிகள் தாங்களாக முன்வந்து தங்களைப் பற்றிய தகவல்களை பகிர்கிறார்கள். 
இதற்கு ஒரு முக்கியக் காரணம் இருக்கிறது. 
ஃபேஸ்புக் தன் கிளை நிறுவனங்கள் மேல் தன் ஆதிக்கத்தை செலுத்தாமல் அவற்றை சுதந்திரமாக செயல்பட வைக்கிறது. 
இன்ஸ்டாகிராம், வாட்ஸ் அப், ஒக்குலஸ் போன்றவை எல்லாம் தத்தமது தனித்திறமைகளோடு விளங்குகின்றன. 
இதனால் கூகுளை விட பயனாளிகள் பற்றி அதிகம் தெரிந்து வைத்திருக்கிறது ஃபேஸ்புக்.
இன்ஸ்டாகிராம், வாட்ஸ் அப், மெசஞ்சர் என பல தளங்கள் இருந்தாலும் ஃபேஸ்புக்தான் நாம் அதிகம் பயம்படுத்தும் தளமாக விளங்குகிறது. ஆனால்  அந்தத் தளத்தின் உலகளாவிய ஆதிக்கத்தை ஒரே ஒரு குறைபாடுதான்தடுத்து கொண்டிருக்கிறது . 
அது- 'சர்ச்' ஆப்ஷன். 
இதை களைய திட்டங்கள் வகுத்து வருகிறது ஃபேஸ்புக்.
கூகுளின் வசம் ஒரு சமூக வலைதளம் கூட இல்லாத நிலையை பயன் படுத்தி  ஃபேஸ்புக் மெல்ல மெல்ல கூகுளின் பிரம்மாண்டத்தை அரிக்கத் தொடங்கியிருக்கிறது. 
2005-ல் ஆண்ட்ராய்ட் என்ற ஸ்டார்ட் அப்பை மட்டும் வாங்காமல் போயிருந்தால் நாம் இன்று பார்க்கும் கூகுள் வேறுமாதிரி இருந்திருக்கும்.

 கூகுளின்  சிறப்புமிக்க சாதனை என்றால் அது ஜிமெயில்தான் . இன்றைய தேதியில் உலகளவில் அதிகம் பயன்படுத்தப்படும் மின்னஞ்சல் ஜிமெயில்தான் .ஜிமெயிலின் மூலம் கூகுளின் மேப், காலண்டர், டாக்ஸ் ஆகியவற்றையும் பயன்படுத்த முடியும்.  இன்று 12 பில்லியன் பயனாளிகள் இவற்றை பயன் படுத்திவருகின்றனர்.

 ஆனால் இந்த எண்ணிக்கையை வெறும் 50 ஊழியர்களைக் கொண்ட வாட்ஸ் அப் நிறுவனம் ஆறே ஆண்டுகளில் எட்டிவிட்டது என்பதுதான் உண்மை . 

 வாட்ஸ் அப் கடந்த மாதம் முதல் தனது  ஒரு டாலர் சந்தா முறையை கைவிட்து விட்டது. 
இப்போது தன் பயனாளிகளை வாட்ஸ் அப் மூலம் வர்த்தக பரிவர்த்தனைகள் மேற்கொள்ளவும் தூண்டுகிறது. ஆலோசனைகளை வழங்குகிறது.
இதனால் ஜிமெயிலில் வரும் சம்பந்தமேயில்லாத பெரிய பெரிய வர்த்தக மெயில்களுக்கு எல்லாம் இனி வேலை இராது . க்ரியேட்டிவிட்டிக்கு தான் இனி இடம் இங்கே. நிறுவனங்கள் தங்கள் பரிவர்த்தனைகளை மேற்கொள்ள வாட்ஸ் அப்பை பயன்படுத்தத் தொடங்கும் காலம் தூரத்தில் இல்லை. வாட்ஸ் அப்பில் இருக்கும் இன்னொரு வசதி நாம் அனுப்பிய தகவலை மறுமுனையில் இருப்பவர் படித்துவிட்டாரா இல்லையா என்பதை தெரிந்துகொள்ள முடியும். 
இது வர்த்தக நிறுவனங்களுக்கு தங்கள் வணிகத்துக்கு மிக சாதகமாக அமையும். இந்த பரிவர்த்தனைகளுக்கு ஃபேஸ்புக் மெசஞ்சரும்  பயன்படும். 
இதனால் வாட்ஸ் அப், மெசஞ்சர், ஸ்லாக் ஆகியவற்றுக்கு நடுவே மாட்டிக்கொண்டு கூகுள் ஜிமெயில் திணற வேண்டிய சூழல் உண்டாகி விட்டது   .
வைனை விட இன்ஸ்டாகிராமிற்கு அதிக பயனாளிகள் இருக்கிறார்கள். வளரும் நாடுகளில் அந்த தளம் மிகவும் பிரபலமாக இருக்கிறது. 
எளிமையான ஒரு தளம் என்பதால்  இன்ஸ்டாகிராம் அனைவராலும் விரும்பி பயன் படுத்தப்பட்டு வருகிறது.
அதுமட்டுமின்றி இங்கும்  இன்ஸ்டாகிராமிற்கும்  ஃபேஸ்புக் பக்கபலமாக  இருக்கிறது. இந்தக் காரணங்களால் வைனிலிருந்து இன்ஸ்டாகிராமிற்கு பலர் மாறி வருகின்றனர். 
ஆப்பிள் பயனாளிகளை கவர்வதற்காக ஐ-போனில் தன் சர்ச் பாரை தக்க வைக்க கூகுள்1 பில்லியன் டாலர்களை அல்லி கொடுத்தது.
 அதேபோல் ஃபேஸ்புக்கும் இன்ஸ்டாகிராம் படங்களை பயன்படுத்த ட்விட்டருக்கு பணம் கொடுத்தாக வேண்டும். 
இப்போது  ஸ்னாப்சாட் செயலி மட்டுமே களத்தில் போட்டிக்கு நிற்கும்.  முன்னர் ஸ்னாப்சாட்டை முடக்க ஃபேஸ்புக் கொண்டுவந்த ஸ்லிங்சாட்  பயனாளிகளிடம் வரவேற்பை பெறாமல் ஓரங்கட்டப்பட்டது . 

மெசஞ்சர் ஆர்ட்டிபிஷியல் இன்டெலிஜென்ஸ் முறையில் செயல்படுவதால் வீசாட் செயலிக்கு போட்டியாக விளங்குகிறது. இப்போதே நீங்கள் மெசஞ்சர் மூலம் உபேர் டாக்ஸி புக் செய்யலாம். சில குறிப்பிட்ட தேடுதல்களை மேற்கொள்ளலாம். இதிலிருந்தே ஃபேஸ்புக் கூகுளை குறி வைப்பதை நாம் புரிந்து கொள்ளலாம்.
மெசஞ்சர் கூகுள் சர்ச்சை விட இன்னும் துல்லியமானதாக இருக்கும். தேவையற்ற பக்கங்கள் எல்லாம் நீக்கப்பட்டுவிடும்.  தேடுதலை எளிமையாக்கி உதவி செய்ய ஒரு டிஜிட்டல் அசிஸ்டென்ட்டும் செயல்படும்.

கூகுளின் வர்த்தக பலங்கள் அனைத்தும் ஃபேஸ்புக்கிற்கும் உள்ளது. சொல்லப்போனால் கூகுளால் செய்ய முடியாதவை எல்லாம் ஃபேஸ்புக்கால் செய்யமுடியும். ஆல்பபெட்டின் வேலையே வருமானத்தை பெருக்குவதுதான் என்பதால் ஃபேஸ்புக் வேகம் எடுப்பதை இனி கூகுளால் தடு க்க முடியாது. 
ஃப்ரீ பேஸிக்ஸ் திட்டத்தை ஃபேஸ்புக் திரும்பத் திரும்ப வலியுறுத்துவதன் நோக்கமே இதுதான். இணையத்தின் ராஜாவாக தான் மட்டுமே இருக்கவேண்டும் என நினைக்கிறது அந்த நிறுவனம். செய்திகள், கட்டுரைகள், வீடியோக்கள், படங்கள், மெசேஜ்கள் என அனைத்தும் அதன் வழியேதான் பார்வைக்கு வரவேண்டும் என விரும்புகிறது. 
WWW என்பதை மாற்றி  "ஃபேஸ்புக்" தான் இனி என்ற ஆதிக்கத்தை இணைய உலகில் கொண்டுவர ஃபேஸ்புக் திட்டமிட்டு செயல்படுகிறது.
அதாவது இணைய உலகின் ஆல் இந்த ஆல்  அழகுராஜா ஆக ஃபேஸ்புக் மாறிக்கொண்டிருக்கிறது.
கூகுள் இதனை எப்படி எதிர் கொள்ளப் போகிறது?
========================================================================
கூகுள் நிறுவனம் வாஸ்ட் ஆப் போன்ற ஒரு அப் வெளியிடகளம் இறங்கி யுள்ளது .

  தற்போது கூகுள் நிறுவனம் Duo என்ற video-calling அப் கலம் இறக்கியுள்ளது..

இது  நல்ல வரவேற்பை பயனர்களிடம்  பெற்றுள்ளது.


 வாட்ஸ் ஆப் போன்ற chat messenger அப்பிளிகேஷனை 
 கூகுள் நிறுவனம் வெளியிட முடிவு செய்துள்ளது.

 இதற்கு Allo என பெரியரிட்டுள்ளது.

இது கிட்டத்தட்ட Duo அப்பிளிகேஷனை போன்று இருக்கின்றது.ஆனால்  Allo ஆப்பில் voice message, Smart Reply, Whisper மற்றும் Shout போன்ற வசதிகள் கொடுக்கப்பட்டுள்ளன.

end-to-end encryption என்ற பாதுகாப்பு அம்சமும், incognito conversations என்ற மறைநிலை உரையாடல்கள் வசதியும் தரப்பட்டுள்ளது.இவ்வுரையாடல் பிறாரால் நம் அனுமதியின்றி பார்க்க,கேட்க இயலாது.

Snap chat போன்று அனுப்பிய தகவல்கள் அதுவே அழிக்கும் வசதியும், அதனை நாம் தெரிவு செய்து கொள்ளும் அமைப்பும் கொடுக்கப்பட்டுள்ளதாக தெரிவிக்கப்பட்டுள்ளது.

ஏற்கனவே கூகுள் GTalk மற்றும் Hangouts போன்றவற்றில், இது போன்ற வசதிகள் கொடுத்திருந்தது.

 வாட்ஸ்ஆப் போன்று Allo அப்பிளிகேஷனை கூகுள் நிறுவனம் முதன்முறையாக களத்தில் இறக்கி  
ஃபேஸ்புக்கிறகு சரியான போட்டியை தந்துள்ளது.
==========================================================================================
இன்று,
ஆகஸ்டு-31.

  • மலேசிய விடுதலை தினம்(1957)

  • கிர்கிஸ்தான் விடுதலை தினம்(1991)

  • வடகொரியா தனது முதலாவது செயற்கைகோளை ஏவியது(1998)

==========================================================================================
                                       "அதுதானே, மக்கள் பிரச்சனைகளை பேச உங்கள விட்டுடுவோம்மா?
                           வந்தீங்களா, ரெண்டு அம்மா பாட்ட கேட்டிங்களான்னு போயிட்டே இருக்கணும்..
            சும்மா எப்பப்பாத்தாலும் காவேரி, சிறுவாணி, பாலாறு, சட்டம் ஒழுங்கு, வேலைவாய்ப்புன்னு..." 
                    ஹெல்மெட் அணியாமல்வாகனம் ஓட்டாதீர்!
                             செல்போன் பேசிக் கொண்டு 
                                 வாகனம் ஓட்டாதீர்!!


                                                                                                   - தமிழ் நாடு காவல்துறை





திங்கள், 29 ஆகஸ்ட், 2016

கலைவாணர் என்.எஸ்.கிருஷ்ணன் ..,

 நாகர்கோயில் அருகிலுள்ள ஒழுகினசேரியில்தான் கலைவாணர்  என்.எஸ்.கிருஷ்ணன்பிறந்தார். 
தந்தையார் சுடலைமுத்துப் பிள்ளை, தாயார் இசக்கி அம்மாள். 

இவர்களுடைய மூத்த மகன் தான் தமிழகத்தில் புகழின் உச்சியில் இருந்த என்.எஸ்.கே. எனும் என்.எஸ்.கிருஷ்ணன். இவர் படித்தது என்னவோ நான்காம் வகுப்புதான். தமிழும் மலையாளமும் இவருக்கு நன்கு தெரியும். தந்தைக்கு பெயருக்கு ஒரு வேலை இருந்தது. 

தாயார் ஒரு குடும்பத் தலைவிதான். மேல் வருமானத்துக்காக இவர் ஒரு சோற்றுக்கடை வைத்து நடத்தி வந்தார். மிக ஏழ்மையான குடும்பம். அப்போதெல்லாம் சினிமா கொட்டகைகள் கிடையாது.
கிருஷ்ணன் நாடகக் கொட்டகைக்குச் சென்று அங்கு சோடா, கலர் விற்கத் தொடங்கினார். 
 

எல்லா ஊர்களிலும் நாடகம் போட் ஒரு கொட்டகை இருக்கும். 1924இல் கிருஷ்ணனின் தந்தை தன் மகனை ஒரு நாடகக் கம்பெனியில் சேர்ப்பதற்காக அழைத்துச் சென்றார். அந்தக் காலத்தில் பல ஊர்களில் பாய்ஸ் நாடகக் குழுக்கள் இருந்தன. 

அவற்றில் பெரும்பாலும் சிறுவர்கள்தான் நடித்து வந்தனர். அவர்களுக்குப் பகலில் ஒரு வாத்தியார் பாடம் எடுத்து கதை, வசனங்கள் என்று சொல்லிக் கொடுப்பார்கள். பாடத் தெரிந்த பையன்களுக்கு கிராக்கி அதிகம். அப்படியொரு நாடகக் கம்பெனியில் கிருஷ்ணன் சேர்ந்தார். 

அங்கு பின்னாளில் பிரபல நகைச்சுவை நடிகராம இருந்த டி.எஸ்.துரைராஜ் என்பவரும் இருந்தார். 

இவர்கள் இருவரும் நெருங்கிய நண்பர்களாக இருந்தனர். 

பிரபல நாடக, சினிமா நடிகரும், தேசியவாதியுமான டி.கே.சண்முகம் அவர்கள் ஸ்ரீ பால ஷண்முகானந்த சபா என்ற பெயரில் ஒரு நாடகக் குழுவை நடத்தி வந்தார். டி.கே.எஸ். அண்டு பிரதர்ஸ் என்று இவர்கள் பிரபலமானார்கள். அவருடைய நாடகக் குழுவின் என்.எஸ்.கிருஷ்ணன் சேர்ந்தார். 

அங்கு என்.எஸ்.கே. சகலகலா வல்லவனாக விளங்கினார். எந்த நடிகராவது இல்லையென்றால், அவருடைய பாத்திரத்தை ஏற்று நடிக்கும் ஆற்றல் பெற்றிருந்தார். பல ஊர்களிலும் நாடகங்கள் நடித்து வந்த இவருக்கு திரைப்படத்தில் நடிக்கும் வாய்ப்பும் கிடைத்தது. அப்படி இவர் நடித்த முதல் தமிழ்ப்படம் 'சதி லீலாவதி' எனும் படம். எம்.ஜி.ஆர். அவர்களும் அந்தப் படித்தில்தான் முதன்முதலாக நடித்துப் புகழ்பெற்று, சினிமாத் துறையின் உச்சிக்குச் சென்றார். 

திரைப்படங்களில் நடித்தாலும் என்.எஸ்.கே. அவர்களுக்கு நாடகம்தான் முக்கியம். இவர் ஒரு முறை புனே நகருக்கு படப்பிடிப்புக்குச் சென்றபோது உடன்வந்த ஒரு நடிகையின் நட்பு கிடைத்தது. அவர்தான் டி.ஏ.மதுரம். இவர் திருச்சி ஸ்ரீரங்கத்தைச் சேர்ந்தவர். 

புனேயில் இருந்த நாளிலேயே இவ்விருவரும் திருமணம் செய்து கொண்டனர். அதற்கு முன்பாகவே என்.எஸ்.கே. 1931இல் நாகம்மை எனும் பெண்ணைத் திருமணம் செய்திருந்தார். டி.ஏ.மதுரம் இரண்டாம் மனைவி. அதன்பின் மதுரத்தின் தங்கை வேம்பு என்பவரை மூன்றாம் மனைவியாகவும் திருமணம் செய்து கொண்டார். 

நாகம்மைக்கு கோலப்பன் எனும் மகனும் டி.ஏ.மதுரத்துக்கு ஒரு பெண் குழந்தை பிறந்து இறந்துவிட்டது. வேம்புவுக்கு ஆறு குழந்தைகள், நான்கு மகன்கள், இரண்டு பெண்கள். மதுரத்தைத் திருமணம் செய்து கொண்ட பிறகு இவ்விருவரும் சேர்ந்து நகைச்சுவைக் காட்சிகளில் நடிக்கத் தொடங்கினர். 

இவர்களுக்கு நல்ல புகழ் கிடைத்து வந்தது. ஓடாத படங்களில் கூட கிருஷ்ணன் மதுரை ஜோடியின் நகைச்சுவைக் காட்சிகளை ஓட்டி வெற்றி பெற்ற படங்களும் உண்டு. 

இவருடைய நகைச்சுவைக் குழுவில் பல நடிகர்கள் சேர்ந்து கொண்டார்கள். புளிமூட்டை ராமசாமி, சி.எஸ்.பாண்டியன், (குலதெய்வம்) ராஜகோபால், கவிஞர் சுப்பு ஆறுமுகம் போன்றோர் இவருடன் இருந்தவர்கள். 

இவருடைய மூளையில் உதயமாகி திரையில் உலாவந்து பிரபலமான சில நிகழ்ச்சிகள் உண்டு. அவை "கிந்தனார் காலக்ஷேபம்", "ஐம்பது அறுபது" நாடகம் போன்றவற்றைச் சொல்லலாம். இவருடைய பாடல்கள், நாடகங்கள் இவற்றில் புரட்சிகரமான சீர்திருத்தக் கருத்துக்கள் இருக்கும். 

ஆகையால் இவரை உரிமை கொண்டாடி பல அரசியல் கட்சிகளும் முயன்றாலும், இவர் திராவிட இயக்கத்தின் பால் இருப்பதைப் போன்ற ஒரு நிலைமையை உருவாக்கி யிருந்தது . 

அறிஞர் அண்ணா அவர்களிடம் இவருக்கு இருந்த நெருக்கமும் அந்த நிலைமையை உறுதி செய்வதாக இருந்தது. "நல்லதம்பி", "பணம்", "மணமகள்" போன்ற இவருடைய படங்கள் அன்றைய நாளில் புரட்சிகரமான கருத்துக்களை வெளிப்படுத்தின. 

இந்தச் சூழ்நிலையில் தான் சென்னையில் 1944இல் "இந்துநேசன்" பத்திரிகை ஆசிரியர் லக்ஷ்மிகாந்தன் கொலைசெய்யப்பட்ட வழக்கில் இவரும் அன்றைய காலகட்டத்தில் புகழின் உச்சியில் இருந்த எம்.கே.தியாகராஜ பாகவதர் மற்றும் கோவை திருப்பட முதலாளி, இயக்குனர் ஸ்ரீராமுலு நாயுடு ஆகியோர் கைதாகினர். 

சென்னையில் வழக்கு நடந்து முடிந்து என்.எஸ்.கே., பாகவதர் இருவருக்கும் ஆயுள் தண்டனை விதிக்கப்பட்டது. தமிழ் நாடே அழுதது. இவர்கள் இருவரும் லண்டனில் உள்ள பிரிவி கவுன்சிலுக்கு மேல்முறையீடு செய்தனர். முடிவில் 1946இல் இவர்கள் இருவரும் விடுதலை செய்யப்பட்டனர். விடுதலைக்குப் பின் என்.எஸ்.கிருஷ்ணன் சோர்ந்துவிடவில்லை. 

புதிய நட்புகள், ஆதரவாளர்கள், திரைப்படத் துறையில் புதிய சிந்தனை, புதிய வளர்ச்சி இவற்றையெல்லாம் உள்வாங்கிக் கொண்டு என்.எஸ்.கே. தன்னை புதிய சூழ்நிலைக்கு ஏற்ப உருவாக்கிக் கொண்டார். 
சமூகப் படங்களை எடுத்து வெளியிட்டார். 

நன்றாக சம்பாதித்தார், நன்றாகவும் தான தர்மங்களைச் செய்து, பிறருக்கு உதவிகள் செய்து அவற்றை நல்ல முறையில் செலவிடவும் செய்தார். தன் கையில் இருப்பதை அப்படியே தானம் செய்துவிடும் நல்ல பண்பு அவரிடம் இருந்தது. 

அவரால் பயனடைந்தவர்கள் ஏராளம். 
அவருக்கு வயிற்றில் ஒரு கட்டி வந்து தொல்லை கொடுத்தது. 
சென்னை பொது மருத்துவ மனையில் சேர்ந்து வைத்தியம் செய்து கொண்டும் பலன் இல்லாமல் 1957 ஆகஸ்ட் 30ஆம் நாள் என்.எஸ்.கிருஷ்ணன் இயற்கை  எய்தினார். 
=====================================================================================
இன்று,
ஆகஸ்டு-30.
  • சர்வதேச காணாமல் போனோர் தினம்.

  • ஆஸ்திரேலியாவின் மெல்பேர்ண் நகரம் அமைக்கப்பட்டது(1835)

  • கலைவாணர்  என்.எஸ்.கிருஷ்ணன் இறந்த தினம்(1957)

  • =====================================================================================
கடுகு சிறுத்து காரம் குறைகிறது?

டெல்லி பல்கலைக்கழகம் மரபணு மாற்றம் செய்யப்பட்ட கடுகு விதையை உற்பத்தி செய்து அதற்கு DHARA MUSTARD HYBRID 11 என பெயர் சூட்டியுள்ளது. 
இந்த கடுகை வர்த்தக ரீதியாக சாகுபடி செய்ய மத்திய சுற்றுச்சூழல் மற்றும் வனத்துறை அமைச்சகத்தின் கட்டுப்பாட்டில் உள்ள மரபணு மாற்றுப் பயிர்களுக்கான அனுமதியளிக்கும் குழு அனுமதி அளித்துள்ளது.  
மரபணு மாற்றம் செய்யப்படாத உயர்ரக விதைகள் ஏற்கனவே, சந்தையில் கிடைக்கும்போது, இந்தியாவில் அதனைக் கொண்டு வருவதற்கான அவசியம் என்ன என விவசாயிகள் கேள்வி எழுப்புகின்றனர்.

நாட்டின் சமையல் எண்ணெய் தேவை உள்நாட்டு உற்பத்தியை விட அதிகமாக இருப்பதால், எண்ணெய் உற்பத்தியை அதிகரிக்க மரபணு மாற்ற தொழில்நுட்பங்கள் தேவைப்படுவதாக பதிலளிக்கின்றனர் விஞ்ஞானிகள். 

ஏற்கனவே, உற்பத்தி அதிகரிப்பிற்காக, மரபணு மாற்றப்பட்ட பருத்தி ரகம் இந்தியாவில் அனுமதிக்கப்பட்டு பெரும் இழப்பை சந்தித்த விவசாயிகளில் ஆயிரக்கணக்கானோர் தற்கொலை செய்து கொண்டதை சுட்டிக் காட்டும் விவசாயிகள், மரபணு மாற்றம் செய்யப்பட்ட கடுகை அனுமதித்தால், பருத்தி விவசாயிகளுக்கு ஏற்பட்ட நிலைமையே தங்களுக்கும் ஏற்படும் என வேதனை தெரிவிக்கின்றனர். 

அதுமட்டுமின்றி, மரபணு மாற்றம் செய்யப்பட்ட உணவுப் பொருட்கள் பாதுகாப்பானதா என்பதற்கான ஆய்வுகள் 
இதுவரை நடத்தப்படவில்லை என்றும், விதையை விற்கும் மான்சாண்டோ நிறுவனமே ஆய்வை மேற்கொண்டு வருவதாகவும் விவசாயிகள் அச்சம் தெரிவிக்கின்றனர். 
எனவே, மரபணு மாற்றக் கடுகு சாகுபடி குறித்து, கருத்துக் கேட்பு நடத்தப்பட வேண்டும் என்றும், இந்த விவகாரத்தில் அரசு வெளிப்படைத் தன்மையுடன் நடந்து கொள்ள வேண்டும் என்றும் விவசாயிகள் வலியுறுத்துகின்றனர்.

கடுகு விளைசல் இந்திய நாடு மக்கள் தேவைக்கு போதிய அளவில் இருக்கையில் இப்போது மரபணு மாற்றம் செய்யப்பட கடுகை மோடி அரசு கொண்டுவர என்ன தேவை இருக்கிறது என்பதுதான் இன்றைய முக்கிய கேள்வி.
=====================================================================================
ஏழு லடசம் ரூபாய் சேலை?
மத்திய மனிதவள மேம்பாட்டுத்துறை அமைச்சராக இருந்தபோது, தொடர் சர்ச்சைகளில் சிக்கி வந்த ஸ்மிரிதி இரானி தற்போது ஜவுளித்துறையை கவனித்து வருகிறார். 

அமைச்சர் பதவியை ஏற்றுக் கொண்டதிலிருந்து அத்துறையின் செயலாளராக உள்ள ரேஷ்மி வர்மாவுடன் அவர் மோதல் போக்கை கடைபிடித்து வருவதாக செய்திகள் வெளியாகின. 

இந்நிலையில் ஜவுளித்துறைக்கு கீழ் இயங்கும் கடைகளில் திடீர் ஆய்வு மேற்கொண்ட அமைச்சர் ஸ்மிரிதி இரானி, சில லட்சம் ரூபாய் மிதிப்புள்ள சேலைகளையும், விநாயகர் சிலை ஒன்றையும் வாங்கியுள்ளார். 
இதற்கான பணத்தை கொடுக்காமல், ஜவுளித்துறையின் கணக்கில் இதனை சேர்க்கும்படி தெரிவித்ததாக கூறப்படுகிறது. இதற்கு எதிர்ப்பு  தெரிவித்த துறை செயலாளர் ரேஷ்மி, சொந்த செலவுகளுக்கு அரசு பணம் வழங்க முடியாது எனக் கூறி பணம் வழங்க மறுத்துள்ளார். 

மேலும் இது தொடர்பாக பிதரமர் அலுவலகத்திலும் ரேஷ்மி புகார் அளித்தாகவும் கூறப்படுகிறது. இந்த புகாரை முற்றிலுமாக மறுத்துள்ள ஸ்மிரிதி, இதனை ஆதாரமற்ற குற்றச்சாட்டு என்று தெரிவித்துள்ளார். 

இருப்பினும் பிரதமர் அலுவலகத்தில் உள்ள தனக்கு நெருங்கியவர்கள் மூலமாக ரேஷ்மியின் குற்றச்சாட்டு அடங்கிய கோப்புகளை அப்புறப்படுத்தவும் ஸ்மிரிதி முயற்சிகள் மேற்கொண்டிருக்கிறார்.
==================================================================================================





ஞாயிறு, 28 ஆகஸ்ட், 2016

இந்தியாவில் இணையம்.

முதல் இணைய தளத்தையும் அதனைத் தேடி அறிய பிரவுசரையும் தந்தவர் டிம் பெர்னர்ஸ் லீ. 
URL, HTML, மற்றும் HTTP போன்ற பெயர்களை எல்லாம் அவர்தான் கொடுத்தார். தொடக்கத்தில் இணையம், யார் வேண்டுமானாலும் மேம்படுத்தக் கூடிய தகவல் மையமாகவும், அனைவரும் தங்களுக்குத் தேவையான தகவலைத் தேடி எடுத்துக் கொள்ளக் கூடிய தகவல் களஞ்சியமாகவும் தான் வடிவமைக்கப்பட்டது. 
அப்படி துவக்கப்பட்ட இணையம் 1991ல் செயல்படத் தொடங்கி  ஆகஸ்ட் 6 அன்று தனது வெள்ளி விழா ஆண்டாகிய 25 ஐ அடிந்துள்ளது.
“கல்வி சார்ந்த தகவல்கள் அனைத்தும், அனைவருக்கும் இலவசமாகக் கிடைக்க வேண்டும்” என்ற  நோக்கம்தான்  டிம் பெர்னர்ஸ் லீ இணையதளம் தோற்றுவிக்க  யொசனையை தூண்டியது. 
அந்த நோக்கத்துடன் 1989ல் பணியாற்றத் தொடங்கி, 1990ஆம் ஆண்டு இதனை வடிவமைத்து சோதனை செய்திட்டார் பெர்னர்ஸ் லீ. 
தகவல் மையமாக அமைந்தாலும், அங்கு அந்த தகவல் உள்ளது என எப்படி அறிவது? என்ற கேள்வி, இணையத்தை  அடுத்த கட்டத்துக்கு கொண்டு சென்றது . 
மேற்கண்ட  கேள்விக்கான விடையை, முதலில் உருவான இணைய நிறுவனங்களில் ஒன்றான யாஹூ தந்தது. ஸ்டான் போர்டு பல்கலையின் மாணவரான ஜெர்ரி யங் மற்றும் தொழில் நுட்ப வல்லுநரான டேவிட் பைலோ இணைந்து, இணைய தளங்களின் பட்டியலை உருவாக்கினார்கள். 
வகை வகையாக இணைய தளங்களைப் பிரித்துக் காட்டினார்கள். 
இணையத்தின் டைரக்டரியாக அவர்கள் உருவாக்கிய பட்டியல் இருந்தது. அதன் பின்னர், டிஜிட்டல் எக்விப்மெண்ட் கார்ப்பரேசன் (DEC), அல்டா விஸ்டா (Alta Vista) என்ற தேடல் பொறியைத் தந்தது. ஹாட்பாட் (Hot Bot) என்னும் தேடல் சாதனம் அதனைத் தொடர்ந்தது. 
அதன் உச்சக்கட்ட தேடலின் விடையாகத்தான் இன்று கூகுள் தேடல் மக்களை அடைந்துள்ளது.
ஒரு சில சொற்களை அமைத்து, தேவையான தேடல் சாதனத்தில் கொடுத்து, உலகின் அனைத்து இணைய சர்வர்களை உள்ளடக்கிய உலக வைய விரிவலை (World Wide Web) யிலிருந்து தேவைக்கதிகமாகவே தகவல்களைப் பெற்றுக் கொள்ளும் சாத்தியத்தை, இணைய வல்லுநர்கள் அளித்து வருகின்றனர். 
'வெப்' என அழைக்கப்படும் வைய விரிவலையும் இணையமும் ஒன்றல்ல. இணையம் என்பது, வைய விரிவலையைத் தாங்கிப் பிடிக்கும் கட்டமைப்பாகும். கேபிள்கள், கம்ப்யூட்டர்கள், சர்வர்கள் மற்றும் அவை சார்ந்த அனைத்தும் இணைந்த கட்டமைப்பே இணையமாகும். 
பல நெட்வொர்க்குகள் இணைந்த நெட்வொர்க் தான் இணையம்.
இதைப்படிக்கும் நேரத்தில் உலகமெங்கும் நூற்றுப் பத்து கோடி இணைய தளங்கள் இயங்கிக் கொண்டிருக்கின்றன. 
தினந்தோறும் 340 கோடி மக்கள்  இணைய தளங்களை  பயன்படுத்தி வருகின்றனர். 
ஒவ்வொரு நிமிடத்திலும், பல கோடி கணக்கில் தகவல்கள் அனுப்பப் படுகின்றன. 
பல கோடி படங்கள் பரிமாறிக் கொள்ளப் படுகின்றன. 
தினசரி குறைந்தது 1.5 கோடி டாலர் மதிப்பில் வர்த்தகம் .இணைய தளங்கள் மூலம் நட்க்கின்றது.
 இணையத்தில் அதிக ஆதிக்கம் செலுத்துவது, சமூக வலைத் தளங்களே. 
அடுத்தபடியாக தேடல் பொறிகளும், வர்த்தக தளங்களும் உள்ளன. 
நிலையாக இணைய தளங்கள் இருந்த நிலை மாறி, இன்று நம்மோடு பேசி உறவு கொள்ளும் இணைய தளங்கள் உயிர்த் துடிப்புடன் இயங்குகின்றன. 
ஆங்கிலம் மட்டுமே இணைய மொழியாக இருந்த நிலை மாறி, உலகின் அனைத்து மொழிகளும் இணையத்தின் மொழிகளாக மக்களுடன் பேசிக் கொண்டிருக்கின்றன. 
வெறும் தகவல் தளங்களாகத் தொடங்கி, இன்று படங்கள், காணொளிப் படங்கள், நகரும் வரைவுகள் கொண்ட தளங்களாக இணையம் இயங்குகிறது. இணையம் கம்ப்யூட்டரிலிருந்து சற்று விலகிச் சென்று பல மொபைல் சாதனங்கள் வழியாக மக்களைச் சென்று அடைகிறது. 
“எங்கும் எதிலும் இணையம்” (internet of things) என்ற இலக்கினை நோக்கி இணையம் சென்று கொண்டிருக்கிறது. 
 அன்றாட வாழ்வில் பயன்படுத்தும் அனைத்து பொருட்களும், இணையத்தில் இணைக்கப்பட்டு 
மக்கள் இணையத்தை அணுக வேண்டிய தேவையும்   நாளுக்கு நாள் அதிகரித்துக் கொண்டுதான் உள்ளது. 
 உலகில் அதிக அலவில் மென் பொருள் தயாரிப்பு  நிறுவனங்கள் இந்தியாவில் பெயர் பெற்றதாக இருந்தாலும்  இன்றைய தேதியில்  86.4 கோடி இந்தியர்கள் இணைய இணைப்பில்லாமல்தான் இருக்கிறார்கள். 
ஆண்கள் 27%  பெண்கள் 17%  இணையத்தில் உலாவி  வருகிறார்கள் என்று  ஒரு புள்ளி விபரம் கூறுகிறது. இணைகின்றனர். 
பெண்கள் எண்ணிக்கை குறைவாக இருக்க காரணம் பெண்களுக்கு இணையம் பாதுகாப்பானது அல்ல என்ற கருத்து உலகம் முழுக்க இருப்பதால்தானாம்.
 இந்தியாவில் இணைய இணைப்பு வழங்குவதற்கான ஆயத்தப் பணிகள் 1986 ஆம் ஆண்டில் தொடங்கப்பட்டன. 
முதலில் கல்வி மற்றும் ஆராய்ச்சி நிறுவனங்கள் மட்டும் இணைய இணைப்பு பெற Educational Research Network (ERNET) என்ற நெட்வொர்க் அமைக்கப்பட்டது. 
இந்திய அரசின் எலக்ட்ரானிக்ஸ் துறையும் (Department of Electronics (DOE)) ஐக்கிய நாடுகள் சபையின், நாடுகளின் வளர்ச்சிக்கான United Nations Development Program (UNDP) துறையும் இணைந்து இந்த முயற்சிகளை மேற்கொண்டன. 
பின்னர், 1988ல், அரசின் தேசிய தகவல் மையம் (National Informatics Centre) அரசின் பல்வேறு துறைகளுக்கிடையேயான தகவல் பரிமாற்றத்திற்கென NICNet என்னும் நெட்வொர்க்கினை ஏற்படுத்திச் செயல்படுத்தியது.
இந்தியாவில் இணைய சேவை, 15 ஆகஸ்ட் 1995 அன்று, வி.எஸ்.என்.எல். நிறுவனத்தால் தொடங்கப்பட்டது. 
அப்போது பொதுத்துறை நிறுவனமாக இருந்த விதேஷ் சஞ்சார் நிகாம் நிறுவனம் (Videsh Sanchar Nigam Limited (VSNL)) இதனை வழங்கியது. 
அதற்கென Gateway Internet Access Service (GIAS) என்றொரு பிரிவினை இந்நிறுவனம் அமைத்து, இணைய இணைப்பினை வழங்கியது. 
ஆறு மாதத்தில் 10 ஆயிரம் பேர் இணைப்பு பெற்றனர். 1995, ஜூலை 31ல், மொபைல் போன் சேவை தொடங்கப்பட்டது. 
இந்தியாவில் இணையப் பயன்பாடு மிக வேகமாக வளர்ந்து வருகிறது. 2000 ஆம் ஆண்டில், 105.34,81,072 மக்களில் 0.5% பேர் (55,57,455) மட்டுமே இணையத்தை அணுகிப் பயன்படுத்த முடிந்தது. 2012 ஆம் ஆண்டில், மொத்த ஜனத்தொகையில் (126,35,89,639) 12.6% பேர் (15,89,60,346) இணையத்தைப் பயன்படுத்தி வந்தனர். இன்று, 2016 ஜூலை 1 அன்று எடுத்த கணக்கின்படி, மொத்த ஜனத்தொகையில் (132,68,01,576) 34,8% பேர் (46,21,24,989) பயன்படுத்தி வருகின்றனர். 
 தொடக்கத்தில் விநாடிக்கு 9.6 கிலோ பிட்ஸ் என்ற அளவில் தொடங்கிய இணைய இணைப்பு வேகம், பின்னாளில் மிக வேகமாக வளர்ந்து தற்போது மெகா பிட்ஸ் என்ற அளவை எட்டியுள்ளது. லீஸ்டு லைன் எனப்படும் தனிப்பட்ட சர்வர் இணைப்பு தற்போது குறைந்த கட்டணத்தில் நொடிக்கு கிகா பிட்ஸ் வேகத்தில் கிடைக்கிறது. 
இந்திய நகரங்களில், அதிக எண்ணிக்கையில், இணையத்தைப் பயன்படுத்துவோர் பட்டியலில், தமிழ்நாடு முதல் இடத்தைப் பெற்றுள்ளது. 
 மார்ச் மாத இறுதியில் எடுத்த கணக்கீட்டின்படி, மொத்தம் உள்ள 23.1 கோடி பேரில் 9% பேர் தமிழ்நாட்டில் உள்ளனர். 
2.1 கோடி பேர் தமிழக நகரங்களில் இணையத்தைப் பயன்படுத்துகின்றனர். மஹாராஷ்ட்ரா, டில்லி மற்றும் கர்நாடகா மாநில நகரங்களில் இணையப் பயனாளர்களின் எண்ணிக்கை, முறையே 1.97 கோடி, 1.96 கோடி மற்றும் 1.7 கோடி ஆக இருந்தது.
மொத்த இந்தியாவில், 34.2 கோடி பயனாளர்களில், கிராமப் புறங்களில் இணைய சந்தாதாரர்களின் எண்ணிக்கை 11.2 கோடியாக இருந்தது. 
கிராமப் புறங்களைப் பொருத்த மட்டில், உத்தரப் பிரதேசத்தின் கிழக்கு பிரிவில், 1.12 கோடி பேர், நகர்ப்புற இணையப் பயனாளர்களுக்கு இணையாக உள்ளனர். இந்த வகையில், மஹாராஷ்ட்ரா மாநிலம் 97 லட்சம் பேரையும், ஆந்திர மாநிலம் 90 லட்சம் பேரையும் கொண்டிருந்தது. 
விரைவில், 'பாரத் நெட்' என்ற திட்டத்தின் கீழ், இரண்டு லட்சத்து 50 ஆயிரம் கிராமப் பஞ்சாயத்துகளில், ஆப்டிகல் பைபர் மூலம் பிராட்பேண்ட் இணைப்பு தரப்பட உள்ளது. 
இந்த வசதி ஏற்படுத்திக் கொடுத்த பின்னர், கிராமப் புறங்களில், இணைய இணைப்பு மிக வேகமாக அதிகரிக்கும் என்று எதிர்பார்க்கப்படுகிறது. இந்த திட்டம், இந்தியா முழுவதும் மூன்று கட்டமாக அமல்படுத்தப்படும். 2017 ஆம் ஆண்டு மார்ச் மாதத்திற்குள்ளாக ஒரு லட்சம் கிராம பஞ்சாயத்துகளிலும், டிசம்பர் 2018க்குள், மீதம் உள்ள 1.5 லட்சம் பஞ்சாயத்துகளிலும் இந்த திட்டம் மேற்கொள்ளப்படும்.
சென்ற ஏப்ரல் முதல் ஜூன் வரையிலான காலத்தில் எடுத்த கணிப்புப்படி, இந்தியாவில் தரப்படும் சராசரியான இணைய இணைப்பு, விநாடிக்கு 3.5 மெகா பிட்ஸ் ஆக இருந்தது. 
இது உலக அளவில், இந்தியாவிற்கு 114 ஆவது இடத்தையே பெற்றுத் தந்துள்ளது.
இந்தியாவில் இணைய சேவை வழங்கும் நிறுவனங்களில் பார்தி ஏர்டெல் நிறுவனம், 9 கோடியே 5 லட்சத்து 30 ஆயிரம் இணைய சந்தாதாரர்களைக் கொண்டு முதல் இடத்தைப் பெற்றுள்ளதாக, அண்மையில் பாராளுமன்றத்தில் தெரிவிக்கப்பட்டது. 
இதற்கு அடுத்த நிலையில், வோடபோன், ரிலையன்ஸ் கம்யூனிகேஷன், பி.எஸ்.என்.எல்., ஏர்செல், டாடா டொகோமோ மற்றும் டெலிநார் ஆகிய நிறுவனங்கள் உள்ளன.====================================================================================
இன்று,
ஆகஸ்டு-29.

மைக்கேல் பாரடே
  • இந்திய தேசிய விளையாட்டு தினம்

  • செப்பு நாணயம் முதன் முதலில் ஜப்பானில் உருவாக்கப்பட்டது(708)

  • பிரேசிலை தனி நாடாக போர்ச்சுக்கல் அறிவித்தது(1825)

  • மைக்கேல் பாரடே மின்காந்த தூண்டலை கண்டுபிடித்தார்(1831)
====================================================================================

சனி, 27 ஆகஸ்ட், 2016

பாலியல் சட்டதிட்டம்......,

ஐக்கிய நாடுகளின் கணக்கெடுப்பின்படி உலகம் முழுவதும் உள்ள பெண்களில் மூன்றில் ஒரு பங்கு பேர், தமது வாழ்நாளில் ஒரு முறையாவது பாலியல் துன்புறுத்தலுக்கு ஆளாகின்றனர். 

அதில் பாதிக்கும் மேலானோர் தமது பதினாறு வயதுக்குள் இத்தகைய சூழலில் சிக்குகின்றனர் என தெரியவந்துள்ளது. நிதர்சனம் என்னவென்றால், எண்பது சதவிகிதம் பேர், தமக்கு நிகழ்ந்த சம்பவத்தைப் பற்றி வெளியில் சொல்வதேயில்லை. 
இதைப் பற்றி தெரிவிக்காமல் இருக்க ஒரு பக்கம் பயம்தான் காரணம் என்றாலும், மறுபக்கம் தமது சமூக சூழலால் நாணி இதை அவமானம் எனக் கருதி போலீசாரிடம் தெரிவிப்பதில்லை. இவை அனைத்துக்கும் மேலாக, பாலியல் துன்புறுத்தல் பற்றிய அறியாமை நிலவுவதும் முக்கியக் காரணம் எனலாம்.
டெல்லியில் நிகழ்ந்த கூட்டு பலாத்காரத்துக்குப் பின் பெண்களுக்கான பாதுகாப்பை மேம்படுத்துவதற்காக பாலியல் துன்புறுத்தலுக்கு எதிரான சட்டத் திருத்தங்கள் கொண்டுவரப்பட்டன. பலாத்காரத்துக்கு தண்டனை வழங்கும் ஐ.பி.சி. 375-ல் சீர்திருத்தம் செய்யப்பட்டது.
1. பெண்ணின் விருப்பம் இன்றியோ;
2. அவளது அனுமதி இன்றியோ;
3. பயமுறுத்தி சம்மதிக்க வைத்தோ;
4. மணமுடித்த பெண்ணை கணவன் என ஏமாற்றி சம்மதிக்க வைத்தாலோ;
5. அவளுக்கு தெரியாமல் மயக்கம் தரும் வஸ்துவை கொடுத்து, அவளது சம்மதம் கேட்டாலோ; 
6.பதினெட்டு வயதுக்குக் கீழ் உள்ள பெண்ணின் சம்மதத்துடனோ/சம்மதமின்றியோ;
7. சம்மதத்தை தெரிவிக்க முடியாத நிலையில் உள்ள பெண்ணை பலாத்காரம் செய்வது உள்ளிட்டவை தண்டிக்கப்படலாம்.
மேலும், பெண்ணின் சம்மதத்தைப் பெறுவதன் அவசியம் பற்றிய பல தகவல்கள் இதில் தெரிவிக்கப்பட்டுள்ளன.
இந்த சம்மதம் வாய்மொழியாகவோ, சைகையாகவோ இருக்கலாம். 
நாம் இந்த சட்டத் திருத்தங்களைத் தெரிந்துகொள்வது அவசியம். 

நம்மில் பலரும் பாலியல் துன்புறுத்தலாக கருதுவது இதன் உச்சகட்டமான பலாத்காரத்தையோ அல்லது பாலியல் ரீதியான தாக்குதல்களையோதான். நாம் தினந்தோறும் அனுபவிக்கும் சைகை மற்றும் வாய்மொழி சீண்டல்களை பாலியல் துன்புறுத்தல் என கருத முடியாத அளவுக்கு அவை நமக்கு பழக்கமாகிவிடுகின்றன. 
ஐ.பி.சி. 354 சட்டத்தின் கீழ் உள்ள ஏ,பி,சி,டி குற்றப் பிரிவுகள் ஆண் பெண்ணைத் தாக்குவது தொடர்பான குற்றங்களுக்கானவை. 

இதில், பெண்ணின் விருப்பத்துக்கு எதிராக தொடுவது, பாலியல் ரீதியான கோரிக்கைகள் வைப்பது, விருப்பமற்ற பெண்ணுக்கு ஆபாசப் படம் காண்பிப்பது, நேரடியாகவோ அல்லது இணையதளத்திலோ பின்தொடர்வது,அனுமதியின்றி புகைப்படம் மற்றும் வீடியோ எடுப்பது மற்றும் அதை நண்பர்களுடன் பகிர்ந்துகொள்வது போன்றவையும் தண்டனைக்குரிய குற்றங்களாகும்.

2 வயது குழந்தைகள்,சிறுமிகள் முதல் கிழவிகள் வரை பாலியல் துன்புறுத்தல்களுக்கு ஆளாகும் காலத்தில் இது போன்ற சட்டங்கள் கண்டிப்பாக தேவை.

ஆனால் காதலித்து பலமுறை இருவரும் மனமொத்து உடலுறவு கொண்ட பின்னர் ஏதாவது பிரசினை என்றால் ஆன் தன்னை கற்பழித்ததாக காவல் துறையில் புகார் கொடுப்பதும்.அதை வாங்கியவுடனே ஆணையும் ,சில நேரங்களில் அவனின் குடும்பத்தையும் கைது செய்வது வாடிக்கையாகி விட்டது.
கற்பழிப்பு என்பது பெண்ணின் சம்மதமின்றி பலாத்காரமாக ஒரு முறை நடப்பது.அதனால்தான் அது பாலியியல் பலாத்காரமாக பெயர் மாறியுள்ளது.

ஆனால் பிறருக்கு தெரியாமல் பலமுறை பெண்ணின் சம்மதத்துடன் நாய்ப்பெறும் உடலுறவு யார் கண்ணிலாவது மாட்டி விட்டால்மட்டும்  பெண்ணுக்கு சாதகமாக சட்டத்தில்  பாலியியல் பலாத்காரமாக மாறி ஆணை அலைக்கழித்து விடுகிறது.
அதையே அந்த ஆண் தன்னை அப்பெண் பாலியல் பலாத்காரம் செய்ததாக சொன்னால் என்ன நடவடிக்கை இருக்கும்?
 அனைவரும் தமது தனிப்பட்ட பாதுகாப்புக்காக இந்த பாலியல் சட்டதிட்டங்களைத் தெரிந்துகொள்வது அவசியமாகின்றது. 

ஏனெனில், நமக்கான உரிமைகளைத் தெரிந்துகொள்வது நமது மாறிவரும் சமூக சூழலில் பாதிப்புக்குள்ளானவர்களைக் குற்றஞ்சாட்டும் நிலையிலிருந்து மாற்றலாம்.
==============================================================================
இன்று,
ஆகஸ்டு-28.
  • ஹென்ரி ஹட்சன், டெலவர் வளைகுடா பகுதியை கண்டுபிடித்தார்(1609)
  • வில்லியம் ஹேர்ச்செல், சனி கோளின் புதிய சந்திரனைக் கண்டுபிடித்தார்(1789)
  • சயின்டிபிக் அமெரிக்கன் என்ற இதழின் முதல் பதிப்பு வெளியானது(1845)
  • காலெப் பிராடம் தான் கண்டுபிடித்த மென்பானத்திற்கு பெப்சி கோலா எனப் பெயரிட்டார்(1898)
  • குவைத்தை தனது ஒரு பகுதியாக ஈராக் அறிவித்தது(1990)

==============================================================================
முகனூல் :-

தலைக்கனம் தலைக்குனிவைத் தரும்...!

'தனக்கு மட்டுமே எல்லாம் தெரியும்' என்று தலைக்கனம் பிடித்த பண்டிதர் ஒருவர் இருந்தார்.
அடர்த்தியான புருவம், பெரிய மீசை, அடிக்கடி மொட்டை போட்டுக் கொள்ளுவதால் ஈர்குச்சி போல் காணப்படும் முடிகளுடன் கூடிய தலை. இதுவே அவரது அடையாளம்...
வீதியில் அவரைக் கண்டு விட்டாலே மக்கள் ஓடி ஒளிந்து கொள்வார்கள்...
ஏனென்றால் கண்ணில் படும் யாராயிருந்தாலும் ஏதாவது கேள்வி கேட்டு மடக்கித் தமது வாதத்திறமையால் மட்டந்தட்டிவிடுவார்.
இதில் சிலர் அழுது விடுவது கூட உண்டு...
ஒரு நாள் அவருக்கு மட்டந்தட்ட யாருமே கிடைக்கவில்லை.
ஊர் எல்லை வரை வந்து விட்டார்...
அங்கே ஒரு மரத்தடியில் தொழில் செய்து கொண்டிருந்த ஒரு நாவிதரைப் பார்த்தார்...
நாவிதரின் உடைகள் நைந்து போய் அவரது வறுமையைக் காட்டினாலும், அதை அவர் சுத்தமாய்த் துவைத்து, நேர்த்தியாய் உடுத்தியிருந்த விதம் அவருக்கு ஒரு தனி கம்பீரத்தைக் கொடுத்தது...
இது பண்டிதருக்கு எரிச்சலை மூட்டியது...
இன்று இந்த மனிதனைக் கதறி அழவைத்தே ஆக வேண்டுமென்று முடிவெடுத்து அவரை நெருங்கினார்...
"என்னப்பா! முடி வெட்ட எவ்வளவு? சவரம் பண்ண எவ்வளவு?" என்றார்...
அவரும், "முடிவெட்ட நாலணா, சவரம் பண்ண ஒரணா சாமி!" என்று பணிவுடன் கூறினார்...
பண்டிதர் சிரித்தபடியே,
"அப்படின்னா, என் தலையை சவரம் பண்ணு..." என்று கூறிவிட்டு வெற்றிப் புன்னகையோடு அமர்ந்தார்...
வயதில் பெரியவர் என்பதால் நாவிதர் அதைப் பெரிதாக எடுத்துக் கொள்ள வில்லை...

வேலையை ஆரம்பித்தார்...
'நாவிதர் கோபப்படுவார்' என்று எதிர்பார்த்திருந்த
பண்டிதருக்கு சற்று ஏமாற்றந்தான்...
பின்னர், பண்டிதர் அடுத்த கணையைத் தொடுத்தார்...
"ஏன்டாப்பா ! உன் வேலை முடி வெட்டுறது...
உன் கைகளைத்தான் பயன்படுத்தி வெட்டுறே... அப்புறம் எதுக்கு சம்மந்தமில்லாம உன்னை நாக்கோட சம்மந்தப் படுத்தி நாவிதன்னு சொல்றாங்க...?"
இந்தக் கேள்வி நாவிதரை நோகடிக்குமென்று நம்பினார். ஆனால் நாவிதர் முகத்திலோ புன்னகை.
"நல்ல சந்தேகங்க சாமி...
நாங்க தொழில் செஞ்சா மாத்திரம் பத்தாது.
முன்னால உக்காந்து இருக்கறவங்களுக்கு அலுப்புத் தட்டாம இருக்க, நாவால இதமா நாலு வார்த்தை பேசுறதனால தான் நாங்க நாவிதர்கள்...
எங்க பேச்சைக் கேக்குறதுக்குன்னே எத்தனை பேர் எங்களைத் தேடி வராங்க தெரியுமா...?"
இந்த அழகான பதில் பண்டிதரை மேலும் கடுப்பேற்றியது.
அடுத்த முயற்சியைத் துவங்கினார்...
"இதென்னப்பா, கத்தரிக் கோல்னு சொல்றீங்க. கத்தரி மட்டுந்தானே இருக்கு... கோல் எங்கே போச்சு?''
இந்தக் கேள்விக்கு பலமான சிரிப்பு மட்டுந்தான் பதிலாக வந்தது நாவிதரிமிருந்து.
"சாமி ரொம்ப சிரிப்பா பேசுறிங்க..." என்று சொல்லி நிறுத்திக் கொண்டார்...
இதிலும் பண்டிதருக்கு ஏமாற்றம்.
கொஞ்சம் கடுமையாகவே ஆரம்பித்தார்...
"எப்பப் பாத்தாலும் வெட்டித் தள்ளிக்கிட்டே இருக்குற...
ஊர்லயே நீ தான் பெரிய வெட்டிப் பய போலருக்கு..."
இந்த வார்த்தை நாவிதர் மனதைக் கொஞ்சம் காயப்படுத்திவிட்டது...
அவர் முகத்தில் கொஞ்சம் வித்தியாசம்...
இதைத்தானே பண்டிதரும் எதிர்பார்த்தார்.
கொஞ்சம் உற்சாகமாகி அடுத்த நக்கலை யோசித்துக் கொண்டிருந்தார்....
இப்போது நாவிதர் பேச ஆரம்பித்தார்... பண்டிதரின் பிரியமான மீசையைத் தொட்டுக் காட்டிக் கேட்டார்,
"சாமிக்கு இந்த மீசை வேணுங்களா?"
பண்டிதர் உடனே, "ஆமாம்..." என்றார்...
கண்ணிமைக்கும் நேரத்தில் பண்டிதரின் மீசையை வழித்தெடுத்து அவர் கையில் கொடுத்து,
"மீசை வேணுமுன்னிங்களே சாமி! இந்தாங்க..."
பல வருடங்கள் ஆசையாய் வளர்த்த மீசை இப்போது வெறும் மயிர்க் கற்றையாய்...
அதிர்ச்சியில் உறைந்து போனார் பண்டிதர்...
நாவிதரோ அடுத்த நடவடிக்கையில் இறங்கினார்.
அவரது அடர்த்தியான புருவத்தில் கை வைத்தபடிக் கேட்டார்,
"சாமிக்கு இந்தப் புருவம் வேணுங்களா...?"
இப்போது பண்டிதர் சுதாரித்தார்.
'வேணும்னு சொன்னா வெட்டிக் கையிலல்ல குடுத்துடுவான்...' என்ற பயத்தில் உடனே சொன்னார்,
"இந்தப் புருவம் எனக்கு வேண்டாம்... வேண்டவே வேண்டாம்...".
நாவிதர் உடனே பண்டிதரின் புருவங்களையும் வழித் தெடுத்தார்...
"சாமிதான் புருவம் வேண்டாம்னு சொன்னீங்கள்ல? அதைக் குப்பைல போட்டுடுறேன். சாமி பேச்சுக்கு மறுபேச்சே கிடையாது..." என்றபடி கண்ணாடியை பண்டிதரின் முகத்துக்கு முன்பாகக் காட்டினார்...
நாற்பது வருஷமாய் ஆசை ஆசையாய் வளர்த்த மீசையில்லாமல்...
முகத்துக்கு கம்பீரம் சேர்த்த அடர்த்தியான புருவமும் இல்லாமல்...
அவருடைய முகம் அவருக்கே மிகுந்த கோரமாக இருந்தது...
கண்கள் கலங்கக் குனிந்த தலை நிமிராமல் ஒரணாவை அவர் கையில் கொடுத்து விட்டு, விரக்தியில் தளர்ந்து போய் நடையைக் கட்டினார் பண்டிதர்...
*"நம்முடைய அறிவும்...*
*புத்தியும்...*
*திறமையும்...*
*அதிகாரமும்...*
*அந்தஸ்தும்...*
*பொருளும்...*
*மற்றவர்களுக்கு உதவுவதற்கே தவிர மட்டம் தட்ட அல்ல..."*
                                                                                                                     ' புதிய தேடல் ' பக்கத்தில் இருந்து.
==============================================================================