முதல்வர் நாற்காலியில் ஒருக்கால்.?
தஞ்சாவூர் மாவட்டம் பட்டுக்கோட்டை அருகே உள்ள செங்கப்படுத்தான் என்ற கிராமம் தான் பட்டுக்கோட்டை கல்யாண சுந்தரத்தின் பூர்விகமாகும்.
விவசாய குடும்பத்தை சேர்ந்தவர் என்பதால் கலப்பையை தூக்கிக் கொண்டு கழனிக்கு சென்ற இவர் கூடவே கவிதைகளையும் புனையத் தொடங்கினார்.
பிற்காலத்தில் பாமரர்களின் பாட்டுடைத் தலைவனாக மிளிர தொடங்கினார். மாடு மேய்த்தது, முறுக்கு விற்றது, உப்பளத்தில் வேலை செய்தது, என தனது 19 வயது வரை பட்டுக்கோட்டை கல்யாணம் சுந்தரம் பார்க்காத வேலைகளே இல்லை என்று சொல்லிவிடலாம்.
இதன் மூலம் பாட்டாளி வர்க்கத்தின் கஷ்ட நஷ்டங்களை கண்கூடாக பார்த்து வளர்ந்து அதனை பாடமாக பயின்ற பட்டுக்கோட்டையார், 19 வயதில் பாட்டெழுத தொடங்குகிறார்.
பொதுவுடைமை சித்தாந்தத்தில் ஆழ்ந்த பற்றுமிக்கவராக திகழும் இவர், உழைக்கும் வர்க்கத்தின் உரிமைக் குரலாக பாடல் வரிகளில் புரட்சியை நிகழ்த்தினார்.
கம்யூனிஸ்ட் கட்சி உறுப்பினருமானார்.
திரைப்படங்களில் பாடல் எழுதும் வாய்ப்பை பெறுவதற்காக சென்னைக்கு வரும் இவர் வாய்ப்புக்காக ஆரம்பக்காலத்தில் அலையாய் அலைந்தார்.
பாசவலை திரைப்படத்தில் பாட்டெழுத இளைஞனான பட்டுக்கோட்டை கல்யாணசுந்தரத்துக்கு வாய்ப்பு தரப்படுகிறது. எம்.எஸ்.விஸ்வநாதன் மிகுந்த சந்தேகத்துடன் பட்டுக்கோட்டை கல்யாணசுந்தரத்தை சந்தித்தோடு, இந்தப் பையனுக்கு சரியாக பாட்டெழுத வருமா, டியூன் கம்போஸ் ஆகுமா என்றெல்லாம் எம்.எஸ்.வி. தயங்கியிருக்கிறார்.
''குட்டி ஆடு தப்பி வந்தால் குள்ள நரிக்கு சொந்தம்; குள்ளநரி மாட்டிக்கிட்ட குறவனுக்கு சொந்தம்'' என ஆன் தி ஸ்பாட்டில் பட்டுக்கோட்டை கல்யாண சுந்தரம் எழுதிக் கொடுத்த பாடல் பல்லவியை கண்டு எம்.எஸ்.விஸ்வநாதன் வியந்துபோய் பட்டுக்கோட்டையார் கரங்களை பற்றி வாழ்த்தியிருக்கிறார்.
அவர் வாழ்த்து பொய்யாகவில்லை, அதன் பிறகு திரையுலகில் விறுவிறுவென உச்சம் தொடுகிறார் பட்டுக்கோட்டை கல்யாணசுந்தரம்.
இவர் குறித்து சில ஆண்டுகளுக்கு முன்னர் இவரது மனைவி அளித்த பேட்டி ஒன்றில், தானும் தனது கணவர் பட்டுக்கோட்டையாரும் சென்னை ராயப்பேட்டையில் வசித்தபோது, போட்டி போட்டுக் கொண்டு தனது கணவரை பாட்டெழுதுவதற்காக அழைத்துச் செல்ல வீடு தேடி கார்கள் வரும் என்கிறார்.
எந்த சினிமா தயாரிப்பு நிறுவனத்தின் வாகனம் முதலில் வருகிறதோ அதில் ஏறி பட்டுக்கோட்டை கல்யாணசுந்தரம் சென்றுவிடுவார் என்றும் தாமதமாக கார் அனுப்பும் நிறுவனங்களுக்கு ஏமாற்றமே மிஞ்சும் எனவும் தெரிவித்துள்ளார். பட்டுக்கோட்டையார் மனைவி கவுரவாம்பாள்.
மேலும் தனது கணவர் பட்டுக்கோட்டை கல்யாண சுந்தரத்துக்கு ராயப்பேட்டை பொன்னுச்சாமி கடை சோறு என்றால் மிகவும் பிடிக்கும் எனவும் அவர் கூறியுள்ளார்.
சின்னப் பயலே சின்னப் பயலே சேதி கேளடா, மனிதன் பிறக்கும் போது பிறந்த குணம் போக போக மாறுது, கையிலே வாங்கினேன் பையில போடலை காசு போன இடம் தெரியல, திருடாதே பாப்பா திருடாதே, என பட்டுக்கோட்டையார் கைவண்ணத்தில் உருவான பாடல்களை பற்றி சொன்னால் சொல்லிக்கொண்டே போகலாம். அந்தளவுக்கு ஆழமான சிந்தனையும், கருத்துச்செறிவும் மிக்கவையாக இருக்கும்.
சினிமாவில் இவர் பாட்டெழுதியது 10 ஆண்டுகள் மட்டுமே என்றாலும், இன்னும் நூறாண்டுகள் கடந்தாலும் இவர் எழுதிய பாடல்கள் அவர் புகழ் பாடும்.
நடிகர் எம்.ஜி.ஆர் க்கு இவர் எழுதிய பாடல்கள் மூலம் மக்கள் மனதில் தனி உயரம் கிடைத்தது.தமிழ்நாடு முதலமைச்சராக அவர் பதவியேற்றம போது இந்த முதல்வர் நாற்காலியில் பட்டுக்கோட்டையார் பாடல்கள் ஒரு கால் என்று கூறியதே கல்யானசந்தரத்தின் பாடல் வலிமை,எளிமை,மக்களிடம் அவை ஏற்படுத்திய தாக்கத்தையும் நன்கு தெளிவு படுத்தும்.
தனது 29வது வயதில்(08.10.1959) பட்டுக்கோட்டை கல்யாண சுந்தரம் இவ்வுலகை விட்டு பிரிந்தாலும் இன்றும் என்றும் தனது பாடல்களால் வாழ்வார்!,.....
வாழ்ந்து கொண்டிருக்கிறார்!!......
வாழ்ந்து கொண்டிருப்பார்.!!!
ஊடகங்களுக்கு விடப்பட்டுள்ள
மிரட்டல்
சி.பி.ஐ. – வருமானவரித் துறை – அமலாக்கத் துறை ஆகியவற்றை வைத்து எதிர்க்கட்சிகளை மிரட்டும் ஒன்றிய பா.ஜ.க. அரசு - அடுத்து ஊடகங்களையும் மிரட்டி வருகிறது. ‘நியூஸ் கிளிக்’ முதன்மை ஆசிரியர் பிரபீர் புர்காயஸ்தாவும், அதன் மனிதவளப் பிரிவின் தலைவர் அமித் சக்ரவர்த்தியும் கைது செய்யப்பட்டுள்ளார்கள்.
பிரபீர் புர்காயஸ்தா - அவசர நிலைக்காலத்தில் ( 1975) 18 மாதங்கள் சிறையில் இருந்த போராளி ஆவார். இடதுசாரிச் சிந்தனை கொண்டவர். அமித் சக்ரவர்த்தி – ஒரு மாற்றுத்திறனாளி.
இவர்கள் இருவரும்தான் கைது செய்யப்பட்டுள்ளார்கள்.டெல்லியில் உள்ள நியூஸ் கிளிக் இணையதள செய்தி நிறுவன அலுவலகத்தில் தீவிர சோதனை நடத்தி பூட்டி சீல் வைத்த டெல்லி காவல்துறையினர், இந்த கைது நடவடிக்கையையும் தொடர்ந்துள்ளனர்.
என்ன குற்றச்சாட்டு அடிப்படையில் இந்த நடவடிக்கையைச் செய்துள்ளார்கள் தெரியுமா?
அமெரிக்க நாளிதழான ‘நியூயார்க் டைம்ஸ்’ ஒரு செய்தியை வெளியிடுகிறது. அதில், ‘நியூஸ் கிளிக் நிறுவனம், சீனாவிட மிருந்து நிதி பெறுகிறது’ என்று குற்றச்சாட்டு சொல்லி இருந்தார்களாம். இதை வைத்து இந்த கைது நடவடிக்கையாம்!
நியூஸ் கிளிக் ஊடக நிறுவனம் வெளியிட்டுள்ள அறிக்கையில், “எங்களது இணையதளம் சுதந்திரமானது. சீன நிறுவனங்களிடம் இருந்து நிதி பெற்றுக் கொண்டு செய்திகளை வெளியிட்டதாகக் கூறப்படும் புகார்களுக்கு எந்த அடிப்படையும் இல்லை.
சீனாவுக்காக பிரச்சாரம் செய்யும் எந்த செய்தியும் எங்கள் இணையதளத்தில் வெளியிடப்பட வில்லை.
2021ஆம் ஆண்டு முதல் நியூஸ் க்ளிக் நிறுவனத்தின் வங்கிக் கணக்குகள், வரவு – செலவுகள், வெளிநாட்டுத் தொடர்புகள் குறித்து ஒன்றிய அரசின் பல்வேறு விசாரணை அமைப்புகள் ஆய்வு நடத்தி உள்ளன.
இந்த ஆய்வுகளில் எந்த முறைகேடுகளும் கண்டுபிடிக்கப்படவில்லை.
நியூயார்க் டைம்ஸ் பத்திரிகையில் உள்நோக்கத்துடன் வெளியான கட்டுரையை மட்டும் அடிப்படையாகக் கொண்டு, எந்த ஆதாரமும் இல்லாமல் ‘உபா’ போன்ற கடுமையான சட்டங்களின் கீழ் எப்படி வழக்குப் பதிவு செய்ய முடியும்?” என நியூஸ் கிளிக் கேள்வி எழுப்பியுள்ளது.
“சீன நிறுவனங்களிடம் இருந்து பெருமளவில் நிதி பெற்ற ‘பி.எம்.கேர்ஸ்’ ஐ நிர்வகிப்பவர் மீது ஏன் ஒரு நடவடிக்கையும் இல்லை?” என உச்சநீதிமன்ற வழக்கறிஞர் பிரசாந்த் பூஷன் கேள்வி எழுப்பியுள்ளார்.
“சீனாக்காரர் ஒருவரிடமிருந்து கொஞ்சம் நிதி வந்த ஒரே காரணத்துக்காக, நியூஸ் க்ளிக் மீது தேசத் துரோக வழக்கு. அந்த நிறுவனத்தோடு தொடர்பு கொண்டவர்களின் வீடுகளில் ரெய்டு, அவர்களின் செல்பேசிகளும் லேப்டாப்களும் பறிமுதல்.
2021 ஆம் ஆண்டு இந்த நிறுவனத்தில் அமலாக்கத்துறை சோதனை நடத்தியது. இதன் முதன்மை ஆசிரியர் பிரபீருக்குச் சொந்தமான வீட்டை முடக்கியது. அவரது நிரந்தர வைப்புத் தொகையை முடக்கியது.
பெரிதாக ஆதாரம் இல்லாததால், நியூஸ் கிளிக் மற்றும் அதன் உரிமையாளர் மீது எந்தவிதமான நடவடிக்கையும் எடுக்கக்கூடாது என உச்சநீதிமன்றம் உத்தரவிட்டது.
இதன் தொடர்ச்சியாக இந்த இணைய ஊடகத்தைக் குற்றம் சாட்டி ஒன்றிய அமைச்சரே நாடாளு மன்றத்தில் பேசினார்.
இதைத் தொடர்ந்து கடந்த அக்டோபர் 3 அன்று சோதனை நடத்தி கைதும் செய்து விட்டார்கள். ‘நியூஸ் கிளிக்’ ஊடக ஊழியர்கள் அனைவரும் விசாரணைக்கு உள்ளாக்கப்பட்டு இருக்கிறார்கள்.
மூத்த பத்திரிகையாளர் ஊர்மிளேஷ், விசாரணைக்கு அழைத்துச் செல்லப்பட்டுள்ளார். ராஜ்யசபா டிவியின் முன்னாள் ஆசிரியர் இவர்.
‘நியூஸ் கிளிக்’ என்பது இடதுசாரிச் சிந்தனை கொண்ட ஊடகம் ஆகும். பா.ஜ.க. அரசின் போலியான முகத்தை தொடர்ந்து அம்பலப்படுத்தி வந்துள்ளது. இதுவரை ஆங்கிலத்தில் செய்திகளை வெளியிட்டு வந்தவர்கள், சமீப காலமாக இந்தியில் செய்திகளை வெளியிடத் தொடங்கி உள்ளார்கள்.
‘இந்தி’ பேசும் மாநிலங்கள் விழிப்புணர்வு பெற்றுவிடக் கூடாது என்பதில் பா.ஜ.க. எப்போதும் தெளிவாக இருக்கும்.
அந்த மாநில மக்களை இருட்டில் வைத்து, வாக்கு வேட்டையாடும் கட்சி அது. எனவே, ‘இந்தி’யில் செய்தி வெளியிடுவதைத் தடுக்க நினைத்துள்ளார்கள்.
‘இந்தியா’ கூட்டணி சார்பில் வெளியிடப்பட்டுள்ள கூட்டறிக்கையில், “மோடி தலைமையிலான ஒன்றிய பா.ஜ.க. அரசு, கடந்த ஒன்பது ஆண்டுகளில், பிபிசி, நியூஸ் லாண்ட்ரி, டைனிக் பாஸ்கர், பாரத் சமாச்சார், காஷ்மீர் வாலா, தி வயர் போன்ற ஊடகங்களை ஒடுக்க புலனாய்வு அமைப்புகளைப் பயன்படுத்தியது.
தற்போது நியூஸ் கிளிக் செய்தி நிறுவனத்தை ஒன்றிய அரசு குறிவைத்துள்ளது. மோடி அரசு ஊடக நிறுவனங்களைக் கையகப்படுத்துவதன் மூலம் தங்கள் கட்சியின் கருத்தியலுக்கு ஊடகங்களை ஊதுகுழலாக மாற்ற முயற்சிக்கிறது.” என்று பகிரங்கமாகக் குற்றம் சாட்டி உள்ளார்கள்.
‘அழுத்தத்துடன் பணிபுரிகிறோம்’ –- என்று உச்சநீதிமன்ற தலைமை நீதிபதிக்கு, டிஜிபப் நியூஸ் இந்தியா ஃப்வுண்டேஷன் (Digipub News India Foundation), இந்தியன் வுமன்ஸ் பிரஸ் கார்ப்ஸ் (Indian Women’s Press Corps), பிரஸ் கிளப் ஆஃப் இந்தியா (Press Club of India) உள்ளிட்ட பல்வேறு அமைப்புகள் இணைந்து கடிதத்தை எழுதியுள்ளன.
“சட்டவிரோதச் செயல்கள் தடுப்புச் சட்டத்தின் கீழ் வழக்குப்பதிவு செய்ய, பத்திரிகைப் பணி ஒன்றும் தீவிரவாதப் பணி அல்ல. எனவே, பத்திரிகைத்துறைக்கு ஏற்பட்டிருக்கும் அச்சுறுத்தல்களை உச்சநீதிமன்றம் தலையிட்டு தடுக்க வேண்டும்” என அவை வலியுறுத்தி உள்ளன.
“மக்களுக்கு நன்மைகள் எதுவும் செய்ய மாட்டோம், இதை யாராவது குறை சொன்னால் அவர்களை விடவும் மாட்டோம்” -– இதுதான் பா.ஜ.க. பாணி ஆட்சி முறையாகும்.
ஒவ்வொரு வினைக்கும் எதிர்வினை இயற்கை உண்டாக்கும்.இதற்கும் உண்டு.
இவை அனைத்துக்குமான தண்டனையை மக்கள் நிச்சயம் தருவார்கள்.
