திங்கள், 28 பிப்ரவரி, 2022

உலக நாட்டாமை அமெரிக்காவும்,

 உக்ரைன் பிரச்சினையும்!

சிறப்புக் கட்டுரை: உலக நாட்டாமை அமெரிக்காவும், உக்ரைன் பிரச்சினையும்!

ரஷ்யா, யுக்ரைன் மீது படையெடுத்தது வன்மையாகக் கண்டிக்கத்தக்கது. ஆனால், இந்தக் கட்டுரையின் தலைப்பு ஏன் ரஷ்யாவும் உக்ரைனும் என்று இருக்காமல் அமெரிக்காவும் உக்ரைனும் என்று இருக்கிறது? இந்தப் பிரச்சினையில் “அமெரிக்கா எங்கே வந்தது?” என்று ஒருவர் கேட்கலாம். 

உலகின் பிரச்சினைகள் பலவும் அமெரிக்காவால் வந்ததுதான் என்று சொன்னால் பலருக்கும் கோபம் வரும். 

உடனே பனிப்போர் காலத்தில் கம்யூனிச சோவியத் யூனியனை ஆதரித்த பழக்கத்தில் பேசுகிறேன் என்று கொந்தளிப்பார்கள். நான் பிரச்சினையை வேறு விதமாகப் பார்க்கிறேன். 

உக்ரைன் பிரச்சினையில் ரஷ்யா அந்த நாட்டின் மீது படையெடுத்ததைக் கண்டிப்பதும், தங்கள் தந்தை நிலத்தைக் காக்க யுக்ரைன் மக்கள் மேற்கொள்ளும் வீரம் செறிந்த போராட்டத்தைப் பாராட்டுவது என்பதும் அனைவரும் செய்யக்கூடியதுதான். ஆனால், இந்தப் பிரச்சினையின் வேர்கள் என்ன என்பதை புரிந்துகொள்ளாமல் விடுவது என்பது மீண்டும் அமெரிக்கா உருவாக்கி வரும் வரலாற்று கதையாடலை (Narrative) விமர்சனமின்றி அனுமதிப்பதாகிவிடும்.

இந்திய புராண கற்பனையில் தேவலோகத்தவர்கள், அதாவது தேவர்களும், கடவுள்களும் ஒருபுறமும், அசுரர் மற்றும் அரக்கர் மற்றொருபுறமும் ஓயாது முரண்பட்டு போரிடுவார்கள்.

 ராஜாஜி சக்ரவர்த்தி திருமகன் எழுதும்போது “தேவர்கள் ஒரு சில குறைபாடுகள் இருந்தாலும் சுபாவத்தில் நல்லவர்கள்; அரக்கர்கள் சில நல்ல காரியங்கள் செய்தாலும் அடிப்படையில் தீயவர்கள்” என்று எழுதியிருப்பார். இதை மனிக்கியன் இருமை (Manichean Dualism), அதாவது கறுப்பு வெள்ளை போல முழுமையான இருமை என்றழைப்பார்கள். 

அப்படியான ஒரு இருபதாண்டு இருமையில் அமெரிக்காவும், மேற்கு ஐரோப்பிய நாடுகளும் உலகில் சுதந்திரம், சமத்துவம், சமாதானம், மக்களாட்சி, மனித உரிமை ஆகிய உயர்ந்த விழுமியங்களை நிறுவுவதற்கே அயராது பாடுபடும் உன்னத சக்திகளாகவும், அவ்வப்போது ஓசாமா பின் லேடன், சதாம் ஹுசைன், புடின் போன்ற அரக்கர்கள் தோன்றி அவர்களை எதிர்த்துப் போரிடுவதாகவும் ஒரு கதையாடலை உருவாக்கப்படுகிறது. 

ஜேம்ஸ் பாண்ட் திரைப்படங்கள் போன்றவைதான் மேற்குலகம் உருவாக்கும் கதையாடல். 

இதை எதிர்கொள்வதற்கான ஒரு விமர்சனப் பார்வையை வளர்த்தெடுப்பது நமது கடமை என்பதால் அமெரிக்காவின் நாட்டாமை வேலைகளைக் குறித்து சிந்திக்க வேண்டும்.

அமெரிக்கா எப்படி நாட்டாமை ஆகியது?

இரண்டாம் உலகப் போரின் இறுதியில் அமெரிக்கா அணு ஆயுதத்தை உருவாக்கியது. 

போரில் தோல்வி முகம் காணத் தொடங்கியிருந்த ஜப்பான் விரைவில் சரணடைந்துவிடும் என்ற சாத்தியம் இருந்தாலும், தான் உருவாக்கிய அணுகுண்டினை பரிசோதிக்க விரும்பி 1945ஆம் ஆண்டு ஆகஸ்ட் 6 ஜப்பானின் ஹிரோஷிமா நகரத்தின் மீதும், அது போதாதென்று மூன்று தினங்கள் கழித்து நாகாசாகி என்ற நகரின் மீதும் அணுகுண்டுகளை வீசி பேரழிவை ஏற்படுத்தியது. 

இதுவரை மானுடம் காணாத மாபெரும் கோரப் பேரழிவினை அமெரிக்கா தேவையில்லை என்று தெரிந்தே நிகழ்த்தினாலும் அது போரை நிறுத்தவும், ஆதிக்க வெறி பிடித்த ஜப்பானுக்குப் பாடம் கற்பிக்கவும் நிகழ்த்தப் பெற்றது என்றே வரலாற்று கதையாடல் கட்டமைத்தது.

அதிலிருந்து நியூக்ளியர் பவர் எனப்படும் அணு ஆயுதம் வைத்துள்ள நாடுகள்தாம் உலகில் நாட்டாமை செய்யும் தகுதி படைத்தவை ஆயின. 

அமெரிக்காவுக்கு இணையாக சோவியத் யூனியன் (அன்றைய யு.எஸ்.எஸ்.ஆர் – இன்றைய ரஷ்யா) அணு ஆயுத வல்லரசாக மாறியது. கூடவே இங்கிலாந்தும், ஃபிரான்சும் அணு ஆயுத வல்லரசாயின. 

கடைசியாக சீனா அணு ஆயுத ஆற்றல் பெற்று அவர்களுடன் இணைந்தது. இந்த ஐந்து நாடுகளே அணு ஆயுத வல்லரசுகளாக தங்களை அறிவித்துக்கொண்டன. அதன்பின் இந்தியா, பாகிஸ்தான், வட கொரியா ஆகிய நாடுகளும் வெற்றிகரமாக அணு ஆயுத சோதனைகள் செய்துள்ளன. இஸ்ரேல், இரான் போன்ற நாடுகளிடம் அணு ஆயுதங்கள் உள்ளனவா என்று தெரியவில்லை. 

ஆனால் அறியப்பட்ட அணு ஆயுத ஏவுகணைகள் பதிமூன்றாயிரத்துச் சொச்சத்தில் தொண்ணூறு சதவிகிதம் அமெரிக்காவிடமும், ரஷ்யாவிடமும்தான் உள்ளன.

அமெரிக்காவின் அணு ஆயுத பலம் தவிர ஒட்டுமொத்த ராணுவ பலமும் கடுமையானது. விமானப்படை, கப்பற்படை, நீர்மூழ்கிக் கப்பல்கள் என பலவிதமான ராணுவ பலம் கொண்டது அமெரிக்கா. 

இரண்டாம் உலகப்போர் 1945-ஆம் ஆண்டு முடிவுக்கு வந்த பிறகு ஆசிய கண்டத்தில் மட்டும் நான்கு நேரடி ராணுவத் தாக்குதலை நிகழ்த்தியுள்ளது அமெரிக்கா. 

வியட்நாம் போர், ஈராக் போர் ஒன்று, ஆஃப்கானிஸ்தான் போர், ஈராக் போர் இரண்டு ஆகியவை அவை. இந்த போர்களின் கதைகளை விரிவாகப் பார்த்தால் இந்தக் கட்டுரை ஒரு புத்தகமாக மாறிவிடும். 

ஒரே ஓர் உதாரணம் போதும்.

ஆஃப்கானிஸ்தானில் தாலிபான் ஆட்சியை முடிவுக்குக் கொண்டுவந்து மக்களாட்சி மலரச்செய்ய 2001ஆம் ஆண்டு ஆஃப்கானிஸ்தானை ஆக்கிரமித்தது அமெரிக்கா. 

இருபதாண்டுக் காலம் அமெரிக்கப் படைகள் ஆஃப்கானிஸ்தானில் தங்கியிருந்தன. சென்ற ஆண்டு மீண்டும் தாலிபானிடம் நாட்டை விட்டுவிட்டு அமெரிக்கப் படைகள் வீடு திரும்பின. படையெடுத்துச் சென்று ஆக்கிரமித்து ஒரு நாட்டில் மக்களாட்சியை மலரச்செய்ய முடியுமா என்ற கேள்விக்கு முழுமையான பதில் கிடைத்தது என்றுதான் கூற வேண்டும்.

இப்படியான நாட்டாமை வேலைகள் பார்க்க இன்னொரு முக்கிய காரணம் பொருளாதாரப் பலம். உலகிலேயே மிக அதிகமான உள்நாட்டு மொத்த உற்பத்தியைக் கொண்டது அமெரிக்கா.

 23 டிரில்லியன் டாலர்கள். அதற்கு அடுத்த சக்தி சீனா; 17 டிரில்லியன் டாலர்கள் என்ற அளவில் அமெரிக்காவின் நாட்டாமையை அமைதியாக வலுவிழக்கச் செய்து வருகிறது. ஜப்பான் 5 டிரில்லியன். 

ஜெர்மனி 4 டிரில்லியன்; இங்கிலாந்து 3 டிரில்லியன்; இத்தாலி, ஃபிரான்சு, இந்தியா 2 டிரில்லியன். இதற்கெல்லாம் பிறகுதான் 1.65 டிரில்லியனில் ரஷ்யா இருக்கிறது.

இங்கேதான் முக்கிய பிரச்சினை இருக்கிறது. அணு ஆயுத ஆற்றலில் அமெரிக்காவுக்கு இணையாக உள்ள ரஷ்யா, பொருளாதார ஆற்றலில் பலவீனமாக இருக்கிறது. இந்த முரண்பாடு விபரீதமானது; எச்சரிக்கையுடன் கையாளப்பட வேண்டியது.

 ஆனால் அமெரிக்கா, ரஷ்யாவைத் தான் வீழ்த்திவிட்டதாக, அது வலுவற்று போய்விட்டதாக நினைத்தது. அதாவது 1991ஆம் ஆண்டு சோவியத் ரஷ்யா பதினைந்து நாடுகளாகச் சிதறியதும், அங்கே கம்யூனிஸ ஆட்சி முடிவுக்கு வந்ததும், உலகமே ஒரு துருவ உலகம் ஆகிவிட்டது; தன்னுடைய நாட்டாமையே இனி உலகில் நிரந்தரம் என்று நினைத்தது அமெரிக்கா. அதனால் சோவியத் யூனியனிலிருந்து பிரிந்த சிறிய நாடுகளை எல்லாம் வடக்கு அட்லாண்டிக் ஒப்பந்த கூட்டமைப்பு (North Atlantic Treaty Organization; NATO) சுருக்கமாக நேட்டோ அமைப்பினுள் இணைத்தது. 

ஆனால், இவ்விதம் நேட்டோ விரிவாக்கப்படாது என ரஷ்யாவுக்கு உறுதி அளித்திருந்தது அமெரிக்கா. 

அந்த உறுதியை மீறி ஒவ்வொரு பழைய சோவியத் நாட்டையும் அது நேட்டோவில் சேர்த்தது. இது என்றைக்கு இருந்தாலும் பிரச்சினையை உருவாக்கும் என சர்வதேச விவகார வல்லுநர்கள் எச்சரித்தனர். புடின் 2007ஆம் ஆண்டிலேயே தன்னுடைய கடும் அதிருப்தியைத் தெரிவித்தார். 

தான் சும்மா இருக்கப் போவதில்லை என ஜியார்ஜியாவைத் தாக்கிக் காட்டினார். ஆனாலும் அமெரிக்காவும், நேட்டோ நாடுகளும் உக்ரைனை நேட்டோவில் சேர்க்க விழைந்தன. பிரச்சினை வெடித்தது.

அமெரிக்காவின் கபட நாடகம்

அமெரிக்கா மக்களாட்சி விழுமியம், மனித உரிமை என்றுதான் தத்துவம் பேசும். 

ஆனால் தன்னுடைய முதலீட்டிய நலன்களுக்காக எந்தவித சமரசமும் செய்துகொள்ளும். சீனாவில் முதலீடு செய்யும் வாய்ப்புக்காக சீனா மக்களாட்சியை நடைமுறைப்படுத்தாவிட்டாலும் அதனுடன் நட்புறவு கொள்ளும். சவுதி அரேபியா மனித உரிமை கிலோ என்ன விலை என்று கேட்டாலும் அதனுடன் நெருங்கிய நட்பினை பேணும். 

ஏனெனில் சவுதி அரேபியாவின் பெட்ரோல் விற்ற உபரி பணம் அமெரிக்கப் பொருளாதாரத்தில் முக்கிய பங்கு வகிக்கிறது.

 இஸ்ரேல் பாலஸ்தீனியர்களைக் கொன்று குவித்தாலும் ஒரு வார்த்தை பேசாது. ஐம்பதாண்டுக் காலமாக ஒடுக்கப்பட்டு, நசுக்கப்பட்டு, அளப்பரிய கொடுமைகளுக்கு ஆளாக்கப்படும் பாலஸ்தீனியர்களுக்கு கெளரவமான சுயாட்சி பகுதியைப் பெற்றுத் தர எதுவும் செய்யாது.

உலகிலுள்ள பல தேசிய அரசுகளும் தங்கள் நாட்டிலுள்ள சிறுபான்மை இனங்களின் சுயாட்சி உரிமைகளை கடுமையாக காலில் போட்டு மிதித்துதான் ஆட்சி செய்கின்றன. குர்து இனமக்களை ஈராக்கும் ஒடுக்கியது; துருக்கியும் ஒடுக்குகிறது. 

அமெரிக்கா குர்து இனமக்களுக்கு ஒரு சுயாட்சி பிரதேசத்தை உருவாக்கி தருமா? அது அவர்கள் “உள் நாட்டு” பிரச்சினை என்று ஒதுங்கிக்கொள்ளும். சிங்கள பேரின வாதம் ஈழத்தமிழர்களை ஒடுக்கியதில் அவர்கள் முப்பதாண்டுக் காலம் தனியாட்சி பிரதேசம் கேட்டுப் போராடினார்கள். 

அமெரிக்காவோ, இங்கிலாந்தோ அவர்கள் பிரச்சினையைத் தீர்க்க என்ன செய்தன? அதுவும் “உள் நாட்டு பிரச்சினை”. காஷ்மீர் பள்ளத்தாக்கில் எழுபது லட்சம் பேர் பாகிஸ்தானுக்கும், இந்தியாவுக்கும் இடையில் மாட்டிக்கொண்டு சுயாட்சி வேண்டும் எனக் கேட்கிறார்கள். 

அமெரிக்கா பாகிஸ்தானுக்கும், இந்தியாவுக்கும் பாரபட்சமின்றி லாக் ஹீட் போர் விமானங்களை சப்ளை செய்யும். அமெரிக்கா உள்ளிட்ட முக்கிய நேட்டோ நாடுகள் எல்லாம் முதலில் ஆயுத வியாபாரிகள். 

அதற்குப் பிறகுதான் மக்களாட்சி, மனித உரிமை, மண்ணாங்கட்டியெல்லாம்.

அமெரிக்காவிலேயே மக்கள் பரப்பில் பொருளாதார ஏற்றத்தாழ்வு கடுமையாக அதிகரித்து வருகிறது. 

உலகம் முழுவதும் சுதந்திரவாத அரசியலும், சந்தை பொருளாதாரமும் ஏற்றத்தாழ்வுகளை அதிகரித்து வருகின்றன. தாமஸ் பிக்கெட்டி தன்னுடைய Capital and Ideology நூலில் மிக விரிவாக புள்ளி விவரங்களுடன் இருபதாம் நூற்றாண்டு உலகப் பொருளாதார வரலாற்றை விளக்குகிறார். 

அமெரிக்காவிடம் இதற்கு எந்த பதிலும் கிடையாது. தேர்தலுக்குத் தேர்தல் அமெரிக்க மக்களுக்கு எப்படி மருத்துவக் காப்பீடு திட்டம் வழங்குவது என்று வேட்பாளர்கள் ஓயாமல் பேசுவார்கள். 

ஏனெனில் அங்கே காப்பீடு இல்லையென்றால் சாக வேண்டியதுதான். தமிழ்நாடு போல “இன்னுயிர் காப்போம்” இலவச சிகிச்சையெல்லாம் நினைத்துக் கூட பார்க்க முடியாது.

இவ்வாறாக முதலீட்டிய குவிப்பு என்பது, உண்மையான மக்களாட்சி அதிகாரப் பரவலுக்கு எதிராக இருப்பதை ஏற்க மறுப்பதன் மூலமாக போலித்தனமான விழுமியங்களைப் பேசி கபட நாடகம் போட்டு வருகிறது அமெரிக்கா. 

அதன் ஒரு பகுதிதான் ரஷ்யாவின் பாதுகாப்பு அச்சங்களைக் குறித்த அக்கறையில்லாமல் அதனுடன் வரலாற்றில் நெருங்கிய உறவு கொண்ட உக்ரைனை நேட்டோவில் சேர்க்க முயற்சி செய்ததும்.

ரஷ்யாவும் உக்ரைனும்

உலகில் எந்தவொரு மக்கள் தொகுதிக்கும் சுயாட்சி கோர உரிமையுள்ளது. ஒவ்வொரு மக்கள் தொகுதியின் வரலாற்றிலும் அதற்குரிய காரணங்கள், அதன் நீண்டகால உறவு நிலை அம்சங்கள் ஆகியவை கவனமாக கருத்தில்கொள்ளப்பட வேண்டும் என்பதே வெற்றிகரமான சுயாட்சி நடைமுறைக்கு உகந்தது. 

உதாரணமாக அண்ணா, தமிழக சுயாட்சி உரிமைகளுக்காக உரத்து குரல் கொடுத்தார்; ஆனால் சீன-இந்திய போரின்போது இந்திய அரசினை ஆதரித்தார். இந்திய தேசியமும், குடியரசும் தமிழ்நாட்டின் சுயாட்சி, கூட்டாட்சி கோரிக்கைகளின் வரலாற்று அடிப்படை என்பதை கணக்கில்கொண்டே தமிழ்நாடு தன் உரிமைகளை, தனித்துவத்தை வலியுறுத்தி வருகிறது.

உக்ரைனின் மக்கள்தொகை நாலரை கோடி; ரஷ்யாவின் மக்கள் தொகை பதினாலரை கோடி. உக்ரைனைவிட மூன்று மடங்கு பெரிய பொருளாதாரம் ரஷ்யாவுடையது. 

உக்ரைனின் நவீன அரசியல் வரலாறு பத்தொன்பதாம் நூற்றாண்டில் ரஷ்ய பேரரசுடனும், இருபதாம் நூற்றாண்டில் சோவியத் யூனியனுடனும் பிணைந்துள்ளதை காணமுடிகிறது. 

எந்த அளவு உக்ரைனின் தனித்த அடையாளம் குறித்து எழுதப்பட்டு வந்துள்ளதோ, அதே போல ரஷ்ய உறவு குறித்தும் எழுதப்பட்டு வந்துள்ளதாகவே தெரிகிறது. உக்ரைனை சின்ன ரஷ்யா என்று குறிப்பிட்டுள்ளார்கள். அதே சமயம் உக்ரைன் சிந்தனையாளர்கள் அதன் தனித்துவத்தை வலியுறுத்தியும் வந்துள்ளார்கள்.

ஸ்டாலின் காலத்துக்குப் பிறகு பனிப்போரின் உச்சத்தில் ஏறக்குறைய முப்பதாண்டுகள் ரஷ்யாவின் அதிபர்களாக இருந்த குருஷேவும் (1953-1964), பிரஷ்னேவும் (1964-1982) உக்ரைனைச் சேர்ந்தவர்கள் என்று அறியும்போது வியப்பாக இருக்கிறது. 

இவர்கள் ஆட்சியில்தான் உக்ரைனில் ரஷ்ய மொழியின் பயன்பாடு அதிகாரபூர்வமாகப் பரவலாகியுள்ளது. இதையெல்லாம் கூறுவது இன்று உக்ரைன், ரஷ்யாவின் மேலாதிக்கத்தை ஏற்க வேண்டும் என்பதற்கு அல்ல. 

உக்ரைன் நேட்டோவில் சேர்வது என்பது ரஷ்யாவுக்கு ஏற்படுத்தக்கூடிய பதற்றத்தைப் புரிந்துகொள்ளத்தான். சோவியத் யூனியன் 15 நாடுகளாக முப்பதாண்டுகளுக்கு முன் பிரிந்தாலும், அவர்கள் கடந்த கால தொடர்புகளிலிருந்து விரைவாக துண்டித்துக்கொள்வதில் பல சவால்கள் இருக்கத்தான் செய்யும் என்பதை கணக்கில்கொள்ள வேண்டும். 

மேற்கத்திய நாடுகள் தொடர்ந்து இந்த நாடுகளில் ஊடுருவி ஏற்படுத்தும் தாக்கங்கள் அவற்றினிடையே தொடர்ந்து பதற்றத்தை அதிகரிக்கச் செய்கின்றன. 

அமெரிக்கா உள்ளிட்ட மேற்கத்திய நாடுகள் போதுமான கவனத்துடன் முன்னாள் சோவியத் நாடுகளின் விவகாரத்தில் நடந்து கொண்டனவா என்பது ஆய்வுக்குரியது. அவர்களது கவனமின்மை, அமெரிக்காவின் சுயநல விரிவாக்க சிந்தனை, நாட்டாமை மனோபாவம் உக்ரைன் பிரச்சினை கடுமையாக வெடிப்பதற்கு முக்கிய காரணமென தோன்றுகிறது.

ஆனால் புடினை புதிய அரக்கனாக்குவதில் அமெரிக்கா நிச்சயம் வெற்றி பெறும். ஒரு மோசமான சர்வாதிகாரியான புடினும் அதற்கு நிச்சயம் ஒத்துழைப்பார். 

அமெரிக்கா தன்னுடைய நோக்கமெல்லாம் உலகில் அனைத்து மக்களும் சுதந்திரமாக வாழ வழி செய்வதுதான் என்று கூறும். உக்ரைனின் பாதுகாப்புக்காக லாக் ஹீட் போர் விமானங்களை விற்கும். பல்வேறு ஆயுதங்களை விற்கும். 

ராணுவ பயிற்சி கொடுக்கும். ஹாலிவுட் படங்களை ஏற்றுமதி செய்து டப்பிங் செய்து திரையிடும். 

இன்னும் உக்ரைன் மக்கள் கோகோ கோலாவுக்கும், மாக் டொனால்டு உணவுக்கும் பழகிக்கொண்டால் பிறகு உலகில் அனைத்து மக்களாட்சி விழுமியங்களும் தழைத்தோங்கிவிடும்.

கட்டுரையாளர்;-

ராஜன் குறை கிருஷ்ணன்

--------------------------------------------------------------------

முழுமையான தலைவர்.முதல்வர் மு.க.ஸ்டாலின்.

கேரளாவிலிருந்து வெளிவரும் மலையாள ``மீடியா ஒன்’’ இணையதளம் ``அ.தி.மு.க. ஆட்சிக்கு வரவேமுடியாது’’ என்றும், ``திராவிட அரசியலின் சாம்பியனாக முதல்வர் மு.க.ஸ்டாலின் மாறி வருகிறார்’’ என்றும் சிறப்புச் செய்தி வெளியிட்டுள்ளது.

அச்செய்தி வருமாறு :

தமிழகத்தில் நடந்த நகர்ப்புற உள்ளாட்சி தேர்தலில் சிறப்பான வெற்றியை தி.மு.க. பதிவு செய்துள்ளது. மு.க.ஸ்டாலின் தலைமையிலான தி.மு.க. தமிழகத்தில் ஆட்சிக்குவந்த பிறகு, திராவிட கட்சிக்கு ஏற்பட்ட பிழைகளை சரி செய்து, பெரிய மாற்றத்தை கொண்டு வருவதை காண முடிகிறது.

அதன் தாக்கம் எல்லா தரப்புகளிலும் பிரதிபலித்து, ஒவ்வொரு கட்டங்களாக தொடர்ந்து நடைபெற்று வருகிறது. எந்த விதத்திலும் பின்வாங்குவதாகத் தெரியவில்லை.

திராவிட அரசியல் என்பது ஏறக்குறைய தி.மு.க.வை மட்டுமே சார்ந்ததாக மாறிவருகிறதைக் கவனிக்க வேண்டியுள்ளது.
திராவிட கழகத்தின் பழைய நிலைக்கு ஸ்டாலின் திரும்பிக் கொண்டிருக்கிறார். தற்போது நடந்து முடிந்த உள்ளாட்சித் தேர்தலின் முடிவுகளை வைத்து பார்க்கும்போது, அ.தி.மு.க.வின் ஆட்சிக்கு முடிவுரை அமைந்ததாகக் கருத தோன்றுகிறது.

ஏனெனில் உள்ளாட்சி தேர்தலில் ஆங்காங்கே சில இடங்களை மட்டுமே கைப்பற்றி உள்ள அ.தி.மு.க., பெரிய அளவிலான தோல்வியைச் சந்தித்துள்ளது. எனவே ஆட்சிக்கு திரும்ப வருவது என்பது கடினமான ஒன்றாகும்.

கிராமப்புறங்களில் ஏறக்குறைய 90% சீட்களை திமுக கைப்பற்றியுள்ளது. இதனால் திராவிட கழகத்தின் கருத்துகளை முன்வைத்து அ.தி.மு.க.வில் செயல்பட்டு வந்த பெரும்பாலான தொண்டர்கள், தி.மு.க.விற்கு திரும்புவதை காணலாம். மேலும் பல கட்சிகளும் சிதறிப் போகவும் வாய்ப்புள்ளது. இதனால் அதிமுகவின் ஆட்சி மீண்டும் அமைவது கடினம்.

திராவிட அரசியலின் சாம்பியனாக மு.க.ஸ்டாலின் மாறி வருகிறார். அதேநேரத்தில் இளைஞர்களுக்கு கட்சியில் அதிக வாய்ப்புகள் வழங்கப்படுகிறது. வளர்ச்சி பணிகளில் கவனம் செலுத்தப்படுகிறது.
புதிய திட்டங்களை குறித்த கருத்துக்களை வெளியிடுகிறார். தமிழ் தேசியத்தை எப்படி வளர்க்கலாம் என்பதை குறித்து ஆழமான கருத்துகளை மக்கள்முன் வைக்கிறார்.

முழுமையான அரசியல் தலைவராக கிறார்!

ஏற்கனவே தமிழ் தேசியம் மீது ஆர்வமுள்ள நிலையில், ஸ்டாலினின் இந்த செயல்பாடு அதற்கு ஊக்கமளிப்பதாக அமைகிறது.
மாநில அரசின் ஆட்சியை மேலும் வலுவானதாக மாற்றுவது குறித்து பேசி வருகிறார். மேற்கண்ட இந்த நடவடிக்கைகளின் மூலம் மு.க.ஸ்டாலின் முழுமையான ஒரு அரசியல் தலைவராக உருவெடுத்துள்ளார் எனலாம்.

இதனால் ஸ்டாலின் தலைமையிலான தி.மு.க அரசை, அரசியல் வட்டாரத்தில் தோல்வி அடையச் செய்வது அவ்வளவு எளிதாக அமையாது.
ஒன்றிய அரசுக்குஎதிராக போராடும் மாநிலம் என்பதில் இருந்து திமுக.வில் மட்டும் அந்த நிலை என்பதை விட, தமிழகம்முழுவதும் இந்த மாற்றத்தைக் காண முடிகிறது.

அ.தி.மு.க.வின் ஒரு குளறுபடியில் இருந்துதான், திமுகவின் இந்த வெற்றிப்பயணம் துவங்கியது என்று கூறலாம். இதற்கு முக்கியமான காரணமாக பாரதிய ஜனதா உடனான கூட்டணியைக் காணலாம். இது தி.மு.கவிற்கு மிகவும் எளிதாக மாறியது.

தமிழகத்தில் கோவில்கள் பராமரிப்பின்றி காணப்பட்டது என்பதை பாரதிய ஜனதா முக்கிய குற்றச்சாட்டாக முன்வைத்து வந்தது.
மேலும் கோவில்களுக்கு சொந்தமான நிலங்கள் கேட்பாரின்றி, பிறரால் ஆக்கிரமிப்பு செய்யப்பட்டு, கோவில்களின் செயல்பாடுகள் கேள்விக்குறியாகின என கூறப்பட்டது.

ஸ்டாலின் தலைமையிலான திராவிட முன்னேற்றக் கழகம் ஆட்சிக்கு வந்தவுடன் தமிழகத்தில் உள்ள கோவில்களை சீரமைப்பது குறித்த அறிவிப்பை முதலில் வெளியிட்டார். ஆக்கிரமிப்பு செய்யப்பட்ட கோவில் நிலங்களை மீட்பது உட்பட பாரதிய ஜனதா குற்றச்சாட்டாக எதைக் கூறிவந்ததோ, அதற்கு தீர்வு கண்டார். 

பாரதிய ஜனதாவின் செயல்பாட்டிற்கு கூட்டணி கட்சியாக இருந்த அ.தி.மு.க.வும் மௌனம் சம்மதம் என்ற நிலையில் இருந்தது.

பாரதிய ஜனதாவின் குற்றச்சாட்டுகளுக்கு மு.க.ஸ்டாலின் தீர்வு கண்டார் என்பதை கடந்து, பிராமணர்கள் அல்லாத பிற ஜாதியினரும் பூசாரிகளாக நியமிக்கப்பட முடிவு செய்யப்பட்டது.
இது ஒரு பெரிய மைல்கல்லாக அமையும் தீர்மானமாக அமைந்தது.
மு.க.ஸ்டாலின் ஒரே ஒரு அறிவிப்பின் மூலம் பல ஆண்டுகளாக பாரதிய ஜனதா கூறி வந்த குற்றச்சாட்டுக்கு முடிவுகட்டினார்.
இதனால் மேற்கொண்டு அ.தி.மு.க தரப்பில் எதுவும் பேச வாய்ப்பில்லாமல் போனது. திராவிட அரசியல் கட்சி என்று தங்களை கூறிகொள்ளும் அ.தி.மு.க., கூட்டணி கட்சி என்பதால், பாரதிய ஜனதா கூறிய கருத்துக்களுக்கு மௌனம் சாதிக்க வேண்டிய நிலை உருவானது.

இதன் மூலம் கேரள அரசியல் தலைவர்களான உம்மன்சாண்டி மற்றும் பினராயி விஜயன் ஆகியோரின் ஒன்றிணைந்த கலவையாக ஸ்டாலினை குறிப்பிடலாம்.
ஏனெனில் ஒருபுறம் மக்களுக்கு சாதகமான உங்கள் தொகுதியில் முதலமைச்சர் உள்ளிட்ட திட்டங்களை கொண்டு வருகிறார். இந்தத் திட்டத்தின் கீழ் ஆட்சிக்கு வந்த பிறகு, 4 லட்சத்திற்கும் மேற்பட்ட புகார்களுக்கு தீர்வு கண்டுள்ளார்.
இதை உம்மன்சாண்டியின் ஆட்சியில் கூட காண முடியவில்லை.

ஸ்டாலினின் திட்டங்கள் அனைத்தும் மக்களை எளிதாகச் சென்று சேரும் வகையில் அமைந்துள்ளன.
இதற்கு சிறந்த எடுத்துக்காட்டாக, சென்னையில் வெள்ளம் ஏற்பட்டபோது, சாதாரண மக்களுக்கு உணவு பரிமாற முதல்வர் நேரடியாக களத்தில் இறங்கினார்.
இது மக்களை வெகுவாக கவர்ந்துவிடுகிறது.

ஒரு சிறந்த அரசியல் நகர்வு!

விவசாயிகளுக்கான 17,000 கோடியில் திட்டத்தை அறிவித்த ஸ்டாலின், அதன் மூலம் ஏறக்குறைய ஒரு லட்சம் வேலைவாய்ப்புகள் உருவானது. குறுகிய காலத்திலேயே சமூக நற்பணிகளுக்கு உதவும் திட்டங்கள் பல அறிவிக்கப்பட்டுள்ளன.

அ.தி.மு.க.வின் 10 வருட ஆட்சியில் தமிழகம், கடும் பின்னடைவைச் சந்தித்துவந்தது என்பதை காட்டும் வெள்ளை அறிக்கையை வெளியிட்டு, மாநிலத்தின் உண்மை நிலை வெளிக்காட்டப்பட்டது.
ஒன்றிய அரசின் மீதான தாக்குதலை ஸ்டாலின் நடத்தினாலும், தமிழக தேசிய உணர்வை வளர்ப்பதில் அதிக கவனம் செலுத்துகிறார்.
இதன் மூலம் ஒன்றிய அரசுடனான போராட்டத்தில் நீங்கள் என்னுடன் நிற்க வேண்டும் என்பதை மக்களின் மனதில் ஆழமாக பதித்துவிட்டார். இது ஒரு சிறந்த அரசியல் நகர்வு எனலாம்.

ஒன்றிய அரசு அளிக்காமல் உள்ள ஜிஎஸ்டி, வளர்ச்சி திட்டங்களுக்கான நிதி என பலவற்றையும் தொடர்ந்து எடுத்துக்காட்டி வருகிறார் ஸ்டாலின். அதேநேரத்தில் சிறந்த ஒரு நிதியமைச்சரை நியமித்துள்ள ஸ்டாலின், உலகத் தரம் வாய்ந்த நிதி தொடர்பான ஆலோசகர்களின் குழுவை அமைத்து, அந்தக்குழுவின் ஆலோசனைகளுக்கு ஏற்ப தமிழகத்தின் நிதி நிலையை சீரமைத்து வருகிறார்.

தி.மு.க. ஆட்சியில் உள்ள கடந்த சில மாதங்களில், ஒரே நேரத்தில் மாநிலத்தின் வளர்ச்சியிலும், மறுபுறம் மக்களுடன் இணைந்து செயலாற்றும் தன்மையையும் ஸ்டாலினின் ஆட்சியில் காணமுடிகிறது.
இதன் பலனை தான் நடந்து முடிந்த தேர்தலின் முடிவுகளில் காண்கிறோம்.

பா.ஜ.க. வுக்கு  வாய்ப்புகள் குறைவு!

இதே நிலையில் ஸ்டாலின் தொடர்ந்து ஆட்சி செய்தால், முன்பே கூறியதுபோல, அ.தி.மு.க. கொஞ்சம் கொஞ்சமாக மறைய ஆரம்பித்துவிடும்.
பல சிறிய கட்சிகளுக்கு மக்களின் கவனம் சிதற வாய்ப்பு உருவாகும். இதில் பாரதிய ஜனதா மக்களின் கவனத்தை பெறுமா என்ற சந்தேகம் ஏற்படலாம்.
ஆனால் நடந்து முடிந்த தேர்தலின் முடிவுகளை வைத்து பார்க்கும்போது, தமிழகத்தில் பாரதிய ஜனதாவின் வளர்ச்சிக்கு வாய்ப்பு குறைவு என்பது தெளிவாகிறது.
ஏனெனில் தி.மு.க.வுக்கு அடுத்த இடங்களில் காங்கிரஸ் மற்றும் கம்யூனிஸ்ட் கட்சியை காணமுடிகிறது.

திராவிட அரசியலை முன்வைத்து தி.மு.க. மற்றும் அ.தி.மு.க. தரப்புகள் தமிழகத்தில் ஆட்சி செய்து கொண்டிருந்த கடந்த காலத்தில், அரசியலில் ஜாதிக் கட்சிகளின் தாக்கம் அதிகமாக இருந்தது.
வன்னியர் கட்சி, புதிய தமிழகம் என பல ஜாதி பிரிவுகளை கொண்ட கட்சிகளை காணலாம். இந்த ஜாதி பிரிவுகளையும் உட்படுத்த ஸ்டாலின் கடந்த சில மாதங்களில் முயற்சி செய்து வந்துள்ளார்.
கடந்த தேர்தலில் ஸ்டாலின் வெளியிட்ட வேட்பாளர் பட்டியலில் இதை தெளிவாக காணலாம். ஜாதி பிரிவை சேர்ந்தவர்களுக்கு போட்டியிட ஸ்டாலின் வாய்ப்பு அளிக்க முயற்சிசெய்துள்ளார். பான் தமிழ்நாடு என்ற ஒரு நிலையை ஸ்டாலின் செயல்படுத்தி உள்ளார்.

கலைஞர்-ஜெயலலிதா,கலைஞர் -எம்ஜிஆர் காலக் கட்டத்தில் ஒருவர் மீது ஒருவருக்கு இருந்த விரோதம் பெரிய அளவில் கவனிக்கப்பட்டது.
ஆட்சிக்கு வருபவர்கள், முன்பு ஆட்சியில் இருந்தவர்களின் மீது கடுமையான குற்றச் சாட்டுகளை வெளியிடுவதை வழக்கமாக கொண்டுஇருந்தனர்.

ஆனால் ஸ்டாலின் அந்தப் பாணியை முற்றிலும் மாற்றி உள்ளார். எதிர்கட்சியில் உள்ள எடப்பாடி பழனிசாமி மற்றும் ஓ.பன்னீர்செல்வத்தின் வீட்டில் நேர்ந்த இறப்புகளுக்கு நேரடியாக வீட்டிற்கு சென்று முதல்வர் ஸ்டாலின் ஆறுதல் கூறினார்.
அதே நேரத்தில் அ.தி.மு.க.வின் ஆட்சியில் நடந்த ஊழல்களை குறித்து விசாரணையும் நடந்து வருகின்றன. ஒன்றிய அரசுக்கு பல கோரிக்கைகள் வைக்கப்படுகின்றன.

விவசாயத்துக்கு தனி பட்ஜெட்
இதையெல்லாம் கடந்து விவசாயத்திற்கான தனி பட்ஜெட் அமைப்பது இதுவே முதல் முறையாகும். இது அதிகம் கவனிக்க வேண்டிய ஒன்றாகும்.
வேறெந்த மாநில அரசும் கொண்டு வந்ததாக தெரியவில்லை. மத்திய நிதியமைச்சராக ப.சிதம்பரம் இருந்தபோது, விவசாயத்திற்கு தனி பட்ஜெட் அமைக்கலாம் என்ற கருத்து மட்டுமே வெளியிடப்பட்டது.

ஆனால் அதை நடைமுறைப்படுத்தவில்லை.
இப்படி பல ஆட்சி, அணுகுமுறைகளில் முழுமையான ஒரு மாற்றத்தை ஸ்டாலின் செய்துள்ளார்-
இவ்வாறு மீடியா ஒன் இணையதளம் சிறப்புச் செய்தி வெளியிட்டுள்ளது.

--------------------------------------------------------------------------

ஸ்விஃப்ட் என்றால் என்ன??

 ரஷ்யா – யுக்ரேன் நெருக்கடி: -

ஆயிரக்கணக்கான நிதி நிறுவனங்களால் பயன்படுத்தப்படும் சர்வதேச பணப்பரிவர்த்தனை சேவை அமைப்பான ஸ்விஃப்டில் இருந்து பல ரஷ்ய வங்கிகளை விலக்கி வைக்க ஐரோப்பிய ஒன்றியம், அமெரிக்கா உள்ளிட்ட நாடுகள் ஒப்புக் கொண்டுள்ளன.

இந்த நடவடிக்கையானது ரஷ்யாவின் வங்கி அமைப்பு மற்றும் ஸ்விஃப்ட் மூலமான நிதி போக்குவரத்துகளை தாக்குவதை நோக்கமாகக் கொண்டுள்ளது. ஸ்விஃப்ட், உலகளாவிய பணப் பரிவர்த்தனைக்கு முக்கியமானது.

ரஷ்யாவின் மத்திய வங்கியின் மீதும் பொருளாதாரத் தடைகள் விதிக்கப்படும். இது வெளிநாடுகளில் தன் நிதி இருப்புகளைப் பயன்படுத்துவதற்கான திறனைக் கட்டுப்படுத்தும் நோக்கம் கொண்டது.

தொடக்கத்தில், ஜெர்மனி, பிரான்ஸ் மற்றும் இத்தாலி போன்ற சில நாடுகள் , ரஷ்யாவை ஸ்விஃப்ட் பயன்பாட்டிலிருந்து விலக்கிவைக்கும் நடவடிக்கையை மேற்கொள்ள தயக்கம் காட்டின.

இந்தத்தடையானது, பிற நாடுகளையும் நிறுவனங்களையும் பாதிக்கும் என்ற கவலைகளும் நிலவுகின்றன. எடுத்துக்காட்டாக, ரஷ்யாவிலிருந்து எண்ணெய் மற்றும் எரிவாயு வாங்குவது தடைபடும்.

இருப்பினும், "ரஷ்யா மீது தொடர்ந்து தடைகளை விதிக்க நாங்கள் உறுதியாக இருக்கிறோம். சர்வதேச நிதி அமைப்பில் இருந்தும், எங்கள் பொருளாதாரங்களில் இருந்தும் அது ரஷ்யாவை மேலும் தனிமைப்படுத்தும்," என்று சனிக்கிழமையன்று வெளியிட்ட ஒரு கூட்டறிக்கையில், ஐரோப்பிய ஒன்றியம், ஜெர்மனி, பிரான்ஸ், இத்தாலி, பிரிட்டன், அமெரிக்கா மற்றும் கனடா தலைவர்கள் கூறியுள்ளனர்.

ஸ்விஃப்ட் என்றால் என்ன?

ஸ்விஃப்ட் என்பது உலகளாவிய நிதிப் பரிவர்த்தனைகளுக்கான சேவை அமைப்பு ஆகும். அதாவது, எல்லைகளைத் தாண்டி பணத்தை பாதுகாப்பாகவும், விரைவாகவும் அனுப்ப இந்த முறை அனுமதிக்கிறது. ஸ்விஃப்ட் என்பது, சொசைட்டி ஃபார் வேர்ல்டுவைட் இன்டர்பேங்க் ஃபைனான்சியல் டெலிகம்யூனிகேஷன் (Worldwide Interbank Financial Telecommunication) என்பதன் சுருக்கமாகும்.

1973 இல் இது பெல்ஜியமில் உருவாக்கப்பட்டது. ஸ்விஃப்ட், 200 க்கும் மேற்பட்ட நாடுகளில் 11,000 வங்கிகள் மற்றும் நிறுவனங்களை இணைக்கிறது.

பணப்பரிவர்த்தனை

ஆனால் ஸ்விஃப்ட் என்பது பாரம்பரிய வங்கி அல்ல. இது ஒரு வகையான உடனடி செய்தியிடல் அமைப்பாகும். பணம் அனுப்பப்பட்ட பிறகும், பெறப்பட்ட பிறகும் பயனர்களுக்கு தகவல் அளிக்கிறது.

இது ஒரு தினத்தில் 40 மில்லியனுக்கும் அதிகமான செய்திகளை அனுப்புகிறது. ஏனெனில் நிறுவனங்கள் மற்றும் அரசுகளுக்கு இடையில் டிரில்லியன் கணக்கான டாலர்கள் கைமாறுகின்றன.

அந்த செய்திகளில் 1% க்கும் அதிகமானவை ரஷ்ய கட்டணங்களை உள்ளடக்கியவை என்று கருதப்படுகிறது.

ஸ்விஃப்ட் யாருக்கு சொந்தம், யார் அதை கட்டுப்படுத்துகிறார்கள்?

ஸ்விஃப்ட் , அமெரிக்க மற்றும் ஐரோப்பிய வங்கிகளால் உருவாக்கப்பட்டது. ஒரே நிறுவனம் இதை சொந்த அமைப்பாக உருவாக்குவதையும் ஒரே ஒருவர் கட்டுப்படுத்துவதை தடுக்கவே இந்த நடவடிக்கை.

இந்த நெட்வொர்க் இப்போது 2,000 க்கும் மேற்பட்ட வங்கிகள் மற்றும் நிதி நிறுவனங்களுக்கு கூட்டாக சொந்தமானது.

அமெரிக்க ஃபெடரல் ரிசர்வ் மற்றும் பாங்க் ஆஃப் இங்கிலாந்து உட்பட, உலகெங்கிலும் உள்ள முக்கிய மத்திய வங்கிகளுடன் கூட்டு சேர்ந்து, நேஷனல் பேங்க் ஆஃப் பெல்ஜியத்தால் இது மேற்பார்வை செய்யப்படுகிறது.

ஸ்விஃப்ட் அதன் உறுப்பினர்களுக்கு பாதுகாப்பான சர்வதேச வர்த்தகத்தை சாத்தியமாக்க உதவுகிறது. மேலும் பிரச்னைகளின்போது அது பக்கசார்பை கொண்டிருக்கக்கூடாது.

இரானின் சர்ச்சைக்குரிய அணுசக்தித் திட்டம் காரணமாக விதிக்கப்பட்ட பொருளாதாரத் தடைகளின் ஒரு பகுதியாக 2012 இல் அந்த நாடு ஸ்விஃப்ட் பயன்படுத்த தடை விதிக்கப்பட்டது. இதன் காரணமாக,எண்ணெய் ஏற்றுமதி வருவாயில் கிட்டத்தட்ட பாதி மற்றும் வெளிநாட்டு வர்த்தகத்தில் 30 சதவிகிதத்தை இரான் இழந்தது.

பொருளாதாரத் தடைகள் தொடர்பாக தனக்கு எந்த அதிகாரமும் இல்லை என்றும் அவற்றைச் சுமத்துவதற்கான எந்த ஒரு முடிவும் அரசுகளிடம் உள்ளது என்றும் ஸ்விஃப்ட் கூறுகிறது.

ஸ்விஃப்ட்டில் இருந்து ரஷ்யாவை தடை செய்வது அதை எவ்வாறு பாதிக்கும்?

ஸ்விஃப்டில் இருந்து எந்த ரஷ்ய வங்கிகள் அகற்றப்படும் என்பது தற்போது தெளிவாகத்தெரியவில்லை. இது வரும் நாட்களில் தெளிவாகும் என எதிர்பார்க்கப்படுகிறது.

"இந்த வங்கிகள் சர்வதேச நிதி அமைப்பில் இருந்து துண்டிக்கப்படுவதையும், உலகளவில் செயல்படும் திறனைக் குறைப்பதையும் இந்த நடவடிக்கை உறுதி செய்யும்" என்று கூட்டறிக்கை தெரிவிக்கிறது.

ஸ்விஃப்ட்டில் இருந்து ரஷ்யாவை தடை செய்வது

ஸ்விஃப்ட் வழங்கும் சாதாரண, எளிமையான மற்றும் உடனடி பரிவர்த்தனை வசதியில் இருந்து ரஷ்ய நிறுவனங்களை விலக்கிவைப்பதே இதன் நோக்கம். ரஷ்யாவின் மதிப்புமிக்க எரியாற்றல் மற்றும் விவசாயப் பொருட்களுக்கான பணவரவு கடுமையாக பாதிக்கப்படும்.

வங்கிகள் ஒன்றுக்கொன்று நேரடியாகச் சமாளிக்க வேண்டியிருக்கும். தாமதங்கள் மற்றும் கூடுதல் செலவுகள் ஏற்படும். இதனால் ரஷ்ய அரசின் வருவாய் குறையும்.

ரஷ்யா, 2014 இல் கிரைமியாவை தன்னுடன் இணைத்தபோது, ஸ்விஃப்ட் செயல்முறையில் இருந்து அந்த நாடு வெளியேற்றப்படும் என்ற அச்சுறுத்தல் அளிக்கப்பட்டது. இந்த நடவடிக்கை போர்ப் பிரகடனத்திற்குச் சமமாக இருக்கும் என்று ரஷ்யா கூறியது.

மேற்கத்திய நாடுகள் அந்த நடவடிக்கையை மேற்கொள்ளவில்லை. ஆனால் இந்த அச்சுறுத்தல் ரஷ்யாவை தனது சொந்த, அதிக வளர்ச்சி அடையாத, எல்லை தாண்டிய பணப்பரிமாற்ற முறையை உருவாக்கத் தூண்டியது.

அத்தகைய தடைக்கு தயாராவதற்காக ரஷ்ய அரசு, மிர் (Mir) எனப்படும் தேசிய கட்டண அட்டை அமைப்பை உருவாக்கியது. இருப்பினும், சில வெளிநாடுகள் மட்டுமே தற்போது இதைப் பயன்படுத்துகின்றன.

ஸ்விஃப்ட் தொடர்பாக மேற்கத்திய நாடுகள் ஒருமித்த கருத்தை ஏன் எட்ட முடியவில்லை?

ஸ்விஃப்ட்

ரஷ்யாவை அகற்றுவதால், ரஷ்யாவில் இருந்து பொருட்களை வாங்கும் மற்றும் ரஷ்யாவுக்கு பொருட்களை விற்கும் நிறுவனங்களுக்கு, குறிப்பாக ஜெர்மன் நிறுவனங்களுக்கு பாதிப்பு ஏற்படும்.

ஐரோப்பிய ஒன்றியத்தின் எண்ணெய் மற்றும் இயற்கை எரிவாயு பெரும்பாலும் ரஷ்யாவிடமிருந்துதான் பெறப்படுகிறது. மேலும் மாற்று விநியோகங்களைக் கண்டுபிடிப்பது எளிதானது அல்ல. எரிசக்தி விலைகள் ஏற்கனவே உயர்ந்துள்ள நிலையில், மேலும் இடையூறு ஏற்படுவதை பல அரசுகள் தவிர்க்க விரும்புகின்றன.

ரஷ்யா பணம் கொடுக்கவேண்டிய நிறுவனங்கள் பணம் பெற மாற்று வழிகளைக் கண்டுபிடிக்க வேண்டும். சர்வதேச வங்கி அமைப்பில் நிகழும் இந்த குழப்பத்தால் விளைந்த ஆபத்து மிகவும் பெரியது என்று சிலர் கூறுகிறார்கள்.

ஸ்விஃப்ட்டிலிருந்து துண்டிக்கப்படுவது ரஷ்யாவின் பொருளாதாரத்தை 5% சுருக்கும் என்று ரஷ்யாவின் முன்னாள் நிதியமைச்சர் அலெக்ஸி குட்ரின் கூறியுள்ளார்.

ஆனால் ரஷ்யாவின் பொருளாதாரத்தில் நீடித்த தாக்கம் குறித்து சந்தேகம் உள்ளது. தனது சொந்த பணப்பரிவர்த்தனை முறையை வைத்துள்ள சீனா போன்ற, பொருளாதாரத் தடைகளை விதிக்காத நாடுகளின் வழியாக ரஷ்ய வங்கிகள் பணம் செலுத்தக்கூடும்.

நன்றி: தமிழோசை.

----------------------------------------------------------------------------

வெள்ளி, 25 பிப்ரவரி, 2022

செல்வாக்கு...யாருக்கு.?

தமிழகத்தில் 10 ஆண்டுகள் கழித்து 19ம் தேதி அன்று நகர்ப்புற உள்ளாட்சி அமைப்புகளுக்கான தேர்தல்கள் நடைபெற்றது. 

அதன் முடிவுகள் கடந்த செவ்வாய்க்கிழமை அன்று வெளியிட்டப்பட்டது.

 பெருவாரியான இடங்களில் திமுக வெற்றி பெற்றது. அதிமுகவின் கோட்டையாக கருதப்பட்ட மேற்கு மண்டலத்தை மொத்தமாக தன்னுடைய கட்டுப்பாட்டுக்குள் கொண்டு வந்தது திமுக. 

இந்த தேர்தலில், மாநகராட்சி வார்டுகளில் அனைத்து கட்சிகளும் பெற்றிருக்கும் வாக்கு வங்கி என்ன? 

கடந்த தேர்தல் காலத்தில் இருந்து இது உயர்ந்திருக்கிறதா? 

21 மாநகராட்சியில் அமைந்திருக்கும் 1374 வார்டுகளில் 57 கட்சிகளைச் சேர்ந்த 11200 பேர் போட்டியிட்டுள்ளனர்.

 சுயேட்சையாக மொத்தம் 3038 வேட்பாளர்கள் களம் இறங்கினார்கள். 

அதற்கு அடுத்த படியாக அதிமுக 1363 வேட்பாளர்களை களம் இறக்கியது. 

திராவிட முன்னேற்றக் கழகம் 1121 வார்டுகளில் தங்களின் வேட்பாளர்களை இறக்கியது. 

தனித்து நின்று களம் கண்ட பாஜக மற்றும் நாம் தமிழர் கட்சி முறையே 1134 மற்றும் 1114 வார்டுகளில் வேட்பாளர்களை களம் இறக்கினார்கள். 

மக்கள் நீதி மய்யம் 671 இடங்களில் நின்றது.

பல்வேறு கட்சிகள் ஒற்ற இலக்க வார்டுகளில் மட்டுமே போட்டியிட்டனர். 

இந்திய திராவிட மக்கள் முன்னேற்ற கட்சி, ஜனதா கட்சி, 

லோக் தந்த்ரிக் ஜனதா தளம்,

 மக்கள் முன்னேற்ற கட்சி, 

நாம் இந்தியா 

நாம் இந்தியர் கட்சி போன்ற கட்சிகள் தலா 1 வார்டுகளில் போட்டியிட்டனர்.

மதசார்பற்ற முற்போக்கு கூட்டணியில் தலைமை வகிக்கும் திமுக 1121 வார்டுகளில் தங்களின் வேட்பாளர்களை களம் இறக்கியது. அதில் 948 பேர் வெற்றி பெற்றனர்.

 இந்த தேர்தலில் மொத்தமாக 35,57,262 (43.59%) வாக்குகளைப் பெற்று முன்னணி பெறுகிறது .

மதசார்பற்ற முற்போக்கு கூட்டணியில் இடம் பெற்றுள்ள முக்கிய தேசிய கட்சி காங்கிரஸ். இந்த தேர்தலில் 122 இடங்களில் போட்டியிட்டு 73 இடங்களில் வெற்றி பெற்றனர். மொத்தமாக 2,57,881 (3.16%) வாக்குகளை அவர்கள் பெற்றுள்ளனர்.

திமுக தலைமையிலான மதசார்பற்ற முற்போக்கு கூட்டணியில் இடம் பெற்றுள்ள சி.பி.ஐ மற்றும் சி.பி.ஐ.எம் முறையே 30 மற்றும் 66 வார்டுகளில் போட்டியிட்டனர். சி.பி.ஐ. கட்சி 13 இடங்களில் 47053 வாக்குகளை பெற்று வெற்றியை உறுதி செய்தது. 

சி.பி.ஐ.எம் கட்சி 69565 வாக்குகளைப் பெற்று 24 வார்டுகளில் வெற்றி பெற்றது. மொத்தமாக இவ்விரண்டு கட்சியும் முறையே இந்த தேர்தலில் 71,884 (0.88%) மற்றும் 1,06,990 (1.31%) வாக்குகளைப் பெற்றனர்.

மதிமுக 27 இடங்களில் போட்டியிட்டு 21 இடங்களில் வெற்றி பெற்றது. மொத்தமாக 73827 வாக்குகளைப் பெற்ற அவர்களின் வாக்கு வங்கி (0.90) ஆக உள்ளது.

இந்திய யூனியன் முஸ்லீம் லீக் 11 இடங்களில் போட்டியிட்டு 6 இடங்களில் வெற்றி பெற்றன. மொத்தமாக 22293 வாக்குகளை அவர்கள் பெற்றுள்ளனர். இவர்களின் வாக்கு சதவீதம் 0.27%.

164 அதிமுக வேட்பாளர்கள் மக்களால் தேர்வு செய்யப்பட்டனர்.

 தேர்வு செய்யப்பட்ட வேட்பாளர்கள் பெற்ற வாக்குகள் 3,83,971. மொத்தமாக 21 மாநகராட்சியிலும் போட்டியிட்ட வேட்பாளர்கள் பெற்ற மொத்த வாக்குகள் 19,61,005. முன்பு எப்போதும் இல்லாத அளவிற்கு பெரிய அளவில் பின்னடவை சந்தித்தது அதிமுக. இந்த தேர்தலில் அவர்களின் வாக்கு வங்கி 24.00% ஆக உள்ளது.

அம்மா மக்கள் முன்னேற்ற கழகம் 879 வேட்பாளர்களை களம் இறக்கியது. ஆனால் அதில் 3 நபர்கள் மட்டுமே மொத்தமாக 7602 வாக்குகளைப் பெற்று வெற்றி பெற்றனர். அநேக இடங்களில் வெற்றியை நிலை நாட்ட இயலவில்லை என்றாலும் ஒட்டுமொத்தமாக 21 மாநகராட்சி வார்டுகளில் இக்கட்சிக்கு பதிவான வாக்குகள் 1,12,653 ஆகும். இவர்களின் வாக்கு விகிதம் இந்த நகர்ப்புற உள்ளாட்சித் தேர்தலில் 1.38%.

பாஜகவை பின்னுக்கு தள்ளிய சுயேட்சைகள்

இந்த முறை பல்வேறு வார்டுகளில் பல சுயேட்சை வேட்பாளர்கள் போட்டியிட்டனர். மொத்தமாக 3038 வேட்பாளர்கள் தனித்து போட்டியிட்டு 73 பேர் அதில் தேர்வும் செய்யப்பட்டுள்ளனர். 

திமுக, அதிமுகவுக்கு அடுத்தபடியாக, காங்கிரஸுக்கு இணையாக இவர்கள் வெற்றியை உறுதி செய்துள்ளனர். வெற்றி பெற்ற வேட்பாளர்கள் 1,41,897 வாக்குகளைப் பெற ஒட்டுமொத்தமாக 3038 வேட்பாளர்களுக்கு பதிவான வாக்குகள் 6,92,829. இந்த தேர்தலில் 8.48% வாக்குகளை இவர்கள் பெற்றுள்ளனர்.

அதிமுக கூட்டணியில் இருந்து வெளியேறி தனித்து நின்று தேர்தலை சந்தித்தது பாஜக. 1134 இடங்களில் 22 இடங்களில் வெற்றியை உறுதி செய்தது இக்கட்சி. 

வெற்றி வேட்பாளர்கள் மொத்தமாக 36807 வாக்குகளை பெற்றிருந்தனர். இந்த தேர்தலில் அவர்கள் 5,85,826 வாக்குகளைப் (தபால் வாக்குகள் நீங்கலாக) பெற்று தங்களின் வாக்கு விகிதத்தை 7.17% ஆக வைத்துள்ளனர்.

பெரிய அளவில் எதிர்பார்க்கப்பட்ட மக்கள் நீதி மய்யம் ஒரு இடத்திலும் வெற்றி பெறவில்லை. 671 இடங்களில் போட்டியிட்டு 1,48,334 (1.82%) வாக்குகளைப் பெற்றுள்ளனர்.

நாம் தமிழர் கட்சி எந்த வார்டிலும் வெற்றி பெறவில்லை. இருப்பினும் 1114 வார்டுகளில் போட்டியிட்ட அவர்கள் பெற்ற வாக்குகள் 205392 (2.51%) ஆகும்.

பாட்டாளி மக்கள் கட்சி 569 இடங்களில் போட்டியிட்டு 5 இடங்களில் வெற்றி பெற்றது. அவர்கள் பெற்ற மொத்த வாக்குகளின் எண்ணிக்கை 115741 (1.41%) ஆகும்.

இவை கட்சிகள் பெற்ற மொத்த வாக்குகள் அடிப்படையிலான விழுக்காடுதான்.  .(℅)கட்சிகள் போட்டியிட்ட இடங்களின் ,பெற்ற வாக குகள் அடிப்படையில் என்றால் அதிகம்,குறைவு என மாற்றம் உண்டாகலாம்.

ஆனால் அதுதான் உண்மையான விழுக்காடாகும்(℅).

உதாரணமாக ம.நீ.மய்யம்671 இடங்களில் மட்டும் போட்டியிட்டு1,48,334 (1.82%) வாக்குகளையும்,நாம் தமிழர் கட்சி 1114 வார்டுகளில் போட்டியிட்டு  வாக்குகள் 205392 (2.51%) பெற்றுள்ளது.

மேலும் வட்ட அளவில் வேட்பாளர்களை கட்சிஅடிப்படையில் மட்டும் தேர்வு செய்வதில்லை.தனிப்பட்ட செல்வாக்கு,சாதி,மதம் போன்றவைகள்தான முன்னிற்கும்.

இதனால்தான் சுயேட்சைகள் அதிகம் நிற்பார்கள் கணிசமான அளவு வெற்றியும் பெறுவார்கள்.

-----------------------------------------------------------------------

நேட்டோ

NATO -  North Atlantic Treaty Organization


இரண்டாம் உலகப்போர் முடிந்த பிறகு முன்னாள் ரவுடி இங்கிலாந்தும் இந்நாள் ரவுடி அமெரிக்காவும் கனடா மற்றும் வேறு சில ஐரோப்பிய நாடுகளும் சேர்ந்து உருவாக்கிய அமைப்பு. இன்றைய தேதியில் 30 நாடுகள் இதன் உறுப்பு நாடுகளாக உள்ளன. 

ஐரோப்பிய நாடுகளின் பாதுகாப்புக்காக உருவாக்கப்பட்ட படை என்று கூறி கொண்டாலும் இது உலகளவில் நடைமுறைபடுத்திய பயங்கரவாதங்கள்தான் அதிகம். 

போஸ்னியா, செர்பியா, செகோஸ்லாவாக்கியா, ஜார்ஜியா, ஈராக், லிபியா, ஆப்கானிஸ்தான், வியட்நாம், தென் கொரியா என்று இந்த படை நுழைந்த இடமெல்லாம் நாசமாகி போனது வரலாறு.


நன்றாக உற்று கவனித்தால் ஒன்று புரிய வாய்ப்புள்ளது. நேட்டோ படைகள் ஒரு நாட்டுக்குள் நுழைவது அந்த நாடுகளுக்கு நன்மை பயக்கவோ பாதுகாப்பு அளிக்கவோ இல்லை.

 மாறாக தனக்கு போட்டியாக வளரும் நாடுகளின் அண்டை நாடுகளை தேர்ந்தெடுத்தே அது நுழையும். அங்கு தன் ராணுவ தளவாடங்களை நிறுத்தி வளரும் நாடுகளை அச்சுறுத்துவதே அதன் இலக்கு. தென்கொரியா சிறந்த உதாரணம்.

 வட கொரியாவை காரணம் காட்டி  தென் கொரியாவிற்குள் டென்ட் போட்ட நேட்டோ படைகளுக்காக எத்தனை லட்சம் தென் கொரிய பெண்கள் விபச்சாரத்துக்குள் தள்ளப்பட்டார்கள் என்பது அந்த அரசாங்கத்திற்கே வெளிச்சம்.

 ஈராக்கிலும் ஆப்கானிஸ்தானிலும் நேட்டோ ஏற்படுத்திய நாசகார வேலைகளை உலகம் வேடிக்கைதான் பார்த்தது.


தற்போது ரஷ்யாவை குறிவைத்து அதன் அண்டை நாடுகளில் தன் துருப்புகளை நிறுத்த துடிக்கிறது. எந்தவொரு நாடும் தன் எல்லைகளில் தன் எதிரி நாட்டு ராணுவத்தை நிறுத்த அனுமதிக்காது. 

 2008ஆம் ஆண்டில் இதே போன்று நேட்டோ படை அளித்த தைரியத்தில் ஜார்ஜியா ரஷ்யாவின் மீது படையெடுக்க சோவியத் யூனியன் பிளவால் துவண்டு போய் மீள் கட்டமைப்பு செய்து கொண்டிருந்த ரஷ்யா இனியும் பொறுக்க முடியாது என்று வீறு கொண்டு திருப்பி அடித்தது. 

ஜார்ஜியாவை  திருப்பி விரட்டியது மட்டுமல்லாமல் அதன் எல்லைக்குள் புகுந்து தாக்க ஜார்ஜியா பல துண்டுகளாக சிதறி போனது. வழக்கம் போல் நேட்டோ படை ஜார்ஜியாவை கை கழுவி விட்டது. 

இன்றும் அந்த நாட்டின் பல நிலபரப்பு ரஷ்யாவின் கட்டுப்பாட்டில் உள்ளது.


இந்த நிலையில் தான் உக்ரைனுக்குள் கால் வைக்க நேட்டோ திட்டம் தீட்டியது. ரஷ்யாவிற்கு உக்ரைன் அண்டைநாடு மட்டுமல்ல அடிக்கடி உரசல் ஏற்படும் நாடு. இந்தியா பாகிஸ்தான் போலதான். 

அங்கு நேட்டோ நுழைந்தால் ஜார்ஜியாவை போல் உக்ரைனும் தாக்க கூடும் என அஞ்சி உக்ரைனை நேட்டோவில் சேர வேண்டாம் என கூறியது. உக்ரைன் ஏற்கவில்லை. சரி நேட்டோ படைகள் ஒருபோதும் ரஷ்யா எல்லையை நெருங்காது என உடன்படிக்கையில் கையெழுத்திட அமெரிக்காவை கேட்டது அதற்கும் மசியவில்லை. 

பொறுத்து பார்த்த புதின் தாக்குதல் நடத்தப்படும் என பல நாட்களாக ராணுவத்தை வைத்து மிரட்டி பார்த்தார். போர் தொடங்கினால் உக்ரைனால் தாக்குப்பிடிக்க முடியாது என்பது தெரிந்து இருந்தும் உக்ரைன் அதிபர் அமெரிக்காவின் கைப்பாவையாகவே மாறி தன் மக்களை கேடயமாக பயன்படுத்தினார்.

 போர் தொடங்கியதும் வழக்கம் போல் நேட்டோ படைகள் பின்வாங்க உக்ரைன் தனி ஆளாக விழி பிதுங்கி நிற்கிறது. உக்ரைன் அதிபர் எப்படியும் தப்பித்து வேறு நாட்டுக்கு ஓடி விடுவார் ஆனால் உக்ரைன் மக்களின் கதி ? 


ரஷ்யா மீது அனைத்து குற்றச்சாட்டுகளையும் சுமத்த முடிந்தாலும் பெரும் குற்றவாளிகள் அமெரிக்காவும் உக்ரைன் அதிபரும்தான்.  

நேட்டோ ஒரு நாசகார பயங்கரவாத ராணுவம். அதை வளர விடுவது உலக நாடுகளின் அமைதிக்குதான் பாதிப்பு. நேட்டோ உலக நாடுகளின் பாதுகாப்புக்காக உருவாக்கப்பட்ட ராணுவம் அல்ல. 

அது அமெரிக்காவிற்கு கட்டுபட மறுக்கும் நாடுகளை மிரட்ட உருவாக்கப்பட்ட அமைப்பு.

இதோ நேட்டோ பாதுகாப்பு தரும் என்று உக்ரைனை நம்ப வைத்து ரஷ்யாவுடன் மோத வைத்தார்கள்.ஆனால் இன்று " தனியாக நின்று தவிக்கிறது உக்ரைன்" என அதிபர் புலம்புகிறார்.

நேட்டோ படைகளை அனுப்ப மாட்டோம் ஆனால் உதவுவோம் என்று நேட்டோ படைத்தலைமை அறிவிக்கிறது.


இப்போதும் போரை நிறுத்த அமெரிக்கா, பிரிட்டன், உக்ரைன் அதிபரால் அமைதி ஒப்பந்தம் போட முடியும். ஆனால் செய்ய மாட்டார்கள்.

-----------------------------------------------------------------------

சுயபரிசோதனை 

நகா்ப்புற உள்ளாட்சித் தோ்தல் தோல்வியைத் தொடா்ந்து, அதிமுக சுயபரிசோதனை செய்துகொள்ள வேண்டிய நிலைக்குத் தள்ளப்பட்டுள்ளது.

சட்டப்பேரவைத் தோ்தலில் அதிமுக தோல்வி அடைந்து ஆட்சியை இழந்திருந்தாலும், 66 சட்டப்பேரவை உறுப்பினா்களுடன் பலமான எதிா்க்கட்சியாக உள்ளது. திமுகவுக்கும் அதிமுகவுக்குமான வாக்கு வித்தியாசம் 2 சதவீத அளவிற்குள்தான்.

ஆனால், நகா்ப்புற உள்ளாட்சித் தோ்தலில் 21 மாநகராட்சிகளையும் இழந்து அதிமுக படுதோல்வியைச் சந்தித்துள்ளது. மக்களவைத் தோ்தலின் போதாவது ஓா் இடத்தில் மட்டும் அந்தக் கட்சி வெற்றிபெற்றது. இந்தத் தோ்தலில் அனைத்து மாநகராட்சிகளையும் அதிமுக இழந்திருப்பது அந்தக் கட்சியினரை பெரும் அதிா்ச்சிக்குள்ளாக்கியிருக்கிறது.

மாநகராட்சி வாா்டுகளில் 1,374 இடங்களில் 164 இடங்களை மட்டுமே அதிமுகவால் கைப்பற்ற முடிந்துள்ளது. 138 நகராட்சிகளில் 2 நகராட்சிகளை மட்டும் கைப்பற்றியுள்ளது. மொத்தம் 3,843 நகராட்சி வாா்டுகளில் 638 வாா்டுகளை மட்டுமே கைப்பற்றியுள்ளது. பேரூராட்சி வாா்டுகளில் 7621 இடங்களில் 1206 இடங்களை மட்டுமே கைப்பற்றியுள்ளது.

சட்டப்பேரவைத் தோ்தலில் பாமக, பாஜக, தமாகா, புரட்சி பாரதம் உள்ளிட்ட கட்சிகளுடன் கூட்டணி அமைத்துப் போட்டியிட்டது. ஆனால், இந்தத் தோ்தலில் பாஜகவும், பாமகவும் கூட்டணியில் இடம்பெறாத நிலையில் தமாகா, புரட்சி பாரதம் உள்ளிட்ட சிறிய கட்சிகளுடன் மட்டும் கூட்டணி அமைத்துப் போட்டியிட்டு தோல்வியைத் தழுவியுள்ளது.

தொடா் தோல்வி: ஜெயலலிதா இருந்தபோது இரண்டு சட்டப்பேரவைத் தோ்தலில் தொடா் வெற்றி என்று சாதனை படைத்த கட்சியாக இருந்த அதிமுக, மக்களவைத் தோ்தல், சட்டப்பேரவைத் தோ்தல், ஊரக உள்ளாட்சித் தோ்தல், நகா்ப்புற உள்ளாட்சித் தோ்தல் என தொடா்ந்து தோல்வியைச் சந்தித்து வருகிறது. கூட்டணியில் பாஜக இருப்பதால்தான் அதிமுகவால் வெற்றிபெற முடியவில்லை என்கிற கருத்தை அந்தக் கட்சியினா் தொடா்ந்து கூறி வந்தனா்.

ஆனால், இந்தத் தோ்தலில் பாஜக தனித்துப் போட்டியிட்டு, குறிப்பிடத்தக்க அளவில் வெற்றியை ஈட்டியது. சென்னையில் கூட ஒரு வாா்டு கவுன்சிலா் இடத்தை பாஜக பெற்றுள்ளது. அப்படியானால், அதிமுகவின் தோல்விக்குக் காரணம் என்ன என்பது ஆராய வேண்டிய நிலைக்கு அந்தக் கட்சித் தள்ளப்பட்டுள்ளது.

அதிமுகவிலிருந்து பிரிந்த கட்சியாகப் பாா்க்கப்படும் அமமுக குறிப்பிடத்தக்க அளவில் இடங்களைக் கைப்பற்றியுள்ளது. அந்தக் கட்சியும் அதிமுகவில் இணைந்திருந்தால் தற்போதைய நிலையைவிட அதிமுக அதிக இடங்களைக் கைப்பற்றியிருக்க முடியும் என்பதில் மாற்று கருத்து இல்லை.

குழப்பமே காரணம்: அதிமுக தலைமையில் நடைபெறும் குழப்பமே அந்தக் கட்சி படுதோல்வி அடைவதற்குக் காரணம் எனக் கூறப்படுகிறது. சட்டப்பேரவைத் தோ்தலில்கூட கொங்கு பகுதியில் அதிமுகவை அசைக்க முடியாத நிலை இருந்து வந்தது. அதிமுக சட்டப்பேரவை உறுப்பினா்களில் பெரும்பாலோனாா் அந்தப் பகுதியில் இருந்து தோ்ந்தெடுக்கப்பட்டவா்கள். தற்போது அந்தப் பகுதியில்கூட அதிமுகவால் பெரிய அளவில் வெற்றியை ஈட்ட முடியவில்லை. திமுக அங்கு செல்வாக்கை உயா்த்திக் கொண்டுள்ளது.

அதிமுகவில் ஓ.பன்னீா்செல்வம், எடப்பாடி பழனிசாமி இடையே நடைபெற்று வரும் போட்டியால் ஏற்படும் குழப்பங்கள் அதிமுகவின் அடிமட்டதொண்டா்கள்வரை பாதிப்பை ஏற்படுத்தியுள்ளது. அந்தக் குழப்பங்களுக்கு தீா்வு காண வேண்டிய முக்கிய கட்டத்தில் அதிமுக உள்ளது. அதற்கான சுயபரிசோதனையை அதிமுக உடனே மேற்கொண்டு ஒற்றைத் தலைமையை ஏற்படுத்த வேண்டும் என்பதே அரசியல் ஆா்வலா்களின் கருத்தாகசெய்தார்

-----------------------------------------------------------------------------

கைதானார்NSEமோசடியாளர்.

தேசிய பங்குச் சந்தையின் (என்எஸ்இ) முன்னாள் குழும இயக்க அதிகாரி ஆனந்த் சுப்ரமணியனின் நியமனமாகும். 

ஆனந்த் சுப்ரமணியன் பங்குச் சந்தை முறைகேடு தொடர்பான வழக்கில் வியாழன் இரவு சிபிஐயால் கைது செய்யப்பட்டார்.

சந்தை கட்டுப்பாட்டாளர் செபி-யின் (இந்தியப் பங்குகள் மற்றும் பரிவர்த்தனை வாரியம்) அறிக்கையில் வெளிவந்துள்ள புதிய உண்மைகளின் அடிப்படையில் அதிகாரிகள் அவரை கைது செய்ததாக வட்டாரங்கள் தெரிவிக்கின்றன. 

ஆனந்த் சுப்பிரமணியனை கைது செய்ய முடிவெடுக்கும் முன்னர், சென்னையில் பல நாட்களுக்கு ஏஜென்சி அவர்கரிடம் விசாரணை நடத்தியதாக அதிகாரிகள் தெரிவித்தனர்.

ஆனந்த் சுப்ரமணியன் முதலில் 2013 இல் என்எஸ்இ-ல் தலைமை செயலுத்தி ஆலோசகராக நியமிக்கப்பட்டார். பின்னர் 2015 இல் அப்போதைய நிர்வாக இயக்குநர் சித்ரா ராமகிருஷ்ணாவால் குழு இயக்க அதிகாரியாக பதவி உயர்வு பெற்றார். 2016 ஆம் ஆண்டில், முறைகேடுகள் குறித்த குற்றச்சாட்டுகள் எழுந்ததை அடுத்து, அவர் தேசிய பங்குச் சந்தையில் இருந்து வெளியேறினார்.

இமயமலையில் உள்ள "யோகி" ஒருவருடன் ரகசியத் தகவலைப் பகிர்ந்துகொண்டதாகவும், அவர் அறிவுரையின் பேரில் பல முக்கிய முடிவுகளை எடுத்ததாகவும் சித்ரா ராமகிருஷ்ணாவிடம் ஏற்கனவே விசாரணை நடைபெற்று வருகிறது. 

செபியின் கூற்றுப்படி, ஆனந்த் சுப்ரமணியனின் நியமனம் மற்றும் செயல்திறன் மதிப்பீட்டிற்கான எந்த ஆதாரமும் இல்லாமல் அவரது சம்பளத்தில் "அடிக்கடி, தன்னிச்சையான மற்றும் விகிதாச்சாரமற்ற" உயர்வு ஆகியவை அந்த இமாலய சாமியாரின் அறிவுரையின் பேரில் எடுத்த சில குறிப்பிடத்தக்க முடிவுகளாகும். 

ஆனந்த் சுப்ரமணியனின் நியமனம் மற்றும் அவரது தகுதியற்ற பதவி உயர்வு ஆகியவற்றில் நிர்வாகக் குறைபாடுகள் இருந்ததாக சித்ரா ராமகிருஷ்ணா மற்றும் பலர் மீது செபி குற்றம் சாட்டியுள்ளது.

செபி, சித்ரா ராமகிருஷ்ணாவுக்கு ₹ 3 கோடியும், என்எஸ்இ, சுப்பிரமணியன், முன்னாள் என்எஸ்இ எம்டி மற்றும் சிஇஓ ரவி நரேன் ஆகியோருக்கு தலா ₹ 2 கோடியும் அபராதம் விதித்துள்ளது. 

சித்ரா ராமகிருஷ்ணாவின் சில முடிவுகள் பற்றிய விவாதம் இப்போது அதிகமாகி வருகிறது. ஆனந்த் சுப்ரமணியம் என்எஸ்இ-யில் பெரும் சம்பள உயர்வுடன் நியமிக்கப்பட்டது மட்டுமின்றி, அவருக்கு தன்னிச்சையாக பதவி உயர்வு கிடைத்ததும் பல சர்ச்சைகளைக் கிளப்பியுள்ளது. இமாலய யோகி கூறியதால், அவர், 

NSE இல் 2வது இடத்துக்கு உயர்த்தப்பட்டார். 

சுப்ரமணியத்திற்கு மூலதனச் சந்தையில் அனுபவம் இல்லை. இருப்பினும் அவருக்கு சம்பள உயர்வு, பதவி உயர்வுகள் தொடர்ந்து கிடைத்தன. 

இரண்டே ஆண்டுகளில், அதாவது 2016ல் அவரது ஊதியத் தொகுப்பு ரூ.4.21 கோடியாக அதிகரித்தது. இதுமட்டுமின்றி, அவருக்கு குழு இயக்க அதிகாரி (GOO) பொறுப்பும் வழங்கப்பட்டது.

இந்தக் காலப்பகுதியில் சுப்ரமணியம் பல வசதிகளைப் பெற்றிருந்ததாக ஊடகச் செய்திகள் தெரிவிக்கின்றன. மும்பையிலிருந்தும் சென்னையிலிருந்தும் பணிபுரியும் வசதி இதில் ஒன்று. 

அவருக்கு வசதியாக பிரத்யேக அமைப்புகளை அமைக்க சிறப்பு ஏற்பாடுகள் செய்யப்பட்டன. ஆனந்த் GOO ஆன பிறகும் இந்த வசதியை தொடர்ந்து பெற்றார்.

என்எஸ்இ-யின் தணிக்கைக் குழுவின் விசாரணைக்குப் பிறகு, சுப்ரமணியத்தின் நியமனம் தவறான முறையில் செய்யப்பட்டது தெரிய வந்தது. 

விசாரணை அறிக்கையில் ஆய்வுக்குப் பிறகு, சுப்ரமணியம் தனது பதவியை ராஜினாமா செய்ய வேண்டும் என முடிவு செய்யப்பட்டது. அடுத்த ஒரு மணி நேரத்தில் சுப்ரமணியம் ராஜினாமா செய்தார்.

---------------------------------------------------------------------------

வியாழன், 24 பிப்ரவரி, 2022

3 வது உலகப் போர்?

 உக்ரைன் மீது போரை அறிவித்த ரஷ்ய அதிபர் விளாதிமிர் புதின் உலக நாடுகளை பெரும்பீதியில் ஆழ்த்தியுள்ளார்.

RussiaUkraine crisis: Tanks, soldiers fighter jets

3-வது உலகப்போரை  உலகம் தாங்காது என்ற ரீதியில் இருநாடுகளுக்கும் இடையே ராஜாங்கரீதியில் பேச்சு நடத்த உலகநாடுகள் அறிவுறுத்தின. 

ஆனால், யாரும் எதிர்பாராமல் இருக்கையில் போரை புதின் அறிவித்துள்ளார். உக்ரைனுக்கு ஆதரவாக அமெரிக்கா, நேட்டோ படைகள் களமிறங்கினால், விளைவு மிக மோசமானதாகஇருக்கும் என்பதில் மறுப்பதற்கில்லை. 

RussiaUkraine crisis: Tanks, soldiers fighter jets

முன்னாள் சோவியத்யூனியன் நாட்டில் ஒருஅங்கமாகத்தான் உக்ரைன் இருந்தாலும், சோவியத் சிதறுண்டபின் தனிநாடாக உதயமானது. 

இருப்பினும், உக்ரைனை ரஷ்யா தனது ஆளுகைக்குள் உட்படுத்தவே முயற்சி செய்துவந்தது என்பது கடந்த கால வரலாற்றில் தெரியவருகிறது. 
படை பலம், வீரர்கள் எண்ணிக்கை, விமானங்கள், கப்பல், ஆயுதங்கள் என அனைத்திலும் ரஷ்யா வல்லரசு என்பதை நிரூபித்தாலும், உக்ரைனுடன் மோதும்போது சேதம் ஏற்படாமல் இருக்காது. 

ரஷ்யாவுக்கு ஈடுகொடுக்கும் வகையில் உக்ரைன் நாடும் ஆயுதங்கள், வீரர்கள், விமானங்களை வைத்துள்ளனர். 

உலக நாடுகளின் ராணுவ வல்லமையை மதிப்பிடும் 'குளோபல் ஃபயர் பவர்' எனும் இணையதளம் மற்றும் இன்டர்நேஷனல் இன்ஸ்டிடியூட் ஃபார் ஸ்ட்ரேட்டஜிக் ஸ்டடீஸ் ஆகிய நிறுவனங்களின் அறிக்கையில் இரு நாடுகளின் படை பலம் தெரிவிக்கப்பட்டுள்ளது.

RussiaUkraine crisis: Tanks, soldiers fighter jets

தரைப்படை

தரைப்படையைப் பொறுத்தவரை உக்ரைன் நாட்டைவிட 5மடங்கு வீரர்களை ரஷ்யா வைத்திருக்கிறது. உக்ரைனிடம் 2 லட்சம் ராணுவ வீரர்கள் இருந்தால், ரஷ்யாவிடம் ஏறக்குறைய 10 லட்சம் ராணுவ வீரர்கள்  பணியில் உள்ளனர். 

இரு நாடுகளிடமும் 2.50 லட்சம் ராணுவ வீரர்கள் ரிசர்வில் வைக்கப்பட்டுள்ளனர். உக்ரைனிடம் 50ஆயிரம்துணை ராணுவத்தினர் இருக்கையில் ரஷ்யாவிடம் 2.50 லட்சம் பேர் உள்ளனர்

RussiaUkraine crisis: Tanks, soldiers fighter jets

டாங்கிகள்

ரஷ்யாவிடம் 12,240 டாங்கிகள் உள்ளன,ஆனால், உக்ரைனிடம் 2,596 டாங்கிகள்தான் உள்ளன. கவசவாகங்கள் 30ஆயிரத்துக்கும் மேல் ரஷ்யாவிடம் இருக்கிறது. ஆனால் உக்ரைனிடம் 12,303 மட்டுமே இருக்கிறது.

 ரஷ்யாவிடம் எஸ்பிஏ ஆயுதம் 6,574 உள்ளன, உக்ரைனிடம் 7,571 மட்டும இருக்கிறது. டாவ்டு ஆர்டிகல் பொறுத்தவரை ரஷ்யாவிடம் 1,607ம் உக்ரைனியம் 2ஆயிரத்துக்கும் அதிகமாக உள்ளன.

RussiaUkraine crisis: Tanks, soldiers fighter jets

இது தவிர ரஷ்யாவிடம் கொத்துக் குண்டுகள், ராக்கெட்டுகள், நவீன ஏவுகனைகள், மோசமான சேதத்தை ஏற்படுத்தும் குண்டுகள், போர்விமானங்களை துரத்தி அழிக்கும் ஏவுகணைகள், வானில் இடைமறித்து அழிக்கும் ஏவுகணை என பல்வேறு நவீன மரண ஆயுதங்கள் உள்ளன.

விமானப்படை
விமானப்படையைப் பொறுத்தவரை ரஷ்யா ஜாம்பவான். 4,178 பல்வேறு வகையான நவீன போர்விமானங்களை ரஷ்யா வைத்துள்ளது. உக்ரைனிடம் 318 விமானங்கள் மட்டும் இருக்கின்றன.

772 ஜெட்போர் விமானங்கள் ரஷ்யாவிடம் இருக்கின்றன, உக்ரைனிடம் 69 மட்டுமேஇருக்கிறது. 544 தாக்குதல் ஹெலிகாப்டர்கள் ரஷ்யாவிடம் உள்ளநிலையில் 34 மட்டுமே உக்ரைனிடம் இருக்கிறது

RussiaUkraine crisis: Tanks, soldiers fighter jets

கப்பற்படை
ரஷ்யாவிடம் 605 பல்வேறு விதமான போர்க்கப்பல்கள் உள்ளநிலையில் உக்ரைனிடம் 38 மட்டுமே உள்ளன. ரஷ்யாவிடம் ஒரு விமானம் தாங்கி கப்பலும், 15 போர் கப்பல்களும், 70 நீர்மூழ்கிகப்பல்களும் உள்ளன.

 உக்ரைனிடம் ஒரு போர் கப்பல் மட்டுமே இருக்கிறது. சிறிய ரக போர்க்கப்பல்கள் ரஷ்யாவிடம் 11 இருக்கிறது, உக்ரைனிடம் 86 உள்ளன.

இருப்பினும் உக்ரைனுக்கு ஆதரவாக அமெரிக்கா  ஆயுதங்களையும்,தனது படைவீரர்களை லட்சக்கணக்கிலும் அனுப்பிக்கொண்டுள்ளது.

--------------------------------------------------------------------------


"நேட்டோ" ஒப்பந்தம்?

நேட்டோ என்பது வடக்கு அட்லான்டிக் ஒப்பந்த அமைப்பு. அமெரிக்கா, கனடா, பிரிட்டன், பிரான்ஸ் உள்பட 12 நாடுகள் சேர்ந்து 1949இல் இந்த ராணுவ கூட்டு அமைப்பை உருவாக்கின.

இதில் உறுப்பினராக உள்ள எந்தவொரு நாடு மீது ஆயுத தாக்குதல் நடந்தால், அந்த நாட்டைக் காக்க மற்ற உறுப்பு நாடுகள் ஓரணியாக சேர இணங்க வேண்டும்.

ஐரோப்பாவில் பனிப்போர் காலத்துக்குப் பிந்தைய ரஷ்ய விரிவாக்க அச்சுறுத்தலை எதிர்கொள்ளும் நோக்கத்தையே இந்த அமைப்பு குறிக்கோளாகக் கொண்டிருந்தது.

1955இல் நேட்டோ கூட்டுப்படைக்கு எதிர்வினையாற்றும் வகையில் கிழக்கு ஐரோப்பிய கம்யூனிஸ்ட் நாடுகள் கூட்டணியுடன் ரஷ்யா வார்சா ஒப்பந்தத்தை ஏற்படுத்தி தனியாக ராணுவ கூட்டணியை அமைத்தது.

வார்சா ஒப்பந்தத்தின்படி இணைந்த நேச நாடுகளில் பல 1991இல் சோவித் யூனியன் பிளவுபட்ட பிறகு ஒப்பந்தத்தில் இருந்து விலகி நேட்டோவில் உறுப்பினர்களாயின. இப்போது நேட்டோ அமைப்பில் 30 உறுப்பு நாடுகள் உள்ளன.

ரஷ்யா மற்றும் ஐரோப்பிய ஒன்றியத்தின் எல்லைகளில் அமைந்துள்ள முன்னாள் சோவியத் குடியரசின் அங்கமாக இருந்ததுதான் யுக்ரேன்.

அந்த நாடு இதுவரை நேட்டோவில் உறுப்பினர் ஆகவில்லை. ஆனாலும், அது நேட்டோ நேச நாடாக விளங்கி வருகிறது. அப்படியென்றால், எதிர்காலத்தில் எப்போதாவது ஒரு கட்டத்தில் நேட்டோ அமைப்பில் உறுப்பினராக சேர யுக்ரேன் அனுமதிக்கப்படலாம் என கருதலாம்.

ஆனால், அப்படியொன்று நடக்கவே கூடாது என்ற உத்தரவாதத்தை மேற்கு நாடுகள் தர வேண்டும் என்று ரஷ்யா விரும்புகிறது.

எனினும், நேட்டோவுடன் யுக்ரேன் நட்பு பாராட்டுவதற்கு தடை விதிக்க அமெரிக்காவும் அதன் நேச நாடுகளும் மறுத்து வருகின்றன. தமது பாதுகாப்பு கூட்டாளிகளை சுயமாக தேர்வு செய்யும் சுதந்திரம் இறையாண்மை மிக்க நாட்டுக்கு இருக்க வேண்டும் என்று அந்த நாடுகள் கூறி வருகின்றன.

மேற்கு நாடுகளின் ராணுவ கூட்டணியில் இணையும் தமது இலக்கில் 'வளைந்து கொடுத்துப் போகவே' யுக்ரேன் விரும்புவதாக பிரிட்டனுக்கான யுக்ரேனிய தூதர் வாடிம் ப்ரிஸ்டெய்க் சமீபத்தில் கூறினார்.

ஆனால், அவரது கருத்துடன் முரண்பட்ட யுக்ரேன் அதிபர் வொலோடிமிர் ஸெலென்ஸ்கியின் செய்தித்தொடர்பாளர், யுக்ரேனிய அரசியலமைப்பில் குறிப்பிட்டுள்ளபடி நேட்டோ மற்றும் ஐரோப்பிய ஒன்றியத்தில் சேரும் தமது ஆர்வத்தில் தங்கள் நாடு உறுதியுடன் இருப்பதாக தெரிவித்தார்.

யுக்ரேனில் ரஷ்யாவுடன் நெருங்கிய சமூக மற்றும் கலசாார தொடர்புகளைக் கொண்டுள்ள மிகப்பெரிய இனவாத ரஷ்ய மக்கள்தொகை உள்ளது. கேந்திர ரீதியாக இந்த வாய்ப்பை அந்நாட்டுக்குள் நுழையும் பின்வாசல் வழியாகப் பார்க்கிறது. யுக்ரேனியர்களும், ரஷ்யர்களும் ஒரே மக்கள் என்று எழுதுகிறார் விளாதிமிர் புதின்.

ரஷ்யா நேட்டோ

மேற்கத்திய சக்திகள் ரஷ்யா மீது அத்துமீறி நுழைவதற்கு நேட்டோ அமைப்பைப் பயன்படுத்துவதாக அதிபர் புதின் கூறுகிறார். மேலும், கிழக்கு ஐரோப்பாவில் நேட்டோ தனது ராணுவ செயல்பாடுகளை நிறுத்த வேண்டும் என்றும் அவர் விரும்புகிறார்.

நேட்டோ கிழக்கு நோக்கி விரிவடையாது என்று 1990இல் அளித்த உத்தரவாதத்தை அமெரிக்கா மீறி விட்டதாக அதிபர் புதின் நீண்ட காலமாக வாதிட்டார்.

ஆனால், ரஷ்யாவின் கூற்றுகளை நிராகரிக்கும் நேட்டோ அமைப்பு, ரஷ்யாவுடனான எல்லையை பகிரும் தமது உறுப்பு நாடுகளின் எண்ணிக்கை வெகு குறைவு என்றும் அவற்றுடனான தமது கூட்டணி தற்காப்பு அடிப்படையிலானது என்றும் தெரிவித்துள்ளது.

map

2014ஆம் ஆண்டின் தொடக்கத்தில் யுக்ரேனியர்கள் தங்கள் 'ரஷ்ய ஆதரவு' அதிபரை பதவியில் இருந்து அகற்றியபோது, யுக்ரேனின் தெற்கு கிரைமிய தீபகற்பத்தை தன்னுடன் ரஷ்யா இணைத்துக் கொண்டது. கிழக்கு யுக்ரேனின் பெரும் பகுதிகளைக் கைப்பற்றிய தமது ஆதரவு பிரிவினைவாதிகளையும் ரஷ்யா ஆதரித்தது.

அந்த விவகாரத்தில் நேட்டோ தலையிடவில்லை. ஆனால் பல கிழக்கு ஐரோப்பிய நாடுகளில் நேட்டோ அதன் படைகளை முதல் முறையாக நிலைநிறுத்தி எதிர்வினையாற்றியது. இந்த படைகள் நேட்டோவின் பிராந்தியத்தை ரஷ்யா ஆக்கிரமிக்க முனைந்தால், அந்த நிலைமையை செயலிழக்கச் செய்யும் வகையில் இந்த நேசப் படைகளின் தன்மை வடிவமைக்கப்பட்டுள்ளன.

நேட்டோ ரஷ்யா

பட மூலாதாரம்

படக்குறிப்பு,


பன்னாட்டு போர்த்தளவாட துருப்புகள் அடங்கிய நான்கு படையணிகளை எஸ்டோனியா, லாத்வியா, லிதுவேனியா, போலாந்து ஆகியவற்றில் நேட்டோ கொண்டிருக்கிறது.

உறுப்பு நாடுகளின் வான் எல்லைக்குள் ரஷ்ய போர் விமானம் ஊடுருவினால் அதை தடுக்கும் வகையில் வான் கண்காணிப்பையும் பால்டிக் நாடுகள் மற்றும் கிழக்கு ஐரோப்பாவில் நேட்டோ விரிவுபடுத்தியுள்ளது.

இந்த படைகள் வெளியேற்றப்பட வேண்டும் என்று ரஷ்யா விரும்புகிறது.

நேட்டோவின் கிழக்கு எல்லைகளை வலுப்படுத்த அமெரிக்கா கிட்டத்தட்ட 3,000 கூடுதல் துருப்புக்களை போலந்து மற்றும் ருமேனியாவுக்கு அனுப்பியுள்ளது. மேலும் போரை எதிர்கொள்ளும் 8,500 துருப்புக்களையும் தயார் நிலையில் வைத்துள்ளது. எனினும், யுக்ரேனுக்குள் அவற்றை அனுப்பும் திட்டத்தை இன்னும் நேட்டோ கொண்டிருக்கவில்லை.

இதேவேளை, யுக்ரேனுக்கு ஜாவெலின் பீரங்கி எதிர்ப்பு ஏவுகணைகள், ஸ்டிங்கர் விமான எதிர்ப்பு ஏவுகணைகள் உட்பட 200 மில்லியன் பவுண்டுகள் மதிப்புள்ள ஆயுதங்களை நேட்டோ அனுப்பியுள்ளது. இது தவிர, அமெரிக்க தயாரிப்பு ஆயுதங்களை யுக்ரேனுக்கு பிற நேட்டோ நாடுகள் அனுப்பவும் அனுமதித்துள்ளது.

யுக்ரேனுக்கு குறுகிய தூர இலக்கை தாக்கும் திறன் கொண்ட 2,000 பீரங்கி எதிர்ப்பு ஏவுகணைகளை பிரிட்டன் வழங்கியுள்ளது. மேலும் போலந்திற்கு கூடுதலாக 350 துருப்புக்களையும், எஸ்டோனியாவுக்கு 900 கூடுதல் துருப்புக்களை அனுப்பி தமது பலத்தை இரட்டிப்பாக்கியிருக்கிறது பிரிட்டன்.

Turkish fighter jets on patrol for Nato over Poland

பட மூலாதாரம்,

படக்குறிப்பு,

கிழக்கு ஐரோப்பாவில் தனது ராணுவ பாதுகாப்பை நேட்டோ முடுக்கிவிட்டுள்ளது

இது தவிர, தெற்கு ஐரோப்பாவுக்கு பிரிட்டன் விமானப்படையின் மேலதிக போர் விமானங்களையும் கிழக்கு மத்திய தரைக்கடலில் உள்ள நேட்டோ போர்க்கப்பல்களுக்கு உதவியாக கடற்படை கண்காணிப்பு கப்பல்களையும் பிரிட்டன் அனுப்பியிருக்கிறது.

யுக்ரேனில் ரஷ்ய படையெடுப்பால் மனிதாபிமான நெருக்கடி ஏற்பட்டால், ஆயத்த நிலையில் இருக்குமாறும் 1,000 துருப்புக்களுக்கு பிரிட்டன் உத்தரவிட்டுள்ளது.

டென்மார்க், ஸ்பெயின், பிரான்ஸ் மற்றும் நெதர்லாந்தும், கிழக்கு ஐரோப்பா மற்றும் கிழக்கு மத்தியதரைக் கடலுக்கு போர் விமானங்கள் மற்றும் போர்க்கப்பல்களை அனுப்பியுள்ளன.

ருமேனியாவில் நேட்டோ போர்க் குழுவை வழிநடத்துவதற்காக அங்கு தமது படைகளை அனுப்ப பிரான்ஸ் திட்டமிட்டுள்ளது. 

----------------------------------------------------------------------------