நீதிமன்றமும் அரசியலும்

தமிழ்நாட்டில் முதலமைச்சர் மு.க.ஸ்டாலின் தலைமையிலான திராவிட மாடல் அரசு கொண்டு வருகிற மக்கள் நலத்திட்டங்கள் பல, தேசிய அளவில் ஒவ்வொருவரும் மாநிலமாக அமல்படுத்தப்பட்டு வருகின்றன.

குறிப்பாக, மகளிர் உரிமைத் தொகை திட்டம் இல்லாத தேர்தல் வாக்குறுதிகளே இல்லை என்ற அளவிற்கு, திராவிட மாடல் அரசின் திட்டம் இந்திய அளவில் மக்கள் ஈர்ப்பு திட்டமாக அமைந்துள்ளது.

அதன் தொடர்ச்சியாக, தற்போது தமிழ்நாட்டளவில் பெரும் வரவேற்பைப் பெற்ற திட்டமாக உங்களுடன் ஸ்டாலின் திட்டம் நடைமுறையில் இருந்து வருகிறது.

 இதனை பொறுத்துக்கொள்ள முடியாத அ.தி.மு.க.வினர், இத்திட்டத்தை விமர்சித்ததோடு மட்டுமல்லாமல், 'உங்களுடன் ஸ்டாலின்' திட்டத்திற்கு எதிராக வழக்கு தொடர்ந்தனர்.

ஆனால், மக்கள் நலப்பணியை உயிர்ப்போடு செய்து வரும் தி.மு.க அரசு, மக்களை மனங்களை மட்டுமல்ல, வழக்கையும் வென்றெடுத்துள்ளது.

தமிழ்நாடு அரசின் திட்டத்தில் 'உங்களுடன் ஸ்டாலின்' பெயரைப் பயன்படுத்திய ஜி.ஆர்.சுவாமிநாதன் இருக்கும்  சென்னை உயர்நீதிமன்றம் விதித்த தடையை நீக்கி உச்சநீதிமன்றம் உத்தரவிட்டது.

இதையடுத்து, செய்தியாளர்களை சந்தித்த தி.மு.க நாடாளுமன்ற உறுப்பினரும், வழக்கறிஞருமான பி.வில்சன், “2026ஆம் ஆண்டு சட்டமன்ற தேர்தலில் தி.மு.க. வெற்றிக்கு, தொடக்கப்புள்ளியாக “உங்களுடன் ஸ்டாலின்” திட்டம் மீதான தடையை நீக்கி உச்சநீதிமன்றம் வழங்கிய உத்தரவு அமைந்துள்ளது” என திட்டவட்டமாக தெரிவித்தார்.

தொடர்ந்து, “அரசியல் தலைவர்களின் பெயரில் திட்டங்களை செயல்படுத்துவது என்பது நாடு முழுவதும் பின்பற்றப்படும் நிகழ்வு.

மனுதாரர் சட்டத்தை தவறாக புரிந்து கொண்டு மனு தாக்கல் செய்துள்ளார். இது சட்ட நடைமுறையை தவறாக பயன்படுத்துவதாகும்.

அரசியல் சண்டைக்கு நீதிமன்றங்களை பயன்படுத்தக் கூடாது என்று பலமுறை உச்சநீதிமன்றம் கருத்து தெரிவித்துள்ளது.

ஒரு வாரத்தில் ரூ.10 லட்சம் அபராதத் தொகையை தமிழ்நாடு அரசுக்கு வழங்க வேண்டும். அபராதத்தை செலுத்தாவிட்டால் அவதூறு வழக்கு தொடரலாம்” என உச்சநீதிமன்றம் தெரிவித்த கருத்துகளையும், நாடாளுமன்ற உறுப்பினர் பி.வில்சன் எடுத்துரைத்தார்.

பா.ஜ.க, செய்தி தொடர்பாளர்

உயர்நீதிமன்ற நீதிபதி!

விளங்குமா நீதி?

ஒன்றியத்தில் கடந்த 11 ஆண்டுகளாக ஆட்சி புரிந்து வரும் பா.ஜ.க, தனக்கு ஆதரவாக செயல்படும் அதிகாரிகளுக்கு ஆளுநர் பதவி உள்ளிட்ட உயர் பொறுப்புகளை கையூட்டாக அளித்து வருகிறது. 

அதற்கு, ஆளுநர் ஆர்.என்.ரவி போன்றவர்கள் உகந்த எடுத்துக்காட்டாக திகழ்ந்து வருகின்றனர்.

இந்நிலையில், அதிகாரிகளுக்கு உயர் பொறுப்புகள் மட்டுமல்ல, கட்சி நிர்வாகிகளுக்கு அதிகாரிகளாகவும் பொறுப்புகள் வழங்கப்படும் என்ற புதிய சலுகையை வெளிப்படுத்தியுள்ளது பா.ஜ.க அரசு.

அதன் ஒரு பகுதியாக, மகாராஷ்டிரா மாநிலத்தில் பா.ஜ.க.வின் தீவிர செயல்பாட்டாளராகவும், கட்சியின் அதிகாரப்பூர்வ செய்தித் தொடர்பாளராகவும் விளங்கி வந்த வழக்கறிஞர் ஆர்த்தி சாத்தே, தற்போது உச்சநீதிமன்றத்தால் மும்பை உயர்நீதிமன்ற நீதிபதியாக தேர்வு செய்யப்பட்டுள்ளார்.

இதனைக் கண்டித்து, மகாராஷ்டிரா மாநிலத்தின் தேசியவாத காங்கிரஸ் (சரத் பவார்) கட்சி மூத்த தலைவர் ரோகித் பவார், “ஆளும் பா.ஜ.க கட்சிக்கு ஆதரவாக வழக்கு விசாரணை செய்து வந்த ஆர்த்தி என்பவரை, உயர்நீதிமன்ற நீதிபதியாக நியமனம் செய்திருப்பது இந்திய ஜனநாயகத்திற்கு முற்றிலும் எதிரானது.

அரசியல் பின்னணி இருக்கும் ஒருவர், எப்படி நடுநிலைத்தன்மையோடி வழக்குகளை கையாளமுடியும். அவ்வாறு நடுநிலைத்தன்மை வகிக்க முடியாத ஒருவர் எப்படி நீதித்துறையில் தலைமை பொறுப்பு வகிக்க முடியும்?

இந்த பணி நியமனத்தை அரசும், நீதித்துறையும் மறுபரிசீலனை செய்ய வேண்டும்” என தனது சமூக வலைதளப்பக்கத்தில் கண்டனம் தெரிவித்துள்ளார்.

ஊருக்கு உபதேசம்!

நன்றி, விசுவாசம்  என்றால் என்ன விலை? என்று கேட்பார் போலிருக்கிறது விஜய்.  பாதிக்கப்பட்டோரைத் தேடிச்சென்று ஆறுதல் சொல்லும் விஜய்,  தனக்காக பாடுபட்ட தன்னை வளர்த்தெடுத்தவர்களின் மறைவுக்கு சென்று ஆறுதல் சொல்லாதது தொடர் கதையாகிறது.

தவெகவில் இன்றைக்கு புஸ்ஸி  ஆனந்த் இருக்கும் இடத்தில் இருக்க வேண்டியவர் சி.ஜெயசீலன்.  அவர்தான் விஜய் ரசிகர் மன்றத்தின் மாநில தலைவராக 20 ஆண்டுகள் பாடுபட்டார்.

அப்போது விஜய் ரசிகர் மன்றத்தின் தலைமை அலுவலகம் சாலிகிராமத்தில் இருந்தது.  திருவொற்றியூரில் வசித்து வந்த சி.ஜெயசீலன் தினமும் சாலிகிராமம் வந்து ரசிகர் மன்ற பணிகளை கவனித்து வந்தார்.  

விஜய் வளர்ச்சிக்கு காரணமானவர்களில் ஜெயசீலனும் ஒருவர்.  விஜய்க்கு இன்றைக்கு ரசிகர் மன்றங்கள் இத்தனை இருக்கிறது என்றால் அவற்றை ஒருங்கிணைத்து, வளர்த்து வந்தவர் ஜெயசீலன்.

ஒரு நேரத்தில் விஜய் ரசிகர் மன்றம், மக்கள் இயக்கமாக மாறியது.    அப்போது தனிக்கட்சி தொடங்க வேண்டும் என்ற எண்ணத்தில் இருந்தார் எஸ்.ஏ.சந்திரசேகர்.  அவரின் எண்ணத்திற்கு ஏற்ப வேலைகளை செய்து வந்தார் ஜெயசீலன்.  ஆனால் அந்த நேரத்தில் ஆளும்  தரப்பில் இருந்து வந்த நெருக்கடிகளால் தனிக்கட்சி முடிவை மாற்றிக்கொண்டு, திடீரென்று ஜெயலலிதாவை சந்தித்து அதிமுகவுக்கு ஆதரவு தெரிவித்தார் எஸ்.ஏ.சந்திரசேகர்.

ஆனால்,  அதிமுகவுக்கு ஆதரவு என்பதை ஜெயசீலன் ஏற்றுக்கொள்ளவில்லை.  தனித்து போட்டி என்றால் சரி, அப்படி இல்லை என்றால் திமுகவுக்கு ஆதரவு கொடுக்கலாம் என்பது ஜெயசீலனின் முடிவு.  இந்த கருத்து வேறுபாட்டை பயன்படுத்தி  விஜய் மன்றத்தின் உள்ளே புகுந்து விட்டார் புஸ்ஸி ஆனந்த்.

தான் சொல்வதுதான் முடிவு.  அதை மாற்ற யாருக்கும் உரிமையில்லை என்று பிடிவாதமாக இருந்த விஜய், ஜெயசீலனை மன்றத்தில் இருந்து வெளியேற்றிவிட்டார்.  ஜெயசீலன் தனது ஆதரவாளர்களுடன் அண்ணா அறிவாலயம் சென்று திமுகவுக்கு ஆதரவு தெரிவித்தார்.   இதனால் ஆத்திரம் கொண்ட புஸ்ஸி ஆனந்த், தனது ஆதரவாளர்களை ஏவி, ஜெயசீலன் படத்தின் மேல் எச்சில் துப்பும் போராட்டம் அறிவித்து அதை நிறைவேற்றியும் காட்டினார்.

விஜய் மக்கள் இயக்கத்தில் இருந்து வெளியேறிய பின்னர் நடிகர் விஷால் ரசிகர் மன்றத்தின் மாநில தலைவராக செயல்பட்டு வந்தார்.

அண்மைக்காலமாக நோய்வாய்ப்பட்டு சாகும் தருவாயில் இருந்தவரை விஜய்யும், எஸ்.ஏ.சந்திரசேகரும் சென்று சந்தித்து எந்த உதவிகளும் செய்யவில்லை.  சிகிச்சை பலனின்றி கடந்த சனிக்கிழமை 2.8.2025அன்று ஜெயசீலன் உயிரிழந்த பின்னர், விஷால் சென்று அஞ்சலி செலுத்தினார்.  எஸ்.ஏ.சந்திரசேகர் சென்று அஞ்சலி செலுத்தினார். ஆனால், தனது வளர்ச்சிக்கு பாடுபட்ட ஜெயசீலனுக்கு இறுதி மரியாதை செலுத்த வரவே இல்லை விஜய்.

தவெகவின் முதல் மாநாட்டிற்கு வந்த தவெகவின் நிர்வாகிகள் சிலர் விபத்தில் இறந்தபோது  இரங்கல் அறிக்கை கூட வெளியிடவில்லை விஜய்.  மாநாட்டில் அவர்களுக்கு மவுன அஞ்சலியும் செலுத்தவில்லை.  இது தவெகவில் பூதாகரமாக வெடித்தது.  விபத்தில் இறந்தவர்களின் குடும்பத்தினர் விஜய்யின் நன்றிக்கெட்டத்தனத்தை சொல்லி அழுது புலம்பி மீடியாக்களில் பேட்டி கொடுத்த பின்னர் உயிரிழந்த நிர்வாகிகளுக்கு ஆறுதல் தெரிவித்தார் விஜய்.

தனக்காக பாடுபட்ட ரசிகர்கள் மற்றும் நிர்வாகிகளின் இறப்புக்கு இரங்கல் தெரிவிக்காத விஜய்,  அஜித்குமார் உள்ளிட்டோரின் இறப்புக்கு நேரில் சென்று அஞ்சலி செலுத்தி ஆறுதல் சொல்லுவதெல்லாம் அப்பட்டமான அரசியல் என்று அம்பலப்படுத்துகிறார்கள் ஜெயசீலன் ஆதரவாளர்கள்.

தனி விமானத்தில் பறந்து நடிகை கீர்த்தி சுரேஷின் திருமணத்திற்கு செல்லும் விஜய், தான் இன்றைக்கு முதல்வர் நாற்காலியில் உட்கார நினைக்கின்ற அளவுக்கு விஜய் ரசிகர் மன்றத்தை வளர்த்து, அதை விஜய் மக்கள் இயக்கமாக மாற்றி, பின்னர் அது தவெகவாக உருவெடுப்பதற்கும் ஆணி வேராக இருந்த ஜெயசீலன் மரணத்திற்கு நேரில் சென்று அஞ்சலி செலுத்தாவிட்டாலும் கூட, சமூக வலைத்தளத்திலாவது இரங்கல் தெரிவிக்காமல் போன அலட்சியத்தை பலரும் சுட்டிக்காட்டி வருகின்றனர்.