எது அவமானம்?
தரையிறங்கிய விமானம்
துபாயில் இருந்து 303 இந்தியர்களுடன் நிகரகுவா நாட்டுக்கு சென்ற விமானம் பிரான்ஸில் தரையிறங்கிய சம்பவத்தில் அதிர்ச்சித் தகவல்கள் வெளியாகி உள்ளன!
துபாயில் இருந்து தனியார் விமானத்தை பிரத்யேகமாக வாடகைக்கு அமர்த்தி நிகரகுவா சென்று, அங்கிருந்து சட்டவிரோதமாக அமெரிக்கா, கனடா செல்ல திட்டமிட்டுள்ளனர். அவர்களை தடுத்து போலீஸ் விசாரணை நடத்தி வருகின்றனர்.
விமானத்தில் பயணித்த இந்தியர்களில் சிலர் தமிழ் பேசுவதாக விசாரணையில் தகவல் வெளியாகி உள்ளது. அவர்கள் தமிழ்நாட்டைச் சேர்ந்தவர்களா? அல்லது இலங்கையை சேர்ந்தவர்களா என தொடர்ந்து விசாரணை நடக்கிறது!
பெரும்பாலானோர் இந்தி உள்ளிட்ட வட மாநில மொழிகளை பேசுவதாக விசாரணையில் தகவல் வெளியாகியுள்ளது. 303 பேரில் 2 பேரை கைது செய்து போலீஸ் விசாரணை!
முதற்கட்ட விசாரணையில் விமானத்தில் இருந்த பெரும்பாலான பயணிகள் இந்தியர்கள் என தெரிய வந்துள்ளது. அதிலும் குஜராத்தை சேர்ந்தவர்கள் அதிகளவில் உள்ளனர்.
ஒரே நேரத்தில் 303 பேர் ஒரே விமானத்தில் வந்ததன் நோக்கம் என்ன? என்பது குறித்து விசாரணை நடைபெற்று வருகிறது!
தெற்கு காசாவில் போர் தீவிரம் இஸ்ரேல் வீரர்கள் 14 பேர் 2 நாளில் பலி.
கொரோனா பரவல் அதிகரிப்பு கண்காணிப்பை தீவிரப்படுத்த வேண்டும்: உலக சுகாதார அமைப்பு வேண்டுகோள்.
8 ஆண்டுகளில் இயற்கை பேரிடர்களின் போது சீரமைப்பு நிவாரணத்திற்கு சீரமைப்பு நிவாரணத்திற்கு 4.61% மட்டுமே வழங்கிய பா.ஜ.க, ஒன்றிய அரசு.கார்பரூட்களுக்கி வங்கிக் கடன்2.5 லட்சம் கோடிகள் தள்ளுபடி செய்துள்ளது.
செங்கடலில் இந்தியாவுக்கு வந்த மேலும் ஒரு கப்பல் மீது ஹவுதி படையினர் டிரோன் தாக்குதல்: 25 இந்திய மாலுமிகள் உயிர் தப்பினர்.
ஐஎன்எஸ் இம்பால் ஏவுகணை அழிப்பு கப்பல் இந்திய கடற்படையில் நாளை இணைப்பு.
தமிழ்நாட்டில், வடகிழக்கு பருவமழை வழக்கமாக டிசம்பர் மாதத்தோடு முடிவடையும் நிலையில், இந்த முறை ஜனவரி முதல் வாரம் வரை நீடிக்கும்: தனியார் வானிலை ஆய்வாளர் பிரதீப் ஜான் கணிப்பு.
பணி செய்ய விடாமல் தடுத்ததாக அமலாக்கத்துறை அதிகாரிகள் மீது மதுரை காவல்துறையினர் வழக்குப்பதிவு
வெள்ளமும் நிவாரணமும்.
தமிழகத்தில் கடந்த 8 ஆண்டுகளில் ஏற்பட்ட இயற்கை பேரிடர்களின் போது சீரமைப்பு, பாதிக்கப்பட்ட மக்களுக்கு நிவாரணத்திற்காக தமிழ்நாடு அரசு கேட்டது ரூ.1,27,655.80 கோடி.
ஆனால், கிடைத்தது வெறும் 4.61 சதவீதம், அதாவது ரூ.5,884.49 கோடி மட்டுமே என்ற பரபரப்பு தகவல்கள் வெளியாகியுள்ளது.
தமிழ்நாட்டில் சென்னையில் தொடங்கி கன்னியாகுமரி வரை கடந்த 8 ஆண்டுகளில் மழை, புயல் என்று பல்வேறு இயற்கை பேரிடர்கள் வந்து போய் உள்ளது.
ஒவ்வொரு இயற்கை பேரிடரின் போதும் பல்வேறு உயிரிழப்புகளும், பொருளாதார இழப்புகளும் ஏற்பட்டது. அவற்றை ஒன்றிய அரசு கண்டுக்கொள்ளவேயில்லை என்று தான் சொல்ல வேண்டும். அந்த அளவுக்கு ஒன்றிய அரசு தமிழகத்தின் மீது பாராமுகமாக இருந்து வருகிறது.
லட்சத்திற்கும் மேற்பட்டோர் வீடுகளை இழந்தனர். 200க்கும் அதிகமானோர் உயிரிழந்தனர். பாதிப்புகளை ஒன்றிய அரசு அதிகாரிகள் குழு பார்வையிட்டு சென்றது. அந்த வெள்ளத்தின் போது தமிழ்நாடு அரசு சார்பில் தற்காலிக நிவாரணமாக ரூ.7,959.93 கோடியும், நீண்ட கால சீரமைப்புக்காக ரூ.17,952.52 கோடி என மொத்தம் ரூ.25,912.45 கோடியை வழங்குமாறு ஒன்றிய அரசிடம் கேட்கப்பட்டது.
ஆனால், ஒன்றிய அரசு ஒதுக்கியதோ ரூ.1,737.65 கோடி. 2016-2017ல் ஏற்பட்ட பெரும் வறட்சியின் போது தமிழ்நாடு அரசு சார்பில் ரூ.39,565 கோடி கேட்கப்பட்டது. ஆனால், வெறும் 1,748.28 கோடி மட்டுமே ஒதுக்கப்பட்டது.
இதே போல 2016-2017ல் ஏற்பட்ட வர்தா புயலின் போது தற்காலிக நிவாரணமாக ரூ.1972 கோடியும், நீண்ட கால சீரமைப்புக்கு ரூ.20,600.37 கோடி என மொத்தம் ரூ.22,573.26 கோடி கேட்கப்பட்டது.
ஆனால், ஒன்றிய அரசு ஒதுக்கியது ரூ.266.17 கோடி 2017-2018ல் ஏற்பட்ட கனமழை, ஒகி புயலின் போது தமிழ்நாடு அரசு சார்பில் தற்காலிக நிவாரணமாக ரூ.876 கோடியும், நீண்ட கால சீரமைப்புக்காக ரூ.8,426 கோடி என மொத்தம் 9,302 கோடி கேட்கப்பட்டது. ஆனால், ஒன்றிய அரசு ரூ.133 கோடி மட்டுமே ஒதுக்கியது.
2018-19ல் ஏற்பட்ட கஜா புயலின் போது தற்காலிக நிவாரணமாக ரூ.2,709 கோடியும், நீண்ட கால சீரமைப்புக்காக ரூ.5,190.17 கோடி என ரூ.17,899.17 கோடி கேட்கப்பட்டது. ஆனால், ஒன்றிய அரசு ஒதுக்கியது ரூ.1,146.12 கோடி மட்டுமே. இதே போல 2020-21ல் ஏற்பட்ட நிவர் புயலின் போது தற்காலிக நிவாரணமாக ரூ.650.10 கோடியும், நீண்ட கால சீரமைப்புக்கு ரூ.3,108.55 கோடி என ரூ.3,758.65 கோடி கேட்கப்பட்டது. ஆனால், ஒதுக்கப்பட்டது ரூ.63.14 கோடி மட்டுமே.
புரவி புயலின் போது தற்காலிக நிவாரணமாக ரூ.485 கோடியும், நீண்ட கால சீரமைப்புக்காக ரூ.1029 கோடி என மொத்தம் ரூ.1,514 கோடி கேட்கப்பட்டது. ஆனால், ஒன்றிய அரசு ஒதுக்கியது ரூ.223.77 கோடி மட்டுமே.
ஜனவரியில் ஏற்பட்ட கனமழையின் போது தற்காலிக நிவாரணமாக ரூ.734.49 கோடியும், நீண்ட கால சீரமைப்புக்கு ரூ.166 கோடி என மொத்தம் ரூ.900.82 கோடி கேட்கப்பட்டது.
ஆனால், ஒன்றிய அரசு ஒதுக்கியது 213.51 கோடி மட்டுமே. இதே போல 2021-22ல் ஏற்பட்ட கன மழை மற்றும் வெள்ளத்தின் போது முதல் முன்மொழிவாக ரூ.549 கோடி தற்காலிக நிவாரணமாகவும், நீண்ட கால சீரமைப்புக்கு ரூ.2,079.66 கோடி என மொத்தம் 2629 கோடி கேட்கப்பட்டது. ஆனால், ஒன்றிய அரசு ஒதுக்கிய தொகை ரூ.352.85 கோடிதான்.
2ம் முன்மொழிவாக தற்காலிக நிவாரணத்துக்கு ரூ.521.29 கோடியும், நீண்ட கால சீரமைப்புக்கு ரூ.1475.21 கோடி என மொத்தம் ரூ.1996.50 கோடியும், 3ம் முன்மொழிவாக தற்காலிக நிவாரணமாக ரூ.439.91 கோடியும், நீண்ட கால சீரமைப்புக்கு ரூ.1,164.75 கோடி என மொத்தம் ரூ.1,604.66 கோடியும் ஒன்றிய அரசிடம் கேட்கப்பட்டது.
அதாவது, 2015 முதல் பேரிடரால் ஏற்பட்ட சேதங்களை தற்காலிகமாக மற்றும் நிரந்தரமாக சீரமைக்கவும், பாதிக்கப்பட்ட மக்களுக்கு நிவாரணம் வழங்கவும் தமிழ்நாடு அரசு கோரிய மொத்த தொகை ரூ.1,27,655.80 கோடி.
ஆனால் ஒன்றிய அரசால் ரூ.5,884.49 கோடி மட்டுமே விடுவிக்கப்பட்டுள்ளது.
இந்த மாநில பேரிடர் நிவாரண நிதியின் கீழ் நிர்ணயிக்கப்பட்ட தொகையில் 75% ஒன்றிய அரசு இரண்டு தவணைகளில் வழங்குகிறது. ஒன்றிய அரசிடமிருந்து மாநில பேரிடர் நிவாரண நிதியின் 75% பங்கு வரப்பெற்ற உடன், மாநில அரசு தனது பங்கான 25%-ஐ சேர்த்து, மாநில பேரிடர் நிவாரண நிதிக்கு ஒதுக்கீடு செய்கிறது.
மாநிலங்களில் ஏற்படும் பேரிடர்களினால் ஆன சேதங்களை சீரமைக்க மாநில பேரிடர் நிவாரண நிதி போதுமானதாக இல்லாத நிலையில், தேசிய பேரிடர் நிவாரண நிதியிலிருந்து (NDRF) நிதி ஒதுக்கீடு செய்ய ஒன்றிய அரசுக்கு மாநில அரசால் கோரிக்கை அளிக்கப்படுகிறது.
இந்தக் கோரிக்கையின் அடிப்படையில், ஒன்றிய அரசு, மாநில அரசுக்கு தேசிய பேரிடர் நிவாரண நிதியிலிருந்து (NDRF) நிதி ஒதுக்கீடு செய்கிறது.
அவ்வாறு தேசிய பேரிடர் நிவாரண நிதியிலிருந்து (NDRF) மாநில அரசுக்கு ஒதுக்கீடு செய்யப்படும் தொகை முழுவதும் ஒன்றிய அரசை சார்ந்தது ஆகும்.
இதில் மாநில அரசின் பங்கு ஏதும் இல்லை. ஆனால், சென்னையில் ஏற்பட்ட பெருவெள்ளத்தையும், தற்போது தென்மாவட்டங்களில் ஏற்பட்டுள்ள வரலாறு காணாத வெள்ளத்தையும் இவ்வாறு கடும் பேரிடர்களாக அறிவித்து NDRFல் இருந்து கூடுதல் நிதி ஒதுக்க வேண்டும் என தமிழ்நாடு முதல்வர் மு.க.ஸ்டாலின் கோரிக்கை விடுத்து இருந்தார்.
பிரதமர் மோடியை சந்தித்த போதும் இதை வலியுறுத்தி மனுவாகவும் கொடுத்திருந்தார்.
ஆனால், இன்று வரை இந்த இரண்டு பேரிடர்களும் கடும் பேரிடர்களாக அறிவிக்கப்படவில்லை. NDRFல் இருந்து இதுவரை தமிழகத்திற்கு கூடுதல் நிதி எதையும் ஒன்றிய அரசு ஒதுக்கவில்லை என்பது குறிப்பிடத்தக்கது.
* 2015 முதல் பேரிடரால் ஏற்பட்ட சேதங்களை தற்காலிகமாக மற்றும் நிரந்தரமாக சீரமைக்கவும், பாதிக்கப்பட்ட மக்களுக்கு நிவாரணம் வழங்கவும் தமிழ்நாடு அரசு கோரிய மொத்த தொகை ரூ.1,27,655.80 கோடி. ஆனால் ஒன்றிய அரசால் ரூ.5,884.49 கோடி மட்டுமே விடுவிக்கப்பட்டுள்ளது. இது தமிழ்நாடு அரசு ஒன்றிய அரசிடம் கோரிய தொகையில் 4.61 விழுக்காடு மட்டுமே. இதில் இருந்து ஒன்றிய அரசு தமிழகத்தின் மீது பாராமுகமாக இருப்பது வெட்ட வெளிச்சமாகியுள்ளது.
* சென்னையில் ஏற்பட்ட பெருவெள்ளத்தையும், தற்போது தென்மாவட்டங்களில் ஏற்பட்டுள்ள வரலாறு காணாத வெள்ளத்தையும் கடும் பேரிடர்களாக அறிவித்து NDRFல் இருந்து கூடுதல் நிதி ஒதுக்க வேண்டும் என தமிழ்நாடு முதல்வர் மு.க.ஸ்டாலின் கோரிக்கை விடுத்து இருந்தார். பிரதமர் மோடியை சந்தித்த போதும் இதை வலியுறுத்தி மனுவாகவும் கொடுத்திருந்தார்.
* இன்று வரை இந்த இரண்டு பேரிடர்களும் கடும் பேரிடர்களாக அறிவிக்கப்படவில்லை. NDRFல் இருந்து இதுவரை தமிழகத்திற்கு கூடுதல் நிதி எதையும் ஒன்றிய அரசு ஒதுக்கவில்லை.
எது அவமானம்?
இந்திய நாட்டின் நாடாளுமன்றத்தில் இருந்து ஒரே நேரத்தில் 146 உறுப்பினர்களை இடைநீக்கம் செய்தது ஜனநாயகத்துக்கு அவமானம் இல்லையாம். மாநிலங்களவை சபாநாயகர் ஜெகதீப் தன்கரைப் போல மிமிக்ரி செய்து விட்டார்களாம்.
ஏதோ இந்தியாவே அவமானப்பட்டதைப் போல பிரதமரும், குடியரசுத் தலைவரும் குசலம் விசாரிப்பதும், மக்களவை சபாநாயகரும் -– மாநிலங்களவை சபாநாயகரும் சந்தித்துக் கொள்வதும் குணச்சித்திரக் காட்சிகளாக அமைந்திருக்கின்றன.
நாடாளுமன்றத்துக்குள் புகைக் குண்டு வீசப்பட்டது. இது தொடர்பாக 6 பேர் கைது செய்யப்பட்டுள்ளார்கள்.
அதுவே விஷ வாயு குண்டாக இருந்திருந்தால் பல உறுப்பினர்களின் நிலைமை என்ன ஆகி இருக்கும் என்றே கணிக்க முடியாது. இது தொடர்பாக பிரதமரோ, உள்துறை அமைச்சரோ அவைக்கு வந்து பதில் அளிக்க வேண்டும் என்பதுதான் எதிர்க்கட்சிகளின் ஒற்றைக் கோரிக்கை.
அதைக் கூட ஆளும் பா.ஜ.க. ஏற்கவில்லை. புகைக்குண்டு வீசப்பட்ட நாடாளுமன்றத்துக்கு வரவில்லை பிரதமர். பதிலளிக்கவில்லை உள்துறை அமைச்சர்.
உள்துறை அமைச்சர் விளக்கம் அளிக்க வேண்டும் என்று கேட்பது நாடாளுமன்ற உறுப்பினர்களின் ஜனநாயக உரிமை ஆகும். அதைக் கூட பயன்படுத்த மக்களவை சபாநாயகர் ஓம் பிர்லாவும், மாநிலங்களவை சபாநாயகர் ஜெகதீப் தன்கரும் அனுமதிக்கவில்லை.
தொடர்ச்சியான முழக்கத்தை எதிர்க்கட்சி உறுப்பினர்கள் எழுப்பினார்கள். எனவே, கொத்துக் கொத்தாக உறுப்பினர்களை இடை நீக்கம் செய்யத் தொடங்கினார்கள் பேரவைத் தலைவர்கள். 146 உறுப்பினர்கள் இடைநீக்கம் செய்யப்பட்டுள்ளார்கள்.
இப்படி இடை நீக்கம் செய்யப்பட்ட உறுப்பினர்களில் சிலர் நாடாளுமன்றத்தின் நுழைவாயில் படியில் அமர்ந்து ஆர்ப்பாட்டத்தில் ஈடுபட்டனர்.
அதுவும் அவர்களுக்கு வழங்கப்பட்ட ஜனநாயக உரிமை ஆகும். அப்போது திரிணாமுல் காங்கிரஸ் கட்சியைச் சேர்ந்த உறுப்பினரான கல்யாண் பானர்ஜி, துணை ஜனாதிபதியும் மாநிலங்களவை சபாநாயகருமான தன்கரைப் போல மிமிக்ரி செய்தாராம். இது தன்கர் கவனத்துக்குச் சென்றது. அவர் மாநிலங்களவையில் தனது கண்டனத்தை தெரிவித்து இருக்கிறார்.
உடனே துணை ஜனாதிபதியை தொலைபேசியில் அழைத்து பேசினாராம் பிரதமர் நரேந்திரமோடி. “பிரதமர் மோடி என்னை போனில் அழைத்து பேசினார். மாண்புமிக்க நாடாளுமன்ற உறுப்பினர்களில் சிலர் செய்த கேவலமான செயல்கள் குறித்து வேதனையை வெளிப்படுத்தினார்.
அதுவும் புனிதமான நாடாளுமன்ற வளாகத்தில் நடப்பது வருத்தம் அளிப்பதாகச் சொன்னார். 20 ஆண்டுகளாக தான் இது போன்ற அவமானங்களை அனுபவித்து வருவதாகவும் சொன்னார். துணை ஜனாதிபதிக்கே இப்படி நடக்கலாமா என்றும் சொன்னார்” என்று பதிவிட்டுள்ளார் துணை ஜனாதிபதி.
“மிமிக்ரி ஒன்றும் தடை செய்யப்பட்டதல்ல. இதன் மூலமாக உறுப்பினர்கள் சஸ்பெண்ட் செய்யப்பட்டதை திசை திருப்பப் பார்க்கிறார்கள்.
துணை ஜனாதிபதி உள்பட யாரையும் கேலி செய்யும் எண்ணம் எனக்கு இல்லை” என்று சொல்லிவிட்டார் மிமிக்ரி செய்த எம்.பி. கல்யாண் பானர்ஜி. அதன் பிறகும் இதை பெரிது ஆக்கினார்கள்.
புகைக் குண்டு வீசியவருக்கு நாடாளுமன்ற நுழைவு அனுமதிச் சீட்டுகொடுத்தவர் பா.ஜ.க. எம்.பி. அதனைத் திசை திருப்பவே இதைச் செய்கிறார்கள்.
அதிலும் குறிப்பாக 20 ஆண்டுகளாக பிரதமர் நரேந்திரமோடி என்ன அவமானங்களைச் சந்தித்து வருகிறார்?
குஜராத் படுகொலையைச் சொல்கிறாரா?
அது யாருக்கு, யாரால் இழைக்கப்பட்ட அவமானம்?
இந்திய நாட்டின் பன்முகத் தன்மைக்கும், மனித உரிமைகளுக்கும், மனசாட்சிக்கும் இழைக்கப்பட்ட துரோகத்துக்கு யார் காரணம்?
பொறுப்பேற்க வேண்டியவர் யார்?
அது என்ன அவதூறு குற்றச்சாட்டா?
அது நடக்க யார் காரணம்?
யாருடைய ஆட்சியில் நடந்தது?
யார் கொடுத்த துணிச்சலில் நடந்தது?
யார் இதுவரை தண்டிக்கப்பட்டுள்ளார்கள்?
பொத்தாம் பொதுவாக, ‘20 ஆண்டுகளாக நான் அவமானங்களைச் சந்தித்து வருகிறேன்’ என்பதன் மூலமாக பிரதமர் நரேந்திர மோடி யாரிடம் கழிவிரக்கம் தேட விரும்புகிறார்?
மக்களவையில் எழுந்து நின்று தன்கருக்கு தங்களது ஆதரவைத் தெரிவித்து இருக்கிறார்கள் பா.ஜ.க. எம்.பி.கள். இது அடுத்தடுத்து நடந்த நாடகங்கள் ஆகும்.
2018 ஆம் ஆண்டு நடந்ததை காங்கிரஸ் தலைவர்களில் ஒருவரான ஜெயராம் ரமேஷ் வெளியிட்டுள்ளார்.
ராகுல் காந்தி சபையில் பேசிவிட்டு, பிரதமரின் இருக்கைக்குச் சென்று அவரைக் கட்டிப் பிடித்தார். அதன்பிறகு பேசிய பிரதமர் அவர்கள், ராகுல்காந்தியைப் போல மிமிக்ரி செய்ததை சுட்டிக் காட்டி இருந்தார்.
‘யார் யாரை கிண்டல் செய்து நடித்துக் காண்பிக்கின்றனர்.
அதுவும் மக்களவைக்குள் நடித்துக் காட்டியதை நினைவுகூறுங்கள்’ என்று சொல்லி அந்த வீடியோவை வெளியிட்டுள்ளார் ஜெயராம் ரமேஷ். முன்னாள் துணைக் குடியரசுத் தலைவர் ஹமீது அன்சாரியை, பிரதமர் மோடி மிமிக்ரி செய்யும் வீடியோவையும் ஜெயராம் ரமேஷ் வெளியிட்டு இருக்கிறார்.
ராகுல்காந்தியை ‘பப்பு’ என்று சொல்லி அதை சைகை மூலம் மிமிக்ரி செய்து கிண்டலடித்தார் பிரதமர் நரேந்திரமோடி. அதனை காங்கிரஸ் கட்சி வெளியிட்டு விமர்சித்துள்ளது. “பிரதமர் மோடி கூட எதிர்க்கட்சித் தலைவர்களை மிமிக்ரி செய்துள்ளார்.
அவர் அவ்வாறு செய்வதை எல்லோரும் சீரியஸாக எடுக்காமல் நகைச்சுவையாகவே எடுத்துக் கொண்டனர். இப்போது என் விஷயத்தில் சீரியஸாக எடுத்துக் கொண்டால் நான் பொறுப்பல்ல” என்றும் கல்யாண் பானர்ஜி சொல்லி இருக்கிறார்.
இந்திய நாட்டின் நாடாளுமன்றத்துக்குள் புகுந்து புகைக் குண்டு வீசப்பட்டது கேவலமில்லையா?
இந்திய நாட்டின் நாடாளுமன்ற உறுப்பினர்களுக்கே பாதுகாப்பு இல்லை என்பது அவமான மில்லையா?
ஒட்டுமொத்தமாக நாடாளுமன்ற உறுப்பினர்கள் அனைவருக்கும் இழைக்கப்பட்ட உரிமை மீறல் அல்லவா இது?
பா.ஜ.க. உறுப்பினர்களுக்கும் சேர்த்தே தான் பா.ஜ.க. நாடாளுமன்றத்தில் பாதுகாப்பு இல்லையா?
இதைக் கேள்வி கேட்டால், அனைவரையும் டிஸ்மிஸ் செய்து விடுவோம் என்பது தான் உலகின் மிகப்பெரிய ஜனநாயக நாடு கடைப்பிடிக்கும் நெறிமுறையா?
அனைத்து உறுப்பினர்களின் பாதுகாப்பும், ஒரே ஒருஉறுப்பினரின் மிமிக்ரியும் ஒன்றா?
•
