ஈரான் போரை முடிச்சுக்கலாம்னு இருக்கேன்

சர்வதேச அளவில் நிலவும் கச்சா எண்ணெய் விநியோக தட்டுப்பாட்டை சீராக்கும் நோக்கில், ஈரான் எண்ணெய் மீதான பொருளாதார தடைகளை அமெரிக்கா சற்றே தளர்த்தியுள்ளது. இந்த சூழலில், ஈரானுக்கு எதிரான ராணுவ நடவடிக்கைகளை குறைப்பது குறித்து பரிசீலித்து வருவதாக அதிபர் ட்ரம்ப் பேசியுள்ளார்.

தங்களது எதிரிகளை தலை சுற்ற செய்யும் அளவிற்கு தக்க பதிலடி தந்துள்ளதாக ஈரான் உச்சபட்ச தலைவர் மொஜ்தாபா அறிவித்தபிறகு, ட்ரோன் மற்றும் ஏவுகணைகளை கொண்டு சவுதி அரேபியா மற்றும் இஸ்ரேல் மீது புதிய தாக்குதலை தொடங்கியது.

இந்நிலையில் தான், மத்திய கிழக்கு போர் தொடர்பான தனது தனது நிலைப்பாட்டை ட்ரம்ப் வெளிப்படுத்தியுள்ளார்.

தனது சமூக வலைதள கணக்கில் வெளியிட்ட பதிவில், “மத்திய கிழக்கு நாட்டில் அமெரிக்கா மேற்கொண்ட மாபெரும் நடவடிக்கையை குறைத்துக் கொள்வது குறித்து பரிசீலித்து வரும் நிலையில், இந்த நடவடிக்கையில் நமது நோக்கங்களை அடைவதற்கான நிலையை அமெரிக்கா மிகவும் நெருங்கி உள்ளது” என ட்ரம்ப் குறிப்பிட்டுள்ளார்.

மற்றொரு செய்தியாளர் சந்திப்பில், “ஹார்முஸ் ஜலசந்தியைப் பயன்படுத்தும் மற்ற நாடுகள், தேவைக்கேற்ப அதனைப் பாதுகாத்து கண்காணிக்க வேண்டும். ஆனால் அமெரிக்கா அதனை பயன்படுத்தாததால் அதனை பாதுகாக்க வேண்டியதில்லை” எனவும் குறிப்பிட்டுள்ளார்.

கடந்த பிப்ரவரி மாதம் 28ம் தேதி தொடங்கிய ஈரானுக்கு எதிரான ராணுவ நடவடிக்கைகளை விரைந்து முடிவுக்கு கொண்டு வரும் மனநிலையை ட்ரம்ப் எட்டிவிட்டார் என்பதற்கான ஆதாரமாக அவரது புதிய பதிவு பார்க்கப்படுகிறது.

இதனிடையே, வெள்ளை மாளிகையின் பத்திரிகைச் செயலாளர் கரோலின் லீவிட்வெளியிட்ட ட்விட்டர் பதிவில், “ ஈரானுக்கு எதிரான ராணுவ நடவடிக்கைகளை நிறைவேற்றுவதற்குச் சுமார் 4-6 வாரங்கள் ஆகும் என்று அதிபரும் பென்டகனும் கணித்திருந்தனர்.

நாளை மூன்றாவது வாரம் தொடங்குகிறது. அமெரிக்க ஆயுதப் படைகள் மிகச் சிறப்பாகச் செயல்பட்டு வருகின்றன.

நாள் செல்லச் செல்ல, ஈரானிய ஆட்சி முடக்கப்பட்டு வருகிறது, மேலும் அமெரிக்காவையும் நமது நட்பு நாடுகளையும் அச்சுறுத்தும் அவர்களின் திறன் கணிசமாகக் குறைக்கப்பட்டு வருகிறது” என குறிப்பிட்டுள்ளார். 

ஹார்மூஸ் ஜலசந்தி மூடப்பட்டுள்ளதால், சர்வதேச அளவில் கச்சா எண்ணெய் விலையேற்றத்துடன், விநியோகத்திலும் பற்றாக்குறை ஏற்பட்டுள்ளது.

இந்த நிலையை சீராக்கும் நோக்கில், மார்ச் 20ம் தேதிக்கு முன்னர் கப்பல்களில் ஏற்றப்பட்ட ஈரானிய கச்சா எண்ணெய் மற்றும் பெட்ரோலியப் பொருட்களை விற்பனை செய்துகொள்ள அமெரிக்கா அனுமதி அளித்துள்ளது.

இந்த அங்கீகாரமானது ஏப்ரல் 19ம் தேதி வரை நீடிக்கும் என தெரிவித்துள்ளது. இதன் மூலம் சுமார் 140 மில்லியன் பேரல் கச்சா எண்ணெய் உடனடியாக உலக சந்தைக்கு கொண்டு வரப்படும் என்றும், ஈரானால் உருவான தற்காலிக அழுத்தம் குறையும் என்றும் அமெரிக்கா தரப்பில் தெரிவிக்கப்பட்டுள்ளது. 

இந்தியாவின் கவலைக்குக் காரணம் என்ன?

உலகின் மிகப்பெரிய இயற்கை எரிவாயு வயலான தென் பார்ஸ் (South Pars) மீது இஸ்ரேல் நடத்திய தாக்குதலுக்குப் பதிலடியாக, ஈரான் இன்று காலை கத்தாரில் உள்ள ராஸ் லஃபான் (Ras Laffan) தொழில்நகரத்தின் மீது ஏவுகணைகளை வீசித் தாக்கியுள்ளது. ராஸ் லஃபான் என்பது சாதாரண இடமல்ல; இது உலகின் மிகப்பெரிய திரவ இயற்கை எரிவாயு (LNG) உற்பத்தி மையமாகும்.இந்தத் தாக்குதல்கள் வெறும் தீ விபத்துகளை மட்டும் ஏற்படுத்தவில்லை, சர்வதேச சந்தையில் கச்சா எண்ணெய் விலையை ஒரே நாளில் 118 டாலராக உயர்த்தியுள்ளது. இது போர் தொடங்குவதற்கு முன்பு இருந்த விலையை விட 50% அதிகமாகும். சவுதி அரேபியா மற்றும் ஐக்கிய அரபு அமீரகம் ஆகிய நாடுகளும் ஈரானின் ஏவுகணைகளை இடைமறித்து அழித்துள்ளதாகத் தெரிவித்துள்ளன. இது ஒட்டுமொத்த வளைகுடா பிராந்தியமுமே ஒரு வெடிமருந்து கிடங்கின் மேல் இருப்பதை உறுதிப்படுத்துகிறது.

இந்த விபரீத மோதல்கள் இந்தியாவிற்கு ஏன் இவ்வளவு முக்கியமானது என்பதற்குப் பின்னால் சில அதிர்ச்சிகரமான புள்ளிவிவரங்கள் உள்ளன:

இந்தியா தனது இயற்கை எரிவாயு தேவையில் பாதியை இறக்குமதி மூலம் பூர்த்தி செய்கிறது. இதில் 40 சதவீதத்திற்கும் அதிகமான எரிவாயு கத்தாரிலிருந்து, குறிப்பாக இப்போது தாக்குதலுக்குள்ளான ராஸ் லஃபான் மையத்திலிருந்தே வருகிறது.

சமையல் எரிவாயு (LPG) விநியோகத்தில் இந்தியா ஏற்கனவே நெருக்கடியைச் சந்தித்து வரும் நிலையில், இந்தத் தாக்குதல் நிலைமையை மேலும் மோசமாக்கியுள்ளது. இந்தியாவின் 90% எல்பிஜி இறக்குமதி ஹார்முஸ் ஜலசந்தி (Strait of Hormuz) வழியாகவே நடைபெறுகிறது.

இந்தியா தனது கச்சா எண்ணெய் தேவையில் 88% இறக்குமதியையே நம்பியுள்ளது. ஹார்முஸ் ஜலசந்தி முடக்கப்பட்டால், ஈராக், சவுதி அரேபியா மற்றும் அமீரகத்திலிருந்து வரும் எண்ணெய் வரத்து நின்றுவிடும்.

அமெரிக்க அதிபர் டொனால்ட் ட்ரம்ப் தனது சமூக வலைதளப் பக்கத்தில் ஒரு விசித்திரமான பதிவைப் போட்டுள்ளார். "இஸ்ரேல் நடத்திய இந்தத் தாக்குதல் பற்றி அமெரிக்காவிற்குத் தெரியாது. இதில் கத்தாருக்கு எந்தச் சம்பந்தமும் இல்லை. ஆனால், கத்தார் மீதான தாக்குதலை ஈரான் நிறுத்தவில்லை என்றால், ஈரானின் மொத்த எரிவாயு வயல்களையும் அமெரிக்கா தரைமட்டமாக்கும்" என்று மிரட்டியுள்ளார்.

இருப்பினும், இஸ்ரேலின் அடுத்தடுத்த நகர்வுகளை அமெரிக்காவால் கட்டுப்படுத்த முடியுமா என்பது கேள்விக்குறியாகவே உள்ளது. ஈரான் தனது தற்கொலைத் தாக்குதல் பாணியில் இறங்கியுள்ளதால், நிலைமை இன்னும் மோசமடையவே வாய்ப்புள்ளது.

தற்போது நிலவும் சூழலை எரிசக்தித் துறை வல்லுநர்கள் 'ரஷ்யன் ரவுலட்' (Russian Roulette) ஆட்டத்தோடு ஒப்பிடுகின்றனர். இஸ்ரேலும் ஈரானும் ஒருவரையொருவர் அழித்துக் கொள்ளத் துணியும் இந்த ஆட்டத்தில், உலக நாடுகள் அனைத்தும் எரிசக்தி விலை உயர்வு மற்றும் தட்டுப்பாட்டால் பாதிக்கப்படப் போகின்றன.

போர் இன்று நின்றால் கூட, இந்த ஆலைகள் மீண்டும் பழைய நிலைக்குத் திரும்பப் பல மாதங்கள் ஆகும். இதுவரை 'போக்குவரத்து பாதை' (Supply Chain) மட்டுமே பிரச்சனையாக இருந்தது, இப்போது 'உற்பத்தி இடமே' (Production Site) சிதைக்கப்பட்டுள்ளது.

இந்தியாவைப் பொறுத்தவரை, இது வெறும் சர்வதேச செய்தி அல்ல; நம் வீட்டு பட்ஜெட்டைத் தீர்மானிக்கப்போகும் ஒரு 'எரிசக்தி நெருக்கடி'.