புதிய பிரதமர் : இலங்கை நெருக்கடி தீருமா?

 இலங்கையில் அரசியல் மற்றும் பொருளாதார நெருக்கடிகள் ஏற்பட்டுள்ள நிலையில் ரணில் விக்ரமசிங்கே ஆறாவது தடவையாக பிரதமராக பதவியேற்றுள்ளார். அதிபர் கோத்தபய ராஜபக்சவின் சகோதரர் மஹிந்த ராஜபக்சேவின்

ஆதரவாளர்கள் இலங்கை அரசை எதிர்த்து போராடிய மக்கள் மீது தாக்குதல் நடத்தினர். போராட்டக்காரர்களும் திருப்பித் தாக்கினர். இதில் 12 பேர் கொல்லப்பட்டனர்.

இதற்குப் பிறகு மகிந்த ராஜபக்சே பிரதமர் பதவியிலிருந்து விலகினார். அதன் பிறகு அதிபர் கோத்தபய ராஜபக்சேவை தனியறையில் சந்தித்து பேசிய பிறகு ரணில் விக்கிரமிசிங்கே பிரதமராக பதவி ஏற்றிருக்கிறார்.

73 வயதான ரணில் விக்கிரமசிங்க, ஒரு மேல்தட்டு குடும்பத்தைச் சேர்ந்தவர். 

அவரது குடும்பத்தின் வேர்கள் சுதந்திரத்திற்கு முந்தைய ஸ்ரீலங்காவுக்குச் செல்கின்றன. அவரது தாய்வழி தாத்தா டி.ஆர். விஜேவர்தன சுதந்திர இயக்கத்தை ஆதரிக்கும் செய்தித்தாளை வெளியிட்டார். அவரது தந்தைவழி தாத்தா, சி.ஜி. விக்கிரமசிங்க, இலங்கையின் பிரிட்டீஷ் காலனித்துவ அரசாங்கத்தின் மூத்த அதிகாரி ஆவார்.

ரணில் விக்கிரமசிங்கேவின் தந்தை, எஸ்மண்ட் விக்கிரமசிங்க, பிந்தைய காலனித்துவ அரசின் ஒரு அங்கமாக இருந்தார்.

 முதலாவதாக, லேக் ஹவுஸ் எனப்படும் பதிப்பகம் எஸ்மண்ட் விக்கிரமசிங்கேவின் மாமனாரால் தொடங்கப்பட்டது. இது பல பத்திரிகைகளை நடத்தியது.

 பின்னர் எஸ்மண்ட் விக்கிரமசிங்க ஐக்கிய தேசியக் கட்சி (UNP) தலைமையின் நெருங்கிய நம்பிக்கையாளர்களில் ஒருவராக மாறினார். இக்கட்சிக்குத்தான் ரணில் விக்கிரமசிங்கே இப்போது தலைவராக இருக்கிறார்.

இளம் வழக்கறிஞரான ரணில் விக்கிரமசிங்க, 1970 இல் மறைந்த பிரதமர் சிறிமாவோ பண்டாரநாயக்க தலைமையிலான கூட்டணிக்கு ஏற்பட்ட பெருந் தோல்வியைத் தொடர்ந்து ஐக்கிய தேசிய கட்சியின் மீள் எழுச்சிக்கு பாடுபட்டார். 

விக்கிரமசிங்கவின் தாய்வழி உறவினரான ஜே.ஆர்.ஜெயவர்தனவே கட்சியின் மறுமலர்ச்சிக்கு வழிவகுத்தார். 

ஜெயவர்த்தன 1977 இல் மீண்டும் பாராளுமன்றத்தில் பெரும்பான்மையுடன் ஆட்சிக்கு வந்தார்.

ஜெயவர்த்தன அமைச்சரவையில் இளம் விக்கிரமசிங்க துணை வெளிவிவகாரத்துறை அமைச்சரானார். சிறிது காலத்தின் பின்னர் இளைஞர் விவகாரங்கள் மற்றும் வேலைவாய்ப்பு அமைச்சராக புதிதாக உருவாக்கப்பட்ட பதவிக்கு மாற்றப்பட்டார்.

 அதனைத் தொடர்ந்து, அவர் கல்வி அமைச்சரானார். மற்றும் அதிபர் ரணசிங்க பிரேமதாசவின் கீழ் கைத்தொழில் அமைச்சராக நீண்ட காலம் பணியாற்றினார். அங்கு அவர் இலங்கை பங்குச் சந்தையில் பெரும் மாற்றங்களுக்கும் வெளிநாட்டு முதலீட்டாளர்களை நாட்டிற்கு ஈர்ப்பதிலும் முக்கிய பங்கு வகித்தார்.


1993 ஆம் ஆண்டு மே மாதம் 1 ஆம் தேதி அதிபர் பிரேமதாச, விடுதலைப் புலிகளால் படுகொலை செய்யப்பட்டபோது, டி.பி.விஜேதுங்க ஜனாதிபதியாக பதவியேற்றபோது ரணில் விக்கிரமசிங்கே முதன் முறையாக பிரதமராக பதவியேற்றார்.

30 ஆண்டுகளாக ஆணாக நடித்து பெண

 மறைந்த பிரதமர் பண்டாரநாயக்கவின் மகள் சந்திரிகா பண்டாரநாயக்கவின் கையால் ஐ.தே.க தோற்கடிக்கப்பட்டதைத் தொடர்ந்து, 2000 ஆம் ஆண்டில் பண்டாரநாயக்கா தலைமையில் மீண்டும் பிரதமராக வரும் வரை விக்கிரமசிங்க எதிர்க்கட்சித் தலைவராக இருந்தார்.

சிறுவயது நண்பரான ஆனால் அரசியல் எதிரியாக இருந்த அதிபர் சந்திரிகாவுடனான அவரது உறவு, 2004 இல் சிதைந்தது. 

மேலும் விக்கிரமசிங்கவின் அரசாங்கத்தில் பாதுகாப்புத்துறை உட்பட சில முக்கிய அமைச்சரவைகளை சந்திரிகா கைப்பற்றினார்.

2005 இல் விக்கிரமசிங்க அதிபர் தேர்தலில் போட்டியிட்டபோது அவர் மஹிந்த ராஜபக்சேவிடம் தோராயமாக 1,50,000 வாக்குகள் வித்தியாசத்தில் தோல்வியடைந்தார்.

 தமிழீழ விடுதலைப் புலிகள் வடக்கு மற்றும் கிழக்கு மாகாணங்களில் விக்கிரமசிங்கே அதிக வாக்கு பெறுவதை பலவந்தமாக தடுத்தனர்.

மீண்டும் எதிர்க்கட்சித் தலைவர் பதவிக்கு வந்த அவர், அதன்பிறகு அதிபர் தேர்தலில் ரணில் போட்டியிடவில்லை. 2010 இல், அவர் ஜெனரல் சரத் பொன்சேகாவை தனது வேட்பாளராக முன்னிறுத்தினார்.

 மேலும் 2015 இல், அவர் ராஜபக்சேவின் கட்சியில் இருந்து பிரிந்த அணியுடன் கூட்டணியுடன் சேர்ந்தார். அந்தக் கூட்டணி மூலம் ஸ்ரீலங்கா சுதந்திரக் கட்சியின் (SLFP) பொதுச் செயலாளர் மைத்திரிபால சிறிசேன 2015 இல் அதிபரானார்.


விக்கிரமசிங்கவின் கல்லூரித் தோழரும் நெருங்கிய நம்பிக்கையாளரான அர்ஜுன மகேந்திரா, மத்திய வங்கி ஆளுநராக பணியாற்றினார். ஆனால் இவர் மீதான ஊழல் குற்றச்சாட்டுகள், விக்கிரமசிங்கவிற்கும் சிறிசேனவிற்கும் இடையிலான உறவுகளை விரைவாகக் கெடுத்தது.

இந்த ஊழல் ஒரு செயலிழந்த அரசாங்கத்திற்கு வழிவகுத்தது. மற்றும் அதிபர் சிறிசேனா, விக்ரமசிங்கவை 2018 இல் பிரதம மந்திரி பதவியில் இருந்து அகற்ற முயற்சித்தார். 

ரணில் விக்கிரமசிங்கே இப்படி பிரதமர் பதவியில் நீக்கப்பட்ட குழப்பத்தில் மகிந்த ராஜபக்ச மீண்டும் 52 நாட்களுக்கு பிரதமராக பதவி வகித்தார். 

இது அரசியல் சாசன சதி என விமர்சகர்களால் விமர்சிக்கப்பட்டது. 

உச்ச நீதிமன்றம் மகிந்தாவின் பதவி நியமனத்தை ரத்து செய்ததை அடுத்து ரணில் விக்கிரமசிங்க மீண்டும் பிரதமரானார்.

இந்த காலகட்டத்தில் UNP அரசாங்கம் சர்வதேச நாணய நிதியத்தின் உதவியுடன் பொருளாதார மறுசீரமைப்பில் பல முன்னேற்றங்களைச் செய்தது. 

இது அதிக வரிவிதிப்பு மூலம் வருமானத்தைப் பெருக்கியது. 

பெரும்பாலும் பெருநிறுவனங்கள் மீது அதிக வரி விதிக்கப்பட்டாலும் குறைந்த வருமானம் பெறுபவர்கள் வரி அதிகம் செலுத்தாமல் பாதுகாக்கப்படுவதை உறுதி செய்தது.

2019 ஆம் ஆண்டு ஈஸ்டர் ஞாயிறு அன்று பொதுமக்களை குறிவைத்து 250 க்கும் மேற்பட்டவர்களைக் கொன்ற குண்டுவெடிப்புகளைத் தொடர்ந்து விக்கிரமசிங்கவின் புகழ் குறைந்தது. தாக்குதல்களைத் தடுக்க அரசாங்கம் போதுமானதைச் செய்யத் தவறியதாக விமர்சகர்கள் குற்றம் சாட்டினர். 

இதனைத் தொடர்ந்து அந்த ஆண்டின் இறுதியில் நடந்த தேர்தலில் ரணில் விக்கிரமசிங்க தோற்கடிக்கப்பட்டார். கோத்தபயா அதிபராகவும், அவரது சகோதரர் மஹிந்த பிரதமராகவும் பதவியேற்றனர். மேலும் ராஜபக்சேவின் குடும்பம் அமைச்சரவையில் பல பதவிகளைக் கைப்பற்றியது.

 நாட்டில் வரவு செலவு அறிக்கையில் 75% ராஜபக்சேவின் குடும்பக் கட்டுப்பாட்டில் இருந்தது. இது பெரும் ஊழலுக்கும், சர்வாதிகாரத்திற்கும் வழி வகுத்தது.

பிரதமர் மகிந்த ராஜபக்ச மற்றும் அவரது சகோதரரும் அதிபருமான கோத்தபய ராஜபக்சேவின் அரசாங்கம் உடனடியாக வரி கட்டமைப்பை மாற்ற முடிவு செய்தது.

 கார்ப்பரேட் நிறுவன வரிகளைக் குறைக்கவும் நடவடிக்கை எடுத்தது, இது நாட்டின் பற்றாக்குறையை அதிகரிக்கச் செய்தது. 

நாட்டின் மொத்த உள்நாட்டு உற்பத்தியில் 15% ஆக இருந்த வரி வருமானம் 8% மாக கிட்டத்தட்ட பாதியாக குறைந்தது.

மேலும் கோவிட்-19 தொற்று நோயினால், இலங்கையின் முக்கிய வெளிநாட்டு வருமான ஆதாரங்கள் சுற்றுலா மற்றும் வெளிநாட்டினரின் வருமானம் குறைந்து போனதால், பிரச்சனை தீவிரமடைந்தது.

தொற்றுநோயால் ஏற்பட்ட அன்னியச் செலாவணி பற்றாக்குறையானது இரசாயன உரத்திலிருந்து இயற்கை உரமாக ஒரே இரவில் மாற்றுவதற்கான பேரழிவுகரமான கொள்கை முடிவிற்கு வழிவகுத்தது. 

இது துக்ளக் தர்பாருக்கு பொருந்தும் ஒரு முட்டாள்தனமான முடிவு. ஏனெனில் அரசாங்கத்தால் இரசாயன உரங்கள் மற்றும் பூச்சிக்கொல்லி மருந்துகளை இறக்குமதி செய்ய முடியவில்லை

இது இலங்கையின் பொருளாதாரத்தில் குழப்பமான மற்றும் அடுக்கடுக்கான விளைவுகளுக்கு வழிவகுத்தது. விவசாய உற்பத்தி சீர்குலைந்தது. 

நாட்டின் வெளிநாட்டு செலவாணி கையிருப்பு இல்லாமல் போய்விட்டது. விலை வாசி உயர்வு, மற்றும் எரிபொருள் தட்டுப்பாடு காரணமாக மக்கள் போராட்டத்தை துவக்கினர். மேலும் அதிபரே வீட்டுக்கு போ எனும் முழக்கம் கொழும்பு முழுவதும் ஒலித்தது. 

இக்காலத்தில்தான் ரணில் விக்கிரமசிங்கேவை பிரதமராக பதவி ஏற்கும்படி அதிபர் கோத்தபய ராஜபக்சே கோரிக்கை விடுத்தார். 

இவர்களுக்கிடையே என்ன பேரம் நடந்தது என்பது வெளி உலகிற்கு தெரியாது.

ரணில் விக்கிரமசிங்க இப்போது பல ஆண்டுகால பொருளாதார முறைகேடு மற்றும் ஊழலை மாற்றியமைத்து மக்கள் ஆதரவைப் பெறுவதற்கான பணியை எதிர்கொள்ளப் போவதாக கூறியிருக்கிறார்.

ஆனால் இது சாத்தியம் இல்லை என்கிறார்கள அரசியல் நோக்கர்கள். அதிபர் கோத்தபயாவிடமே அதிகாரங்கள் குவிந்துள்ளது. கிட்டத்தட்ட மறைமுக இராணுவ சர்வாதிகார ஆட்சி இலங்கையில் நடைபெறுகிறது. 

இராணுவத்தின் கட்டுப்பாடு அதிபர் கையில் இருக்கிறது.

முன்னாள் பிரதமர் மகிந்தாவை வீட்டுக்கு அனுப்பிய போராட்டக்காரர்கள் கோத்தபயாவையும் வீட்டுக்கு அனுப்ப தொடர்ந்து போராடுகிறார்கள்.

 இதற்கிடையே இலங்கையில் குறுகியகால வெளிநாட்டுக் கடன்களை அடைக்க வேண்டிய காலமும் வந்துவிட்டது. அரசின் கையில் பணமில்லை.

ரணில் விக்கிரமசிங்கே பொதுவில் இந்திய மற்றும் மேற்குல நாடுகளின் ஆதரவாளர் என்பதால் இந்நாடுகளிடம் உதவியைக் கோரலாம். 

ஆனால் மேற்குலக நாடுகள் அனைத்தும் உக்ரைன் போரில் சிக்கியிருப்பதால் இலங்கைக்கு உதவும் வாய்ப்பு குறைவு. இந்தியாவும் பணவீக்கம் மற்றும் பொருளாதார நெருக்கடியில் இருப்பதால் பெரிய அளவுக்கு உதவ வாய்ப்பில்லை.

இந்நிலையில் விலை வாசி மேலும் உயர்ந்து வரும் நிலையில், எரிபொருள் தட்டுப்பாடு அதிகரித்து வரும் நிலையில் மக்கள் போராட்டமும் தீவிரமடைந்து வருகிறது.

 இதை இராணுவத்தைக் கொண்டு அடக்கினால் போராட்டம் தீவிரமடையுமே அன்றி குறையாது. மக்கள் கோத்தபயாவை வீட்டு அனுப்ப வேண்டும், அதிபர் அதிகாரங்கள் குறைக்கப்படவேண்டும், 

மக்கள் நலன் சார்ந்து புதிய அரசியல் அமைப்பு உருவாக்கப்பட வேண்டும் என்ற கோரிக்கைகளுடன் போராடுகிறார்கள். தற்போது கொழும்புவைத் தாண்டி இலங்கையின் மற்ற பகுதிகளிலும் போராட்டம் பரவி வருகிறது.

இந்நிலையில் ரணில் விக்கிரமசிங்கேவின் பதவியேற்பு என்ன மாற்றத்தை ஏற்படுத்தும் என்பதை பொறுத்திருந்துதான் பார்க்க வேண்டும்.

----------------------------------------------------------------------------