ஆளில்லாக் கடையில்

*சென்னைக்கு 250 கிலோமீட்டர் தொலைவில் நெருங்கி வந்தது டிட்வா புயல். இன்று மாலை ஆழ்ந்த காற்றழுத்த தாழ்வு மண்டலமாக வலுவிழக்கும் என வானிலை மையம் கணிப்பு.

*திருவள்ளூர், ராணிப்பேட்டை மாவட்டங்களுக்கு இன்று ரெட் அலர்ட். காஞ்சிபுரம், வேலூர், திருப்பத்தூர், தருமபுரி, கிருஷ்ணகிரி உள்பட 9 மாவட்டங்களுக்கு ஆரஞ்சு எச்சரிக்கை.

*மாநில அவசரகால கட்டுப்பாட்டு மையத்தில் துணை முதலமைச்சர் உதயநிதி ஸ்டாலின் ஆய்வு. மழை பாதிப்புகள் தொடர்பான புகார்கள் மீது உடனுக்குடன் நடவடிக்கை எடுக்கப்படுவதாக பேட்டி.

*மழை வெள்ளத்தால் கொழும்பு விமான நிலையத்தில் 3-வது நாளாக தமிழர்கள் உள்ளிட்ட 300 இந்தியர்கள் பரிதவிப்பு. உணவு, குடிநீர் உள்ளிட்ட அடிப்படை வசதிகள் கூட கிடைக்கவில்லை எனக் குற்றச்சாட்டு.

*ஒன்றிய அரசு குட்ட, குட்ட குனியாமல் நிமிர்ந்து நடைபோடுவோம். தமிழ்நாட்டை புறக்கணிக்கும் ஒன்றிய அரசுக்கு எதிராக முதலமைச்சர் மு.க.ஸ்டாலின் சூளுரை.

*இலங்கையில் டிட்வா புயலால் உயிரிழந்தோர் எண்ணிக்கை 150-ஐ கடந்தது. வெள்ளத்தில் சிக்கியவர்களை ஹெலிகாப்டர்கள் உதவியுடன் மீட்ட மீட்பு குழுவினர்.

*ஆளே இல்லாத கடையில… யாருக்கு டீ ஆத்துது தேர்தல் ஆணையம்?*

அசாம் மாநிலத்தில், உச்சநீதிமன்றத்தின் மேற்பார்வையில் தேசிய குடிமக்கள் பதிவேடு (NRC) நடைமுறை முடிந்து, சுமார் 19 லட்சம் பேர் இந்தியர்கள் இல்லை, ‘வெளிநாட்டவர்’ என்று கண்டறியப்பட்டது. 

இந்த 19 இலட்சம் பேரில் சுமார் 7 இலட்சம் பேர் இஸ்லாமியர்கள், வங்கால இந்துக்கள், அசாமி இந்துக்கள், கூர்காக்கள்  (பெரும்பாலும் இந்துக்கள்) என சுமார் 8.5 இலட்சம் பேர் இந்துக்கள். மீதமுள்ள 3.5 இலட்சம் பேரின் விவரங்கள் இல்லை.

குடியுரிமை சிக்கல் இவ்வளவு தீவிரமாக இருக்கும் அசாமில் SIR இல்லை! அதாவது, அங்கு நடைபெரும் வாக்காளர் பட்டியல் திருத்த நடவடிக்கையில் வாக்காளர்கள் எந்தப் படிவத்தையும் நிரப்பிக்கொடுக்கத் தேவையில்லை, எந்த ஆவணங்களையும் கொடுக்கவேண்டியதில்லை, பட்டியலில் பெயர் இருக்கிறதா என்று சரிபார்த்துக்கொண்டால் போதும். அதுவும் BLOக்களே சரிபார்த்துவிடுவார்கள்.

இதில் கவனிக்கவேண்டியது, NRC நடவடிக்கையின்போது இந்தியர்கள் இல்லை என்று சொல்லப்பட்ட 19 இலட்சம் பேரின் பெயர்கள் வாக்காளர் பட்டியலில் இருந்து நீக்கப் பட்டதா? என்றால், இல்லை! 

அவர்கள் வருகின்ற அசாம் சட்டமன்றத் தேர்தலில் வாக்களிக்கலாம்! 19 இலட்சம் பேரை இந்தியர்களே இல்லை என்று சொன்ன மோடி அரசு, வருகின்ற தேர்தலில் அவர்களை வாக்களிக்க அனுமதிக்கிறது! காரணம் சுமார் 10 இலட்சம் பேர் பாஜகவுக்கு வாக்களிக்கக் கூடியவர்கள் என்று பாஜக நினைக்கிறது, தேர்தல் ஆணையமோ ‘சைலண்ட் மோடில்’ இருக்கிறது.

ஆனால், இதுபோன்ற குடியுரிமை சிக்கல் இல்லாத தமிழ்நாட்டில், நாம் ஒவ்வொருவரும் படிவம் நிரப்பிக் கொடுக்கவேண்டும், 2002 இல் உள்ள நமது குடும்பத்தினர் விவரங்களைத் தரவேண்டும்,  நமது ஆவணங்களைத் தரவேண்டும்..!

ஆளே இல்லாத கடையில… யாருக்கு டீ ஆத்துது தேர்தல் ஆணையம்?

வங்கக் கடலில் உருவாகி தமிழகத்தை நோக்கி நகர்ந்து வந்த டிட்வா புயல், யாரும் எதிர்பாராத வகையில் கடலிலேயே தனது வலிமையை இழந்து காணாமல் போயுள்ளது. இருப்பினும், தமிழகத்தின் பல பகுதிகளில் கனமழை உறுதியாக பெய்யும் என தனியார் வானிலை ஆய்வாளர் பிரதீப் ஜான் கூறியுள்ளார். இதுகுறித்து அவர் தனது ஃபேஸ்புக் பக்கத்தில் பதிவிட்டுள்ளார்.

கடந்த சில நாட்களாக தமிழ்நாட்டு வானிலை ஆய்வாளர்கள் உன்னிப்பாக கவனித்து வந்த 'டிட்வா' புயல், இரவில் திடீரெனத் திசைமாறி, தனது பலத்தை இழந்துள்ளது. இந்த மாற்றத்திற்குக் காரணம், உலர்ந்த காற்று மற்றும் செங்குத்து காற்று வெட்டு ஆகிய இரண்டு காரணிகள் தான் என்று அவர் தெரிவித்துள்ளார்.

இந்த புயல் அமைப்புக்குத் தேவையான ஈரப்பதத்தை உறிஞ்சிக் கொண்டதால், மேகங்கள் உருவாகும் வாய்ப்பு குறைந்தது.காற்றின் திசை மற்றும் வேகத்தில் ஏற்பட்ட வேறுபாடு காரணமாக, புயலின் மைய அமைப்பு சிதைக்கப்பட்டது. இதன் விளைவாக, புயல் டிட்வா தற்போது வெறும் வெப்ப மண்டல காற்றழுத்த தாழ்வு மண்டலமாக மாறியுள்ளது. இது மேகங்கள் அற்ற, ஒரு 'வெற்று ஷெல்' போல கடலில் மிதப்பதாக வானிலை ஆய்வாளர் பிரதீப் ஜான் தெரிவித்துள்ளார்.

புயலின் நகர்வில் ஏற்பட்ட மாற்றம் ஒருபுறம் இருக்க, அதன் தாக்கத்தால் தமிழகத்தின் பல பகுதிகளில் ஏற்கெனவே கனமழை பதிவாகியுள்ளது. மயிலாடுதுறையில் மிக அதிகபட்சமாக 140 மி.மீ முதல் 220 மி.மீ வரை மிகக் கனமழை கொட்டித் தீர்த்துள்ளது. தஞ்சாவூர் மற்றும் திருவாரூர் உட்பட மற்ற டெல்டா மாவட்டங்களிலும் நல்ல மழை பதிவாகியுள்ளது. தென் மாவட்டங்களான சிவகங்கை மற்றும் ராமநாதபுரம் பகுதிகளிலும் குறிப்பிடத்தக்க மழை கிடைத்துள்ளது.

காற்றழுத்த தாழ்வு மண்டலமாகச் சுருங்கிவிட்ட அமைப்பில் தற்போது மேகங்கள் இல்லை என்றாலும், அடுத்த 24 மணி நேரத்தில் வட தமிழகத்தில் மீண்டும் மேகமூட்டம் திரள வாய்ப்புள்ளதாக வானிலை மாதிரிகள் கணிக்கின்றன. இன்று பிற்பகலுக்குப் பிறகு வேலூர், ராணிப்பேட்டை உள்ளிட்ட வட தமிழகத்தின் மையப் பகுதிகளில் மேகங்கள் மீண்டும் உருவாகும் என எதிர்பார்க்கப்படுகிறது. இந்த காற்றழுத்த தாழ்வு மண்டலம்  சென்னையை நெருங்கி வர வாய்ப்புள்ளது. டித்வா புயல் காணாமல் போனாலும், அதன் தாக்கத்தால் வட தமிழகம் உட்பட பல பகுதிகளில் நல்ல மழைக்கான வாய்ப்பு நீடிப்பதால், பொதுமக்கள் அதற்கேற்ப தயாராக இருக்க அறிவுறுத்தப்படுகிறார்கள்.

கவாய் கால நீதி நிலைக்கட்டும்!

இந்தியாவின் 52 ஆவது உச்சநீதிமன்றத் தலைமை நீதிபதியாகப் பொறுப்புவகித்து, கடந்த நவம்பர் 23 ஆம் தேதி ஓய்வு பெற்றுள்ளார் மாண்பமை பி.ஆர்.கவாய் அவர்கள். அவர் தனது பணிக் காலத்தில் இந்திய நாட்டுக்கு நல்ல பல நீதிகளைச் சொல்லிச் சென்றிருக்கிறார்.

தலைமை நீதிபதிக்கு இதுவரை வரலாற்றில் இல்லாத வகையில் அவமானம் இழைக்கப்பட்டது. நீதியரசர் கவாய் மீது டெல்லி வழக்கறிஞர் ராகேஷ் கிஷோர் (71) என்பவர், கடந்த மாதம் காலணியை வீசினார். “சனாதன தர்மத்தை அவமதிப்பதைப் பொறுத்துக் கொள்ள முடியாது” என தொடர்ந்து கத்திக் கூச்சல் போட்டுள்ளார் அந்த வழக்கறிஞர்.

அவர் மீதும் இதுவரை எந்த நடவடிக்கையும் இல்லை. கேட்டால், ‘அவர் மீது நடவடிக்கை எடுக்க வேண்டாம் என்று தலைமை நீதிபதியே சொல்லிவிட்டார்’ என்கிறார்கள். நடவடிக்கை எடுக்க வேண்டாம் என்பது அவரது பெருந்தன்மையாக இருக்கலாம். ஆனால், தலைமை நீதிபதியின் மாண்பைக் காக்க வேண்டியது ஒன்றிய அரசின் பொறுப்பு அல்லவா? .

“அரசுக்கு, எதிரான வழக்கை எனது அமர்வு விசாரிப்பதை மத்திய அரசு விரும்பவில்லை என்று நினைக்கிறேன். விரைவில் நான் ஓய்வு பெறப்போவதால் மத்திய அரசு இப்படியான செயலை எடுத்து இருக்கலாம்.” என்று வெளிப்படையாக தலைமை நீதிபதி வருந்தினார்.

பகவாய்-

இத்தகைய சூழலில்தான் அவர் தலைமை நீதிபதி பொறுப்பை வகித்தார். இருப்பினும் அவர் வழங்கிய பல வழிகாட்டுதல்கள் முக்கியமானவை.

1.மக்களால் தேர்ந்தெடுக்கப்பட்ட மாநிலச் சட்டமன்றங்களின் உரிமையை நிலைநாட்டியது மாண்பமை தலைமை நீதிபதி கவாய் அமர்வு. “சட்டமன்றத்தால் நிறைவேற்றி அனுப்பி வைக்கப்பட்ட மசோதாக்களை ஆளுநர் நிறுத்திவைப்பது கூட்டாட்சித் தத்துவத்திற்கு எதிரானது” என்று தீர்ப்பளித்தார்.

“மசோதாவுக்கு ஒப்புதல் அளிக்க வேண்டும், குடியரசுத் தலைவருக்கு அனுப்பலாம், சட்டப்பேரவைக்குத் திருப்பி அனுப்பலாம். இந்த மூன்றில் ஒன்றைத்தான் ஆளுநர் தேர்ந்தெடுக்க முடியுமே தவிர, ஒன்றிய அரசு கூறுவதுபோல் நான்காவதாக எந்த வாய்ப்பும் இல்லை. அரசியல் சாசனப்பிரிவு 200, 201–ன் படி மசோதாக்களுக்கு ஆளுநர் மற்றும் குடியரசுத் தலைவர் ஒப்புதல் வழங்க வேண்டும்.

இல்லையெனில் சட்டப்பேரவைக்கு மசோதாவை ஆளுநர் திருப்பி அனுப்ப வேண்டும். மசோதாக்கள்மீது முடிவெடுக்காமல் காலவரம்பின்றிக் கிடப்பில் வைக்க ஆளுநருக்கு அதிகாரம் கிடையாது. மக்களால் தேர்ந்தெடுக்கப்பட்ட அரசுக்கே அதிகாரம் இருக்கிறது.

மக்களால் தேர்ந்தெடுக்கப்பட்ட அரசும், அதன் அமைச்சரவையுமே முதன்மையான இடத்தில் இருக்கின்றன. மசோதாக்கள் விவகாரத்தில் இடையூறு விளைவிக்கும் அணுகுமுறையை ஆளுநர்கள் மேற்கொள்ளக் கூடாது. ஆளுநர் செயல்படாமல் இருந்தால் அரசியல் அமைப்பு, நீதிமன்றங்கள் அதனை ஆய்வு செய்யும். அமைச்சரவையின் ஆலோசனையின்படியே ஆளுநர் செயல்பட வேண்டும்” என்பது கூட்டாட்சித் தத்துவத்துக்குக் காட்டிய வழியாகும்.

2. உச்சநீதிமன்றச் செய்தியாளர்களுக்கு அளித்துள்ள பேட்டியில் சமூகநீதியை வலியுறுத்திப் பேசி இருக்கிறார் மாண்பமை கவாய். “சமத்துவத்தை நிலைநாட்டவே இடஒதுக்கீடு வழங்கப்பட்டுள்ளது. இந்த இடஒதுக்கீடு, அனைவருக்கும் கிடைக்க வேண்டும். வாய்ப்புகள் கிடைக்காதவர்களுக்கு உள் ஒதுக்கீடு வழங்க வேண்டும்” என்று சொல்லி இருக்கிறார்.

3. மரண தண்டனைக்கு எதிரான கருத்தை மாண்பமை கவாய் சொல்லி இருக்கிறார். “ஒரு குற்றத்துக்கு மரண தண்டனை மட்டுமே தீர்வாகுமா? ஆகாது. நான் எனது பணிக் காலத்தில் தூக்குத் தண்டனையை ஒருமுறைகூட உறுதி செய்யவில்லை. கடந்த ஆண்டுகளில் வழங்கப்பட்ட பல்வேறு தீர்ப்புகளில் ஒருவரை தூக்கிலிடுவதை விட அவருக்கு பல ஆண்டு சிறை அல்லது சாகும் வரை சிறைத் தண்டனை வழங்கலாம்” என்று சொல்லி இருக்கிறார்.

4. சுதந்திரமான நீதித்துறையை வலியுறுத்தி இருக்கிறார். “நீதித்துறை மீது மக்கள் அசைக்க முடியாத நம்பிக்கை வைத்திருக்க வேண்டும் என்றால் அது சுதந்திரமாக இருக்க வேண்டும். அது தொடர்ந்து நிலைநிறுத்தப்பட வேண்டும்” என்று சொல்லி இருக்கிறார்.

5. நீதித்துறையா, நிர்வாகத்துறையா, நாடாளுமன்றமா? யார் உயர்ந்தவர்கள் என்ற கேள்வி எழுந்து வருகிறது. இந்திய அரசமைப்புச் சட்டம் மட்டுமே உயர்ந்தது. மற்றவை அனைத்தும் அரசமைப்புச் சட்டத்துக்காகப் பணியாற்ற வேண்டும் – என்பது அவரது அழுத்தமான கருத்து ஆகும்.

உச்சநீதிமன்றத் தலைமை நீதிபதியாக இருந்த மாண்பமை கவாய் அவர்களின் சிந்தனைகளை உரியவர்கள் பின்பற்ற வேண்டும்.