ஆட்டுக்குத் தாடி எதற்கு?
சென்னையில் விடிய விடிய மழை! காலையும் தொடருமாம்.
அனைத்து பல்கலைக்கழகங்களும் சிறப்பாக வளர மாநில முதலமைச்சர்களே வேந்தராக இருக்க வேண்டும் - பட்டமளிப்பு விழாவில் முதலமைச்சர் மு.க.ஸ்டாலின் பேச்சு.
வங்கக்கடலில் காற்று சுழற்சி நீடிப்பதால் தமிழ்நாட்டில் சென்னை உள்பட 12 மாவட்டங்களில் கனமழைக்கு வாய்ப்பு - வானிலை ஆய்வு மையம் அறிவிப்பு.
இன்று கன்னியாகுமரி, திருநெல்வேலி மற்றும் தென்காசி மாவட்டங்களில் ஓரிரு இடங்களில் கன முதல் மிக கனமழையும், தூத்துக்குடி, இராமநாதபுரம், தேனி, திண்டுக்கல், புதுக்கோட்டை, தஞ்சாவூர், திருவாரூர், நாகப்பட்டினம், மயிலாடுதுறை மாவட்டங்கள் மற்றும் காரைக்கால் பகுதிகளில் ஓரிரு இடங்களில் கனமழையும் பெய்ய வாய்ப்புள்ளது.
காஞ்சிபுரம் மாவட்டம் திருவந்தவார் நடுநிலைப்பள்ளி குடிநீர் தொட்டியில் மலம் கலந்ததாக கூறப்பட்டநு பொய். மாவட்ட ஆட்சியர் மறுப்பு தெரிவித்துள்ளார்.
நவம்பர் 26ம் தேதி திமுக மாவட்டச் செயலாளர்கள் கூட்டம் நடைபெறும் என தி.மு.க, பொதுச்செயலாளர் துரைமுருகன் அறிவித்துள்ளார்.
23ம் தேதி காவிரி நீர் ஒழுங்காற்றுக் குழுக் கூட்டம் நடைபெறுகிறது. கூட்டத்தில் பங்கேற்க தமிழ்நாடு, கர்நாடகா, கேரளா, புதுச்சேரி அதிகாரிகளுக்கு அழைப்பு .
கேரளாவில் 2 ஆண்டுகளுக்கு முன்பு பறிமுதல் செய்யப்பட்ட தனது தொப்பியை ஆசிரியர்கள் திருப்பித் தருமாறு முன்னாள் மாணவர் துப்பாக்கிச்சூடு நடத்தியதால் பரபரப்பு.
"ஊரடங்கு உத்தரவு பிறப்பிக்க வேண்டாம். மக்கள் இறந்தால் இறக்கட்டும். அரசு அதை அனுமதிக்க வேண்டும்" என்று கொரோனா பரவிய காலத்தில் ரிஷி சுனக் பேசியதாக செய்திஇங்கிலாந்தில் பரவி வருகிறது.
இஸ்ரேல்-ஹமாஸ் போர் நிறுத்த ஒப்பந்தத்தை நெருங்கிவிட்டதாக தகவல் .
ஆளுநர் ஏன் தேவை?
ஆளுநர் பதவிகளை தூக்கிச் சுமக்க வேண்டிய அவசியமில்லை என்பதை அரசியலமைப்புச் சட்ட மேதைகளும், அரசியல் ஆய்வாளர் களும் காலம் காலமாகச் சொல்லி வந்துள்ளார்கள்.‘மலர்க மாநில சுயாட்சி’ என்ற அறிவுக் கருவூலத்தை உருவாக்கிக்கொடுத்த கு.ச.ஆனந்தன் அவர்கள், ஆளுநர்களை இப்படி வரையறுக்கிறார்...“மாநில ஆளுநர் என்பவர், நமது அரசமைப்புச் சட்டத்தின் ஓர் அதிசயப் படைப்பு: ஆங்கிலேயர் விட்டுச் சென்ற ஏகாதிபத்தியத்தின் கடைசிச் சின்னம்,
இந்திய நாட்டின் விடுதலைக்குப் பின்னரும், நம்மால் அறுத்தெறிய முடியாத ஓர் அடிமைப்பந்தம். ஆளுநர் என்பவர், ஒரு மாநிலத்தின் ஆட்சித் தலைவர் (நிர்வாகத் தலைவர்); மாநிலச் சட்டமன்றத்தின் மிக முக்கியக் கூறாக இருப்பவரும் அவரே.
ஆனால், அப்படிப்பட்ட மாநில ஆளுநரைக் குடியரசுத் தலைவரின் மூலமாக- -– மத்திய அரசே நியமனம் செய்கிறது.அவருடைய நியமனத்தில் மாநில மக்களுக்கும், மாநில அரசிற்கும் எவ்வகைத்தொடர்பும் பங்கும் கிடையாது”என்று எழுதி இருக்கிறார்.பிரிட்டிஷ் அரசு, இந்திய நாட்டை ஆள்வதற்காக உருவாக்கி வைத் திருந்தவைதான் கவர்னர்களும் கவர்னர் ஜெனரல்களும்.
மக்களால் தேர்ந்தெடுக்கப்பட்ட மக்கள் பிரதிநிதிகளைக் கட்டுப்படுத்த இந்தப் பதவிகளை உருவாக்கி வைத்திருந்தார்கள்.
மத்திய அரசின் ‘கையாளைத்தான்’ நாகரிகமான சொற்களால் ‘மாநிலத்தின்ஆட்சித் தலைவர்’ எனவும், ‘மேதகு ஆளுநர்’ எனவும், அரசமைப்புச்சட்டம் ஆக்கி வைத்திருக்கிறது.
அரசமைப்புச் சட்டத்தில் இன்றைய ஆளுநர்கள் இடம் பெற்றதே ஒரு சுவையான கதை என்பதையும் அவர் விவரித்துள்ளார்.
அரசமைப்பு ஆலோசகர் பி.என். இராவ் அவர்கள், 30–-5–-1947-–இல் உருவாக்கிய தனது அரசமைப்புக் குறிப்பில்,“மாநிலச் சட்டமன்ற உறுப்பினர்களால் ஆளுநர்கள் தேர்ந்தெடுக்கப்பட வேண்டும்”என்று குறிப்பிட் டிருந்தார். ஐந்து மாதங்களில், நிலைமை மாறியது. வல்லபாய் படேல் தலைமையில் இயங்கிய “மாநில அரசமைப்புக் குழு”, அந்த ஏற்பாட்டை விரும்பவில்லை.
அதற்கேற்ப 1947-–ஆம் ஆண்டு அக்டோபர் மாதத்தில், பி.என். இராவ் அவர்களின் குறிப்பு மாறுதலடைந்தது.
அதன் பின்னர், மாநில வாக்காளர்களாலேயே மாநில ஆளுநரும் நேரடியாகத் தேர்ந்தெடுக்கப்பட வேண்டும் எனப் பல அரசமைப்புச் சபை உறுப்பினர்கள் வலியுறுத்தினார்கள்.
சென்னை மாகாண முன்னாள் ஆளுநர் ஸ்ரீ பிரகாசா, முன்னாள் குடியரசுத் தலைவர் வி.வி.கிரி, என்.வி.காட்கில், டாக்டர். கே.எம்.முன்சி, கைலாசநாத கட்சு போன்ற பெருந்தலைவர்கள் இப்படிச் சொன்னார்கள். அடுத்த நான்கு மாதங்களில் அந்தக் கருத்தும் மாறிற்று.
ஆளுநராக நியமனம் பெற, மாநிலச் சட்டமன்ற உறுப்பினர்களால் நான்கு பேர் தேர்ந்தெடுக்கப்பட வேண்டும்; அவர்களில் ஒருவரை ஆளுநராகக் குடியரசுத் தலைவர் நியமிப்பார் என்ற ஒரு கருத்து உரு வாயிற்று, ஆனால் இதுவும் பின்னர் மாறியது.
அரசமைப்புச் சபை இறுதியாக விவாதித்தபோது, ஆளுநரை குடியரசுத் தலைவரே நியமனம் செய்ய வேண்டும் என்று எழுதப்பட்டு விட்டது. இத்தகைய பதவி ஒன்றிய ஆளும் கட்சிகளின் கைப்பாவையாக ஆக்கப்பட்டு விட்டது.
நொந்து போன அரசியல்வாதிகளுக்கு சில நேரங்களில் கொடுக்கப்படும் ஆறுதல் பரிசுதான் ஆளுநர் பதவியாகும். திறமையற்ற இடைத்தரமான அரசியல்வாதிகளுக்கு அளிக்கப்படும் நன்கொடை மானியங்களைப் போன்றதே ஆளுநர் பதவியாகும்”என்று மத்திய -– மாநில உறவுகளைஆராய 1972 ஆம் ஆண்டு அமைக்கப்பட்ட குழு அறிக்கையே சொன்னது.
மாநில சுயாட்சி குறித்து ஆராய இராஜமன்னார் குழுவை முதலமைச்சர் கலைஞர் அவர்கள் 1974 ஆம் ஆண்டு அமைத்தார்கள்.
அந்த அறிக்கை மீதான தனது விளக்கத்தை அன்றைய தி.மு.க. அரசு முன் வைத்தது.
ஆளுநர் நியமனம் குறித்து நமது அரசியலமைப்பில் வகை செய்யப்பட்டுள்ளது – -மக்களாட்சி முறையில் காலத்திற்கு ஒவ்வாத ஒன்றாகும். இவர், மத்திய அரசால் நியமிக்கப்பட்டு மத்திய அரசுக்குப் பொறுப்புள்ள அதிகாரியாவார்.
எனவே, உள்ளூர் நிலைமைகளையும் அரசியல் நிலைமையையும் இவர் அறிந்திருக்க முடியும் என்று எதிர்பார்க்க இயலாது. ஆளுநர்பதவிக்காகச் செய்யப்படும் செலவும் சமதர்ம சமுதாய முறைக்கு ஏற்றதாக இல்லை. இச்செலவு வீணானது.
இதனைக் கைவிடலாம். ஆளுநர் பதவியை எடுத்து விடுவதற்கு உற்ற தருணம் இதுவேயாகும்”என்று அந்த அறிக்கையில் கூறப்பட்டது. ஆனாலும் ஆளுநர்கள் குறித்து அகில இந்தியா முழுமைக்கும் ஒத்த கருத்து உருவாகாததால் ஆளுநர் பதவி நீட்டித்துக் கொண்டே வந்துள்ளது.
ஆனால் கடந்த பத்தாண்டு காலத்தில் ஆளுநர்களின் அடக்குமுறைகள் அதிகமாகி வருகின்றன. இது மாநிலக் கட்சிகள் -– அகில இந்தியக் கட்சிகள் மனதில் ஒரு தாக்கத்தை ஏற்படுத்தி உள்ளது.
ஆளுநர்களை வைத்து இன்றைய பா.ஜ.க. அரசு என்ன மாதிரியான காரியங்களைச் செய்து வருகிறது என்பதை உச்சநீதிமன்ற வழக்கறிஞர் ராஜீவ் தவான் ஒரு முறை எழுதினார்.
மோடி பிரதமராக பதவி ஏற்றதுமே ஏறக்குறைய அனைத்து மாநிலஆளுநர்களையும் மற்றும் துணை நிலை ஆளுநர்களையும் மாற்றம் செய்தார்.
இந்த மாறுதல் பட்டியலில் உச்சநீதிமன்ற முன்னாள் தலைமை நீதிபதி சதாசிவமும் இருந்தார். அவர் என்ன கட்டாயத்தின் பேரில் மாற்றம் செய்யப்பட்டார் என்பது யாருக்கும் தெரியாது.
இவர்கள் அனைவரும் பா.ஜ.க.வின் அரசியல் சதி வேலைகளுக்கு தேவைப்பட்டனர்.
புதிதாக ஏழு யூனியன் பிரதேசங்களில் துணை நிலை ஆளுநர்கள் நியமிக்கப்பட்டனர். தில்லி சட்டமன்றத் தேர்தலில் தோற்ற முதலமைச்சர் வேட்பாளர் கிரண் பேடி புதுச்சேரி துணைநிலை ஆளுநராக்கப்பட்டார். அனில் வைசால்தான் ஒரு பா.ஜ.க. ஆதரவாளர் என்று ஒத்துக் கொண்டவர்.
நஜீப்ஜங் பா.ஜ.க. அரசின் கட்டளைப்படி செயல்பட்டார். ஜம்மு – - காஷ்மீர் ஆளுநர் எம்.என்.வோரா, ஒடிசா ஆளுநர் எஸ்.சி.ஜெமின், நரசிம்மா (ஆந்திரா), கேசரிநாத் திரிபாதி (மே.வ.) மற்றும் கல்யாண் சிங் இவர்களெல்லாம் பா.ஜ.க.வின் தீவிர ஆதரவாளர்கள்”என்று எழுதினார் ராஜீவ் தவான்.ஆளுநர்கள் நியமனத்தில் புதிய நடைமுறையை கண்டுபிடித்தாக வேண்டும். ஆளுநராக நியமிக்கப்பட உள்ளவர்களை நாடாளுமன்ற மாநிலங்களவைக்கு வரவழைத்து அனைத்துக் கட்சி நாடாளுமன்ற உறுப்பினர்கள் முன்னிலையில் முழுமையாக விசாரிக்க வேண்டும். அவர்களது பொருத்தப்பாடும், தகுதியின்மையும் அம்பலப்படுத்தப்பட வேண்டும். அரசமைப்புச் சட்டத்தில் இதற்கான திருத்தங்களை மேற்கொள்ள வேண்டும்” என்றும் குறிப்பிட்டார்.
பா.ஜ.க.வால் நியமிக்கப்பட்ட ஆளுநர்கள் எப்படி நடந்து கொண்டார்கள்என்பதையும் அவர் வரிசைப்படுத்தினார்.
*மேகாலயா ஆளுநராக இருந்த வி.சண்முகநாதன் மீது பாலியல் குற்றச்சாட்டை பத்திரிகைகள் விரிவாக எழுதின.
*அருணாச்சலப் பிரதேச ஆளுநர் ஜோதி பிரகாஷ் சட்டமன்றத்திற்கு ஒரு தலைப்பட்சமான தகவலை அளித்து ஜனவரி 23, 2016 இல் குடியரசுத் தலைவர் ஆட்சியை அமல்படுத்தினார். பின்னர் பா.ஜ.க. ஒன்றிய அரசின் அரசியல் நோக்கம் நிறைவேறியதும் குடியரசுத் தலைவர் ஆட்சி வசதியாக திரும்பப் பெறப்பட்டது. அருணாச்சலப் பிரதேச முதல்வர் கலிக்கோ புல் பதவி நீக்கம் செய்யப்பட்டார். அவர் தற்கொலை செய்து கொண்டு இறந்து போனார்.
*உத்தரகண்ட் ஆளுநர் கே.கே.பால் உதவியால் முதல்வர் ராவத் மீது சி.பி.ஐ. விசாரணை ஏவப்பட்டு அவரது ஆட்சி கலைக்கப்பட்டது. இதை விசாரித்த நீதிபதி கே.எம்.ஜோசப் ஆட்சி தலைமையிலான அமர்வு உத்தரகண்டில் குடியரசுத் தலைவர் ஆட்சி திணிக்கப்பட்டது பா.ஜ.க.வுக்கு சாதகமானது, அரசமைப்புச் சட்டத்திற்குப் புறம்பானது எனத் தீர்மானித்தார். கடும் உழைப்புடன் கூடிய கவனமிக்க தீர்ப்பை வழங்கக் கூடிய அறிவார்ந்த நீதிபதியான கே.எம்.ஜோசப் இதற்காக பழிவாங்கப்பட்டார். உச்சநீதிமன்ற நீதிபதி ஆவதற்கு தகுதியான அவரது பெயர் பரிந்துரை செய்யப்படாமல் கைவிடப்பட்டது.
*2017-இல் கோவா, மணிப்பூர் சட்டமன்றத் தேர்தல்களில் காங்கிரஸ் தனிப்பெரும் கட்சியாக வெற்றிபெற்றாலும் பா.ஜ.க. ஆட்சியை கைப்பற்றுவதற்கு ஆளுநர்கள் உதவி செய்தனர்.
*2020-இல் மத்தியப் பிரதேசம், 2022 இல் மகாராஷ்டிரம் என ஆளுநர்கள் உதவியுடன், அதிகார பலத்துடன் பா.ஜ.க. ஆட்சியை கைப்பற்றியது. தேர்தல்கள்தான் இந்தியாவின் பலமாகும். வாக்காளர்களின் மனநிலை, உணர்வு தேர்தலில் வெளிப்படுகிறது. ஆனால் ஆளுநர்களின் செயல்பாட்டால் தேர்தலின் நோக்கமே அடிபட்டுப் போகிறது.
*சில ஆளுநர்கள் அரசியலமைப்புச் சட்டக் கொள்கைகளை மீறி குற்றம் புரிகின்றனர். தொங்கு சட்டமன்றத்தில் முதல்வரை நியமனம் செய்வது முக்கியமானப் பிரச்சினையாகும். அவர்களுக்கு ஜனநாயக அடிப்படைகள், மக்களின் தீர்ப்பு பற்றி எல்லாம் அக்கறையில்லை. ஏறத்தாழ, அனைத்து ஆளுநர்களுமே பதற்றமும், மிகை உணர்ச்சி கொண்டவர்களாகவும், அரசியல் சார்புடன் செயல்படுபவர்களாகவும் இருக்கின்றனர்.
*கேரள ஆளுநர் ஆரிப் முகமது கான், மேற்குவங்க ஆளுநராக இருந்த ஜெகதீப் தன்கர் போன்றவர்கள் தங்களது சொந்த அரசுகளுக்கே சவால் விடும் வகையில் செயல்பட்டனர். ஜெகதீப் தன்கர், தலைமைச் செயலாளரையும், காவல்துறை தலைவரையும் ஆளுநர் மாளிகைக்கு கட்டளையிட்டு வரவழைத்தார்.
*பல்கலைக் கழக வேந்தர் நியமனம் குறித்த சட்டத்தை திருத்தம் செய்ய கேரள மாநில அரசு விரும்பும் போது ஆளுநர் ஆரீப், பல்வேறு பல்கலைக் கழக வேந்தர்களை பதவி நீக்கம் செய்கிறார். இப்படி ஒவ்வொரு மாநிலத்திலும் ஒவ்வொரு விதமான பிரச்சினைகளை ஆளுநர்கள் உருவாக்கினார்கள். உருவாக்கிக் கொண்டும் வருகிறார்கள்.
ஆளுநர்களின் நடத்தைகள் குறித்து உச்சநீதிமன்றம் பலமுறை கொட்டியும்இருக்கிறது. குட்டியும் இருக்கிறது. திட்டியும் இருக்கிறது. ஆனால் இவர்கள் திருந்துவதாக இல்லை.
பேரறிவாளன் உள்ளிட்ட ஏழு பேர் விடுதலையில் மாநில அமைச்சரவை எடுத்த முடிவை ஏற்காமல் ஆளுநர் காலதாமதம் செய்ததை உச்ச நீதிமன்றம் கண்டித்து அவர்களை நீதிமன்றமே விடுதலை செய்ததைப் பார்த்தோம். உச்சநீதிமன்ற நீதிபதிகள் எல்.நாகேஸ்வரராவ், பி.ஆர்.கவாய், ஏ.எஸ்.போண்ணா ஆகியோர் அடங்கிய அமர்வு ஒரே தீர்ப்பை வழங்கியது.
The reference of the recommendation of the Tamil Nadu Cabinet by the Governor to the President of India two and a half years after such recommendation had been made is without any constitutional backing and is inimical to the scheme of our Constitution, whereby “the Governor is but a shorthand expression for the State Government’ as observed by this Court’.
-‘‘கவர்னர் என்பது மாநில அரசின் சுருக்கெழுத்து மட்டுமே’’என்று முன்பொரு தீர்ப்பில் உச்சநீதிமன்றம் சொன்னதையே பேரறிவாளன் வழக்கிலும் நீதிபதிகள் கூறினார்கள்.
பஞ்சாப் சட்டமன்ற நிதிநிலை அறிக்கைக்கான கூட்டத் தொடரை கூட்டுவதற்கு அனுமதி தரவில்லை அந்த மாநில ஆளுநரான பன்வாரிலால். கடந்த பிப்ரவரி மாதம் உச்சநீதிமன்றத்துக்கே போனது பஞ்சாப் மாநில அரசு.‘
‘ஆளுநர் என்பவர் மாநில அமைச்சரவைக்கு கட்டுப்பட்டவர். இது உச்சநீதிமன்றத்தின் பல்வேறு வழக்குகளில் தீர்ப்பாகத் தரப்பட்டுள்ளது. எனவே அமைச்சரவைக் குழு ஒரு முடிவெடுத்தால் ஆளுநர் அதனை ஏற்க வேண்டும்”என்று நீதிபதிகள் அறிவுறுத்தினார்கள்.
தமிழ்நாடு -– கேரளா –- மேற்கு வங்கம் - பஞ்சாப் –- டெல்லி - தெலுங்கானா என எதிர்க்கட்சிகள் ஆளும் மாநிலத்துக்கு குடைச்சல் கொடுக்கும் வேலையை மட்டுமே ஆளுநர்கள் பார்த்து வருகிறார்கள்
. தமிழ்நாடு -– கேரளா - – பஞ்சாப் ஆகிய மாநிலங்கள் உச்சநீதிமன்றத்திலே முழுமையான வழக்கை பதிவு செய்துள்ளது.
‘‘நீங்கள் நெருப்புடன் விளையாடுகிறீர்கள்’’என்று பஞ்சாப் மாநில ஆளுநரைப் பார்த்து உச்சநீதிமன்றம் எழுப்பிய கேள்வி என்பது சாதாரணமானது அல்ல.
நெருப்புடன் என்றால் மக்களோடு சிறுபிள்ளைத்தனமாக விளையாடிக் கொண்டிருக்கிறார்கள் ஆளுநர்கள். ஒவ்வொரு முறையும் உச்சநீதிமன்றத்துக்குப் போய் இவர்களைக் கட்டுப்படுத்துங்கள் என்று நிற்க முடியுமா? முடியாது.
இதற்கு மொத்தமாக முற்றுப்புள்ளி வைத்தாக வேண்டும்.
‘ஆளுநர் பதவியே அகற்றப்பட வேண்டும்’என்று தமிழ்நாடு முதலமைச்சர் வைக்கும் கோரிக்கையானது இந்தியாவின் கோரிக்கையாக மாற்றப்பட வேண்டும். மாநிலங்களைக் காக்க – - மக்களாட்சித் தத்துவத்தைக் காக்க ஆளுநர் பதவி அகற்றப்பட வேண்டும்.
‘‘ஆட்டுக்குத் தாடி எதற்கு?
நாட்டுக்கு ஆளுநர்கள் எதற்கு?”-பேரறிஞர் அண்ணா!
