பொய்யாட்சி....?
நல்லாட்சியல்ல, பொய்யாட்சி
மக்கள் அனைத்தையும் மறந்திருப்பார்கள் என்று நினைத்து பொய்ப் பேட்டிகளை வண்டி வண்டியாக அவிழ்க்கத் தொடங்கி இருக்கிறார் எதிர்க்கட்சித் தலைவர் பழனிசாமி. நாசகார ஆட்சியைத்தான் இவர் கொடுத்தாரே தவிர, நல்லாட்சியைத் தரவில்லை.
தனது சொந்தத் தொகுதியில் கூட எந்த அடிப்படை பிரச்சினையையும் பழனிசாமி தீர்க்கவில்லை. பிறகு எப்படி தமிழ்நாட்டில் மற்ற தொகுதிகளில், அம்மக்களின் பிரச்சினையை பழனிசாமி தீர்த்திருப்பார்?
சுமார் 10 ஆயிரம் பேர் வேலைக்காக பதிவு செய்துள்ளார்கள் எடப்பாடி தொகுதியில் மட்டும். அவர்களது அனைத்து விண்ணப்பங்களையும் கட்டுக்கட்டாக அடுக்கி எடுத்து வந்து பொதுவெளியில் காட்டினார் தி.மு.க. தலைவர்.
2021 ஆம் ஆண்டு சட்டமன்றத் தேர்தலுக்கு முன்னதாக அனைத்துத் தொகுதியிலும் கிராமசபைக் கூட்டங்களை நடத்தினார் தி.மு.க. தலைவர் மு.க.ஸ்டாலின் அவர்கள். அப்போது, எடப்பாடி தொகுதியில் நடந்த கிராம சபையில் பேசிய பெண்கள் அனைவரது உரையும் கண்ணீரையும் கோபத்தையும் வரவைத்தது. அரசாங்க அலுவலகத்துக்கு போனால் எந்த இடத்தில் எவ்வளவு லஞ்சம் தர வேண்டி இருக்கிறது என்றார் ஒரு பெண். நெசவாளர் நிறைந்த அந்தப் பகுதியில் நெசவாளர் துயர் துடைக்க எதுவும் செய்யவில்லை என்றார் இன்னொருவர். டாஸ்மாக் கடைகள் மூலமாக ஏற்படும் சட்டம் – ஒழுங்கை இன்னொருவர் சொன்னார். படித்த தன்னைப் போன்றவர்க்கு வேலை கிடைக்காத கொடுமையை இன்னொருவர் சொன்னார். ‘ரோடு போடுவதைத் தவிர எதுவும் செய்யவில்லை, அதுவும் போட்ட ரோட்டையே திரும்பத் திரும்பப் போடுகிறார்கள்’ என்று சொன்னார் மற்றொருவர்.
முதலமைச்சர் பதவியில் இருந்த பழனிசாமி தனது சொந்தத் தொகுதியைக் கூட எவ்வளவு கேவலமாக வைத்துள்ளார் என்பதைப் படம் பிடித்தது எடப்பாடியில் நடந்த கிராமசபை!
1. எடப்பாடி தொகுதியில் ஜவுளிபூங்கா
2. நெருஞ்சிப்பேட்டையில் காவிரி ஆற்றின் குறுக்கே பாலம்
3. கொங்கணாபுரத்தில் தொழில்பேட்டை
4. மேட்டூர் அணையில் இருந்து வெளியேறும் உபரி நீர் பயன்பாடு
5. எடப்பாடி அரசு மருத்துவமனை மேம்பாடு
6. கொங்கணாபுரம் கூட்டுறவு வங்கி விவகாரம்
7. மின் மயானங்கள்
8. தேங்காய், மா.பருத்தி, மரவள்ளிக் கிழங்கு ஆகியவற்றுக்கு ஆதார விலை
9. பொதுக்கழிவு சுத்திகரிப்பு நிலையம்
10. நிலக்கடலை விவசாயிகளுக்கு தனிகூட்டுறவு சங்கம்
-– இவை அனைத்தும் பழனிச்சாமி, எடப்பாடித் தொகுதிக்குச் செய்து தருவதாகச் சொன்ன வாக்குறுதிகள். இதனை நிறைவேற்றித் தரவில்லை என்றுதான் அந்தத் தொகுதி மக்கள் குற்றம் சாட்டினார்கள்.
நங்கவல்லி டவுன் பஞ்சாயத்தில் உள்ள வேளாண் கூட்டுறவு கடன் சங்கத்தின் தலைவர் பொதுப்பணத்தை மோசடி செய்தார். இது கண்டு பிடிக்கப்பட்டது. அ.தி.மு.க.வைச் சேர்ந்தவர் என்பதால் விசாரணை நாடகம் நடத்தி, இழப்பை மட்டும் பதிவு செய்து அவரை காப்பாற்றிவிட்டார் பழனிசாமி. அ.தி.மு.க. உள்ளூர் தலைவர்களும் பழனிசாமிக்கு நெருக்கமான உதவியாளர்களும் சட்டவிரோதமாக மணல் கொள்ளையில் ஈடுபட்டு வருகிறார்கள் என்று குற்றச்சாட்டு வைக்கப்பட்டது. பொங்கல் பரிசுகளாக விநியோகிக்கப்பட்ட கரும்பில் பழனிசாமியின் நெருங்கிய கூட்டாளிகள் கமிஷன் பார்த்துள்ளார்கள். தேங்காய் வியாபாரிகள் பெருமளவு பாதிக்கப்பட்டு வருகிறார்கள். இதுவும் அப்போது சொல்லப்பட்ட குற்றச்சாட்டுதான்.
‘’எடப்பாடியில் உள்ள கொங்கணாபுரத்தில் உள்ள விவசாய நிலங்கள்
வழியாக எண்ணெய் குழாய் அமைக்கப்பட்டுள்ளது. கேரளாவில், கர்நாடக குழாய் இணைப்பு இங்கு போலல்லாமல் நெடுஞ்சாலைகள் வழியாகச்செல்கிறது.
ஆனால் இங்கு ஆயிரக்கணக்கான விவசாயிகளின் விவசாய நிலங்களையும் சேதப்படுத்துகிறது” என்றும் அப்போது பொதுமக்கள் சொன்னார்கள்.
அ.தி.மு.க. அரசாங்கம் ஐந்து ஆண்டுகளுக்கு முன்பு பெரியநாச்சியூர் கிராமத்தில் இருந்த ஆரம்ப சுகாதார நிலையக் கட்டடத்தை இடித்தது. 2021 வரை அதைக் கட்டித் தரவில்லை. மக்கள் எதற்கெடுத்தாலும் எடப்பாடி நகரத்துக்குத்தான் செல்ல வேண்டி உள்ளது. தூய்மையான பஞ்சாயத்து விருதை கொடுத்துள்ளார்கள். ஆனால் குடிநீர் மேல்நிலை நீர்த்தேக்கத் தொட்டியை ஒன்றரை ஆண்டுகளாக சுத்தம் செய்யவில்லை என்று மக்கள் சொன்னார்கள். இதுதான் அவர் நல்லாட்சி நடத்திய லட்சணம் ஆகும்.கிராமசபைக் கூட்டம் நடந்த பஞ்சாயத்தில் 52 சின்டெக்ஸ் தண்ணீர்
தொட்டிகள் உள்ளன. 3 ஆண்டுகளுக்கு முன்பு இதில் 40 தொட்டிகளில் இருந்து மோட்டார் அகற்றப்பட்டது, அவை 2021 முதல் பொருத்தப்படவில்லை. கிராமசபைக் கூட்டம் மைதானத்தின் நுழைவாயிலில் ஒரு சின்டெக்ஸ் தொட்டி உள்ளது, அதில் கடந்த 3 ஆண்டுகளாக தண்ணீர் இல்லை. இதுதான் பழனிசாமியின் தொகுதியின் அன்றைய நிலைமை!
‘‘ஆனால் கழிவறை கட்டுவதில் கமிஷன் அடித்துவிட்டார்கள். ஒன்றிய அரசு அறிமுகப்படுத்திய வீட்டு கழிப்பறை திட்டத்தில் சேர 2 ஆயிரம் ரூபாய் கமிஷனாக அ.தி.மு.க. பிரமுகர்கள் வாங்கி இருக்கிறார்கள்.தனிப்பட்ட குடிநீர் குழாய் இணைப்புக்கு 4000 ரூபாய், -5000 ரூபாய் வசூலித்திருக்கிறார்கள். காசு கொடுத்தால்தான் டெண்டர் என்று பழனிசாமி நடந்து கொள்வதைப் போலவே அவரது கட்சிக்காரர்களும் காசு கொடுத்தால்தான் இது போன்ற அரசின் பயனை பெற முடியும் என்ற நிலைமைதான் எடப்பாடி தொகுதியில் இருக்கிறது” என்று அப்போது மக்கள் சொன்னார்கள். இதுதான் அவர் நல்லாட்சி நடத்தியதா?
எப்போதும் சேலத்தில் போய் பதுங்கிக் கொள்ளும் பழனிசாமி, சேலம் மாவட்டத்துக்காவது ஏதாவது செய்துள்ளாரா என்றால் அதுவும் இல்லை!
சேலம் மாவட்டத்துக்கு பழனிசாமி கொடுத்த வாக்குறுதிகள் என்ன?
சேலம் – பெங்களூரு தேசிய நெடுஞ்சாலையில் தி.மு.க. ஆட்சி காலத்தில் தொடங்கப்பட்ட தகவல் தொழில் நுட்பப் பூங்கா பணிகளை முடக்கி வைத்திருந்தார். திடக்கழிவு மேலாண்மை திட்டத்தை முடக்கினார். பாதாளச் சாக்கடை
திட்டத்தை முறையாகச் செயல்படுத்தவில்லை. ஏற்காடு தாவரவியல் பூங்காவை முறையாக அமைக்கவில்லை. சேலம் சூப்பர் ஸ்பெஷாலிட்டி மருத்துவமனையை மேம்படுத்தவில்லை. சேலம் மாநகர எல்லைப் பகுதிகளை இணைக்கும் ரிங் ரோடு அமைக்கப்படும் என்றார் பழனிசாமி. அமைக்கவில்லை. தலைவாசல் சந்தை விரிவாக்கம் செய்யப்படவில்லை. ஓமலூரில் திரவிய தொழிற்சாலை அமையவில்லை.
கொடுத்த அத்தனை வாக்குறுதிகளையும் காற்றில் பறக்கவிட்ட ஆட்சிதான் எடப்பாடி பழனிசாமியின் ஆட்சி. இவர்தான் இன்று நல்லாட்சி தந்ததாக
உளறிக் கொண்டிருக்கிறார்.
2011 முதல் 2021 வரை நல்லாட்சி கொடுத்தார்களாம். கொடுத்த வாக்குறுதி எதையும் நிறைவேற்றாதது எப்படி நல்லாட்சியாக இருந்திருக்க முடியும்?
2016 அ.தி.மு.க. தேர்தல் அறிக்கையில் முக்கியமாகச் சொன்ன அறிவிப்பு, வேலைக்குச் செல்லும் பெண்களுக்கு அம்மா ஸ்கூட்டர். வழங்கப்படும் என்பது தான். ஆட்சிக்கு வந்ததும் கிடப்பில் போட்ட அறிவிப்பை 2019 நாடாளுமன்றத் தேர்தலுக்காக அப்போது பா.ஜ.க. கூட்டணியில் இருந்த அ.தி.மு.க. திடீரென பிரதமர் மோடியை வைத்துத் தொடங்கினார்கள். அம்மா ஸ்கூட்டர் மானியம் வெறும் 2.85 பயனாளிகளுக்கு மட்டுமே வழங்கப்பட்டிருக்கிறது. பணிக்குச் செல்லும் எல்லா பெண்களுக்கும் வழங்குவதாகச் சொன்னது ஏமாற்று வேலை. ‘ஸ்கூட்டர் வாங்க 50 சதவிகிதம் மானியம் வழங்கப்படும்’ எனப் பிரச்சாரத்தில் ஜெயலலிதா சொன்னார். ஆனால், ஸ்கூட்டர் விலையில் 50 சதவிகிதமோ அல்லது 25 ஆயிரம் ரூபாய் இதில் எது குறைவோ அந்தத் தொகைதான் மானியமாகக் கொடுத்தார்கள். அதனால் ஸ்கூட்டர் வாங்கியவர்களுக்குப் பாதி தொகை வழங்கப்படவில்லை.
2016-ல் அ.தி.மு.க வெளியிட்ட தேர்தல் அறிக்கையில், ’ஆதி திராவிடர் பழங்குடியினர் நல விடுதிகளுக்கு நீராவி கொதிகலன்களும் நீராவி இட்லி குக்கர்களும் வழங்கப்படும்’ என்று அறிவித்தார்கள். வெறும் காத்துதான் வந்தது. நரிக்குறவர்களைப் பழங்குடியினர் பட்டியலில் சேர்ப்பதற்கு நடவடிக்கை எடுக்கப்படும் என்ற அறிவிப்பு முதல்வர் பழனிசாமி ஆட்சியில் உறங்கிக் கொண்டிருந்தது. ‘அம்பேத்கர் கொள்கையை பரப்ப 5 கோடியில் அம்பேத்கர் பவுண்டேஷன் நிறுவப்படும்’ என்ற அறிவிப்பு நகரவே இல்லை.
‘‘அரசு மருத்துவமனைகளில் செயற்கை கருத்தரித்தல் மையங்கள் அமைக்க வேண்டும்’’ என்கிற கோரிக்கை தொடர்ச்சியாக எழுந்த நிலையில் தான், ‘‘7 அரசு மருத்துவக் கல்லூரி மருத்துவமனைகளிலும் 6 தலைமை அரசு மருத்துவமனைகளிலும் கட்டணமில்லா கருத்தரிப்பு மையங்கள் ரூ.10 கோடியில் உருவாக்கப்படும்’’ என 2017 ஜூனில் அறிவித்தது அ.தி.மு.க. ஆட்சி. ‘மகளிர் சிறப்பு மருத்துவர், உடலியல் மருத்துவர், லேப்ராஸ்கோப்பி சிகிச்சை மருத்துவர் எல்லாம் கருத்தரிப்பு மையங்களில் இருப்பார்கள்’ எனச் சொன்னார்கள். முதல் கட்டமாகச் சென்னை, கோவை, மதுரை, திருச்சி,
திருநெல்வேலி, தஞ்சாவூர் ஆகிய 6 அரசு மருத்துவக் கல்லூரி மருத்துவ மனைகளில் தொடங்கப்படும் என்றெல்லாம் செய்திகள் வெளியாகின. ஆனால் எதுவும் நடக்கவில்லை.
அமெரிக்க சுதந்திர தேவி சிலை போல ரூ. 100 கோடியில் மதுரையில் தமிழ்த்தாய்க்கு சிலை அமைக்கப்படும் என சட்டமன்ற விதி 110-ன் கீழ்
அறிவிப்பை 2013 மே 14-ம் தேதி வெளியிட்டார் முதல்வர் ஜெயலலிதா. தமிழ்த்தாயை ஏமாற்றிய ஆட்சிதான் அம்மா ஆட்சி.
2011 அ.தி.மு.க. தேர்தல் அறிக்கையில் இருந்தவை பழனிசாமிக்கு நினைவில் இருக்கிறதா?
* சென்னை முதல் கன்னியாகுமரி வரை கடலோர சாலைத் திட்டம்.
* தென் தமிழகத்தில் ‘ஏரோ பார்க்’.
* ஆன்லைன் வர்த்தகம் தடுக்கப்படும்.
* 10 ஆடை அலங்காரப் பூங்காக்கள்.
* திருப்பூர் சாயக் கழிவுகளைச் சுத்திகரிக்க விஞ்ஞானக் கழிவு அகற்றும்
நிலையம்.
* 58 வயதுக்கு மேற்பட்டவர்களுக்கு இலவச பஸ் பாஸ்.
* மின்னணு ஆளுமையின் கீழ் அனைத்துக் காவல் நிலையங்கள்.
* விவசாயிகளைப் பங்குதாரர்களாகக் கொண்ட 6 ஆடை அலங்கார சிறப்புப் பொருளாதார மண்டலங்கள்.
* பள்ளிகளில் தாய்மொழியோடு பிறமொழிகள் பயில சிறப்புப் பயிற்சிகள்.
* நீதிமன்றங்களில் தமிழ்மொழி.
* தமிழில் படித்தவர்களுக்கு அரசு வேலைவாய்ப்பில் முன்னுரிமை.
* வனவிலங்குகள் குடியிருப்பு, விவசாய நிலங்களுக்குள் புகுவதைத்
தடுக்க நடவடிக்கை.
* தகவல் தொழில்நுட்ப வளர்ச்சியை இரண்டு மடங்காக்குவோம்.
* மொபைல் மின்னணு ஆளுமைத் திட்டம்.
- – இவை எதுவும் நிறைவேற்றப்படவில்லை ஜெயலலிதா ஆட்சியில்!
2016 தேர்தல் அறிக்கையில் சொல்லப்பட்டது நினைவில் இருக்கிறதா?
அனைத்து ரேஷன் அட்டைதாரர்களுக்கும் செல்போன் விலையின்றி வழங்கப்படும், பெரிய பேருந்து நிலையங்கள், வணிக வளாகங்கள், பூங்காக்கள் போன்ற பொது இடங்களில், இலவச ‘வை-பை’ இணையதள வசதி வழங்கப்படும், அனைத்து ஊராட்சி ஒன்றியங்களிலும் அம்மா இரு சக்கர வாகன பழுது பார்க்கும் பயிற்சி மையம் உருவாக்கப்படும் – இப்படிச் சொன்னது எதையும் செய்யவில்லை. சொன்னது எதையும் செய்யாத பழனிசாமிதான் நல்லாட்சி தந்தாராம்.
7.12.2020 நாளிட்ட ‘இந்தியா டுடே’ ஏடு வெளியிட்ட ஆய்வு அறிக்கைப்படி ஐந்து ஆண்டுகளின் ( 2015 – 20 ) செயல்பாட்டில் 19 வது இடம் தரப்பட்டது அ.தி.மு.க. ஆட்சிக்கு. 20 மாநிலங்களில் 19 ஆவது இடம். கடைசியில் இருந்து இரண்டாவது இடம் என்று வேண்டுமானால் பழனிசாமி பெருமைப்பட்டுக் கொள்ளலாம்.
நன்றி:முரசொலி.
