வரிக்குதிரைக்கே வரியா?
முதலமைச்சர் மு.க.ஸ்டாலின் உடன் ஓ.பன்னீர்செல்வம், பிரேமலதா சந்திப்பு. அடுத்தடுத்த சந்திப்புகளால் தமிழ்நாட்டு அரசியல் வட்டாரத்தில் பரபரப்பு.
அதிமுக ஆட்சிக்கு வந்தால் கச்சத்தீவை மீட்கும் நடவடிக்கைகளில் கவனம் செலுத்தப்படும். ராமநாதபுரம் தேர்தல் பிரசார சுற்றுப்பயணத்தில் எடப்பாடி பழனிசாமி வாக்குறுதி.
அண்ணா பல்கலைக்கழக முன்னாள் துணைவேந்தர் வேல்ராஜ் பணியிடை நீக்கம். ஓய்வுபெறும் கடைசி நாளில், பழைய நிதி முறைகேடு குற்றச்சாட்டில் நடவடிக்கை. 
நெல்லையில் ஆணவக்கொலை நடந்த இடத்தில் சிபிசிஐடி ஆய்வு. கவினின் தோழி பணியாற்றிய சித்தா கிளினிக்கில் விசாரணை.
அதானிக்காக இந்திய பொருளாதாரத்தை அழித்துவிட்டது ஒன்றிய பாஜக அரசு. ட்ரம்ப் விமர்சனத்தை சுட்டிக்காட்டி எதிர்க்கட்சித் தலைவர் ராகுல் காந்தி குற்றச்சாட்டு.
எதிர்க் கட்சிகளின் எதிர்ப்பையும் மீறி பீகாரில் வாக்காளர் பட்டியல் சிறப்பு திருத்தம். வரைவு வாக்களர் பட்டியலை இன்று வெளியிடுகிறது தேர்தல் ஆணையம்.
இந்திய பொருட்கள் மீதான அமெரிக்காவின் 25 சதவீத வரி இன்று முதல் அமல். பாதிப்புகள் குறித்து ஆய்வு செய்து வருவதாக ஒன்றிய அரசு தகவல்.
மாலேகான் குற்றவாளிகள் விடுதலை நீதியை கேலிக்கூத்தாக்கும் செயல். மார்க்சிஸ்ட் பொதுச்செயலாளர் எம்.ஏ.பேபி கடும் விமர்சனம்.
ஜெர்மனியைச் சேர்ந்த இன்ஸ்டா பிரபலம் நோயல் ராபின்சன் பெங்களூருவில் கைது. அனுமதியின்றி சாலையில் நடனமாடி வீடியோ பதிவு செய்ததால் நடவடிக்கை.
வரிபோடுவதில் சாதனையாளருக்கே வரியா?
அமெரிக்காவில் இறக்குமதி செய்யப்படும் இந்தியப் பொருட்களுக்கு 25 விழுக்காடு வரி விதிக்கப்படும் என்று அமெரிக்க அதிபர் டிரம்ப் அநியாய அறிவிப்பைச் செய்துள்ளார். இதனை ஒன்றிய பா.ஜ.க அரசு கடுமையாக எதிர்த்தாக வேண்டும்.
ஆகஸ்ட் 1 ஆம் தேதி முதல் நடைமுறைக்கு வரும் என்ற அறிவிப்புடன் அமெரிக்க அதிபர் டிரம்ப் வெளியிட்டுள்ள செய்தி, இந்தியாவுக்கு மிகமிக மோசமானது ஆகும்.
“எல்லாம் நல்லதல்ல! எனவே, ஆகஸ்ட் 1 ஆம் தேதி முதல் இந்தியா 25 விழுக்காடு வரியையும் அபராதத்தையும் செலுத்தும். இந்தியா, அமெரிக்காவின் நண்பனாக இருந்த போதிலும், கடந்த ஆண்டுகளில் சிறிய அளவிலான வர்த்தகமே இந்தியாவுடன் செய்து வருகிறோம்.
ஏனெனில் அவர்கள் மிக அதிக அளவு வரி விதிக்கின்றனர். உலகில் மிக அதிக வரிகளில் இதுவும் ஒன்றாக உள்ளது. உலகில் வேறு எந்த நாட்டிலும் இல்லாத அளவுக்கு மிகக் கடுமையான, அருவருப்பான, நாணயமற்ற வர்த்தகத் தடைகளை அவை கொண்டுள்ளன.
உக்ரைனில் ரஷ்யா செய்து வரும் கொலைகளை நிறுத்த வேண்டும் என அனைத்துத் தரப்பினரும் விரும்பும் வேளையில், அந்த நாட்டிடம் இருந்து இந்தியா எப்போதும் குறிப்பிடத்தக்க அளவுக்கு ராணுவத் தளவாடங்கள், எரி சக்திப் பொருட்களை இறக்குமதி செய்து வருகிறது” – இப்படிப் போகிறது அமெரிக்க அதிபரின் செய்திக் குறிப்பு. இவை எதேச்சதிகாரக் கருத்துக்கள் ஆகும்.
கடந்த ஏப்ரல் மாதமே இது போன்ற ஒரு அறிவிப்பை அமெரிக்க அதிபர் டிரம்ப் செய்தார். “அமெரிக்கா மீது வரிகளையும் பிற தடைகளையும் விதித்துள்ள ‘மோசமான நாடுகளில்’ ஒன்றாக இந்தியாவைப் பட்டியலிட்டது டிரம்ப் அரசு.
இதன் காரணமாக இந்தியா மீது 27 விழுக்காடு வரி விதிக்கப்பட்டது. அதுவரை 2 விழுக்காடு வரி மட்டுமே விதிக்கப்பட்டு வந்த நிலையில், இந்தியா மீது 27 விழுக்காடு வரி போடப்படும் என அறிவிக்கப்பட்டது. அமெரிக்கச் சரக்குகளுக்கு இந்தியா 52 விழுக்காடு வரி விதிப்பதாக, அமெரிக்க அதிபர் டிரம்ப் குறிப்பிட்டார்.
இந்தியா மிகவும் கடினமான அணுகுமுறையைக் கொண்டுள்ளது என்றும் அவர் தெரிவித்தார்.
வர்த்தகக் கொள்கைகளைப் பொறுத்தவரை, ‘இந்தியா மிகவும் கடினமாக நடந்துகொள்வதாகவும்’ அப்போது டிரம்ப் தெரிவித்தார். இந்தியச் சந்தையில் அமெரிக்க இறக்குமதிகள் போட்டியிடுவதை இந்தியாவின் வர்த்தகக் கொள்கைகள் மிகவும் கடினமாக்குகிறது என்று குறிப்பிட்ட அவர், “இந்தியா மிக மிகக் கடுமையாக நடந்து கொள்கிறது.
பிரதமர் மோடி சமீபத்தில் இங்கு வந்து சென்றிருந்தார். அவர் எனக்கு சிறந்த நண்பர். நான் அவரிடம், ‘நீங்கள் என் நண்பர்தான். ஆனால், நீங்கள் எங்களை சரியாக நடத்தவில்லை’ என்று சொன்னேன். அவர்கள் 52 விழுக்காடு இறக்குமதி வரி விதிக்கிறார்கள். நாம் பல ஆண்டுகளாக அவர்களுக்கு இறக்குமதி வரி விதிக்கவில்லை” என்று அப்போது டிரம்ப் சொன்னார்.
‘இன்றுதான் அமெரிக்காவுக்கு உண்மையான விடுதலை நாள்’ என்றும் டிரம்ப் அறிவித்தார். இந்த அனைத்து வரியும் வரும் ஏப்ரல் 9 ஆம் தேதி 12.01 மணி முதல் அமலுக்கு வருவதாக வெள்ளை மாளிகை அறிவித்தது.
இந்த வரி விதிப்புக்கு உலகத் தலைவர்கள் கடும் எதிர்ப்புத் தெரிவித்துள்ளனர். அப்போதும் ஒன்றிய பா.ஜ.க அரசு மென்மையான போக்கை கடைப்பிடித்தது. “இந்த சமீபத்திய நிகழ்வுகள் தொடர்பாக மதிப்பீடு செய்யப்பட்டு வருகிறது,
இதனால் பாதிக்கப்படும் அனைத்துத் தரப்பினரிடமும் ஆலோசனை நடைபெற்று வருகிறது” என இந்திய வெளியுறவுத் துறை அமைச்சர் ஜெய்சங்கர் சொன்னார்.
சீனா கடுமையான எதிர்ப்பைக் காட்டியது. அமெரிக்காவில் இருந்து இறக்குமதி ஆகும் பொருட்களுக்கு சீனா அதிக வரி விதிப்பதன் மூலமாக தனது எதிர்ப்பைக் காட்டியது.
ஆஸ்திரேலியா, கனடா, பிரிட்டன், ஜெர்மனி, ஸ்வீடன் ஆகிய நாடுகளும் அப்போது கடுமையாக எதிர்த்தன. இந்த நிலையில் சில நாடுகளுக்கான வரி விதிப்பை நிறுத்தி வைத்தார் டிரம்ப். அதில் இந்தியாவும் ஒன்று.
இதைத் தொடர்ந்து இந்தியாவுக்கும் அமெரிக்காவுக்குமான வர்த்தகப் பேச்சுவார்த்தைகள் தொடங்கின. இதுவரை ஐந்து சுற்றுப் பேச்சுவார்த்தைகள் வாஷிங்டனில் நடந்துள்ளன.
ஆறாவது சுற்று பேச்சுவார்த்தை ஆகஸ்ட் 26 ஆம் தேதி டெல்லியில் நடக்க இருப்பதாக அறிவிக்கப்பட்டுள்ளது. வர்த்தகப் பேச்சுவார்த்தைகள் நடந்து கொண்டு இருக்கும் போது, அடுத்தக் கட்டப் பேச்சுக்கு தேதி குறிக்கப்பட்ட நிலையில் தன்னிச்சையாக வரியை உயர்த்தி எதற்காக டிரம்ப் அறிவிக்க வேண்டும்? என்ன அவசரம்? என்று கேட்பதை விட, ஒன்றிய பா.ஜ.க. அரசு மீது அவருக்கு எந்த மரியாதையும் இல்லை என்பதையே இது காட்டுகிறது.
“இந்தியா – பாகிஸ்தான் போரை நான்தான் நிறுத்தினேன்” என்று திரும்பத் திரும்பச் சொல்லி வருகிறார் டிரம்ப். அது தொடர்பாக இந்திய நாடாளுமன்றத்தின் இரு அவைகளிலும் எதிர்க்கட்சிகள் கேள்விகளால் துளைத்தாவர்த்தகமே
ஆனாலும் பிரதமர் மோடி இதற்குப் பதிலே சொல்லவில்லை. இது அவரது பலவீனத்தின் அடையாளம் ஆகும்.
அமெரிக்காவுக்கு எதிரான விமர்சனங்களுக்கு எதிர்வினையாக இந்த வரி விதிப்பு செய்யப்பட்டுள்ளதா என்பதை பா.ஜ.க. அரசு விளக்க வேண்டும். அமெரிக்காவின் வரி விதிப்பு மிரட்டல்களை ஒன்றிய பா.ஜ.க. அரசு கடுமையாக எதிர்க்க வேண்டும்.
நலம் விசாரிப்பு?அ.இ.அ.தி.மு.க.வின் அதிருப்தி தலைவர் ஓ.பன்னீர்செல்வம், பாஜக தலைமையிலான தேசிய ஜனநாயக கூட்டணியில் இருந்து அதிகாரப்பூர்வமாக விலகுவதாக வியாழக்கிழமை அறிவித்தார்.
நீண்ட காலமாக எதிர்பார்க்கப்பட்ட இந்த முடிவு, பா.ஜ.க.வுடனான அவரது உறவில் ஏற்பட்ட விரிசலையும், புறக்கணிப்பையும் வெளிப்படுத்தியுள்ளது.
'அவமானம்' மற்றும் புறக்கணிப்பு:
ஓ. பன்னீர்செல்வம் தரப்பு, பா.ஜ.க.வின் மத்திய தலைமை தங்களை பல மாதங்களாகப் புறக்கணித்து வருவதாகக் குற்றம் சாட்டியுள்ளது. குறிப்பாக, பிரதமர் நரேந்திர மோடி தமிழகம் வந்தபோது, அவரைச் சந்திப்பதற்குக்கூட வாய்ப்பு மறுக்கப்பட்டது ஓபிஎஸ் ஆதரவாளர்களிடையே கடும் அதிருப்தியை ஏற்படுத்தியுள்ளது.
இதுவே கூட்டணியில் இருந்து வெளியேறுவதற்கான முக்கியக் காரணம் என்று அவர்கள் கூறுகின்றனர்.
அதிகாரபூர்வ அறிவிப்பு:
சென்னை பத்திரிக்கையாளர் சந்திப்பில், ஓ. பன்னீர்செல்வத்தின் ஆதரவாளரான பண்ருட்டி ராமச்சந்திரன், 'அதிமுக தொண்டர்கள் உரிமை மீட்புக் குழு' தேசிய ஜனநாயகக் கூட்டணியில் இருந்து விலகுவதாக அறிவித்தார்.
"இதற்கான காரணங்கள் அனைவருக்கும் தெரியும்" என்று குறிப்பிட்ட அவர், இப்போதைக்கு வேறு எந்தக் கட்சியுடனும் கூட்டணி இல்லை என்றும், விரைவில் மாநிலம் தழுவிய சுற்றுப்பயணத்தை ஓபிஎஸ் தொடங்குவார் என்றும் தெரிவித்தார். "வருங்காலத்தில் அரசியல் சூழலுக்கு ஏற்ப கூட்டணி குறித்து முடிவு செய்வோம்" என்றும் அவர் கூறினார். இந்தச் சந்திப்பில் ஓ. பன்னீர்செல்வம் மௌனம் காத்தார்.
ஓபிஎஸ் தரப்பினருக்கு நெருக்கமான வட்டாரங்கள், பா.ஜ.க. கூட்டணியில் இருந்து விலகும் முடிவு சில வாரங்களாகவே எடுக்கப்பட்டு வந்ததாகத் தெரிவிக்கின்றன. "அவர் முழுவதுமாக மனமுடைந்துவிட்டார்" என்று அந்த வட்டாரங்கள் கூறுகின்றன.
"பிரதமர் வருகையின்போது, குறைந்தது அவரைச் சந்திப்பார் என்று எதிர்பார்த்தோம். ஆனால் அதுவும் நடக்கவில்லை. அதுதான் கடைசி அடி."
சென்னையில் பிரதமர் மோடியை விமான நிலையத்தில் வரவேற்க வந்த தலைவர்களின் பட்டியலில் இடம்பெற ஓபிஎஸ் விரும்பியுள்ளார். இது ஒரு சம்பிரதாயமான நிகழ்வு என்றாலும், அரசியல் முக்கியத்துவம் வாய்ந்தது. ஆனால், கூட்டணி கட்சியான தமிழ் மாநில காங்கிரஸ் தலைவர் ஜி.கே. வாசன் போன்றோர் அழைக்கப்பட்டபோது, ஓபிஎஸ் புறக்கணிக்கப்பட்டார்.
ஓபிஎஸ்ஸுக்கு நெருக்கமான முன்னாள் அரசியல்வாதி ஒருவர், சங் பரிவார அமைப்புகளால் அவர் 'பயன்படுத்தப்பட்டு' கைவிடப்பட்டதாகக் குற்றம் சாட்டினார். "எடப்பாடி பழனிசாமிக்கு எதிராக அவர் மேற்கொண்ட கிளர்ச்சி, பா.ஜ.க. மற்றும் ஆர்.எஸ்.எஸ். தலைவர்களின் ஆலோசனையின் பேரில்தான் நடைபெற்றது" என்று அவர் கூறினார்.
"ஆனால், இறுதியில் பா.ஜ.க. எடப்பாடி பழனிசாமியை ஏற்றுக்கொண்டு, ஓபிஎஸ்ஸைப் புறக்கணித்துவிட்டது. அவர் துரோகப்படுத்தப்பட்டதாக உணர்கிறார்."
ஓ.பி.எஸ்.ஸின் அடுத்தகட்ட நகர்வு குறித்து, அவரது நெருங்கிய உதவியாளர் ஒருவர், நடிகர் விஜய்யின் தமிழக வெற்றிக் கழகத்துடன் (TVK) பேச்சுவார்த்தைகள் நடந்து வருவதை உறுதிப்படுத்தினார்.
“அவருக்கு இரண்டு வாய்ப்புகள்தான் உள்ளன - தி.மு.க. அல்லது தி.வெ.க. இப்போதைக்கு, தி.வெ.க. முன்னணி வகிக்கிறது,” என்று அந்த உதவியாளர் கூறினார்.
சசிகலாவின் அண்ணன் மகனான டி.டி.வி. தினகரனையும் ஓபிஎஸ் உடன் இணைத்து, தென் தமிழகத்தில் தங்களின் செல்வாக்கைக் கட்டமைக்க முயற்சிகள் நடந்து வருவதாகவும் அந்த உதவியாளர் தெரிவித்தார்.
தமிழக வெற்றிக் கழகத்தின் மூத்த தலைவர் ஒருவரும், ஓபிஎஸ்ஸை இணைத்துக்கொள்வதற்குத் தங்கள் கட்சி தயாராக உள்ளதாகத் தெரிவித்தார். "அவரை நிராகரிக்க எங்களிடம் எந்தக் காரணமும் இல்லை. அவர் ஒரு முன்னாள் முதல்வர். அவரது அணியில் முன்னாள் அமைச்சரும், நான்கு முன்னாள் சட்டமன்ற உறுப்பினர்களும் உள்ளனர். மாநிலத்தின் சில பகுதிகளில் ஓபிஎஸ்ஸுக்கு இன்னும் ஆதரவு உள்ளது" என்று அந்தத் தலைவர் கூறினார்.
திமுக தரப்பு இது குறித்து மௌனம் காக்கிறது. ஓபிஎஸ் கூட்டணியில் இருந்து விலகியதற்கு, முதல்வர் ஸ்டாலினை காலை நடைப்பயணத்தின்போது சந்தித்ததுதான் காரணம் என்ற வதந்திகளை இரு தரப்பினரும் மறுத்துள்ளனர்.
"தியோசஃபிக்கல் சொசைட்டியில் அவர்கள் நடைப்பயணத்தின்போது சந்தித்திருக்கலாம். ஆனால் அதற்கு எந்த முக்கியத்துவமும் இல்லை. முதலமைச்சரின் இல்லத்தில் அவர்கள் சந்தித்திருந்தால் அது வேறு கதை" என்று திமுகவின் மூத்த தலைவர் ஒருவர் தெரிவித்தார்.
ஓபிஎஸ்ஸின் வெளியேற்றம், தமிழகத்தில் பா.ஜ.க.வின் எதிர்காலத்தை எடப்பாடி பழனிசாமி தலைமையிலான அதிமுகவுடன் மேலும் பிணைத்துள்ளது. "இது ஒரு வலிமையான முடிவு அல்ல, இது உயிர்வாழ எடுத்த முடிவு" என்று ஓபிஎஸ்ஸுடன் நெருக்கமாக இருந்த முன்னாள் அதிமுக தலைவர் ஒருவர் தெரிவித்தார்.
"ஒரு காலத்தில் பா.ஜ.க. தனது அதிகாரத்தை மீண்டும் பெற்றுத்தரும் என்று ஓபிஎஸ் நம்பினார்; ஆனால் அவர் தனது முதல்வர் பதவி, கட்சிப் பதவி, கட்சியையும், தன் மக்களையும் இழந்தார். இப்போது அவர்களது ஆதரவையும் இழந்தார்.
ஒரு தலைவரைத் தங்களுடையதாக ஆக்கிக்கொண்டு, அவரை மோசமான முடிவுகளை எடுக்க வைத்து, அவரை முழுவதுமாகப் பயன்படுத்திவிட்டு, இறுதியில் கைவிடுவது பா.ஜ.க.வின் வழக்கம். பா.ஜ.க.வின் இந்த அரசியல் அணுகுமுறை புதிதல்ல”, என்று அவர் மேலும் குற்றம் சாட்டினார்.
அதே நேரம் சென்னை ஆழ்வார்பேட்டையில் உள்ள முதல்வர் ஸ்டாலின் வீட்டுக்கு நேற்று மாலை திடீரென வந்த ஓ.பன்னீர்செல்வம், அவருடன் சந்திப்பு நடத்தினார். ஓ.பன்னீர்செல்வத்தை துணை முதல்வர் உதயநிதி ஸ்டாலின் வீட்டு வாசல் வரை வந்து வரவேற்றார்.
முன்னதாக, தேமுதிக பொதுச் செயலர் பிரேமலதா விஜயகாந்த் நேற்று காலை முதல்வர் ஸ்டாலினை நேரில் சந்தித்திருந்தார்
“நட்புடன் நலம் விசாரித்தமைக்கு நன்றி!” என்று பிரேமலதா விஜயகாந்த் உடனான சந்திப்பு குறித்து முதல்வர் ஸ்டாலின் குறிப்பிட்டுள்ளார்.
அதேபோல், ஓ.பன்னீர்செல்வம் உடனான சந்திப்பு குறித்த புகைப்படத்தைப் பகிர்ந்து, “உள்ளன்போடு உரையாடி உடல்நலம் விசாரித்ததற்கு நன்றி!” என்று முதல்வர் ஸ்டாலின் மற்றொரு பதிவில் குறிப்பிட்டுள்ளார்.
